Katakin Ajri ro Reddik

Eļan̄n̄e ewōr nejūm̧ ajri ro reddik ilo baam̧le eo am̧, errein rej jet m̧akūtkūt ko me remaron̄ jipan̄ er ekkatak:

• Al. Al in jar ko im al ko jān Children’s Songbook rekajoor ilo aer katakin katak ko. Kōjerbal topics index eo ilo tulikin Children’s Songbook n̄an pukōt al ko me reiiookļo̧k pedped in katak ko an gospel eo kwoj katakin. Jipan̄ ajri ro nejūm̧ keidi ennaan ko an al ko n̄an mour ko aer. (Barāinwōt lale “Including Sacred Music in Your Gospel Learning” ilo bok in.)

• Ron̄jake im kōm̧m̧an arin juon bwebwenato. Ajri ro reddikļo̧k em̧m̧an bwebwenato ippāer—jān jeje ko rekwojarjar, jān mour eo am̧, jān bwebwenatoon baam̧le eo am̧ ak menmenbwij, ak jān Church magazines. Kappukot wāween ko n̄an men bwe ren bōk koņaer n̄an kwaļo̧k bwebwenato eo. Remaron̄ jibwe pija ko ak mweuik ko jet, jin̄aik pija ko kōn ta eo rej ron̄jake, kōm̧m̧an arin kōn bwebwenato eo, ak em̧ool jipan̄ kwaļo̧k bwebwenato eo. Jipan̄ ajri ro nejūm̧ kile m̧ool ko an gospel eo ilo bwebwenato ko kwoj kwaļo̧ki.

• Riiti juon eoon. Ajri ro reddik remaron̄ jab lukkuun riit, ak kwomaron̄ men bwe ren bōk koņaer ilo ekkatak eo jān jeje ko rekwojarjar. Kwomaron̄ mije wōt juon eoon, ennaan eo eaorōk, ak naan eo. Ajri ro remaron̄ bar kakilōklōk eoon ko rekkadu jān jeje ko rekwojarjar eļan̄n̄e rej āliji jejjo alen. Ilo aer ron̄ naan eo an Anij, renaaj en̄jake Jetōb eo.

• Lale juon pija ak alooje juon pija in alooj. N̄e kwoj kwaļo̧k n̄an ajri ro nejūm̧ juon pija ak juon pija in alooj eo me ej iookļo̧k pedped in katak an gospel eo ak bwebwenato an jeje ko rekwojarjar, kajjitōk ippāer kajjitōk ko me ejipan̄ er ekkatak jān ta eo rej loe. N̄an waanjon̄ak, kwomaron̄ kajjitōk, “Ta eo ej waļo̧k ilo pija in ak pija in alooj in? Ekōjkan an kōm̧m̧an bwe kwon en̄jake?” Gospel Media app eo, MediaLibrary.ChurchofJesusChrist.org , im children.ChurchofJesusChrist.org rej jikin ko rem̧m̧an n̄an alooji pija ko ak pija in alooj ko.

• Ejaake. Ajri ro remaron̄ ekkal, jin̄n̄a, ak kōļare pija eo men eo ej iookļo̧k bwebwenato eo ak pedped in katak eo rej ekkatak kake.

• Bōk Koņaam̧ ilo katak eo me ej kōjerbal m̧weiuk ak men ko jet. Juon katak eo ej kōjerbal m̧weiuk ak men ko jet emaron̄ jipan̄ ajri ro nejūm̧ meļeļe juon pedped in katak an gospel eo me epen n̄an meļeļe kake. N̄e kōjerbal m̧weiuk ak men ko jet, pukōt wāween ko n̄an kōtļo̧k bwe ajri ro nejūm̧ ren bōk koņaer. Renaaj ekkatak eļapļo̧k jān juon en̄jake in ikitōltōl ijeļokin jān alooje kōmeļeļe eo.

• Kōmmālmel. N̄e ajri ro rej kōmmālmel juon jekjek eo me rej iooni ilo mour in, em̧m̧anļo̧k aer meļeļe ewi wāween an juon pedped in katak an gospel eo jerbal ilo mour ko aer.

• Āliji m̧akūtkūt ko. Ajri ro reddikļo̧k remaron̄ kōņaan ron̄ katak ko elōn̄ kōttan n̄an meļeļe kaki. Jab mijak in kōmakijkij am̧ āliji bwebwenato ko ak m̧akūtkūt ko. N̄an waanjon̄ak, kwomaron̄ kwaļo̧k juon bwebwenato jān jeje ko rekwojarjar jejjo alen ilo wāween ko rokkoktaktak—ilo ad riit jān jeje ko rekwojarjar, ba ilo tukaduin ilo naan ko am̧ make, kwaļo̧k juon pija in alooj, kōtļo̧k bwe ajri ro nejūm̧ ren jipan̄ eok kwaļo̧k bwebwenato eo, kūr er n̄an kōm̧m̧an arin bwebwenato eo, im ko eierļo̧k wōt.

baam̧le eo ej ekkatak jeje ko rekwojarjar