Kabonganaan Anene n Taromauri n Am Kamatebwai

Anenean kuuna n te Moanrinan ao boki n anene e kona ni kakabwaiako ma am utu ni kawai aika a mwaiti. Iango aikai a kona ni buokiko ni kabonganai katangitang aika a tabu ngkai ko kataia n reiakina ao ni maiuakina te euangkerio.

• Reiakin tuan reirei. Taratarai koaua ake a reiakinaki inanon kuuna ake ko anenei ke n ongoraeakini. Aio are e kona ni kairi nakon maroroakinan te euangkerio iaon koaua aikai ni karokoa e bong. Anenei ke ongoraeakini kuuna n te Moanrinan ke kuna n taromauri ake a reirei taekan Iesu Kristo ao Ana euangkerio. Kakauongo raoi nakon kawai ake e kakoaua iai te Tamnei ae Raoiroi iroun te Tia Kamaiu ao Ana reirei.

• Kinaa mwaakan te katangitang. Anenean ke ongoraeakinan kuna n te Moanrinan ao kuna n taromauri e kona n riki bwa te kakabwaia inanon taai ni kainnano. Te katooto, aneneakin te kuna e kona ni karekea te rau nakon te teei n te tai ni matu, karekea te kimwareirei ngkai a ikotaki ni mwakuri kain am utu, kakukureia kain rarikim ae aoraki, ke ni karaua nanon temanna ae aki rau.

• Tibwai taneiai. Tibwa am taneiai ao aia taneiai am utu are e irekereke nakon te rongorongo n te anene. Ko kona naba n tibwai karaki man koroboki aika a tabu aika a irekereke.

• Kairiia am utu. Am utu a na reiakinaki n ae mwaiti riki man kuuna ngkana a rang kakairiiria. Arom ni kairiia kain am utu, ko kona ni kaoa natim ae ikawai bwa e na ibuobuoki n angareirei iaon te kuna nakon tarina ao mwanena aika uarereke riki ke ni kaoia ataei bwa a na reireiniia te utu te kuna are a reiakinna n te Moanrinan. Ko kona naba ni karekea aia tai kain te utu bwa a na ikaruoruo ni kaira te anene.

• Bwaina te kakauiango. Kabonganai kawai aika a kakaokoro n reiakin kuna aika a tabu inanon te utu. Te katooto, ko kona ni katei kain taeka ma kibuntaeka n te kuna. Ke ko kona ni ikaruoruo ni karaoa te kaotioti iaon mwakoron te kuna ngkai kain te utu ake tabeman a kataia ni keetina te kuna. Am utu a kona ni kukurei n anenei kuna ni biriia aika a kakaokoro ke rietaia. Te Gospel Library app ao te Euangkerio ibukiia Ataei app iai bwanaa aika a tia n raweaki ao witeo aika a kona ni buokiko n reiakin kuuna. Ko kona naba ni karaoi rinanin katangitang ke kuuna aika a tau n ongora iai.

Ibukin karekeiango riki tabeua, tarai mwakoro n “Using Music to Teach Doctrine” ao “Helping Children Learn and Remember Primary Songs and Hymns,” a reke ni “Kaetieti ibukin Tain te Anene ao aia Tai n Taetae Ataei n te Bootaki n Toa” inanon Nakomai, Iriirai—Ibukin te Moanrinan.