Paggamit sa Dali, Sunod Kanako—Alang sa mga Indibidwal ug mga Pamilya

Alang Kang Kinsa Kini nga Kapanguhaan?

Kini nga kapanguhaan alang sa matag indibidwal ug pamilya diha sa Simbahan. Gidisenyo kini aron ikaw matabangan nga makakat-on sa ebanghelyo—sa imong kaugalingon ba o kauban sa imong pamilya. Kon ikaw wala makatuon sa ebanghelyo sa regular nga paagi kaniadto, kini nga kapanguhaan makatabang kanimo sa pagsugod. Kon ikaw aduna nay maayong naandan nga pagtuon sa ebanghelyo, kini nga kapangohaan makatabang kanimo nga makabaton og mas makahuluganong mga kasinatian.

Unsaon Nako sa Paggamit Niini nga Kapangohaan?

Gamita kini nga kapangohaan sa bisan unsang paagi nga makatabang kanimo. Makita nimo kini nga makatabang isip giya o tabang alang sa kaugalingon ug pamilya nga pagtuon sa kasulatan. Makagamit ka usab niini alang sa home evening. Ang mga gilatid nag-highlight sa importante nga mga baroganan nga makita sa Bag-ong Tugon, nagsugyot og mga ideya ug mga kalihokan alang sa mga indibidwal ug mga pamilya, ug naghatag og mga luna sa pagrekord sa imong mga panghunahuna.

Ang Dali, Sunod Kanako—Alang sa mga Indibidwal ug mga Pamilya wala magpasabot nga ipuli o ikompetensya sa maayong mga butang nga imong gibuhat. Sunda ang giya sa Espiritu sa pagtino kon unsaon paghimo sa imong kaugalingong pagtuon sa pulong sa Dios.

Sa Unsa nga Paagi Kini nga Kapangohaan may Kalabotan sa Unsay Mahitabo sa Simbahan?

Ang mga latid dinhi niini nga kapanguhaan gihan-ay sumala sa sinemana nga iskedyul sa pagbasa. Ang Dali, Sunod Kanako nga mga kapangohaan alang sa Primary, alang sa Sunday School, ug alang sa mga korum sa Aaronic nga Pagkapari ug sa mga klase sa Young Women nagsunod sa sama nga iskedyul. Sa pagsuporta sa imong mga paningkamot sa pagkat-on ug pagpuyo sa ebanghelyo diha sa panimalay, ang imong mga magtutudlo sa simbahan mohatag kanimo og mga oportunidad sa pagpakigbahin sa imong mga kasinatian, mga hunahuna, ug mga pangutana mahitungod sa mga tudling sa kasulatan nga imong gitun-an diha sa panimalay.

Tungod kay ang Sunday School kaduha lamang itudlo sa usa ka bulan, ang mga magtutudlo sa Sunday School mahimong mopili sa paglaktaw o sa pagtipon sa mga latid aron masunod ang sinemana nga iskedyul. Kini mahimo usab nga gikinahanglan (alang sa Sunday School ug Primary) sa mga semana nga ang regular nga mga miting sa Simbahan wala mapahigayon tungod sa komperensiya sa stake o sa ubang mga rason. Sulod niini nga mga semana ikaw gidapit sa pagpadayon sa pagtuon sa Bag-ong Tugon diha sa panimalay.

Kinahanglan Ba Akong Mosunod sa Iskedyul?

Ang iskedyul makatabang kanimo sa paghuman og basa sa Bag-ong Tugon sa kataposan sa tuig. Agi ug dugang, ang pagsunod sa samang iskedyul sama sa uban makagiya ngadto sa makahuluganong mga kasinatian diha sa panimalay, sa simbahan, ug bisan asa. Apan ayaw batia nga nahigot sa iskedyul o napugos sa pagbasa sa matag bersikulo; ang iskedyul giya lamang aron ikaw matabangan sa paglihok sa imong kaugalingon nga kapaspason. Ang importante nga butang mao nga ikaw nagkat-on sa ebanghelyo sa indibidwal nga paagi ug isip usa ka pamilya.