“Xtiqb’al li aatin: Xkawresinkileb’ laa walal aak’ajol re te’kanaaq chiru chixjunil li yu’am sa’ lix b’ehileb’ li sumwank re li Dios,” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2023 (2022)
“Xtiqb’al li aatin,” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2023
Xtiqb’al li aatin
Xkawresinkileb’ laa walal aak’ajol re te’kanaaq chiru chixjunil li yu’am sa’ lix b’ehileb’ li sumwank re li Dios
Xb’aan naq a’an nakatxra, kaw xch’ool chawix ut naxnaw k’a’ru naru nakab’aanu, laa Choxahil Yuwa’ naxk’e aahoonal re xtenq’ankileb’ laa walal aak’ajol chi ok ut chi chaab’ilo’k sa’ xb’ehileb’ li sumwank, a’ li xb’ehil li junelik yu’am (chi’ilmanq Tzol’leb’ ut Sumwank 68:25–28). A’an ajwi’ naraj naxye xtenq’ankileb’ chixkawresinkileb’ rib’ re xpaab’ankileb’ ut ok sa’eb’ li loq’laj sumwank, jo’ li sumwank re li kub’iha’ ut eb’ li sumwank neke’b’aanuman sa’ li santil ochoch. Rik’ineb’ li sumwank a’an, eb’ laa walal aak’ajol te’xjunaji rib’ rik’in li Kolonel Jesukristo.
K’iila paay li na’leb’ wan re xkawresinkileb’ laa walal aak’ajol choq’ re li b’eenik a’in sa’ xb’ehileb’ li sumwank, ut li qaChoxahil Yuwa’ tatxtenq’a chixtawb’al b’ar wan li jwal chaab’il re taatenq’aheb’. Naq taasik’ aamusiq’anb’il na’leb’, jultikaq aawe naq moko natzolman ta chixjunil li na’leb’ sa’ li hoonal k’uub’anb’il. Jo’kan ut naq li tzolok li nim wi’chik xwankil nak’ulman sa’ kab’l, a’an li tzolok rik’in li eetalil ut rik’ineb’ li kok’ hoonal ut moko ninqeb’ ta ru—a’ li nak’ulman sa’ li qawanjik sa’ li qayu’am. Jo’ naq xtaaqenkil xb’ehileb’ li sumwank a’an jun yalok q’e ut re chixjunil li yu’am, jo’kan ajwi’ li tzolok sa’ lix b’ehileb’ li sumwank. (Chi’ilmanq “Ochochnal ut junkabʼal,” Li K’utuk jo’ li Kolonel [2022], 30–31.)
Wan naab’al li na’leb’ re xkawresinkileb’ laa walal aak’ajol re lix b’eenikeb’ sa’ lix b’ehileb’ lix sumwank li Dios.
Arin neke’k’utman junjunq li na’leb’ naru neke’tenq’an aawe chixtawb’al aamusiq’ankil. Naru nakataw xkomon aana’leb’ re xtzolb’aleb’ li kok’al li wankeb’ xchihab’ choq’ re li Tzoleb’aal reheb’ li Kok’al sa’ “Xkawresinkileb’ li kok’al re te’kanaaq chiru chixjunil li yu’am sa’ lix b’ehileb’ li sumwank re li Dios” sa’ Kim Taaqehin—Choq’ re li Tzoleb’aal reheb’ li Kok’al.
Li kub’iha’ ut li k’ojob’aak
Laj Nefi kixk’ut naq “li okeb’aal li tento [too’ok] wi’” sa’ lix b’ehileb’ li sumwank “a’an li jalb’a-k’a’uxlej ut li kub’iha’” (2 Nefi 31:17). Li xyalb’al aaq’e re xtenq’ankileb’ laa walal aak’ajol chixkawresinkileb’ rib’ choq’ re li kub’iha’ ut li k’ojob’aak naru naxk’e xkawilaleb’ xch’ool chi wank sa’ li b’e a’an. Li xyalb’al aaq’e a’in natikla rik’in k’utuk chirix li paab’aal chirix li Jesukristo ut li jalb’a-k’a’uxlej. A’an ajwi’ xk’utb’al chan ru naqa’ak’ob’resi li sumwank noko’ok wi’ sa’ li kub’iha’ naq nokotz’aqon sa’ li loq’laj wa’ak rajlal xamaan.
Arin wankeb’ junjunq li k’anjeleb’aal li naru nakate’xtenq’a: 2 Nefi 31; Temas del Evangelio, “Bautismo,” topics.ChurchofJesusChrist.org.
-
Junelik naq taawanq junaq aanumsihom li tixkawob’resi laa paab’aal chirix li qaChoxahil Yuwa’ ut li Jesukristo, wotz rik’ineb’ laa kok’al. Tenq’aheb’ chixtawb’al ru naq li paab’aal naru nakawob’resiik chiru chixjunil li yu’am. K’a’ru naru neke’xb’aanu laa kok’al re te’xnimob’resi lix paab’aaleb’ chirix li Kristo rub’elaj naq te’kub’eeq xha’?
-
Naq eb’ laa kok’al te’xsik’ ru li k’a’ru ink’a’ us, aatinan rik’ineb’ rik’in sahil ch’oolejil chirix li maatan re li jalb’a-k’a’uxlej. Ut naq laa’at taasik’ ru li ink’a’ us, wotz li sahil ch’oolejil nakak’ul naq nakajal aak’a’uxl. Ch’olob’ xyaalal naq li Jesukristo kixnumsi rahilal ut kikam sa’ xk’ab’a’eb’ li qamaak, a’an kixk’e qawankilal chi jalaak. Naq eb’ laa kok’al te’xsik’ xkuyb’al xmaak, chakuyeb’ xmaak sa’ xyaalal ut chi sa aach’ool.
-
Seraq’i reheb’ laa kok’al resilal laa kub’iha’. Wotz aajalam-uuch ut wotzeb’ chixjunil li esilal nakak’uula. Wotz reheb’ k’a’ru kaweek’a, chan ru naq eb’ laa sumwank nakate’xtenq’a chixnawb’al ru li Jesukristo ut chan ru naq toj neke’rosob’tesi laa yu’am. Waklesiheb’ xch’ool laa kok’al chi patz’ok.
-
Naq taawanq junaq kub’iha’ sa’ laa junkab’al malaj sa’ laa teep, chak’ameb’ laa kok’al. Aatinanqex chirix li k’a’ru xawil laa’at ut k’a’ru xe’ril ut xe’reek’a laa kok’al. Wi naru, aatinan rik’in li kristiaan li nakub’e xha’ ut patz’ re junjunq li patz’om jo’ a’in: “Chan ru naq xawaj naq taakub’eeq aaha’? Chan ru naq xakawresi aawib’?”
-
Rajlal naq taak’e reetal naq eb’ laa kok’al yookeb’ chixb’aanunkil k’a’ruhaq xe’xye naq te’xb’aanu, chak’eheb’ xsahileb’ xch’ool. Ye reheb’ naq xpaab’ankileb’ li teneb’ahom nokohe’xtenq’a chixkawresinkil qib’ re roxloq’inkileb’ li sumwank noko’ok wi’ naq nakub’e qaha’. K’a’ru naqayeechi’i re li Dios naq nakub’e qaha’? K’a’ru naxyeechi’i qe a’an? (chi’ilmanq Mosiah 18:8–10, 13).
-
Naq laa’at ut eb’ laa kok’al taawanq junaq eeloq’laj numsihom (maare, sa’ li iglees, sa’ rilb’aleb’ li loq’laj hu, malaj sa’ li k’anjelak chiru jun kristiaan), aatinan chirix laa week’ahom malaj lix musiq’ahom li Musiq’ej. Patz’ reheb’ laa kok’al k’a’ru neke’reek’a. Ye reheb’ chan ru naq li Musiq’ej naru naraatinaheb’ li kristiaan, jo’ ajwi’ chan ru naq maare tz’aqal naraatina junaq kristiaan. Tenq’aheb’ laa kok’al chixk’eeb’aleb’ reetal li hoonal naq maare yookeb’ chi toch’e’k xb’aan li Santil Musiq’ej.
-
Ilomaqeb’ sa’ komonil junjunq reheb’ li video “Escúchalo!” wan sa’ li Biblioteca del Evangelio. Tz’ilomaq rix chan ru naq eb’ lix moos li Qaawa’ neke’rab’i lix yaab’ xkux a’an. Patz’ reheb’ laa kok’al naq te’xyiib’ junaq jalam-uuch malaj junaq video chirix rab’inkil lix yaab’ xkux li Kolonel.
-
Wotz chan ru naq li wank choq’ komon re Lix Iglees li Jesukristo reheb’ laj Santil Paab’anel sa’ Roso’jikeb’ li Kutan nakatrosob’tesi. Chan ru nakatnach’o rik’in laa Choxahil Yuwa’ ut rik’in li Jesukristo naq nakatk’anjelak chiruheb’ laa was aawiitz’in jo’ ajwi’ naq eb’ a’an neke’k’anjelak chawu laa’at? Tenq’aheb’ laa kok’al chixk’oxlankil chan ru naru neke’k’anjelak ut neke’xkawob’resiheb’ li ras riitz’in jo’ komon re li Iglees.
-
K’ehomaq xloq’al ut yalomaq xsahil li loq’laj wa’ak sa’ lee junkab’al. Tenq’aheb’ lee kok’al chixk’uub’ankil chan ru te’xjayali xk’a’uxleb’ rik’in li Jesukristo sa’ xhoonalil li loq’laj wa’ak. Chan ru taqak’ut naq loq’ li loq’laj wa’ak choq’ qe?
-
Sa’ li hu Amigos wankeb’ na’leb’, seraq’, ut kok’ k’anjel re xtenq’ankileb’ li kok’al chixkawresinkileb’ rib’ choq’ re li kub’iha’ ut li k’ojob’aak. Kanab’eb’ laa kok’al naq te’xsik’ ru junjunq re te’ril ut te’xtzol aawochb’een laa’at. (Chi’ilmanq ajwi’ “Cómo prepararse para el bautismo” sa’ li raqal choq’ reheb’ li kok’al sa’ li Biblioteca del Evangelio.)
Jalam-uuchxkub’iha’ jun li ch’ina alLaj Nefi kixk’ut naq “li okeb’aal li tento [too’ok] wi’” sa’ lix b’ehileb’ li sumwank “a’an li jalb’a-k’a’uxlej ut li kub’iha’” (2 Nefi 31:17).
Xtzolb’aleb’ laa kok’al chirix li tijonelil
Li tijonelil a’an lix wankilal li Dios li narosob’tesiheb’ wi’ li ralal xk’ajol. Li tijonelil re li Dios wan anajwan sa’ li ruchich’och’ saʼ Lix Iglees li Jesukristo rehebʼ laj Santil Paabʼanel saʼ Rosoʼjikebʼ li Kutan. Chixjunileb’ li komon re li Iglees li neke’roxloq’i lix sumwank neke’osob’tesiik rik’in xwankil li tijonelil re li Dios sa’eb’ li rochoch re xkawob’resinkileb’ a’an ut eb’ lix junkab’al (chi’ilmanq K’anjenel Hu: Li k’anjelak sa’ lix Iglees li Jesukristo reheb’ laj Santil Paab’anel sa’ Roso’jikeb’ li Kutan, 3.5, ChurchofJesusChrist.org). Li wankilal a’an tixtenq’aheb’ li komon chixb’aanunkil li k’anjel re li kolb’a-ib’ ut re li taqenaqil loq’al re li Dios sa’ lix yu’ameb’ a’an ut sa’ xyu’ameb’ lix junkab’al (chi’ilmanq K’anjenel Hu, 2.2).
Neke’qak’ul li k’ojob’anb’il k’anjel rik’in lix wankilal li tijonelil. Naq eb’ li winq ut eb’ li ixq neke’k’anjelak sa’ li Iglees, neke’xb’aanu rik’in lix wankilal li tijonelil, rub’el xb’eresihomeb’ li neke’k’amok re xlaawil li tijonelil. Chixjunileb’ li ralal xk’ajol li qaChoxahil Yuwa’—eb’ lix teelom ut eb’ lix rab’in—te’osob’tesiiq naq yooqeb’ chixtawb’al ru li tijonelil.
Re xtawb’al xkomon li na’leb’ chirix li tijonelil, chi’ilmanq Russell M. Nelson, “Li musiq’ejil b’ihomal,” Jolomil ch’utub’aj-ib’ re octubre 2019; Russell M. Nelson, “Lix tz’aq lix wankilal li tijonelil,” Jolomil ch’utub’aj-ib’ re abril 2016; “Eb’ li na’leb’ chirix li tijonelil,” ch’ol 3 re li K’anjenel Hu.
-
K’e xna’ajeb’ li k’ojob’anb’il k’anjel re li tijonelil sa’ laa yu’am. Tenq’aheb’ laa kok’al chixkawresinkileb’ rib’ sa’ musiq’ej choq’ re li loq’laj wa’ak rajlal xamaan. Waklesiheb’ xch’ool laa kok’al chixsik’b’aleb’ li rosob’tesihom li tijonelil naq yajaqeb’ malaj naq te’raj xk’ojob’ankil xch’ool malaj xb’eresinkileb’. Chak’aytesi aawib’ chixwotzb’al chan ru naq li Qaawa’ yoo chirosob’tesinkil lee junkab’al rik’in lix wankilal li tijonelil.
-
Naq teerileb’ li loq’laj hu sa’ komonil, tz’ilomaq rix chan ru naq li Dios narosob’tesiheb’ li kristiaan rik’in lix wankilal a’an. Wotz chan ru naq li Dios nakatrosob’tesi rik’in lix tijonelil. Re xjultikankil chan ru naq li Dios nokorosob’tesi rik’in lix wankilal, chi’ilmanq K’anjenel Hu, 3.2, 3.5.
-
Tzol anihatqeb’ li xe’k’ojob’ank re junaq li komon sa’ laa junkab’al sa’ li tijonelil. (Eb’ laj k’amol re li Tijonelil re Melkisedek naru neke’xk’ul junaq resileb’ li ani xe’k’ojob’ank re sa’ li tijonelil wi neke’xtaqla junaq correo sa’ LineofAuthority@ChurchofJesusChrist.org; chi’ilmanq ajwi’ “Solicitar una línea de autoridad del sacerdocio” sa’ li Centro de ayuda sa’ ChurchofJesusChrist.org.) K’ut k’a’ut naq aajel ru xnawb’al naq lix wankilal li tijonelil nachal chaq tz’aqal rik’in li Jesukristo. K’a’ut naq naxwotz a’an qik’in?
-
K’ut chiruheb’ laa kok’al naq chirix li kub’iha’, naru neke’xk’ul lix wankilal li tijonelil naq neke’roxloq’i li sumwank re li kub’iha’. Ilomaq sa’ komonil li raatin li Awa’b’ej Russell M. Nelson, “Li musiq’ejil b’ihomal” (Jolomil ch’utub’aj-ib’ re octubre 2019). Ye reheb’ laa kok’al chan ru naq eb’ li k’ojob’anb’il k’anjel re li tijonelil neke’xk’am chaq lix wankilal li Dios sa’ laa yu’am. Re rilb’al junjunq resil chan ru naq noko’osob’tesiik xb’aan lix wankilal li tijonelil, chi’ilmanq K’anjenel Hu, 3.5.
-
Tz’ilomaq rix li patz’om: “Chan ru xwanjik jun xmoos li Qaawa’?” Ilomaq Tzol’leb’ ut Sumwank 121:36–42 ut sik’omaq xsumenkil li patz’om. Junelik naq taak’e reetal naq laa kok’al (malaj junaq chik kristiaan) yoo chixk’anjelankil junaq reheb’ li na’leb’ malaj li chaab’ilal a’an, chak’eheb’ xsahil xch’ool.
-
Naq laa’at malaj laa kok’al te’roksi li laaw re xteeb’al junaq okeb’aal malaj xlochb’al junaq b’eleb’aal ch’iich’, k’e aahoonal re xjuntaq’eetankil li laaw a’an rik’ineb’ li laaw wan rik’ineb’ laj jolominel sa’ li tijonelil. (Re xtawb’al xkomon xch’olob’ankil li laaw re li tijonelil, chi’ilmanq K’anjenel Hu, 3.4.1). K’a’ru “neke’xte” malaj “neke’xtikib’” lix laawil li tijonelil? Chi’ilmanq ajwi’ Gary E. Stevenson, “B’ar wankeb’ xlawil ut xwankilal li tijonelil?,” Jolomil ch’utub’aj-ib’ re abril 2016; “Dónde están las llaves?” (video), ChurchofJesusChrist.org.
-
Naq tatk’ojob’aaq sa’ junaq k’anjel, patz’ reheb’ laa kok’al naq te’wanq aran, wi naru. Kanab’eb’ laa kok’al chirilb’al chan ru naq nakatk’anjelak sa’ laa b’oqb’al. Naru ajwi’ nakasik’ chan ru naru neke’tz’aqon aawik’in. Ch’olob’ chan ru naq nakaweek’a lix wankil li Qaawa’ sa’ laa b’oqb’al.
Xik sa’ li santil ochoch—Li kub’iha’ ut k’ojob’aak choq’ reheb’ li kamenaq
Eb’ li santil ochoch a’aneb’ xcha’al lix k’uub’anb’il na’leb’ li qaChoxahil Yuwa’ choq’ reheb’ li ralal xk’ajol. Sa’eb’ li santil ochoch, noko’ok sa’ loq’laj sumwank rik’in li qaChoxhil Yuwa’ naq nokotz’aqon sa’eb’ li loq’laj k’ojob’anb’il k’anjel, li jayalinb’ileb’ rik’in li Jesukristo. Li qaChoxahil Yuwa’ xk’e chaq qe jun li b’e re naq chixjunileb’ li ralal xk’ajol te’ok sa’ sumwank ut te’tz’aqonq sa’eb’ li k’ojob’anb’il k’anjel, jo’eb’ ajwi’ li ink’a’ ke’ru chi tz’aqonk chiru xyu’ameb’. Sa’ xtiklajik li chihab’ naq eb’ laa kok’al te’xket 12 chihab’, ak neke’ru chi kub’eek xha’ ut chi k’ojob’aak sa’ li santil ochoch choq’ ruuchileb’ lix xe’ xtoon kamenaqeb’.
Re xtawb’al xkomon li na’leb’ chirix li kub’iha’ ut li k’ojob’ank choq’ reheb’ li kamenaq, chi’ilmanq “Acerca del bautismo y la confirmación vicarios,” temples.ChurchofJesusChrist.org.
-
Chatwulaq sa’ li santil ochoch rajlal a’ yaal jo’ chanru naru chawu. Ye reheb’ laa kok’al k’a’ut naq nakatwulak ut chan ru naq li santil ochoch nakatxtenq’a chireek’ankil naq nach’ wi’chik wankat rik’in laa Choxahil Yuwa’ ut li Jesukristo.
-
Ilomaqeb’ ut tz’ilomaqeb’ rix li patz’om re li recomendacion re li santil ochoch sa’ komonil. Aatinan rik’ineb’ laa kok’al chirix li nak’ulman sa’ jun li tz’ilok-ix re li recomendacion re li santil ochoch. Wotz k’a’ut naq aajel ru choq’ aawe naq taawanq jun aarecomendacion re li santil ochoch.
-
Ilomaq Malakias 4:6 sa’ komonil. Tz’ilomaq rix chan ru naq naru nasutq’i lee raam rik’ineb’ lee xe’ eetoon. Sik’omaq xkomon eena’leb’ chirixeb’ lee xe’ eetoon naq nekeril li resilal lee junkab’al sa’ FamilySearch.org. Sik’omaqeb’ lee xe’ eetoon li neke’raj ru kub’eek xha’ ut k’ojob’aak. Jun consultor sa’ laa teep naru tatxtenq’a.
-
Ilomaq sa’ komonil li k’anjeleb’aal wan sa’ li raqal “Templo” sa’ li raqal reheb’ li kok’al sa’ li Biblioteca del Evangelio. (Chi’ilmanq ajwi’ “Cómo preparar a su hijo para bautismos y confirmaciones en el templo” sa’ ChurchofJesusChrist.org.)
Xk’ulb’al li osob’tesiik xb’aan li yuwa’b’ejil aj k’anjel
Jun osob’tesiik xb’aan li yuwa’b’ejil aj k’anjel naru naxk’am qab’e, naxk’ojob’ qach’ool, malaj nokoxmusiq’a. Aran wan lix na’leb’ li qaChoxahil Yuwa’ choq’ qe ut nokoxtenq’a chixtawb’al ru b’ar nokochal chaq ut k’a’ru li junelikil qajom. Tenq’aheb’ laa kok’al chixkawresinkileb’ rib’ chixk’ulb’al jun rosob’tesihom li yuwa’b’ejil aj k’anjel naq taak’ut chiruheb’ xnimal ru ut xloq’alil li rosob’tesihom li yuwa’b’ejil aj k’anjel.
Re xtawb’al xkomon aana’leb’ chirix li tijonelil, chi’ilmanq Temas del Evangelio, “Bendiciones patriarcales,” topics.ChurchofJesusChrist.org.
-
Wotz rik’ineb’ laa kok’al chan ru naq kak’ul laa wosob’tesinkil rik’in li yuwa’b’ejil aj k’anjel. Naru taawotz chan ru naq kakawresi aawib’, chan ru naq nakatxtenq’a chi nach’ok rik’in li Dios, ut chan ru nakawoksi laa wosob’tesinkil sa’ laa yu’am. Naru ajwi’ nakab’oqeb’ laa kok’al chi aatinak rik’ineb’ jalan chik komon re li junkab’al li ak xk’ulumeb’ li rosob’tesinkil rik’in jun yuwa’b’ejil aj k’anjel.
-
K’ehomaq eehoonal re rilb’aleb’ junjunq reheb’ li na’leb’ sa’ Temas del Evangelio, jo’ “Bendiciones patriarcales.” Re xtawb’al eena’leb’ chirix li kawresink-ib’ re xk’ulb’al li rosob’tesihom li yuwa’b’ejil aj k’anjel, chi’ilmanq K’anjenel Hu, 18.17.
-
Wi wankeb’ aaxe’ aatoon li ke’xk’ul rosob’tesihom li yuwa’b’ejil aj k’anjel, maare chaab’ilaq raj wi taawil ru junjunqaq rik’ineb’ laa kok’al. Re xpatz’b’aleb’ li rosob’tesinkileb’ li ak kamenaqeb’, okan sa’ ChurchofJesusChrist.org, taapitz’ b’ar wi’ naxye cuenta, ut taasik’ b’ar wi’ naxye “Bendicion patriarcal.”
-
Chirix naq eb’ laa kok’al te’xk’ul li rosob’tesihom li yuwa’b’ejil aj k’anjel, patz’ re junaq li komon sa’ laa junkab’al li xwan aran naq tixtz’iib’a k’a’ru nareek’a ut tixwotz rik’ineb’ laa kok’al.
Xik sa’ li santil ochoch—Li loq’laj aq’ej
Li Dios naraj xtiqib’ankileb’ chixjunil li ralal xk’ajol rik’in “wankilal li nachal chaq taqe’q” (Tzol’leb’ ut Sumwank 95:8). Jun sut ajwi’ nokoxik sa’ li santil ochoch re xk’ulb’al li qaloq’laj tiqib’ankil, a’b’an eb’ li sumwank noko’ok wi’ rik’in li Dios ut li musiq’ejil wankilal naxk’e q’e a’an jo’ xcha’al li loq’laj tiqib’aak naru nokohe’rosob’tesi wulaj wulaj sa’ li qayu’am.
Re xtawb’al xkomon li na’leb’ chirix li loq’laj tiqib’aak sa’ li santil ochoch, chi’ilmanq “Sobre la investidura del templo,” temples.ChurchofJesusChrist.org; Russell M. Nelson, “Preparémonos para las bendiciones del templo,” Liahona, octubre 2010, 41–51.
-
K’ut junaq xjalam-uuch li santil ochoch sa’ lee rochoch. Aatinan rik’ineb’ laa kok’al chirix li nakaweek’a sa’ li santil ochoch. Aatinan chi kok’ aj xsa’ chirix laa rahom choq’ re li Qaawa’ ut li rochoch ut eb’ li sumwank okenaqat wi’ aran.
-
Okanqex sa’ temples.ChurchofJesusChrist.org. Ilomaqeb’ sa’ komonil li kok’ esil jo’ “Sobre la investidura del templo” ut “Prepararse para la Casa del Señor.” Kanab’eb’ laa kok’al chi patz’ok chirix li santil ochoch. Re taanaw k’a’ru naru taawotz naq moko wankat ta sa’ li santil ochoch, il li na’leb’ naxk’e li Elder David A. Bednar sa’ “Kawresinb’il re xk’ulb’al chixjunil li k’a’ru na’ajman” (Jolomil ch’utub’aj-ib’ re abril 2019; chi’ilmanq tz’aqal li raqal “Li tzolok ut li kawresink-ib’ re xik sa’ li santil ochoch li b’aanunb’il sa’ li ochoch ut li tenq’anb’il xb’aan li Iglees”).
-
Naq laa’at ut eb’ laa kok’al textz’aqonq sa’ xkomoneb’ chik li k’ojob’anb’il k’anjel (jo’ li loq’laj wa’ak malaj junaq rosob’tesinkil li yaj), k’ehomaq eehoonal chixtz’ilb’al rix k’a’ru nareetali li k’ojob’anb’il k’anjel a’an. K’a’ru neke’reetali li eetalil? Chan ru naq neke’xch’olob’ xyaalal li Jesukristo? A’in naru naxtenq’aheb’ laa kok’al chixkawresinkileb’ rib’ re te’xtz’il rix k’a’ru xyaalalileb’ li k’ojob’anb’il k’anjel re li santil ochoch, li neke’xch’olob’ ajwi’ xyaalal li Jesukristo.
-
Tenq’aheb’ laa kok’al chixk’eeb’al reetal chan ru naq yookeb’ chiroxloq’inkileb’ li sumwank re li kub’iha’ nayeeman sa’ Mosiah 18:8–10, 13. Tenq’aheb’ ajwi’ laa kok’al chixk’eeb’al reetal chan ru naq yookeb’ chi osob’tesiik xb’aan li Qaawa’. Kawob’resi xch’ooleb’ laa kok’al chiroxloq’inkileb’ li sumwank.
-
Wotz chi saqen ut chi kok’ aj xsa’ chan ru naq laa sumwank re li santil ochoch naxk’am aab’e sa’ li k’a’ru nakasik’ ru ut chan ru naq nakatxtenq’a chi nach’ok rik’in li Jesukristo. Naru nakawoksi li K’anjenel Hu, 27.2, re tzolok chirixeb’ li sumwank neke’qab’aanu sa’ li santil ochoch.
Xik sa’ jun mision
Li Elder David A. Bednar kixk’ut: “Li k’a’ru jwal aajel ru naru nekeb’aanu re xkawresinkil eerib’ re xik chi k’anjelak a’an wulak chi wank jo’ jun misioneer rub’elaj naq texxik sa’ jun mision. … Li ch’a’ajkilal moko a’an ta xik sa’ li mision; a’ b’an li wulak choq’ misioneer ut k’anjelak chiru chixjunil li qayu’am chi anchal qach’ool, qaam, qak’a’uxl ut qametz’ew. … Yookex chixkawresinkil eerib’ re k’anjelak chiru chixjunil lee yu’am” (“Llegar a ser misioneros,” Liahona, noviembre 2005, 45–46). Laa walal aak’ajol te’osob’tesiiq xb’aan li k’a’ru te’xnumsi rub’elaj naq te’wulaq choq’ misioneer, moko ka’ajwi’ ta chiru li hoonal naq wanqeb’ chaq choq’ misioneer.
Re xtawb’al xkomon chirix a’in, chi’ilmanq Russell M. Nelson, “Xjultikankil li evangelio re tuqtuukilal,” Jolomil ch’utub’aj-ib’ re abril 2022; M. Russell Ballard, “Li k’anjelak jo’ misioneer kirosob’tesi lin yu’am chi junelik,” Jolomil ch’utub’aj-ib’ re abril 2022; Preparación misional: Adaptarse a la vida misional, ChurchofJesusChrist.org.
-
K’ut chan ru xwotzb’al li evangelio jo’ yal nak’ulman. Junelik k’eek’ooq aach’ool chixk’eeb’al reetal li hoonal b’ar wi’ naru nakawotz laa week’ahom chirix li qaChoxahil Yuwa’ ut li Kolonel, ut eb’ li osob’tesihom nakak’ul jo’ komon re lix Iglees. B’oqeb’ junjunq chik li komon chixjunajinkil rib’ eerik’in sa’ kok’ k’anjel chirix li Iglees ut li junkab’al.
-
Sik’ aahoonal re naq laa junkab’al taawotzoq rik’ineb’ li misioneer. Patz’ reheb’ naq te’xtzoleb’ laa wamiiw malaj patz’ reheb’ naq te’xtzoleb’ li komon wankeb’ sa’ laa junkab’al. Patz’ reheb’ li misioneer naq te’xwotz li k’a’ru yookeb’ chixnumsinkil ut chan ru naq li k’anjelak sa’ li mision yoo chixtenq’ankileb’ chi nach’ok rik’in li Jesukristo. Patz’ ajwi’ reheb’ k’a’ru ke’xb’aanu (malaj xe’raj raj xb’aanunkil) re xkawresinkileb’ rib’ re wank choq’ misioneer.
-
Wi xatwan chaq sa’ jun mision, aatinan chi saqen ut chi kok’ aj xsa’ chirix laa mision. Malaj ut, patz’ reheb’ laa wamiiw ut eb’ laa junkab’al li xe’wan chaq sa’ junaq mision naq te’aatinaq chirixeb’ lix mision. Naru ajwi’ nakaseraq’i chan ru naq nakawotz li evangelio rik’ineb’ laa was aawiitz’in chiru laa yu’am. Tenq’aheb’ laa kok’al chixk’oxlankil chan ru naru neke’xwotz li evangelio.
-
K’eheb’ xhoonal laa kok’al chixk’utb’aleb’ li na’leb’ re li evangelio sa’ li junkab’al. Naru ajwi’ neke’xtzol xwotzb’al lix paab’aaleb’ rik’ineb’ li ras riitz’in. Naru nekex’aatinak chirixeb’ junjunq patz’om jo’ “Chan raj ru naru noko’aatinak chirix lix Hu laj Mormon rik’in junaq kristiaan maajun wa rab’ihom chirix a’an?” malaj “Chan raj ru taqach’olob chiru junaq kristiaan naq naqaj ru li Kolonel?”
-
Tenq’aheb’ laa kok’al re naq maak’a’aq xxiweb’ naq te’aatinaq rik’ineb’ li kristiaan. Chan ru naru nab’aanuman jun li chaab’il seraq’ik? Waklesiheb’ xch’ool laa kok’al chixtzolb’al rab’inkil li neke’xye li ras riitz’in, chixtawb’al ru li wan sa’ li raameb’, ut chixwotzb’aleb’ li yaal chirix li evangelio li naru narosob’tesi xyu’ameb’.
-
Sik’ li hoonal re naq eb’ laa kok’al te’tzoloq chirix jalan chik na’leb’ ut paab’aal. Tenq’aheb’ chixk’eeb’al reetal ut chiroxloq’inkil li chaab’il ut yaalil na’leb’ chirix lix paab’aaleb’ li ras riitz’in.
Xik sa’ li santil ochoch—Tz’ape’k sa’ junajil
Sa’ li santil ochoch, jun b’eelomej ut jun ixaqilb’ej naru neke’sumla choq’ re li junelik q’e kutan. Nak’ulman a’in sa’ jun k’ojob’anb’il k’anjel nak’ab’a’iik tz’ape’k sa’ junajil. Us ta li k’ojob’anb’il k’anjel a’in toj najt wan chiruheb’ laa kok’al, li kok’ na’leb’ teeb’aanu chi kok’ aj xsa’ sa’ komonil naru naxtenq’aheb’ chixkawresinkil rib’ choq’ re li xchaq’al ru osob’tesiik a’in.
Re xtawb’al xkomon aana’leb’, chi’ilmanq Temas del Evangelio, “Tz’ape’k sa’ junajil,” topics.ChurchofJesusChrist.org.
-
Ilomaq sa’ komonil “Li Junkab’al: Jun Jek’inb’il Aatin choq’ re li Ruchich’och’” sa’ ChurchofJesusChrist.org. K’a’ru naxk’ut li jek’inb’il aatin a’in chirix li sahil ch’oolejil sa’ li yu’am sa’ junkab’al ut chirixeb’ li chaab’il wank chi sumsu? Rik’ineb’ laa kok’al, sik’ ru junaq reheb’ li na’leb’ tusub’anb’ileb’ sa’ li jek’inb’il aatin re teetzol. Naru taasik’ junjunq li raqal sa’eb’ li loq’laj hu li neke’aatinak chirix li na’leb’ sa’ li K’utul Raqal reheb’ li Loq’laj Hu. Naru ajwi’ teek’uub’ eemeta re roksinkileb’ li na’leb’ a’in chi us wi’chik sa’ lee junkab’al. Naq teek’anjela lee meta, tz’ilomaq rix sa’ komonil li k’a’ru naxk’am chaq li na’leb’ a’an sa’ lee junkab’al.
-
Il aawochb’eeneb’ laa kok’al li raatin li Awa’b’ej Dieter F. Uchdorf sa’ “B’antiox reheb’ li neke’kolok” (Jolomil ch’utub’aj-ib’ re abril 2016). Naq texwulaq sa’ li raqal kab’a’inb’il “Jun tenamit re tz’eqok eechej,” naru teesik’ junjunq k’a’aq re ru sa’ lee rochoch li yal re tz’eqe’k ut jun siir chik li ink’a’ naru natz’eqman. Ye chan ru nekerileb’ li k’a’aq re ru li nekeraj naq ink’a’ te’po’e’q sa’ junpaat. Jo’ chanru li na’leb’ a’in, chan ru tento taqil li qasumlajik ut li qawanjik sa’ junkab’al? K’a’ chik ru naxye li Awa’b’ej Uchtdorf chirix li Kolonel ut chan ru naq naru nokoxtenq’a chixwaklesinkil li sumalil ut li kawil junkab’al?
-
Wi sumsuukat, aatinan rik’ineb’ laa kok’al chirix li nakaweek’a naq chaab’il yookex chixb’aanunkil sa’ sumalil, li k’a’ru yookex chixtzolb’al, ut chan ru naq yookex chixyalb’al chaab’ilo’k. Wi laa’at ut laa sum aatin xextz’ape’ sa’ junajil sa’ li santil ochoch, k’ut chiruheb’ laa kok’al rik’in laa wanjik chan ru nekeyal eeq’e chiroxloq’inkileb’ lee sumwank cherib’il eerib’ ut rik’in li Qaawa’. Ye reheb’ laa kok’al chan ru nekeyal eeq’e chixk’eeb’al lee Choxahil Yuwa’ ut li Kolonel sa’ xyi lee wanjik sa’ jun sumal ut chan ru naq nekextenq’aak xb’aaneb’ a’an.
-
Naq aajel ru naq tex’aatinaq jo’ junkab’al, ch’utub’omaq eerib’ ut aatinanqex. K’e reetal naq chixjunil te’ruuq chi aatinak ut te’oxloq’iiq lix k’a’uxleb’ chixjunileb’ li komon sa’ li junkab’al. Oksiheb’ li hoonal a’in re xk’utb’al li chaab’il aatinak ut li sahil wank sa’ li junkab’al, us ta jalan jalanq naxk’oxla li junjunq.
-
Naq taatawmanq junaq ch’a’ajkilal sa’ li junkab’al, k’ut aakuyum ut xchaab’ilal aana’leb’. Tenq’aheb’ laa kok’al chirilb’al chan ru naq xtuqub’ankileb’ li ch’a’ajkilal jo’ li Kristo naru natenq’an re te’xkawresi rib’ choq’ re jun chaab’il wank sa’ sumalil. Ilomaq Tzol’leb’ ut Sumwank 121:41–42, ut wotz chan ru naq eb’ li na’leb’ sa’ li raqal a’an naru neke’oksiman sa’ li sumalil.