Ko ʻEtau Taumuʻá ke Fakaului

Ko e taumuʻa ʻo e ako mo akoʻi kotoa pē ʻo e ongoongoleleí ke fakaloloto ʻetau ului ki he Tamai Hēvaní mo Sīsū Kalaisí mo tokoni ke tau hoko ʻo hangē ko Kinauá. ʻI he taimi ʻoku tau ako ai e ongoongoleleí ʻo makatuʻunga ʻi he ʻuhingá ni, ʻoku ʻikai ngata pē ʻi heʻetau fekumi ki ha ngaahi fakamatala foʻou; ka ʻoku tau fie hoko ko ha kau “fakatupu foʻou” (2 Kolinitō 5:17). ʻOku ʻuhinga ʻeni ke tau fakafalala ki he Tamai Hēvaní mo Sīsū Kalaisi ke Na tokoni ke liliu hotau lotó, ngaahi fakakaukaú, angafaí, mo hotau natula moʻoní.

Ka ko e faʻahinga ako ʻo e ongoongoleleí ʻokú ne fakamālohia ʻetau tuí pea fakatau ki he mana ʻo e liliú ʻoku ʻikai hoko fakaʻangataha pē ia. ʻOku ope atu ia mei he loki akó ki hotau lotó mo e ʻapí. ʻOku fie maʻu ki ai ʻa e feinga fakaʻaho maʻu pē ke maʻu ha mahino mo moʻui ʻaki e ongoongoleleí. ʻOku fie maʻu ʻa e tākiekina ʻa e Laumālie Māʻoniʻoní ki hono ako ʻo e ongoongolelei ʻoku iku ki he ului moʻoní.

ʻOku tataki kitautolu ʻe he Laumālie Māʻoniʻoní ki he moʻoní pea fakamoʻoniʻi mai ʻa e moʻoni ko iá (vakai Sione 16:13). ʻOkú Ne fakamaama hotau ʻatamaí, fakaake ʻetau mahinó, mo tākiekina e ongo hotau lotó ʻaki e fakahā mei he ʻOtuá, ko e tupuʻanga ʻo e moʻoni kotoa pē. ʻOku fakamaʻa ʻe he Laumālie Māʻoniʻoní hotau lotó. ʻOkú Ne ueʻi kitautolu ke tau holi ke moʻui ʻaki ʻa e moʻoní, pea ʻokú Ne fanafana mai ʻa e ngaahi founga ke tau fai ai ʻení. Ko hono moʻoní, “ko e Laumālie Māʻoniʻoní … te Ne akoʻi ʻa [kitautolu] ʻi he meʻa kotoa pē” (Sione 14:26).

ʻI he ngaahi ʻuhingá ni, ʻi heʻetau feinga ke moʻui ʻaki, ako mo akoʻi ʻa e ongoongoleleí, ʻoku totonu ke tau tomuʻa fekumi ki he takaua ʻa e Laumālié. ʻOku totonu ke puleʻi ʻe he ngaahi taumuʻa ko ʻení ʻa ʻetau ngaahi filí mo tākiekina ʻetau ngaahi fakakaukaú mo e ngāué. ʻOku totonu ke tau fekumi ki he meʻa ʻokú ne fakaafeʻi ʻa e ivi tākiekina ʻo e Laumālié pea tafoki mei he meʻa ʻokú ne tuli ʻa e ivi tākiekina ko iá—he ʻoku tau ʻiloʻi kapau ʻoku tau taau ke maʻu e Laumālie Māʻoniʻoní, te tau lava foki ʻo taau ke nofo ʻi he ʻao ʻo e Tamai Hēvaní mo hono ʻAlo, ko Sīsū Kalaisí.