Ekoba Al ko Rekwojarjar ilo Am̧ Ekkatak kōn Gospel eo

Al al ko an Būraimere remaron̄ kōjeraam̧m̧an eok im baam̧le eo am̧ ilo elōn̄ wāween ko. Ļōmņak kein remaron̄ jipan̄ eok kōjerbal al ko rekwojarjar ilo am̧ kajjieon̄ ekkatak im mour kōn gospel eo.

• Ekkatak pedped in katak ko. Kappukōt m̧ool ko kar katakin ilo al ko kwoj al kaki ak ron̄jaki. Menin ej tōl n̄an kōmeļeļe ko an gospel kōn m̧ool kein ilo aolepān raan en. Al im ron̄jake al ko an Būraimere ak al in jar ko me rej katakin kōn Jisōs Kraist im gospel eo An. Lukkuun lale an Jetōb Kwojarjar eo kam̧ool kōn Rilo̧mo̧o̧r im katak ko An.

• Kile kajoor in al. Al ak ron̄jake al ko an Būraimere emaron̄ erom̧ juon kōjeraam̧m̧an ilo iien aikuj ko. N̄an waanjon̄ak, al juon al emaron̄ kaeņōm̧m̧an juon ajri ilo iien an kiki, ejaake lan̄lōn̄ ilo an baam̧le eo jerbal ippān doon, kōketak juon rūtūrum̧ eo enan̄inmej, ak kaenōm̧m̧an juon eo ej en̄jake ikūm̧kūm̧ im mijak.

• Kwaļo̧k en̄jake ko. Kwaļo̧k en̄jake ko am̧ make ak baam̧le eo am̧ me ej iookļo̧k ennaan ko an al ko. Kwomaron̄ bar kwaļo̧k bwebwenato ko me rej iookļo̧k en̄jake ko.

• Kōkajoorļo̧k baam̧le eo am̧. Baam̧le eo am̧ enaaj ekkatak eļapļo̧k kōn al ko eļan̄n̄e kwoj lukkuun bōk konaam̧. N̄an kōm̧m̧an bwe ro uwaan baam̧le eo ren bōk koņaer, kwomaron̄ karuwaineneik tok juon ajri erūtto n̄an jipan̄ katakin juon al n̄an ajri ro jatin ak karuwaineneik ajri ro n̄an katakin juon al me rekar ekkatak kake ilo Būraimere. Kwomaron̄ bar kōtļo̧k bwe ro uwaan baam̧le eo ren kajjojo tōl juon al.

• Mejādik. Kōjerbal jet iaan wāween ko n̄an ekkatak al ko rekwojarjar āinwōt juon baam̧le. N̄an waanjon̄ak, kwomaron̄ kōjerbal kōm̧m̧an ko ak jerbal ko me rejejjet n̄an naan ko ilo juon al. Ak kwomaron̄ kajjojo kōm̧m̧an arin al eo ilo an ro jet uwaan baam̧le eo kajjieon̄ kwaļo̧k al ta eo. Baam̧le eo am̧ emaron̄ al al ko ilo jon̄an iim̧ ak tōn im ainikien ko rokkotaktak. Gospel Library app eo im Gospel for Kids app elōn̄ kein kanne ainikien ie im pija in alooj ko me remaron̄ jipan̄ eok katak al ko. Kwomaron̄ bar kwaļo̧k laajrak in al ko rekwojarjar n̄an ron̄jaki.

N̄an ļōmņak ko reļļapļo̧k, lale jekjōņ ko “Kōjerbal Al n̄an Katakin Katak eo” im “Jipan̄ Ajri ro Ekkatak im Keememej Al in Būraimere ko im Al in Jar ko,” rej pād ilo “Instructions for Singing Time and the Children’s Sacrament Meeting Presentation” ilo Itok, Ļoor Eō—N̄an Būraimere.