Ngaahi Fakakaukau ki hono Fakatupulaki Hoʻomou Ako Fakafāmili ʻa e Folofolá

Ko e ako folofola fakafāmili maʻu peé ko ha founga mālohi ia ke tokoniʻi ai homou fāmilí ke nau ongoʻi e ivi tākiekina ʻo e Laumālie Māʻoniʻoní mo ako ʻa e ongoongoleleí. ʻOku ʻikai mahuʻinga ʻa e tuʻo lahi mo e fuoloa hoʻomou lau folofola fakafāmilí ʻo tatau mo hoʻo feinga ke toutou fakahoko maʻu iá. ʻI he taimi te mou ʻai ai e ako folofolá ko ha konga mahuʻinga hoʻomou moʻui fakafāmilí, te mou tokoniʻi ai homou fāmilí ke mou vāofi ange mo ofi ange ki he Tamai Hēvaní mo Sīsū Kalaisi pea langa ʻenau ngaahi fakamoʻoní ʻi he fakavaʻe ʻo e folofola ʻa e ʻOtuá. Fakakaukau ke mou fealēleaʻaki fakataha fekauʻaki mo e ngaahi fehuʻi ko ʻení:

• ʻE fepoupouʻaki fēfē e kau mēmipa homou fāmilí ke ako fakafoʻituitui e folofolá?

• Ko e hā ʻe lava ʻe he kau mēmipa homou fāmilí ‘o fai ke fakalotolahiʻi e tokotaha takitaha ke vahevahe ʻa e meʻa ʻoku nau akó?

• ʻE founga fēfē haʻo fakamamafaʻi ʻa e ngaahi tefitoʻi moʻoni ʻokú ke ako ʻi he Fuakava Foʻoú ʻi he ngaahi momeniti akoʻi ʻo e ʻaho kotoa pē?

Manatuʻi ko e ʻapí ʻa e feituʻu lelei taha ki hono ako e ongoongoleleí. Te ke lava ʻo ako mo akoʻi e ongoongoleleí ʻi ʻapi ʻi ha ngaahi founga ʻoku ʻikai malava ia ʻi ha kalasi ʻa e Siasí. ʻAi ke ke mohu founga ʻi hoʻo fakakaukau ki ha ngaahi founga ke tokoniʻi ai homou fāmilí ke nau ako mei he folofolá. Fakaʻaongaʻi ha niʻihi ʻo e ngaahi fakakaukau ko ʻení ke fakatupulaki ʻaki hoʻomou ako fakafāmili e folofolá.

Fakaʻaongaʻi e Hivá.

Hivaʻi e ngaahi hiva ʻoku nau fakamālohia e ngaahi tefitoʻi moʻoni ʻoku akoʻi ʻi he folofolá. ‘Oku fokotuʻu atu ʻi he fokotuʻutuʻu fakalēsoni ʻo e uike takitaha ha foʻi himi pe hiva ʻa e fānaú. Te ke lava ʻo ʻeke ki he kau mēmipa ʻo e fāmilí ha ngaahi fehuʻi fekauʻaki mo e ngaahi foʻi lea pe kupuʻi lea ʻi he fakalea ʻo e hivá. Makehe mei he hivá, ʻe lava ʻe homou fāmilí ke fakatātaaʻi ʻa e ngaahi hivá pe fanongo ki he ngaahi hivá lolotonga ʻenau fakahoko ha ngaahi ʻekitivitī kehe. Ke maʻu ha ngaahi fakakaukau lahi ange, vakai ki he “Ko Hono Fakakau e Hiva Toputapú ʻi Hoʻo Ako e Ongoongoleleí” ʻi he maʻuʻanga tokoni ko ʻení.

Vahevahe e Ngaahi Folofola ʻoku ʻUhingamālié

Tuku ha taimi maʻá e kau mēmipa ʻo e fāmilí ke nau vahevahe ai e ngaahi potufolofola ʻoku ʻuhingamālie kiate kinautolu lolotonga ʻenau ako fakataautahá.

Fakaʻaongaʻi Hoʻo Ngaahi Lea pē ʻAʻau

Fakaafeʻi e kau mēmipa ʻo e fāmilí ke nau fakamatalaʻi fakanounou ʻi he lea pē ʻanautolu ʻa e meʻa ne nau ako mei he folofola ne mou akó.

Fakaʻaongaʻi ʻa e Folofolá ki Hoʻo Moʻuí

Hili hano lau ha potufolofola, kole ki he kau mēmipa ʻo e fāmilí ke nau vahevahe ha ngaahi founga ʻoku ʻaonga ai ʻa e potufolofola ko iá ki heʻenau moʻuí.

ʻEke ha Fehuʻi

Fakaafeʻi e kau mēmipa ʻo e fāmilí ke nau ʻeke ha fehuʻi fekauʻaki mo e ongoongoleleí, pea tuku taimi leva ke fekumi ki he ngaahi veesi ʻe ala tokoni ki hano tali e fehuʻi ko iá.

Fakaʻaliʻali ha Potufolofola

Fili ha veesi ʻokú ke pehē ʻoku mahuʻingamālié, pea fakaʻaliʻali ia ʻi ha feituʻu ʻe lava e kau mēmipa ʻo e fāmilí ʻo toutou mamata ki ai. Fakaafeʻi e toenga ʻo e fāmilí ke nau taufetongi ʻi hono fili ha potufolofola ke fakaʻaliʻali.

ʻAi ha Lisi Potufolofola

Mou fili fakafāmili ha ngaahi veesi folofola te mou fie aleaʻi lolotonga e uike ka hoko maí.

Ako Maʻuloto ha ngaahi Potufolofola

Fili ha potufolofola ʻoku ʻuhingamālie ki ho fāmilí, pea fakaafeʻi e kau mēmipa ʻo e fāmilí ke nau ako maʻuloto ia ʻaki hano toutou lau fakaʻaho ia pe ʻai ha foʻi vaʻinga ako maʻuloto.

Vahevahe ha Ngaahi Lēsoni Fakataumuʻa

Fekumi ki ha ngaahi meʻa ʻoku fekauʻaki mo e ngaahi tefitoʻi moʻoni ʻo e ongoongoleleí ʻi he ngaahi potufolofola ʻoku mou lau fakafāmilí. Fakaafeʻi e kau mēmipa ʻo e fāmilí ke nau talanoa ki he founga ʻoku fekauʻaki ai ʻa e meʻa takitaha mo e ngaahi akonaki ʻi he folofolá.

Fili ha Tefito

Tuku ke taufetongi e fāmilí ʻi hano fili ha tefito ʻe lava ke ako fakataha ʻe he fāmilí. Fakaʻaongaʻi ʻa e Fakahinohino ki he Ngaahi Folofolá (scriptures.ChurchofJesusChrist.org) ke kumi ha ngaahi potufolofola fekauʻaki mo e tefitó.

Tā ha Fakatātā

Lau fakafāmili ha ngaahi veesi, pea tuku leva ha taimi ki he kau mēmipa ʻo e fāmilí ke nau tā ha meʻa ʻoku fekauʻaki mo e meʻa ne mou laú. Tuku ha taimi ke mou aleaʻi ai hoʻomou ngaahi tā fakatātaá.

Fakafaivaʻi ha Talanoa

Hili hano lau ha foʻi talanoa, fakaafeʻi e kau mēmipa ʻo e fāmilí ke nau fakafaivaʻi ia. Hili iá, aleaʻi ʻa e founga ʻoku fekauʻaki ai ʻa e talanoá mo e ngaahi meʻa ʻoku mou aʻusia fakafoʻituituí mo fakafāmilí.

Naʻe pehē ʻe Palesiteni Lāsolo M. Nalesoni: “ʻOku ou palōmesi atu ʻi hoʻomou ngāue mālohi ke fakafoʻou homou ʻapí ke hoko ko ha senitā ki hono ako ʻo e ongoongoleleí, ʻe ʻalu pē taimí mo e hoko moʻoni homou ʻaho Sāpaté ko ha meʻa fakafiefia. ʻE fiefia hoʻo fānaú ke ako pea moʻui ʻaki e ngaahi akonaki ʻa e Fakamoʻuí, kae hōloa e ivi takiekina ʻo e filí ʻi hoʻo moʻuí mo ho ʻapí. ʻE hoko ha ngaahi liliu lahi mo tuʻuloa ʻi homou fāmilí” (“Ko e Hoko ko ha Kāingalotu Faʻifaʻitakiʻangá,” Liahona, Nōvema 2018, 113–14).