baam̧le eo ej alooje nien pija ko

Tijem̧ba 26–Jānwōde 1

Jej Bōk Eddo n̄an Ad Make Ekkatak

Unin jeje ko rekwojarjar ej n̄an jipan̄ eok itok n̄an Kraist im lukkuun oktaktok n̄an gospel in An. Itok, Ļoor Eō—N̄an Kajjojo Armej im Baam̧le Ko emaron̄ jipan̄ eok meļeļe jeje ko rekwojarjar im pukot kajoor eo ilo jetōb me kwe im baam̧le eo am komij aikuji. Innem, ilo kūlaaj ko am̧ ilo Kabun̄ in, enaaj wōr am̧ iien em̧m̧an n̄an kwaļo̧k en̄jake im ļōmņak ko n̄an kapilōk Armej ro Rekwojarjar m̧ōttam̧ ilo kijejeto ko aer n̄an ļoor Kraist.

Je En̄jake ko Rej Im̧we Eok

“Ta eo kom̧ro pukot e?” Jisōs ekar kajjitōk ippān rikaļoor ro an Jon Ripeptaij (Jon 1:38). Kwomaron̄ kajjitōk ippam̧ make ejja kajjitōk in wōt—kōn ta eo kwoj loe ilo Kallim̧ur Ekāāl ilo iiō in enaaj lukkuun pedped wōt ioon ta eo kwoj kappukote. “Kappukot, im kom̧ naaj lo” ej kallim̧ur eo an Rilo̧mo̧o̧r (Matu 7:7). Kōn menin, kajjitōk kajjitōk ko me rej itok n̄an kōļmenļo̧kjeņ eo am̧ ilo am̧ ekkatak, innem kappukot ilo tiljek uwaak ko. Ilo Kallim̧ur Ekāāl, kwonaaj riiti kōn en̄jake ko rekajoor an jetōb an Rikaļoor ro an Jisōs Kraist. Āinwōt juon rijilōk eo etiljek an Rilo̧mo̧o̧r, emaron̄ make wōt am̧ en̄jake ko ilo jetōb rekajoor ilo am̧ bōk kūr eo an Rilo̧mo̧o̧r, loi ilo aolep bok in ekwojarjar, “Itok, ļoor eō” (Luk 18:22).

pija ej bōk jikin ekkatak an juon make

Ļōmņak ko n̄an Ekkatak Jeje Ko Rekwojarjar Ippam̧ Make

N̄an lukkuun ekkatak jān Rilo̧mo̧o̧r eo, ij aikuj bōk kūr in An, “Itok, ļoor eō.”

Kūr eo an Rilo̧mo̧o̧r, “Itok, ļoor eō,” ej iookļo̧k aolep—jekdo̧o̧n n̄e jekāāl ilo iaļ in rikaļoor in ak eto ad pād ie ilo aolepān mour ko ad. Menin kar kūr eo An n̄an juon likao em̧weie eo ekar kajjieon̄ kōjparok kien ko (lale Matu 19:16–22; Luk 18:18–23). Ta eo likao in ekar ekkatak—im ta eo jej aolep aikuj ekkatak—ej bwe erom̧ juon rikaļoor meļeļein leļo̧k aolepāen ad n̄an Jemedwōj Ilan̄ im Jisōs Kraist. Jej eddōļo̧k ilo ad mour in rikaļoor ilo ad kile ta eo ejjeļo̧k ippād, kōm̧m̧an oktak ko, im kappukot eļapļo̧k n̄an lukkuun ļoor Er.

Ekkatak jān Rilo̧mo̧o̧r ej jino n̄e jej kajjieon̄ meļeļe ta eo Ekar katakin. N̄an waanjon̄ak, ewi wāween an meļeļe eo am̧ kōn ettā m̧ūlaļļo̧k ilo am̧ kappukot men kein rej elaajrak?

• Katak ko an Rilo̧mo̧o̧r eo (lale Matu 18:1–5; Luk 18:9–14)

• Juon waanjon̄ak jān mour eo An (lale Jon 13:1–15)

Eļan̄n̄e kwoj kōņaan ekkatak eļapļo̧k, kajjieon̄e m̧akūtkūt in kōn bar juon pedped in katak, āinwōt iakwe im jeorļo̧k bōd.

N̄aij eddoiki aō make ekkatak.

Elder David A. Bednar ekar ba: “Jejjab aikuj kōtļo̧k bwe Kabun̄ in āinwōt juon doulul en katakin ak jiron̄ kōj aolep men otemjeļo̧k jej aikuj jeļā n̄an kōm̧m̧ani n̄an erom̧ rijilōk ro rej wūjļepļo̧k im niknik n̄an jem̧ļo̧kin. Ijoke, eddo eo ad make ej n̄an ekkatak ta jej aikuj in ekkatak, n̄an mour ilo ad jeļā mour, im n̄an erom̧ wōn eo Maajta eo ekōņaan bwe jen erom̧. Im kapijuknen ko ad rej jikin ekkatak, mour, im erom̧” (“Pojak n̄an Bōk Aolep Menin Aikuj Otemjeļo̧k,” Liaona, Māe 2019, 102).

Ta meļeļein n̄an bōk eddo n̄an ad make ekkatak? Kappukoti uwaak ko rekkar ilo ennaan eo an Elder Bednar im ilo eoon kein rej elaajrak: Jon 7:17; 1 Tessalonika 5:21; Jemes 1:5–6, 22; 2:17; 1 Nipai 10:17–19; 2 Nipai 4:15; Alma 32:27; im Katak im Bujen Ko 18:18; 58:26–28; 88:118. Ta eo kwoj en̄jake ej im̧we eok n̄an kōm̧m̧an n̄an an emourur am̧ ekkatak kōn gospel?

Ij aikuj jeļā m̧ool eo ippa make.

Bōlen kwomaron̄ jeļā kōn armej ro me elukkuun pen aer luuji tōmak ko aer, jekdo̧o̧n ta eo ej waļo̧k ilo mour ko aer. Remaron̄ kakeememej eok kōn virgin ro ļalem remāletlet ilo barabōļ an Rilo̧mo̧o̧r (lale Matu 25:1–13). Ta eo kwomaron̄ jab loe rej kijejeto ko aer retiljek n̄an kōkajoorļo̧k naan in kam̧ool ko aer kōn m̧ool eo.

Ewi wāween aō bōk im kōmourrur naan in kam̧ool ko ad make? Je ļōmņak ko am̧ make ilo am̧ kejokļo̧kjeņ kōn eoon kein rej elaajrak: Luk 11:9–13; Jon 5:39; 7:14–17; Jerbal 17:10–12; 1 Korint 2:9–11; im Alma 5:45–46. (Bar lale Gospel Topics, “Testimony,” topics.ChurchofJesusChrist.org.)

leddik eo iturin juon iaļ

Kajjojo kōj rej aikuj bōk juon naan in kam̧ool kōn kōj make.

Ta eo ij aikuj kōm̧m̧ane n̄e ewōr kain kajjitōk rōt in?

Ilo am̧ kappukot jeļāļo̧kjeņ ilo jetōb, kajjitōk ko renaaj itok n̄an ļōmņak eo am̧. Pedped in katak kein rej elaajrak remaron̄ jipan̄ kōn kajjitōk kein ilo wāween ko me rej kalōk tōmak im naan in kam̧ool:

• Kappukot meļeļe jān Anij. Anij ej unjen m̧ool otemjeļo̧k, im E ej kwaļo̧k m̧ool jān Jetōb Kwojarjar, jeje ko rekwojarjar, im rikanaan im rijilōk ro An.

• Jerbal kōn tōmak. Eļan̄n̄e uwaak ko rejjab kajju itok, lōke bwe Irooj enaaj kwaļo̧k uwaak ko n̄e iien eo ejejjet. Ilo ejja in wōt, mour wōt kōn m̧ool eo me kwaar jeļā kadede.

• Dāpij jibadbad eo an indeeo. Kajjieon̄ kalimjōk men ko ilo an Irooj kalimjōki, ejjab an laļ kalimjōk. Lali kajjitōk ko ilo jeje ko kōn karōk in lo̧mo̧o̧r eo an Jemedwōj Ilan̄.

pija eo ej bōk jikin ekkatak an baam̧le

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Matu 13:1–23.N̄an jipan̄ baam̧le eo am̧ kōbpopo n̄an ekkatak jān Kallim̧ur Ekāāl iiō in, kwomaron̄ riiti barabōļ in kōn katōk ine eo. Baam̧le eo am̧ emaron̄ m̧ōņōņō in etal n̄an nabōj im kappukot kain bwij ko roktak me rej kōmeļeļeiki ilo barabōļ eo. Ewi wāween ad kōm̧m̧an bwe būruōd en āinwōt juon “bwidej em̧m̧an” me Jisōs ekar kōmeļeļeiki? (Matu 13:8).

Galetia 5:22–23; Pilippai 4:8.Būreejtōn Russell M. Nelson ekar kūr eok n̄an “ukōt m̧ōko [m̧ōm̧i] n̄an juon jikin kone an tōmak” im n̄an “bar kōkāāl m̧weo im̧ōmi n̄an juon jikin ekkatak gospel eo.” N̄an ro me rej kōm̧m̧ane men kein, ekar kallim̧ur: “Ajri ro nejimi renaaj m̧ōņōņō in ekkatak im mour kōn katak ko an Rilo̧mo̧o̧r eo, im kareel ko an rikapo eo ilo mour eo ami im ilo m̧weo imōmi enaaj dikļo̧k. Oktak ko ilo baam̧le eo ami renaaj em̧m̧an im kajoorļo̧k” (“Erom̧ Riwaanjon̄ak ro rej Armej ro Rekwojarjar ilo Raan-ko Āliktata,” Liaona, Okt. 2018, 113).

Jinoin juon iiō ekāāl ej juon iien em̧m̧an n̄an kōm̧m̧an juon baam̧le ko̧o̧njeļ n̄an kōm̧m̧an bwe m̧weo im̧ōm̧ “juon im̧ōn tōmak” im “juon jikin ekkatak kōn gospel eo.” Ta ļōmņak ko kōn wāween n̄an kōm̧m̧an menin ej itok ilo kōļmenļo̧kjeņ ilo ad riiti Galetia 5:22–23 im Pilippai 4:8? Bōlen baam̧le eo am̧ remaron̄ kōm̧m̧ane jet aer kōttōpar an kajjojo im an baam̧le n̄an ekkatak Kallim̧ur Ekāāl ilo iiō in ej itok. Ta eo jemaron̄ kōm̧m̧ane n̄an kakeememej kōj make kōn kōttōpar ko ad?

N̄an ļōmņak ko reļļapļo̧k ikkijeen katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar elmakote: “Teach Me to Walk in the Light,” Children’s Songbook, 177.

Kōkm̧anm̧anļo̧k Am̧ Make Ekkatak

Pukot katak ko. Juon pedped in katak ej juon m̧ool indeeo im ej jāmin oktak. Būreejtōn Boyd K. Packer ekar kwaļo̧k bwe “katak em̧ool, rej ukōt m̧wil im manit ko” (“Little Children,” Ensign, Nob. 1986, 17). Ilo am̧ im baam̧le eo am̧ ekkatak jeje ko rekwojarjar, kappukot m̧ool ko me remaron̄ jipan̄ eok mour eļapļo̧k āinwōt Rilo̧mo̧o̧r eo.

Jisōs Kraist

Meram an Laļ in,, jān Brent Borup