“Jānwōde 23–29. Matu 3; Mark 1; Luk 3: ‘Kwom̧in Kōpooj iaļ eo an Irooj,’” Itok, Ļoor Eō—N̄an Kajjojo Armej im Baam̧le Ko: Kallim̧ur Ekāāl 2023 (2022)

“Jānwōde 23–29. Matu 3; Mark 1; Luk 3,” Itok, Ļoor Eō—N̄an Kajjojo Armej im Baam̧le Ko: 2023

Pija

Jon Ripeptaij ej peptaiji Jisōs

wintō eo em̧ōj kainōknōk ilo Nauvoo Illinois Tampeļ, jān Tom Holdman

Jānwōde 23–29

Matu 3; Mark 1; Luk 3

“Kwom̧in Kōpooj iaļ eo an Irooj”

Jino ilo riiti Matu 3; Mark 1; im Luk 3. Ilo am̧ jar kōn Jetōb Kwojarjar n̄an jipan̄ eok meļeļe jebta kein, E enaaj lewaj n̄an eok ļōmņak ko me rej n̄an kwe. Je en̄jake kein rej im̧we eok, im kōm̧m̧an karōk n̄an mour kaki.

Je En̄jake ko Rej Im̧we Eok

Jisōs Kraist im gospel eo An emaron̄ ukōt eok. Luk ekar kouti juon kanaan etto an Aiseia me ekar kōmeļeļeiki tokjen eo me kōn itok eo an Rilo̧mo̧o̧r: “Kom̧laļ otemjej renaaj jen̄ak, im toļ otemjej reļap im redik renaaj ettā ļo̧k; im men ko re ankeke renaaj jim̧we, im iaļ ko re pedakilkil renaaj eo air wōt juon” (Luk 3:5; bar lale Aiseia 40:4). En̄in ej juon enaan n̄an kōj aolep, ekoba ro rej ļōmņak rejjab maron̄ oktak. Eļan̄n̄e juon men eban oktak āinwōt juon toļ emaron̄ ettā ļo̧k, innem em̧ool Irooj emaron̄ jipan̄ kōj kajim̧weiki iaļ ko ad repedakilkil (lale Luk 3:4–5). Ilo ad eo̧ron̄ kūr eo an Jon Ripeptaij n̄an ukweļo̧k im oktak, jej kōpooj kōļmenļo̧kjeņ eo am im buruōm̧ n̄an wōnm̧aeiki Jisōs Kraist bwe jen maron̄ “lo lo̧mo̧o̧r jān Anij” (Luk 3:6).

Pija

pija ej bōk jikin ekkatak an juon make

Ļōmņak ko n̄an Ekkatak Jeje Ko Rekwojarjar Ippam̧ Make

Wōn eo kar Mark?

Ilubwiljin rijeje ro an Gospel eo, jejeļā jidik kōn Mark. Jejeļā bwe ekar juon mijinede kōmpānien an Paul, Pita, im bar jejjo mijinede. Elōn̄ rimāletlet ro ilo baibōļ rej tōmak bwe Pita ekar kapilōk Mark n̄an je ta ko rej waļo̧k ilo mour eo an Rilo̧mo̧o̧r. Gospel eo an Mark kar jeje m̧okta jān bok ko jet jilu.

Bar lale Bible Dictionary, “Mark.”

Matu 3:1–12; Mark 1:1–8; Luk 3:2–18

Ukwelok ej juon oktak ekajoor ilo kōļmenļo̧kjeņ im bōro.

Mijen eo an Jon Ripeptaij ekar kōpooj buruōn armej ro n̄an wōnm̧aeiki Rilo̧mo̧o̧r im erom̧ āinwōt E. Ewi wāween an kar kōm̧m̧ane? Ekar kean̄, “Kom̧win ukeļo̧k” (Matu 3:2). Im ekar kōjerbal pija ko āinwōt leen wōjke ko im wheat ko n̄an katakin kōn ukweļo̧k (lale Luk 3:9, 17).

Ta pija ko jet kwoj loe ilo bwebwenato ko an iien kwaļo̧k naan eo an Jon Ripeptaij?(lale Matu 3:1–12; Mark 1:1–8; Luk 3:2–18). Ļōmņak in kōkaļļeiki ilo eoon ko ak jin̄n̄aiki pjia ko aer. Ta eo pija kein rej katakin kōn katak im men ko remenin aikuj n̄an ukweļo̧k?

Mool in ukweļo̧k ej “juon oktak ilo kōļmenļo̧kjen, juon loļo̧kjeņ ekāāl kōn Anij, kōn juon make, im kōn laļ in. … [Ej meļeļein] juon oktak an bōro im ankilaan Anij” (Bible Dictionary, “Repentance”). Ilo Luk 3:7–14, ta oktak ko me Jon ekar kōm̧m̧ane n̄an karuwaineneik armej ro n̄an kōppopo n̄an wōnm̧aeiki Kraist? Ewi wāween an kapilōk in iook waj eok? Ewi wāween am̧ maron̄ kwaļo̧k ke kwar lukkuun m̧ool in ukweļo̧k? (lale Luk 3:8).

Bar lale Russell M. Nelson, “emaron̄ Kōm̧m̧an Em̧m̧anļo̧k im Maron̄ Em̧m̧anļo̧k,” Liaona, Māe 2019, 67–69; Dallin H. Oaks, “Erreo kōn Ukweļo̧k,” Liaona, Māe 2019, 91–94.

Matu 3:7; Luk 3:7

Wōn ro kar ri Parisi im Sadducees?

Ri Parisi membōr ro an kabun̄ eo an ri Ju ro me rekar kautiej er make ilo aer kajejjet ad mour kōn kien Moses im tōmak ko aer. Sadducees ro rekar juon kurup in ri Ju rem̧weie ilo an ļap kōnono kōn kabun̄ im men ko an kien; rejjab tōmak ilo katak ko kōn jerkakpeje. Jim̧or kurup ekar jebwābwe jān jibadbad eo eļan kōn kien eo an Anij.

Bar lale Matu 23:23–28; Bible Dictionary, “Pharisees,” “Sadducees.”

Matu 3:11, 13–17; Mark 1:9–11; Luk 3:15–16, 21–22

Jisōs Kraist ekar peptaij n̄an “kam̧ool em̧m̧an otemjej.”

Ke kwar peptaij, kwar ļoor waanjon̄ak eo an Rilo̧mo̧o̧r. Keidi ta eo kwoj ekkatak jān bwebwenato ko kōn peptaij eo an Rilo̧mo̧o̧r kōn ta eo ekar waļo̧k ilo iien peptaij.

Peptaij eo an Rilo̧mo̧o̧r	Peptaij eo Aō
Peptaij eo an Rilo̧mo̧o̧r Wōn eo ekar peptaiji Jisōs, im ta mālim eo ekar kabwijere?	Peptaij eo Aō Wōn eo ekar peptaij i eok, im ta mālim eo ekar kabwijere?
Peptaij eo an Rilo̧mo̧o̧r Ia eo Jisōs ekar peptaij ie?	Peptaij eo Aō Ia eo kwar peptaij ie?
Peptaij eo an Rilo̧mo̧o̧r Ewi wāween an kar Jisōs peptaij?	Peptaij eo Aō Ewi wāween am̧ kar peptaij?
Peptaij eo an Rilo̧mo̧o̧r Etke Jisōs ekar peptaij?	Peptaij eo Aō Etke kwar peptaij?
Peptaij eo an Rilo̧mo̧o̧r Ewi wāween an Jemedwōj Ilan̄ kwaļo̧k ke Ekar bun̄ buruōn kōn Jisōs?	Peptaij eo Aō Ewi wāween an kar Jemedwōj Ilan̄ ekar kwaļo̧k An bun̄ buruōn ke ekar peptaij? Ewi wāween An kar kwaļo̧k an kar kōmālim menin jān tōre eo?

Bar lale 2 Nipai 31; Mosaia 18:8–11; Katak im Bujen Ko 20:37, 68–74; “The Baptism of Jesus” (video), ChurchofJesusChrist.org.

Matu 3:16–17; Mark 1:9–11; Luk 3:21–22

Ro uwaan taitōl eo an Anij rej juon armej ro roktak jān doon.

Baibōļ epād ie elōn̄ kam̧ool ko rellōn̄ bwe ro uwaan ak rej pād ium̧win taitōl an Anij rej juon armej ro roktak. Bwebwenato eo kōn peptaij eo an Rilo̧mo̧o̧r rej juon waanjon̄ak. Ilo am̧ riiti bwebwenato kein, kejokļo̧kjeņ kōn ta eo kwoj ekkatak kōn taitōļ an Anij. Etke katak kein raorōk n̄an eok?

Bar laleo Jenesis 1:26; Matu 17:1–5; Jon 17:1–3; Jerbal 7:55–56; Katak im Bujen Ko 130:22.

Pija

pija eo ej bōk jikin ekkatak an baam̧le

Ļōmņak ko n̄an Ekkatak Jeje ko Rekwojarjar an Nokon in Jota an Baam̧le

Matu 3.Jon Ripeptaij ekar kabwijer Priesthood eo an Aron. Ta eo jemaron̄ ekkatak jān waanjon̄ak eo an kōn un ko an Priesthood eo an Aron? Ta kōjeraam̧m̧an ko jej būki jān Priesthood eo an Aron? Eļan̄n̄e ewōr juon likao ilo baam̧le eo am̧, kwomaron̄ bōk iien n̄an jipan̄ eok meļeļe kōn wāween an kōjerbal Priesthood eo an Aron n̄an kōjeram̧m̧an ro jet. (Bar lale Katak im Bujen Ko 13:1; 20:46–60.)

Matu 3:11–17; Mark 1:9–11; Luk 3:21–22.Ro uwaan baam̧le eo am̧ lo an juon armej peptaij im kapen āinwōt juon membōr in Kabun̄ in? Ta eo ro uwaan baam̧le eo rej en̄jake? Bolen kwomaron̄ katakin er kōn kōkaļļe ko an peptaij im kapen. Ewi wāween an peptaij im kapen āinwōt juon ijjino ekāāl ak bar ļotak? Etke jej lukkuun tuļo̧k ilo dān n̄e jej peptaij? Etke kwoj kanōk nuknuk mouj n̄e kwoj peptaij? Etke menin letok eo an Jetōb Kwojarjar kar kōmeļeļeiki āinwōt juon “peptaij an kijeek”? (Katak im Bujen Ko 20:41; bar lale Bible Dictionary, “Baptism,” “Holy Ghost”).

Matu 3:17; Mark 1:11; Luk 3:22.N̄āāt eo jekar en̄jake ke Anij ekar bun̄ buruōn kōn kōj? Ta eo jemaron̄ kōm̧m̧ane āinwōt juon baam̧le n̄an kabun̄ buruōn Anij?

N̄an ļōmņak ko reļļapļo̧k ikkijeen katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar elmakote: “Baptism,” Children’s Songbook, 100–101.

Kōkōm̧anm̧anļo̧k Ekkatak Ippam̧ Make

Kajjitōk jipan̄ eo an Irooj. Jeje ko rekwojarjar kar letok n̄an kōj jān jeje ko rekwojarjar, im n̄an lukkuun meļeļe kaki jej aikuj revelesōn ko ad make. Irooj ekar kallim̧ur, “Kajjitōk im naaj lewōj n̄an kom̧; kappukot im kom̧ naaj lo; kōļļaļļaļ, im naaj kapeļļo̧k n̄an kom̧” (Matu 7:7).