“Jānwōde 16–22. Jon 1: Kōm Ar Lo Messaia,” Itok, Ļoor Eō—N̄an Kajjojo Armej im Baam̧le ko: Kallim̧ur Ekāāl 2023 (2022)
“Jānwōde 16–22. Jon 1,” Itok, Ļoor Eō—N̄an Kajjojo Armej im Baam̧le ko: 2023
Jānwōde 16–22
Jon 1
Kōm Ar Lo Messaia
Ilo am̧ riit im kejokļo̧kijeņ Jon 1, je im̧we ko kwoj bōki. Ta ennaan ko kwoj loi me renaaj ļapļok aer aorōk n̄an kwe im baam̧le eo am̧? Ta eo komaron̄ kwaļo̧k ilo kūlaaj ko am̧ ilo Kabun̄ in?
Je En̄jake ko Rej Im̧we Eok
Em̧ōj ke am̧ kar ļōmņak eļan̄n̄e konaaj kile Jisōs in Nazaret āinwōt Eo Nejin Anij n̄e kon kar mour ilo tōre in mour in jerbal in karejar eo An ilo mour in? Ilo iiō ko, ri Israel ro retiljek, ekoba Andrew, Pita, im Pilip, im Natanael, rekar kōttar im jar kōn itok eo an Messaia eo kar kallim̧ūr kake. Ke rekar ioone, ekōjkan aer kar jeļā bwe E ej Eo rekar kappukote? Ilo wāween in wōt kōj aolep jej itok n̄an jeļā Rilo̧mo̧o̧r—ilo ad bōk kūr n̄an “Itok im koṃ naaj loe” kōn make (Jon 1:39). Jej riit kake E ilo jeje ko rekwojarjar. Jej ron̄ katak ko An. Jej loe wāween An kar mour. Jej en̄jake Jetōb eo An. Ilo iaļ in, jej loe, āinwōt an kar Natanael loe, bwe Rilo̧mo̧o̧r ejeļā kōj im ej iakwe kōj im ekōņaan kōpooj kōj n̄an bōk “men ko reḷap” (Jon 1:50).
Ļōmņak ko n̄an Ekkatak Jeje Ko Rekwojarjar Ippam̧ Make
Wōn kar Jon?
Jon ekar juon rikaļooran Jon Ripeptaij im tokālik ekar erom̧ juon iaan rikaļoor ro m̧oktata an Jisōs Kraist im juon iaan Rijilōk ro Jon̄oulruo. Kar je gospel eo an Jon, elōn̄ leta ko, im bok in Revelesōn. Ilo Gospel eo an, ekar ņa etan make āinwōt rikaļoor eo “Jisōs ej yokwe” im “rū kaḷoran eo juon” (Jon 13:23; 20:3). Ikdeelel eo an Jon n̄an kwaļo̧k kōn gospel in ekar ļap an kajoor jon̄an ekar kajjitōk n̄an pād ilo laļ in m̧ae Itok eo Kein Karuo an Rilo̧mo̧o̧r bwe en maron̄ boktok elōn̄ jetōb ko n̄an Kraist (lale Katak im Bujen Ko 7:1–6).
Bar lale Bible Dictionary, “Jon,” “Jon, Gospel of.”
Jisōs Kraist ekar “ilo jinoin ippān Anij.”
Jon ekar ijjino gospel eo an ilo an kōmeļeļeik jerbal eo me Kraist ekar kōm̧m̧ane m̧okta jān An kar ļotak: “lo jinoin … Naan eo [Jisōs Kraist] ippān Anij.” Ta eo kwoj ekkatak jān eoon ko 1–5 kōn Rilo̧mo̧o̧r im Jerbal in An? Komaron̄ lo kōmeļeļe ko realikkar ilo Ukok eo an Josep Smith, Jon 1:1–5 (ilo Bible appendix). Ilo am̧ ijjino ekkatak eo am̧ kōn mour eo an Rilo̧mo̧o̧r, etke aurōk n̄an jeļā kōn jerbal eo An ilo mour eo m̧okta?
Bar lale Gospel Topics, “Jesus Christ Chosen as Savior,” topics.ChurchofJesusChrist.org.
Jisōs Kraist ej “Meram e ṃool,” Nejin Anij.
Kar im̧we Jon n̄an kappukot Rilo̧mo̧o̧r kōnke naan in kam̧ool eo an Jon Ripeptaij, eo ekar kwaļo̧k bwe e “ear itok bwe en kōnnaan kōn. … Meram eo” (Jon 1:8–9). Jon make ekar bar kwaļo̧k an kam̧ool ekajoor kōn mour im mijen eo an Rilo̧mo̧o̧r.
Emaron̄ juon men ekabwilōn̄lōn̄ n̄an kōm̧m̧ane juon laajrak in m̧ool ko me Jon ekar kobaik ilo kōppeļak in naan in kam̧ool eo an kōn Kraist (eoon ko 1–18; bar lale Ukok eo an Josep Smith Jon 1:1–19 [ilo Bible appendix]). Etke kwoj ļōmņak bwe Jon ekar ijjinoik Gospel eo an kōn m̧ool kein? Ļōmņak in jeik kam̧ool eo am̧ kōn Jisōs Kraist—ta eo komaron̄ kōņaan kwaļo̧k? Ta en̄jake ko remaron̄ jipan̄ eok ilo am̧ itok im jeļā im ļoor Rilo̧mo̧o̧r? Wōn eo emaron̄ jeram̧m̧an jān an ron̄ naan in kam̧ool eo am̧?
Jisōs Kraist ej letok “kajoor n̄an erom̧” ļaddik im leddik ro nejin Anij.
Men̄e jej aolep leddik im ļaddik ro ilo jetōb nejin Anij Jemed, n̄e jej jerawiwi je kattoļo̧k kōj, ak jeppelļo̧k, jān E. Jisōs Kraist ej letok n̄an kōj juon iaļ n̄an bar jepļaak kōn en̄taan in pinmuur eo An. Kejokļo̧kijeņ ta eo Jon 1:11–13 ej katakin kōn erom̧ leddik ro im ļaddik ro nejin Anij. Bar ļōmņak ta eo eoon kein rej katakin kōn wāween ad bōk menin letok in: Rom 8:14–18; Mosaia 5:7–9; Katak im Bujen Ko 25:1. Ta meļeļein n̄an eok n̄an bōk “kajoor n̄an erom̧” juon leddik ak ļaddik nejin Anij?
Jemen ej kam̧ool kōn Eo Nejin.
Jon 1:18 ej kwaļo̧k bwe ejjeļo̧k juon enan̄in loe Anij. Ijo wōt ke, Ukok eo an Josep Smith in eoon in ej kalikkar bwe “ejjeļo̧k armej eaar lo Anij ilo jabdwōt iien, ijjelo̧kun wōt eaar kam̧ool kōn Nejin” (lale Jon 1:18, footnote c). Ļōmņak in etale iien kein ilaļ ke Anij Jemed kar ron̄ An kam̧ool kōn Nejin: Matu 3:17; 17:5; 3 Nipai 11:6–7; Josep Smith—Bwebwenato 1:17.
Etke ej juon kōjeram̧m̧an bwe eped bwebwenato kein ipped? Ta eo kajjojo iaer ej katakin kōj kōn kadkad eo an Jisōs Kraist ippān Jemān?
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota
Ilo ad ekkatak jeje ko rekwojarjar, jenaaj bōk im̧we n̄an mour ko ad.
-
Jon 1:4–10.Ekōjkan am̧ maron̄ jipan̄ baam̧le eo am̧ pijaikļo̧k ta eo rekar riit kake kōn meram eo ilo eoon kein? Komaron̄ kōtļo̧k an ro uwaan baam̧le eo am̧ kajojo bōk koņaer kōmeram juon ruum̧ emarok kōn juon ļait im kwaļo̧k ekōjkan an Rilo̧mo̧o̧r Meram eo ilo mour ko aer. Innem, ilo am̧ riiti Jon 1:4–10, ro uwaan baam̧le eo remaron̄ wōr aer ļōmņak kōn naan in kam̧ool eo an Jon kōn Jisōs Kraist, Meram eo an Laļ in.
-
Jon 1:35–36.Etke Jon Ripeptaij ekar maron̄ kūri Jisōs “Lamb an Anij”? Ta eo jej ekkatak jān taitōļ in jān Elder Jeffrey R. Holland’s “Behold the Lamb of God” ak enaan eo an Elder Gerrit W. Gong “Good Shepherd, Lamb of God”? (Liaona, Māe 2019, 44–46, 97–101)
-
Jon 1:35–46.Ta tōprak ko in naan in kam̧ool e an Jon? Ta eo baam̧le eo am̧ emaron̄ ekkatk jān armej ro kar kōmeļeļe kaki ilo eoon kein kōn wāween kwalo̧k kōn gospel in? Bar lale bitio eo “Inviting Others to ‘Come and See’” (ChurchofJesusChrist.org).
-
Jon 1:45–51.Ta eo Natanael ekar kōm̧m̧an n̄an jipan̄ e bōk juon kam̧ool kōn Jisōs Kraist? Karuwaineneik ro uwaan baam̧le eo n̄an ekōnono kōn wāween aer kar bōk kam̧ool ko aer.
N̄an ļōmņak ko rellōn̄ļo̧k n̄an katakin ajri ro, lale unin tōl eo an wiik in ilo Itok Ļoor Eō—N̄an Būraimere.
Al eo kar elmakote: “The Lord Is My Light,” Hymns, no. 89.
Kōkōm̧anm̧anļo̧k Ad Katakin
Kwaļo̧k mennin katak ko. Karuwaineneik ro uwaan baam̧le eo n̄an pukot menin katak ko remaron̄ kōjerbali n̄an jipan̄ er meļeļe pedped in katak ko ilo jeje ko rekwojarjar kwoj riiti āinwōt juon baam̧le. N̄an waanjon̄o̧k, remaron̄ kōjerbale juon kāāntōļ n̄an pinej jenkwan Meram in Kraist (lale Jon 1:4).
Jeova ej Kōm̧anm̧an Laļ in, jān Walter Rane