“Kabonganaakin Nakomai, Iriirai—Ibukiia Aomata n Tatabemaniia ao Utu,” Nakomai, Iriirai—Ibukiia Aomata n Tatabemaniia ao Utu: Te Nu Tetemanti 2023 (2022)
“Kabonganaakin Nakomai, Iriirai—Ibukiia Aomata n Tatabemaniia ao Utu,” Nakomai, Iriirai—Ibukiia Aomata n Tatabemaniia ao Utu: 2023
Kabonganaakin Nakomai, Iriirai—Ibukiia Aomata n Tatabemaniia ao Utu
Antai ae E Katauaki Ibukin te Bwai n Ibuobuoki Aei?
Te bwai n ibuobuoki aei bon ibukiia aomata n tatabemaniia ao utu n te Ekaretia. E karaoaki bwa e na buokiko n reiakina te euangkerio—ngkana tao bon ti ngkoe ke ma am utu. Ngkana ko tuai ni kamatebwaia te euangkerio n taai aika a nako, e kona ni buokiko te bwai n ibuobuoki aei ni waakina am kamatebwai. Ngkana e a kaman maeuakina reiakinan te euangkerio, e kona te bwai n ibuobuoki aei ni buokiko ni karekei am atatai aika a na rangi ni uaana riki.
N na Kanga ni Kabonganaa te Bwai n Ibuobuoki Aei?
Kabongana te bwai n ibuobuoki aei ni kawai aika a na ibuobuoki nakoim. Ko kona ni kunea bwa e rangin n ibuobuoki bwa te kairi ke te buoka ibukin kamatebwaian booki aika tabu i bon iroum ao am utu. Ko kona naba ni kabongana n te kainutu. Te kabwarabwara aei e katurui reirei ake a kuneaki n te Nu Tetemanti, e anga iango ibukin te kamatebwai ao waaki ni kakukurei ibukiia aomata n tatabemaniia ao utu, ao e katauraoi tabo ibukin korean ami namakin.
Nakomai, Iriirai—Ibukiia Aomata n Tatabemaniia ao Utu e aki kantaningaaki bwa e na onomwi ke n kaiangatoa ma bwaai aika tamaroa ake ko karaoi n reiakina te euangkerio. Irii ana kairiiri te Tamnei ni baireia bwa ko na kanga ni kamatebwaia ana taeka te Atua.
E na Kanga te Bwai n Ibuobuoki aei n Irekereke ma Bwaai Aika a Riki n te Ekaretia?
Kamataata n te bwai n ibuobuoki aei a baireaki nakon bairean tai ni wareware n te wiiki. Te boki Nakomai, Iriirai e boongana bukin te Moanrinan, ibukin te Reirei n Tabati, ao ibukin te Kooram n te Nakoanibonga ae te Aaron ao aia Kiraati Kairake n Ataeinnaine a irii taai aika ti tearona. Ni bouka am kekeiaki n reirei ao ni maiuakina te euangkerio ni mweengam, a na anganiko am tia reirei n te ekaretia am tai n tibwauai am atatai, am iango, ao am titiraki iaon koroboki aika tabu aika ko a tia ni kamatebwaia ni mweengam.
Bukina bwa te Reirei n Tabati e karaoaki tii uoua te tai n te namwakaina, taan reirei n te Reirei n Tabati a na rineia ke n taonna ke ni ikotii reirei ake a baireaki n teimatoa n irii babaire ni katoa wiiki. Aio e riai naba (ibukin te Reirei n Tabati ao te Moanrinan) inanon wiiki ngkana bootaki n Taromauri aki karaoaki ibukin maungatabu n te titeiki ke ibukina riki tabeua. Inanon wiiki aikai ko kaoaki bwa kona reitinako ni kamatebwaia te Nu Tetemanti ni mweengam.
E Riai Bwa N na Ira te Babaire Anne?
Bairean te tai anne e na buokiko ni kabanea warekan Te Nu Tetemanti n tokin te ririki aei. N reitaki ma anne, irakin te aeka ni babaire anne n aroia tabeman e kona ni kairi nakon atatai aika uaana ni mweengam, n te ekaretia, ao n taabo nako. Ma tai iangoia bwa ko kabaeaki n ira taina ke ni kairoroaki bwa ko na wareki kibu n kabane; te baire anne bon ti te kairi ni buokiko n barongaiko. Te bwai ae moan te kakaawaki bwa kam a reiakina te euangkerio n tatabemani ngkami ao n ami utu.