Apendiks

Pag-andam sa Inyong Mga Anak nga Maanaa sa Dalan sa Pakigsaad sa Dios sa Tibuok Kinabuhi

Tungod Siya nahigugma kaninyo, nagsalig kaninyo, ug nahibalo sa inyong potensiyal, ang Langitnong Amahan mihatag kaninyo sa oportunidad sa pagtabang sa inyong mga anak nga mosulod ug mouswag subay sa Iyang dalan sa pakigsaad, ang dalan paingon ngadto sa kinabuhing dayon (tan-awa sa Doktrina ug mga Pakigsaad 68:25–28). Kini naglakip sa pagtabang kanila nga mangandam sa paghimo ug pagtuman sa sagrado nga mga pakigsaad, sama sa pakigsaad sa bunyag ug sa mga pakigsaad nga gihimo diha sa templo. Pinaagi niining mga pakigsaad, ang inyong mga anak mobugkos sa ilang kaugalingon ngadto sa Manluluwas, si Jesukristo.

Adunay daghang paagi sa pag-andam sa inyong mga anak alang niining panaw sa dalan sa pakigsaad, ug ang Langitnong Amahan motabang kaninyo sa pagdiskobre sa labing maayong paagi sa pagtabang kanila. Samtang magtinguha kamo og inspirasyon, hinumdomi nga dili tanang pagkat-on mahitabo atol sa giiskedyul nga mga leksiyon. Sa pagkatinuod, kabahin sa unsay nakapahimo sa pagkat-on diha sa panimalay nga gamhanan kaayo mao ang oportunidad sa pagkat-on pinaagi sa ehemplo ug pinaagi sa ginagmay, yano nga mga gutlo—ang matang nga natural nga mahitabo diha sa dagan sa inadlaw nga pagpakabuhi. Sama sa pagsunod sa dalan sa pakigsaad nga usa ka makanunayon, tibuok kinabuhi nga proseso, mao usab ang pagkat-on mahitungod sa dalan sa pakigsaad. (Tan-awa sa “Panimalay ug Pamilya,” Pagtudlo Sumala sa Pamaagi sa Manluluwas [2022], 30–31.)

Adunay daghang paagi sa pag-andam sa inyong mga anak alang sa ilang panaw diha sa dalan sa pakigsaad sa Dios.

Sa ubos mao ang pipila ka ideya nga mahimong moresulta ngadto sa dugang nga inspirasyon. Makakita kamo og dugang nga mga ideya alang sa pagtudlo sa Primary nga pangedaron nga mga bata diha sa “Pag-andam sa mga Bata nga Maanaa sa Dalan sa Pakigsaad sa Dios sa Tibuok Kinabuhi” diha sa Dali, Sunod Kanako—Alang sa Primary.

Bunyag ug Pagkompirma

Si Nephi mitudlo nga ang “ganghaan pinaagi diin [kita] kinahanglan nga mosulod” sa dalan sa pakigsaad “mao ang paghinulsol ug bunyag pinaagi sa tubig” (2 Nephi 31:17). Ang inyong mga paningkamot sa pagtabang sa inyong mga anak nga mangandam alang sa bunyag ug pagkompirma lig-ong makabutang sa ilang tiil diha niana nga dalan. Kini nga mga paningkamot magsugod sa pagtudlo mahitungod sa hugot nga pagtuo diha ni Jesukristo ug sa paghinulsol. Kini usab maglakip sa pagtudlo mahitungod unsaon nato sa pagbag-o ang atong mga pakigsaad sa bunyag pinaagi sa pag-ambit sa sakramento matag semana.

Aniay pipila ka kapanguhaan nga makatabang kaninyo: 2 Nephi 31; Giya Ngadto sa mga Kasulatan, “Bunyag,” topics.ChurchofJesusChrist.org.

• Sa matag higayon nga kamo adunay usa ka kasinatian nga magpalig-on sa inyong hugot nga pagtuo diha sa Langitnong Amahan ug ni Jesukristo, ipaambit kini sa inyong anak. Tabangi siya nga makasabot nga ang hugot nga pagtuo usa ka butang nga mamahimong magkalig-on ug magkalig-on sa tibuok kinabuhi. Unsa ang pipila ka butang nga mabuhat sa inyong anak aron makapalambo og mas lig-on nga hugot nga pagtuo kang Kristo sa dili pa siya mabunyagan?

• Kon ang inyong anak makahimo og sayop nga pagpili, malipayong pag-istorya kabahin sa gasa sa paghinulsol. Ug kon kamo makahimo og sayop nga pagpili, ipaambit ang kalipay nga moabot kon kamo maghinulsol. Pagpamatuod nga tungod kay si Jesukristo nag-antos ug namatay alang sa atong mga sala, Siya mihatag kanato og gahom sa pag-usab. Kon ang inyong anak magtinguha og kapasayloan, pasayloa sa gawasnon ug malipayong paagi.

• Sultihi ang inyong mga anak kabahin sa inyong bunyag. Pagpakita og mga litrato ug pagpaambit og mga handomanan. Paghisgot kon unsa ang imong gibati, kon sa unsang paagi ang inyong mga pakigsaad sa bunyag nakatabang kaninyo nga mas makaila ni Jesukristo, ug sa unsang paagi sila nagpadayon sa pagpanalangin sa inyong kinabuhi. Awhaga ang inyong anak nga mangutana.

• Kon adunay usa ka bunyag diha sa inyong pamilya o sa inyong ward, dad-a ang inyong anak aron makakita niini. Magkauban nga maghisgot mahitungod sa unsay nakita ug nabati ninyo ug sa inyong anak. Kon mahimo, pakig-istorya ngadto sa tawo nga gibunyagan ug pangutana og sama sa mosunod: “Giunsa nimo paghimo niini nga desisyon? Giunsa nimo pagpangandam?”

• Bisan kanus-a nga mamatikdan ninyo ang inyong anak nga nagbuhat og usa ka butang nga gisaad niya nga buhaton, paghatag og sinsero nga pagdayeg. Ipasabot nga ang pagtuman sa mga pasalig motabang kanato nga maandam sa pagtuman sa mga pakigsaad nga atong himoon kon kita bunyagan. Unsay atong isaad sa Dios sa dihang bunyagan kita? Unsay Iyang isaad kanato? (tan-awa sa Mosiah 18:8–10, 13).

• Kon kamo ug ang inyong anak magkauban nga nakabaton og sagrado nga kasinatian (sama diha sa simbahan, samtang nagbasa sa mga kasulatan, o samtang nagserbisyo sa usa ka tawo), sultihi siya mahitungod sa espirituhanon nga mga pagbati o mga impresyon nga aduna kamo. Dapita ang inyong anak sa pagpaambit kon unsa ang iyang gibati. Hibaloi ang nagkadaiyang paagi nga ang Espiritu makaistorya ngadto sa mga tawo, lakip sa mga paagi nga Siya personal nga makig-istorya kaninyo. Tabangi ang inyong anak nga makamatngon sa mga gutlo kon siya tingali nagsinati sa impluwensiya sa Espiritu Santo.

• Magkauban nga tan-awa ang pipila ka bidyo diha sa Gospel Library nga koleksiyon nga giulohan og “Paminaw Kaniya!” Magkauban nga hisgoti ang mahitungod sa lainlaing paagi nga ang mga sulugoon sa Ginoo nakadungog sa Iyang tingog. Dapita ang inyong anak nga magdrowing og hulagway o maghimo og bidyo mahitungod kon giunsa niya pagpaminaw ang tingog sa Manluluwas.

• Paghisgot mahitungod kon sa unsang paagi ang pagkahimong usa ka miyembro sa Ang Simbahan ni Jesukristo sa mga Santos sa Ulahing mga Adlaw nakapanalangin kaninyo. Sa unsang paagi nga kamo mas nakapaduol ngadto sa Langitnong Amahan ug kang Jesukristo samtang kamo miserbisyo sa uban ug samtang ang uban miserbisyo kaninyo? Tabangi ang inyong anak sa paghunahuna og mga paagi sa pagserbisyo ug pagpalig-on sa uban isip usa ka miyembro sa Simbahan.

• Himoa ang sakramento nga usa ka sagrado ug malipayon nga panghitabo diha sa inyong pamilya. Tabangi ang inyong anak sa pagplano og mga paagi nga motutok kang Jesukristo atol sa sakramento. Unsaon nato sa pagpakita nga ang sakramento sagrado ngari kanato?

• Ang Higala nga magasin kasagaran naglakip og mga artikulo, mga istorya, ug mga kalihokan aron sa pagtabang sa mga bata nga maandam alang sa bunyag ug pagkompirma. Tugoti ang inyong anak sa pagpili og pipila nga basahon ug kalingawan uban kaninyo.

  

  Si Nephi mitudlo nga ang “ganghaan pinaagi diin [kita] kinahanglan nga mosulod” sa dalan sa pakigsaad “mao ang paghinulsol ug bunyag pinaagi sa tubig” (2 Nephi 31:17).

Pagtudlo sa Inyong mga Anak mahitungod sa Pagkapari

Ang pagkapari mao ang awtoridad ug gahom sa Dios diin Siya mopanalangin sa Iyang mga anak. Ang pagkapari sa Dios anaa sa yuta karon sa Ang Simbahan ni Jesukristo sa mga Santos sa Ulahing mga Adlaw. Ang tanang miyembro sa Simbahan kinsa motuman sa ilang mga pakigsaad napanalanginan sa gahom sa pagkapari sa Dios diha sa ilang mga panimalay aron sa paglig-on sa ilang kaugalingon ug sa ilang mga pamilya (tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 3.5, ChurchofJesusChrist.org). Kini nga gahom makatabang sa mga miyembro sa paghimo sa buhat sa Dios sa kaluwasan ug kahimayaan sa ilang personal nga mga kinabuhi ug mga pamilya (tan-awa sa Kinatibuk-ang Tamdanan nga Basahon, 2.2).

Kita makadawat og mga ordinansa pinaagi sa awtoridad sa pagkapari. Kon ang mga lalaki ug mga babaye moserbisyo diha sa mga calling sa Simbahan, sila mobuhat sa ingon uban sa awtoridad sa pagkapari, ubos sa direksiyon niadtong kinsa naghupot sa mga yawe sa pagkapari. Ang tanang anak sa Langitnong Amahan—Iyang mga anak nga lalaki ug Iyang mga anak nga babaye—mapanalanginan samtang mas masabtan nila ang pagkapari.

Aron makat-on og dugang pa mahitungod sa pagkapari, tan-awa sa Russell M. Nelson, “Espirituhanon nga mga Bahandi,” Liahona, Nob. 2019, 76–79; Russell M. Nelson, “Ang Bugti sa Gahom sa Pagkapari,” Liahona, Mayo 2016, 66–69; “Mga Baroganan sa Pagkapari,” kapitulo 3 sa Kinatibuk-ang Tamdanan nga Basahon.

• Himoa ang mga ordinansa sa pagkapari nga usa ka makanunayon nga bahin sa inyong kinabuhi sa pamilya. Sama pananglit, tabangi ang inyong anak nga espirituhanon nga makaandam alang sa sakramento matag semana. Awhaga ang inyong anak nga magtinguha og mga panalangin sa pagkapari kon siya masakit o magkinahanglan og paghupay o direksiyon. Himoa kini nga kinaiya nga ilhon ang mga paagi nga ang Ginoo nagpanalangin sa inyong pamilya pinaagi sa gahom sa pagkapari.

• Samtang magkauban kamong magbasa sa mga kasulatan, pagbantay og mga oportunidad nga hisgotan kon sa unsang paagi ang Dios nagpanalangin sa mga tawo pinaagi sa Iyang gahom. Ipaambit ang inyong kaugalingon nga mga kasinatian sa dihang ang Dios mipanalangin kaninyo pinaagi sa Iyang pagkapari. Alang sa mga ehemplo sa mga panalangin nga atong madawat gikan sa Dios pinaagi sa pagkapari, tan-awa sa Kinatibuk-ang Tamdanan nga Basahon, 3.2, 3.5.

• Kat-oni ang linya sa awtoridad sa pagkapari sa usa ka tawo diha sa inyong pamilya. (Ang mga naghupot sa Melchizedek nga Pagkapari makadawat og kopya sa ilang linya sa awtoridad pinaagi sa pagpadala og email ngadto sa [e-mail] [e-mail]; tan-awa usab sa “Request a Priesthood Line of Authority” diha sa Help Center sa ChurchofJesusChrist.org ChurchofJesusChrist.org.) Hisgoti kon nganong importante nga makahibalo nga ang awtoridad sa pagkapari naggikan kang Jesukristo Mismo. Nganong gipakigbahin man Niya kini ngari kanato?

• Tudloi ang inyong anak nga human sa bunyag, siya makadawat sa gahom sa pagkapari pinaagi sa pagtuman sa pakigsaad sa bunyag. Magkauban nga rebyoha ang mensahe ni Presidente Russell M. Nelson nga “Espirituhanon nga mga Bahandi” (Liahona, Nob. 2019, 76–79). Sultihi ang inyong anak kon sa unsang paagi ang mga ordinansa sa pagkapari midala sa gahom sa Dios ngadto sa inyong kinabuhi. Alang sa usa ka lista sa pipila ka paagi nga kita napanalanginan pinaagi sa gahom sa pagkapari, tan-awa sa Kinatibuk-ang Tamdanan nga Basahon, 3.5.

• Hisgoti ang pangutana “Unsa sama ang usa ka sulugoon sa Ginoo?” Mag-uban sa pagbasa sa Doktrina ug mga Pakigsaad 121:36–42, ug pangita og mga tubag. Bisan kanus-a nga mabantayan ninyo ang inyong anak (o laing tawo) nga naggamit sa usa sa mga baroganan o mga hiyas niini nga mga bersikulo, ipasabot kini.

• Kon kamo o ang inyong anak mogamit og mga yawe sa pag-abli og pultahan o pagpaandar og sakyanan, paggahin og higayon sa pagtandi niadto nga mga yawe ngadto sa mga yawe nga gihuptan sa mga lider sa pagkapari. (Alang sa usa ka kahulogan sa mga yawe sa pagkapari, tan-awa sa Kinatibuk-ang Tamdanan nga Basahon, 3.4.1). Unsa ang “maablihan” o “mapasugdan og lihok” sa mga yawe sa pagkapari alang kanato? Tan-awa usab sa Gary E. Stevenson, “Asa ang mga Yawe ug Awtoridad sa [Pagkapari]?,” Liahona Mayo 2016, 29–32 ChurchofJesusChrist.org.

• Kon i-set apart kamo alang sa usa ka calling, dapita ang inyong anak nga mouban, kon mahimo. Pakit-a ang inyong anak nga gihimo ninyo ang inyong calling. Mahimo gani kamong mangita og tukma nga mga paagi nga siya makatabang kaninyo. Ihulagway kon sa unsang paagi nabati ninyo ang gahom sa Ginoo sa inyong calling.

Pag-adto ngadto sa Templo—Mga Bunyag ug mga Pagkompirma alang sa mga Patay

Ang mga templo usa ka bahin sa plano sa Langitnong Amahan alang sa Iyang mga anak. Diha sa mga templo, mohimo kita og sagrado nga pakigsaad uban sa Langitnong Amahan samtang moapil kita sa sagrado nga mga ordinansa, ang tanan niini nagtudlo ngadto kang Jesukristo. Ang Langitnong Amahan naghatag og paagi alang sa tanan sa Iyang mga anak nga mohimo og mga pakigsaad ug moapil sa mga ordinansa, lakip niadtong kinsa wala niini makadawat niini nga kinabuhi. Sa sinugdanan sa tuig nga siya mag 12 anyos, ang inyong anak igo na ang pangidaron nga mabunyagan ug makompirmahan diha sa templo alang sa namatay nga mga katigulangan.

Aron sa pagkat-on og dugang bahin sa mga bunyag ug mga kompirmasyon alang sa mga patay, tan-awa sa “About Proxy Baptism and Confirmation,” temples.ChurchofJesusChrist.org.

• Tambong sa templo kutob sa itugot sa inyong mga kahimtang. Hisgoti ngadto sa inyong anak kon nganong moadto ug sa unsang paagi ang templo motabang kaninyo nga mobati nga mas duol ngadto sa Langitnong Amahan ug kang Jesukristo.

• Mag-uban sa pagrebyo ug maghisgot sa mga pangutana sa rekomend sa templo. Istoryahi ang inyong anak kon unsay mahitabo diha sa usa ka interbiyo sa rekomend sa templo. Ipaambit kon nganong ang pagbaton og rekomend sa Templo importante kaninyo.

• Mag-uban sa pagbasa sa Malaquias 4:6. Hisgoti kon sa unsang paagi ang inyong mga kasingkasing maghunahuna ngadto sa inyong mga katigulangan. Pagkat-on pa og dugang mahitungod sa inyong mga katigulangan pinaagi sa pagsuhid og dungan sa kasaysayan sa inyong pamilya diha sa https://www.familysearch.org/philippines/ FamilySearch.org. Pangita og mga katigulangan kinsa nagkinahanglan nga mabunyagan ug makompirmahan. Usa ka konsultant sa templo ug family history sa ward makatabang kaninyo.

• ChurchofJesusChrist.org.)

Pagdawat og Patriyarkal nga Panalangin

Ang usa ka patriyarkal nga panalangin mahimong usa ka tinubdan sa giya, kahupayan, ug inspirasyon. Kini naglangkob og personal nga tambag gikan sa Langitnong Amahan ngari kanato ug makatabang kanato nga makasabot sa atong mahangtoron nga pagkatawo ug katuyoan. Tabangi ang inyong anak nga mangandam sa pagdawat og patriyarkal nga panalangin pinaagi sa pagtudlo kaniya sa kamahinungdanon ug sagrado nga kinaiya sa patriyarkal nga mga panalangin.

Aron makat-on pa og dugang, tan-awa sa Giya Ngadto sa mga Kasulatan, “Patriyarkal nga mga Panalangin,” topics.ChurchofJesusChrist.org.

• Ipaambit ngadto sa inyong anak ang inyong kasinatian sa pagdawat og patriyarkal nga panalangin. Makapaambit kamo og mga butang sama sa giunsa ninyo pagpangandam sa pagdawat niini, sa unsang paagi kini nakatabang kaninyo nga mas makapaduol ngadto sa Dios, ug sa unsang paagi ninyo gigamit ang panalangin sa inyong kinabuhi. Mahimo usab ninyong dapiton ang inyong anak nga makig-istorya ngadto sa ubang mga sakop sa pamilya kinsa nakadawat sa ilang patriyarkal nga mga panalangin.

• Gahini og gamay nga panahon ang dungan nga pagrebyo sa pipila ka mga kapanguhaan diha sa Giya Ngadto sa mga Kasulatan, “Patriyarkal nga mga Panalangin.” Aron makat-on mahitungod sa proseso sa pagdawat og patriyarkal nga panalangin, tan-awa sa Kinatibuk-ang Tamdanan nga Basahon, 18.17.

• Kon kamo adunay mga katigulangan nga nakadawat og patriyarkal nga mga panalangin, mahimong makapadasig ang pagbasa sa pipila niini ngadto sa inyong anak. Sa paghangyo og mga panalangin sa mga katigulangan nga namatay na, mo-log in ngadto sa https://www.churchofjesuschrist.org/?lang=ceb ChurchofJesusChrist.org, i-klik ang account nga icon diha sa ibabaw sa tuo nga bahin sa screen, ug pilia ang “Patriyarkal nga Panalangin.”

• Human ang inyong anak nakadawat og patriyarkal nga panalangin, dapita ang bisan kinsang sakop sa pamilya nga anaa sa pagrekord sa ilang mga panalangin ug ipaambit kini ngadto sa inyong anak.

Pag-adto sa Templo—ang Pagtuga

Gusto sa Dios nga tugahan, o panalanginan, ang tanan sa Iyang mga anak uban sa “gahom gikan sa kahitas-an” (Doktrina ug mga Pakigsaad 95:8). Kausa lang kita moadto sa templo aron sa pagdawat sa atong kaugalingon nga pagtuga, apan ang mga pakigsaad nga atong himoon ngadto sa Dios ug ang espirituhanon nga gahom nga Iyang ihatag kanato isip kabahin sa pagtuga makapanalangin kanato sa kada adlaw sa atong kinabuhi.

Sa pagkat-on og dugang bahin sa pagtuga diha sa templo., tan-awa sa “ temples.ChurchofJesusChrist.orgRussell M. Nelson, “Pagpangandam alang sa mga Panalangin sa Templo,” Liahona [Espesyal nga Isyu], Okt. 2010, 2010, 41–51.

• Pagpakita og litrato sa templo diha sa inyong panimalay. Sultihi ang inyong anak mahitungod sa mga pagbati nga inyong nasinati diha sa templo. Paghisgot kanunay mahitungod sa inyong gugma alang sa Ginoo ug sa Iyang balay ug sa mga pakigsaad nga inyong gihimo didto.

• temples.ChurchofJesusChrist.org. Tugoti ang inyong anak nga mangutana og bisan unsa nga pangutana nga aduna siya mahitungod sa templo. Alang sa giya kon unsa ang inyong mahisgotan sa gawas sa templo, tan-awa ang mensahe ni Elder David A. Bednar nga “Andam nga Makaangkon sa Matag Gikinahanglan nga Butang” (Liahona, Mayo 2019, 101–4; tan-awa ilabi na ang seksiyon nga giulohan og “Nakasentro sa Panimalay ug Gisuportahan sa Simbahan nga Pagkat-on ug Pagpangandam alang sa Templo”).

• Samtang kamo ug ang inyong anak moapil o mosaksi sa ubang ordinansa (sama sa sakramento o sa usa ka panalangin sa pagkaayo), paggahin og mubo nga panahon sa paghisgot sa simbolismo nga naapil diha sa ordinansa. Unsa ang girepresentar sa mga simbolo? Sa unsang paagi kini nagpamatuod ni Jesukristo? Kini makatabang sa inyong anak nga maandam sa pagpamalandong sa simbolikanhon nga kahulogan sa mga ordinansa sa templo, nga nagpamatuod usab ni Jesukristo.

• Tabangi ang inyong anak nga makabantay kon giunsa niya pagtuman ang pakigsaad sa bunyag nga gihulagway diha sa Mosiah 18:8–10, 13. Tabangi usab ang inyong anak nga makabantay kon sa unsang paagi ang Ginoo nagpanalangin kaniya. Palig-ona ang kamasaligon sa inyong anak sa iyang abilidad sa pagtuman sa mga pakigsaad.

• Bukas ug makanunayong paghisgot mahitungod sa unsang paagi ang inyong mga pakigsaad sa templo mogiya sa inyong mga pagpili ug motabang kaninyo nga mas maduol ngadto ni Jesukristo. Mahimo ninyong gamiton ang Kinatibuk-ang Tamdanan nga Basahon, 27.2, aron sa pagrebyo sa mga pakigsaad nga atong himoon diha sa templo.

Pagserbisyo og Misyon

Si Elder David A. Bednar mitudlo: “Ang bugtong nga labing importanting butang nga inyong mahimo sa pagpangandam alang sa usa ka tawag aron sa pagserbisyo mao ang pagkahimong usa ka misyonaryo sa dili pa nga kamo moadto sa usa ka misyon. … Ang isyu dili nga moadto sa usa ka misyon; kondili ang isyu mao ang pagkahimong usa ka misyonaryo ug pagserbisyo sulod sa atong tibuok kinabuhi sa bug-os natong kasingkasing, gahom, hunahuna, ug kusog. … Nangandam kamo alang sa tibuok ninyong kinabuhi nga misyonaryong pagserbisyo” (“Pagkahimong usa ka Misyonaryo,” Liahona, Nob. 2005, 45–46). Ang mga kasinatian nga aduna ang inyong anak sa pagkahimong usa ka misyonaryo mopanalangin kaniya sa kahangtoran, dili lang sa gidugayon sa panahon nga siya mahimong moserbisyo isip usa ka misyonaryo.

Aron makat-on og dugang pa, tan-awa sa Russell M. Nelson, “Pagsangyaw sa Ebanghelyo sa Kalinaw,” Liahona, Mayo 2022, 6–7; M. Russell Ballard, “Misyonaryo nga Pagserbisyo Mipanalangin sa Akong Kinabuhi sa Kahangtoran,” Liahona, Mayo 2022, 8–10; Misyonaryong Pagpangandam Pag-adjust sa Kinabuhing Misyonaryo, https://www.churchofjesuschrist.org/study?lang=ceb ChurchofJesusChrist.org.

• Ipakita kon unsaon sa pagpaambit sa ebanghelyo sa natural nga mga paagi. Mahimong alerto kanunay sa mga kahigayonan sa pagpaambit ngadto sa uban sa inyong mga pagbati mahitungod sa Langitnong Amahan ug sa Manluluwas ug sa mga panalangin nga inyong nadawat isip usa ka miyembro sa Iyang Simbahan. Dapita ang uban sa pag-apil sa inyong pamilya diha sa Simbahan ug may kalabotan sa pamilya nga mga kalihokan.

• Pangita og mga oportunidad alang sa inyong pamilya nga makig-istorya sa mga misyonaryo. Dapita sila sa pagtudlo sa inyong mga higala, o itanyag nga tugotan sila nga magtudlo og mga tawo diha sa inyong panimalay. Pangutan-a ang mga misyonaryo mahitungod sa mga kasinatian nga anaa sila ug sa unsang paagi ang misyonaryo nga pagserbisyo nagtabang kanila nga mas makapaduol ngadto ni Jesukristo. Pangutana usab kon unsa ang ilang gibuhat (o gibuhat unta) aron mangandam nga mahimong mga misyonaryo.

• Kon nakaserbisyo kamo og misyon, gawasnon ug makanunayon nga maghisgot mahitungod sa inyong mga kasinatian. O dapita ang mga higala o mga sakop sa pamilya kinsa nakaserbisyo og mga misyon sa paghisgot mahitungod sa ilang mga misyon. Mahimo usab kamong maghisgot mahitungod sa mga paagi nga gipaambit ninyo ang ebanghelyo ngadto sa uban sa tibuok ninyong kinabuhi. Tabangi ang inyong anak nga maghunahuna og mga paagi nga siya makapaambit sa ebanghelyo.

• Hatagi ang inyong anak og mga kahigayonan sa pagtudlo sa inyong pamilya sa mga baroganan sa ebanghelyo. Ang inyong anak mahimong magbansay usab sa pagpaambit sa iyang mga tinuohan ngadto sa uban. Sama pananglit, mahimo ninyong hisgotan ang mga pangutana sama sa “Unsaon man nato sa pagpaila sa Basahon ni Mormon ngadto sa usa ka tawo nga wala pa gayod makadungog niini?” o “Unsaon man nato sa paghulagway sa panginahanglan alang sa Manluluwas ngadto sa usa ka tawo nga dili Kristiyano?”

• Tabangi ang inyong anak nga mahimong komportable nga makig-istorya sa mga tawo. Unsa ang pipila ka maayo nga paagi sa pagsugod og pag-istoryahanay? Awhaga ang inyong anak nga magkat-on kon unsaon sa pagpaminaw sa unsay isulti sa uban, pagsabot kon unsay anaa sa ilang kasingkasing, ug pagpaambit sa mga kamatuoran sa ebanghelyo nga makapanalangin sa ilang mga kinabuhi.

• Pangita og mga kahigayonan alang sa inyong anak nga magkat-on mahitungod sa ubang mga kultura og mga tinuohan. Tabangi siya nga makaila ug motahod sa maayo ug tinuod nga mga baroganan sa mga gituohan sa uban.

Pag-adto sa Templo—Pagsilyo

Sa templo, ang bana ug asawa mahimong maminyo alang sa kahangtoran. Kini mahitabo sa usa ka ordinansa nga gitawag og pagsilyo. Bisan og kini nga ordinansa tingali daghang katuigan pa ang gidugayon alang sa inyong anak nga lalaki o anak nga babaye, ang ginagmay, yano, ug makanunayon nga mga butang nga inyong buhaton og dungan atol niana nga mga tuig makatabang kaniya nga maandam alang niini nga talagsaon nga panalangin.

Aron makat-on pa og dugang, tan-awa sa Giya Ngadto sa mga Kasulatan, “Bugkos, Pagbugkos [Sealing],” sa https://www.churchofjesuschrist.org/study/scriptures/gs?lang=ceb topics.ChurchofJesusChrist.org.

• Basaha og dungan “Ang Pamilya: Usa ka Pamahayag ngadto sa Kalibotan. diha sa https://www.churchofjesuschrist.org/study/scriptures/the-family-a-proclamation-to-the-world/the-family-a-proclamation-to-the-world?lang=ceb ChurchofJesusChrist.org. Unsay gitudlo niini nga pamahayag mahitungod sa kalipay sa kinabuhi sa pamilya ug mahitungod sa malamposon nga mga kaminyoon? Uban sa inyong anak, pagpili og usa sa mga baroganan nga gilista diha sa pamahayag nga tun-an. Mahimo kamong mangita og mga kasulatan nga may kalabotan niana nga baroganan diha sa Giya ngadto sa mga Kasulatan. Mahimo usab kamong magtakda og mga tumong aron mas hingpit nga magamit kana nga baroganan diha sa inyong pamilya. Samtang inyong trabahoon ang inyong mga tumong, magkauban nga hisgoti ang epekto sa pagsunod niana nga baroganan sa kinabuhi sa pamilya.

• Uban sa inyong anak, basaha ang mensahe ni Presidente Dieter F. Uchtdorf’ nga “Agig Pagdayeg Niadtong Miluwas” (Liahona, Mayo 2016, 77–80). Kon maabot kamo ngadto sa seksiyon nga giulohan og “Ang Katilingban nga Gamiton Pagkahuman Ilabay,” mahimo kamong mangita og mga butang sa inyong panimalay nga iglalabay ug ubang butang nga dili. Paghisgot mahitungod kon sa unsang paagi lahi ang inyong pagtratar sa mga butang kon gusto nimo kini nga molungtad og taas nga panahon. Unsa ang gisugyot niini mahitungod kon unsaon nato sa pagtratar ang kaminyoon ug ang mga relasyon sa pamilya? Unsa pa ang atong makat-onan gikan sa mensahe ni Presidente Uchtdorf mahitungod sa unsang paagi ang Manluluwas makatabang kanato sa pagpalambo og lig-on nga mga kaminyoon ug mga pamilya?

• Kon minyo kamo, mahimong bukas ngadto sa inyong anak mahitungod sa mga butang nga gibati ninyo nga maayo ninyo nga gibuhat isip usa ka magtiayon, sa mga butang nga inyong gikat-onan, ug sa mga paagi nga naningkamot kamo nga molambo. Kon ikaw ug imong kapikas nasilyo sa templo, ipakita sa inyong anak pinaagi sa ehemplo kon giunsa ninyo pagpaningkamot sa pagtuman sa inyong mga pakigsaad sa usag usa ug sa Ginoo. Sultihi ang inyong anak kon giunsa ninyo pagpaningkamot sa paghimo sa Langitnong Amahan ug sa Manluluwas nga sentro sa inyong relasyon ug kon sa unsang paagi Sila nagtabang kaninyo.

• Kon kinahanglang himoon ang mga desisyon sa pamilya, pagpahigayon og mga konseho ug mga panaghisgotan sa pamilya. Seguroha nga ang tanang opinyon sa mga sakop sa pamilya madungog ug mahatagan og bili. Gamita kini nga mga panaghisgotan isip usa ka kahigayonan sa pagpakita og maayong komunikasyon og kamabination diha sa mga relasyon sa pamilya, bisan kon dili tanan ang naglantaw sa mga butang sa samang paagi.

• Kon adunay panagsumpaki o panagbangi diha sa pamilya, pagpakita og pailob ug kalooy. Tabangi ang inyong anak nga makakita kon sa unsang paagi ang pagdumala sa panagbangi sa Kristohanong mga paagi makatabang kaniya nga maandam alang sa usa ka malipayon nga kaminyoon. Basaha og dungan ang Doktrina ug mga Pakigsaad 121:41–42, ug hisgoti kon sa unsang paagi ang mga baroganan niini nga mga bersikulo magamit ngadto sa kaminyoon.