“Iango ibukin Kanakoraoan Am Kamatebwai ni Koroboki Aika Tabu” Nakomai, Iriirai—Ibukiia Aomata n Tatabemaniia ao Utu:Te Nu Tetemanti 2023 (2022)
“Iango ibukin Kanakoraoan Am Kamatebwai ni Koroboki Aika Tabu,” Nakomai, Iriirai—Ibukiia Aomata n Tatabemaniia ao Utu: 2023
Iango ibukin Kanakoraoan Am Kamatebwai ni Koroboki Aika Tabu
Aikai tabeua kawai aika a bebete ni katamaroa am kamatebwai n ana taeka te Atua inanon koroboki aika tabu.
Kakaai Koaua ibukin Iesu Kristo
Koroboki aika tabu a reireiniira bwa bwaai nako a kakoaua Kristo (taraa 2 Nibwaai 11:4; Mote 6:63),ngaia are korei ao mwaakenii kiibu ake a reirei taekan te Tia Kamaiu ao arom n Iriiria.
Kakaai Taeka ao Mwakoro n Taeka Aika a Kaunga te Nano
Ko kona ni kunea bwa taeka ao mwakoro n taeka inanon booki aika tabu a taraa ni kakawaki nakoim, ae kanga titebo ma a koreaki ti ibukim. A kona n ae a namakinna n ae e kaineti ao ni kaunga ao n anai nano nakoim. Iangoia ni mwakenii inanon am boki aika tabu ke ni koroi inanon am tieno ni kamatebwai.
Taratarai Koaua n te Euangkerio
N tabetai koaua n te euangkerio (a atongaki n angiin te bwa reirei ke tuua) a taekinaki ni kaineti, ao n tabetai a katautauaki rinanon te katooto ke te karaki. Titirakiniko, “Tera koaua aika akea tokiia aika reiakinaki inanon kiibu aikai?”
Kakauongo nakon te Tamnei
Taraai raoi am iango ao am namakin, e ngae ngke aki kaineti nakon te bwai ae ko warekia. A kona iango aikanne n riki bwa bwaai raoi ake e tangiria Tamara are i Karawa bwa ko na reiakin.
Kabotaui Kanoan Koroboki Aika Tabu Nakon Maium
Iangoia bwa a na kanga karaki ao reirei inanon booki aika tabu ni kaineti nakon maium. Te katooto, ko kona n titirakiniko, “Tera taneiai aika I a tia ni karekei n ti tebo ma aika I wareki?” ke “N na kanga n ira ana banna ni katooto te aomata aei n koroboki aika tabu?”
Titiraki inanon am tai ni Kamatebwai
Inanon am tai ni kamatebwai koroboki aika tabu, a kona n rio titiraki n am iango. A kona titiraki aikai n irekereke nakon te bwai ae ko warekia ke nakon maium ae tabangaki. Iangoi titiraki aikai ao taratarai kaekaaia ngkai ko waakinako ni kamatebwai koroboki aika tabu.
Kabonganai Buokan te Kamatebwai ibukin Koroboki Aika Tabu
Ni karekei nonoori riki n taian kibu aika ko wareki, kabongana bwaai aika a na taraaki inano, te Topical Guide, te Rikitinari n te Baibara, te Kairi nakon Koroboki aika Tabu (scriptures.lds.org) ao buokan te kamatebwai ake tabeua.
Iangoi Kanoan Koroboki Aika Tabu
Ko kona ni karekei atatai aika a nano aika uaana n koroboki aika tabu ngkana ko iangoi taekaia—bwaai aika a riki ke n tein tabo n koroboki aika tabu. Te katooto, ataakin aroia ao aia onimaki aomata are e taetae nakoia te burabeti e kona ni buokiko n atai bwaai ake e nanonii n ana taeka.
Korei Am Iango ao Am Namakin
A mwaiti kawai aika ko kona ni koroi iai mwiin am namakin aika a roko n am tai ni kamatebwai. Te katooto, ko kona ni mwaakena te taeka ae nano ke kibuntaeka ao koroi am iango bwa te bwai ae e na taraaki inanon am boki ae tabu. Ko kona naba ni kawakina te tieno ibukin atatai aika nano, namakin, ao iango aika ko karekei.
Kamatebwaia aia Taeka Burabeti ao Abotoro ni Boong Aika Kaitira
Wareki bwaai aika a tia n anga reirei iaona burabeti ao abotoro ni boong aika kaitira ibukin taian reirei aika ko kunei inanon booki aika tabu (te katooto, taraa conference.ChurchofJesusChrist.org ao ana maekatiin te Ekaretia).
Tibwauai Atatai Aika a Nano
Maroroakinan atatai aika a nano n oin am kamatebwai tiaki ti te kawai ae tamaroa n reiakinaia tabeman, ma e ibuobuoki naba ni kakorakora otam n te bwai ae ko a tia ni warekia.
Maiuakin Bwai Ake Ko Reiakinii
Kamatebwaian koroboki aika tabu a na aki tii kaungaira ma a na bitii naba tein maiura. Kakauongo nakon ana kairoro te Tamnei n te bwai ae ko na karaoia ngkana ko wareware, ao motinnanoia bwa ko na karaoi kairoro aikanne.
E taku Bednar: “Ti riai n aki kantaningaa te Ekaretia bwa te bootaki ae e na reireiniira man tuangiira bwaai ni kabane ake ti riai n atai ao ni karaoi n riki bwa taan iriiria aika kakaonimaki ao n teimatoa n ninikoria ni karokoa te toki[taraa Reirei ao Berita aika Tabu 121:29]. Ma, bon tabera reiakinan bwaai ake ti riai n reiakin, ni maiuakin ake ti bon ataia bwa ti riai ni maiuakinna, ao n riki bwa aomata are e kantaningaia te Mwaatita bwa tina karekea. Ao mwengara bon te tabo ae tamaroa ibukin reiakinana, maiuakinana, ao rikirakera are tina karekea” (“Katauraoi ni Karekei Bwaai Nako aika Kainnanoaki,” Riaona, Meei 2019, 102).