“Ko Hono Fakaʻaongaʻi ʻo e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí,” Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: Fuakava Foʻoú 2023 (2022)
“Ko Hono Fakaʻaongaʻi ʻo e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí,” Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: 2023
Ko Hono Fakaʻaongaʻi ʻo e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí
Ko Hai ʻOku Fakataumuʻa Ki ai e Maʻuʻanga Tokoni Ko ʻEní?
ʻOku fakataumuʻa e maʻuʻanga tokoni ko ʻení ki he fakafoʻituituí mo e fāmili kotoa pē ʻi he Siasí. ʻOku fakataumuʻa ia ke tokoniʻi koe ke ako e ongoongoleleí—ʻiate koe pē pe fakataha mo homou fāmilí. Kapau kuo teʻeki ke ke ako maʻu pē ʻa e ongoongoleleí ʻi he kuohilí, ʻe ala tokoni ʻa e maʻuʻanga tokoni ko ʻení ke ke kamata leva. Kapau kuó ke ʻosi ako maʻu pē ʻa e ongoongoleleí, ʻe ala tokoni ʻa e maʻuʻaga tokoni ko ʻení ke ke maʻu ha ngaahi aʻusia ʻoku ʻuhingamālie angé.
Te u Fakaʻaongaʻi Fēfē ʻa e Maʻuʻanga Tokoni Ko ʻEní?
Fakaʻaongaʻi ʻa e maʻuʻanga tokoni ko ʻení ʻi ha founga pē ʻe ala tokoni kiate koé. ʻE lava ke hoko ia ko haʻo fakahinohino pe maʻuʻanga tokoni ki hono ako fakataautaha mo fakafāmili e folofolá. Te ke lava foki ʻo fakaʻaongaʻi ia ki he efiafi ʻi ʻapí. ʻOku fakamamafaʻi ʻe he ngaahi fokotuʻutuʻú ha ngaahi tefitoʻi moʻoni mahuʻinga ʻi he Fuakava Foʻoú, fokotuʻu atu ha ngaahi fakakaukau mo e ʻekitivitī ki hono ako fakafoʻituitui mo fakafāmilí, pea fakaʻatā mo ha feituʻu ke lekooti ai e ngaahi ongo ʻokú ke maʻú.
ʻOku ʻikai fakataumuʻa e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke fetongi pe feʻauʻauhi mo e ngaahi meʻa lelei ʻokú ke lolotonga fakahoko ke ako ʻa e ongoongoleleí. Muimui ki he fakahinohino ʻa e Laumālié ke fakapapauʻi e founga te ke fakahoko ai hoʻo ako e folofola ʻa e ʻOtuá.
ʻOku Fekauʻaki Fēfē ʻa e Maʻuʻanga Tokoni Ko ʻEní mo e Meʻa ʻOku Hoko ʻi he Siasí?
ʻOku fakamāʻopoʻopo ʻa e ngaahi fokotuʻutuʻu fakalēsoni ʻi he maʻuʻanga tokoni ko ʻení ʻo fakatatau ki ha taimi-tēpile laukonga fakauike. ʻOku muimui ʻa e ngaahi maʻuʻanga tokoni Haʻu, ʻo Muimui ʻIate Au maʻá e Palaimelí, Lautohi Faka-Sāpaté, mo e ngaahi kōlomu Lakanga Taulaʻeiki Faka-ʻĒloné mo e ngaahi kalasi ʻa e Kau Finemuí ki he taimi-tēpile tatau. Ke tokoniʻi hoʻo ngaahi feinga ke ako mo moʻui ʻaki e ongoongoleleí ʻi ʻapí, ʻe ʻoatu ʻe hoʻo kau faiako he lotú ha ngaahi faingamālie ke ke vahevahe ai hoʻo ngaahi aʻusiá, fakakaukaú, mo e ngaahi fehuʻi fekauʻaki mo e ngaahi potufolofola kuó ke ako ʻi ʻapí.
Koeʻuhí ʻoku akoʻi tuʻo ua pē e Lautohi Faka-Sāpaté he māhina, ʻe lava ke fili ʻa e kau faiako Lautohi Faka-Sāpaté ke hiki fakalaka pe fakatahaʻi ʻa e ngaahi fokotuʻutuʻu fakalēsoní ke lele tatau mo e taimi-tēpile fakauiké. Mahalo foki ʻe fie maʻu ʻeni (ki he Lautohi Faka-Sāpaté mo e Palaimelí fakatouʻosi) ki he ngaahi uike ʻoku ʻikai fakahoko ai ha ngaahi fakataha angamaheni ʻa e Siasí koeʻuhi ko ha konifelenisi fakasiteiki pe ngaahi ʻuhinga kehe. ʻOku fakaafeʻi koe ke hokohoko atu hoʻo ako e Fuakava Foʻoú ʻi ʻapi lolotonga e ngaahi uike ko ʻení.
ʻOku Fie Maʻu Nai Ke u Muimui ki he Taimi-Tēpilé?
ʻE tokoni atu e taimi-tēpilé ke ʻosi hoʻo lau e Fuakava Foʻoú ʻi heʻene aʻu ki he fakaʻosinga ʻo e taʻú. ‘Ikai ngata aí, ʻe lava e muimui ki he taimi-tēpile tatau mo e niʻihi kehé ʻo iku ki ha ngaahi aʻusia mahuʻingamālie ʻi ʻapi, ʻi he lotú, mo ha toe feituʻu pē. Kae ʻoua te ke ongoʻi haʻisia ki he taimi-tēpilé pe fakamālohiʻi ke lau e veesi kotoa; ko e taimi-tēpilé ko ha fakahinohino pē ia ke tokoni atu ke taimiʻi lelei hoʻo fokotuʻutuʻú. Ko e meʻa mahuʻingá ko hoʻo ako fakafoʻituitui mo fakafāmili ʻa e ongoongoleleí.