te aine ae kamatebwaii koroboki aika tabu

Te Rairaki Bon Ara Kouru

Te botoniango n kamatebwaian ao te anga reirei ni kabane n te euangkerio bon kakorakoraan rairakira nakon Tamara are i Karawa ao Iesu Kristo ao n buokiira n riki n ai Aroia. Iaan bukina aei, ngkana ti kamatebwaia te euangkerio, tiaki tii kakaai rongorongo aika a boou; ti tangiria n riki bwa te “aomata ae tibwa karikaki nabangkai” (2 I-Korinto 5:17). Nanona bwa ti na onimakina Tamara are i Karawa ao Iesu Kristo bwa a na buokiira ni bitii nanora, ara taratara, ara mwakuri, ao kateira n aomata.

Ma te aeka n reirei n te euangkerio are e kakorakora ara onimaki ao ni kairiira nakon te kakai n te rairaki aki riki n te tai ae tii teuana. E reitinako riki iaon te umwa n reirei nako nanora ao mweengara. E kainnanoa te mwakuri ae teimatoa, ni katoabong n ota iai ao ni maiuakina te euangkerio. Reiakinan te euangkerio are e kairi nakon te rairaki ni koaua e riai n raonaki iroun te Tamnei ae Raoiroi.

E kairiira te Tamnei ae Raoiroi nakon te koaua ao ni kaota koauan te koaua anne (taraa Ioane 16:13). E kaotai ara iango, e rikirake ara atatai, ao n ringii nanora ma te kaotioti mairoun te Atua, mwiin koaua ni kabane. Te Tamnei ae Raoiroi e kaitiakii nanora. E karin inanora tangiran maiuakinan te koaua, ao E wirikiriki nakoira kawai nakon karaoan aei. Ni koauana, “te Tamnei ae Raoiroi … e na [reireiniira] bwaai ni kabane” (Ioane 14:26).

Ni bukina aikai, n ara kona ni maiuakin, n reiakin, ao n tataekina te euangkerio, ti riai moa ao ae kakawaki riki n ukoukora ana iraorao te Tamnei. Te kouru aei e riai n tautaekana ara rinerine ao ni kairi ara iango ao ara mwakuri. Ti riai ni ukoukora te bwai ae karika ana kairoro te Tamnei ao n totokoa te bwai ae kanakoa te kairoro anne—ibukina bwa ti ataia bwa ngkana ti tau ni karekea te Tamnei ae Raoiroi, ti kona naba n tau ni maeka ma Tamara are i Karawa ao Ana Rikitemanna, Iesu Kristo.