inahan ug anak nagtuon sa mga kasulatan

Mga Ideya sa Pagpalambo sa Imong Pamilya nga Pagtuon sa Kasulatan

Ang kanunay nga pagtuon sa kasulatan diha sa pamilya usa ka gamhanan nga paagi sa pagtabang sa imong pamilya nga mobati sa impluwensiya sa Espiritu Santo ug makakat-on sa ebanghelyo. Unsa ka daghan ug kadugay ang inyong pagbasa isip pamilya dili sama kaimportante kay sa pagka-makanunayon sa inyong mga paningkamot. Samtang ikaw naghimo sa pagtuon sa kasulatan nga importanting bahin sa kinabuhi sa imong pamilya, ikaw motabang sa mga sakop sa imong pamilya nga mas maduol ngadto sa Langitnong Amahan ug ni Jesukristo ug motukod sa ilang mga pagpamatuod diha sa pundasyon sa pulong sa Dios. Hunahunaa ang paggamit sa mosunod nga mga pangutana:

• Sa unsang paagi ang mga sakop sa imong pamilya makadasig sa usag usa nga magtuon sa mga kasulatan sa tinagsa-tagsa?

• Unsay imong mabuhat sa pag-awhag sa mga sakop sa pamilya sa pagpakigbahin unsay ilang nakat-onan?

• Unsaon nimo sa paghatag og gibug-aton sa mga baroganan nga imong nakat-onan sa Bag-ong Tugon sa matag adlaw nga kahigayonan sa pagtudlo?

Hinumdomi nga ang panimalay mao ang labing nindot nga dapit sa pagkat-on sa ebanghelyo. Ikaw makakat-on ug makatudlo sa ebanghelyo diha sa panimalay sa mga paagi nga dili mahimo diha sa klase sa Simbahan. Pagmamugnaon samtang ikaw naghunahuna og mga paagi sa pagtabang sa imong pamilya sa pagkat-on gikan sa mga kasulatan. Hunahunaa ang pipila sa mosunod nga mga ideya sa pagpalambo sa imong pamilya nga pagtuon sa kasulatan.

pamilya ug mga lider sa Simbahan nanganta og dungan diha sa usa ka panimalay

Gamit og Musika

Kanta og mga awit nga nagsuporta sa mga baroganan nga gitudlo diha sa mga kasulatan. Usa ka gisugyot nga himno o awit sa mga bata gilista diha sa latid sa matag semana. Mahimo kang mangutana sa mga sakop sa pamilya mahitungod sa mga pulong o hugpong sa mga pulong diha sa awit. Agig dugang sa pagkanta, ang imong pamilya makahimo og mga lihok nga mobagay sa mga awit o makapaminaw sa mga awit isip nagpaluyo nga duyog nga musika samtang nagbuhat sila sa ubang mga kalihokan. Alang sa dugang pa nga mga ideya, tan-awa sa “Paglakip sa Sagrado nga Musika sa Imong Pagkat-on sa Ebanghelyo” dinhi niini nga kapangohaan.

Pagpaambit og Makahuluganong mga Kasulatan

Hatagi og panahon ang mga sakop sa pamilya sa pagpaambit og mga tudling sa kasulatan nga ilang nakit-an nga makahuluganon sa panahon sa ilang personal nga pagtuon.

Paggamit sa Imong Kaugalingong mga Pulong

Dapita ang mga sakop sa pamilya sa pag-summarize sa ilang kaugalingong mga pulong sa unsay ilang nakat-onan gikan sa mga kasulatan nga inyong gitun-an.

Gamita ang mga Kasulatan diha sa Imong Kinabuhi

Human mabasa ang usa ka tudling sa kasulatan, hangyoa ang mga sakop sa pamilya sa pagpakigbahin og mga paagi nga ang mga tudling magamit diha sa ilang mga kinabuhi.

Pangutana

Dapita ang mga sakop sa pamilya sa pagpangutana og usa ka ebanghelyo nga pangutana, ug dayon paggahin og panahon sa pagpangita og mga bersikulo nga makatabang og tubag sa pangutana.

Pagpakita og usa ka Kasulatan

Pilia ang usa ka bersikulo nga makahuluganon kanimo, ug ibutang kini sa dapit nga makita kanunay sa mga sakop sa pamilya. Dapita ang ubang mga sakop sa pamilya sa pagpuli-puli sa pagpili og kasulatan nga ipakita.

inahan ug mga anak nga nagtuon sa mga kasulatan

Paghimo og Lista sa Kasulatan

Isip pamilya, pagpili og pipila ka mga bersikulo nga gusto nimong hisgotan sa umaabot nga semana.

Pagmemorya og mga Kasulatan

Pilia ang usa ka tudling sa kasulatan nga makahuluganon sa imong pamilya, ug dapita ang mga sakop sa pamilya sa pagmemorya niini pinaagi sa pagbalik-balik og basa niini kada adlaw o sa paghimo og dula sa pagmemorya.

Pakigbahin og mga Leksiyon nga Naggamit og Butang

Pangita og mga butang nga may kalabotan sa mga baroganan sa ebanghelyo diha sa mga tudling sa kasulatan nga inyong gibasa isip pamilya. Dapita ang mga sakop sa pamilya sa pakighisgot mahitungod kon sa unsa nga paagi ang butang may kalabotan sa mga pagtulon-an diha sa mga kasulatan.

Pagpili og usa ka Hisgotanan

Papuli-puliha ang mga sakop sa pamilya sa pagpili og hisgotanan nga tun-an og dungan sa pamilya. Gamita ang Topical Guide, ang Bible Dictionary, o Ang Giya ngadto sa mga Kasulatan (scriptures.ChurchofJesusChrist.org) sa pagpangita og mga tudling sa kasulatan mahitungod sa hisgotanan.

Pagdrowing og Hulagway

Ipabasa ang pipila ka mga bersikulo isip pamilya, ug dayon hatagi og panahon alang sa mga sakop sa pamilya sa pagdrowing og usa ka butang nga kalabot sa unsay inyong gibasa. Gahini og panahon ang paghisgot sa gidrowing sa usag usa.

Pagdrama og usa ka Istorya

Human mabasa ang istorya, dapita ang mga sakop sa pamilya sa pagdrama niini. Pagkahuman, pakighisgot mahitungod kon sa unsa nga paagi ang istorya kalabot sa mga butang nga inyong nasinati sa tinagsa-tagsa ug isip usa ka pamilya.

Miingon si Presidente Russell M. Nelson: “Ako mosaad nga samtang makugihon kamo nga molihok aron sa pagbag-o sa inyong panimalay ngadto sa usa ka sentro sa pagkat-on sa ebanghelyo, sa hinayhinay ang inyong mga adlaw nga Igpapahulay mahimong ikahimuot. Inyong mga anak maghinam-hinam sa pagkat-on ug pagsunod sa mga panudlo sa Manluluwas, ug ang impluwensya sa kaaway diha sa inyong kinabuhi ug sa inyong panimalay makuhaan. Ang mga kausaban sa inyong pamilya dako ug magpadayon” (“Ang Mahimong Labing Dalaygon nga mga Santos sa Ulahing mga Adlaw,” Liahona, Nob. 2018, 113).