te utu ae a taraa te kaintamnei

Ritembwa 26–Tianuare 1

Bon Tabera Reiakinara I bon Iroura

Oin te kantaninga ibukin koroboki aika tabu bwa e na buoki ngkami nakon Kristo ao ni kamatoai ngkami inanon Ana euangkerio. Nakomai, Iriirai—Ibukiia Aomata n Tatabemaniia ao Utu e kona ni buoka kamamataakim ni koroboki aika tabu ao ni kunea i nanona te kakorakoraaki n te maiu n tamnei are ko kainnanoia ma am utu. Ngkanne, am kiraati n te Ekaretia, e na reke am tai ni tibwauai atatai ao ni kaungaaia raoraom Aika Itiaki n aia kekeiaki n iriira Kristo.

Korei Am Namakin

“Tera ae kam ukoukoria?” E titirakiniia ana reirei Iesu taekan Ioane te Tia Bwabetito (Ioane 1:38). Ko na bon konaa n titirakinikote aekaki n titiraki naba anne—bwa teraare ko kunea n te Nu Tetemanti n te ririki aei e na bon nako man te bwai are ko ukoukoria. “Kam na ukeuke, ao ane e na reke i roumi” bon ana berita te Tia Kamaiu (Mataio 7:7). Ngaia are tabeka te titiraki are e roko n am iango ngkai ko kamatebwai, ao ngkanne botumwaaka ukoukori taian kaeka. N te Nu Tetemanti ko na wareki rongorongon aia taneiai n tamnei ae moan te korakora ana reirei Iesu Kristo. Ngkai ana reirei te Tia Kamaiu ae moan te kakaonimaki, ko kona ni karekei oin am taneiai n tamnei aika moan te korakora ngkai ko butimwaea ana kakao te Tia Kamaiu, are e kuneaki i nanon te waorium ae tabu aei, “Nakomai, iriirai” (Ruka 18:22).

te kanikinaa ibukin te kamatebwai i bon iroum

Iango ibukin te Kamatebwai i bon Iroum ni Koroboki aika Tabu

N reiakinaki raoi mairoun te Tia Kamaiu, I riai ni butimwaea Ana kakao, “Nakomai, Iriirai.”

Ana kakao te Tia Kamaiu, “Nakomai, Iriirai, ” e kaineti nakoia aomata ni kabane—ngkana tao ti tuai n iriira Iesu Kristo i nanon te tai ae maan ke ti a tia n iriiria inanon maiura ae bwanin. Bon aio Ana kakao nakon te rorobuaka ae kaubwai are e kataia ni kawakin tua (taraa Mataio 19:16–22; Ruka 18:18–23). Tera are e reiakinna te rorobuaka—ao tera are ti riai ni bane n reiakinna—bwa te riki n aron ana reirei nanona ti na anga nanora ae bwanin nakon te Tama are i Karawa ao Iesu Kristo. Ti karekea te rikirake i nanon rikira bwa ana reirei ngkai ti kinai baika ti kabwaka iai, karaoi bitaki, ao n ukeuke rikibwa ti aonga n bon kawaninii ni kabane.

Reiakinaki mairoun te Tia Kamaiu e moanaki ma ngke ti kataia n ota n te bwai are E reireia. N aron te katoto, e kanga otam ni kakorakora tenanorinano ngkai ko ukeukerii baikai?

• Ana reirei te Tia Kamaiu (taraa Mataio 18:1–5; Ruka 18:9–14)

• Te katoto man Maiuna (taraa Ioane 13:1–15)

Ngkana ko tangiria ni kan reiakinaki riki, kataa te waaki aei ma teuana reirein te euangkerio, n aron te tangira ke te kabwarabure.

Iai katabeau ibukin reiakinau ibon irou. .

E taku Unimwaane David A. Bednar: “Ti riai n aki kantaningaa te Ekaretia ngkai te bootaki bwa e na reireiniira man tuangiira bwaai ni kabane ake ti kainnanoi n atai ma ni karaoi ao n riki bwa ana reirei aika kakaonimaki ao n teimatoa n ninikoria ni karokoa te toki. Ma, bon tabera te reiakinna bwa tera ae riai n atai , maiuakinan te maiu are ti bon ataia bwa ti riai ni maiuakinna, ao te riki bwa aomata are e kantaningaia te Mwaatita ibukira. Ao mwengara bon te tabo ae katauaki ibukin reiakinan te rabakau, maiu, ao ni karekei” (“Prepared to Obtain Every Needful Thing,” Riaona, Meei 2019, 102).

Tera ae nanonaki n ae tabem bon karekean te rabakau? Kakaei kaeka ake a kona n reke n ana maroro Unimwaane Bednar ao i nanon koroboki aika tabu aikai: Ioane 7:17; 1 I-Tetaronike 5:21; Iakobo 1:5–6, 22; 2:17; 1 Nibwaai 10:17–19; 2 Nibwaai 4:15; Aramwa 32:27; ao Reirei ao Berita aika Tabu 18:18; 58:26–28; 88:118. Tera ae ko namakinna bwa ko kan karaoia bwa ko aonga riki n reiakina taekan te euangkerio?

I riai n ataa te koaua i bon ibukiu.

Tao ko bane ni kinaia aomata ake a taraa n aki kona ni bua aia onimaki, n aki tabe ma baika a riki i nanon maiuia. A kona ni kauringko taekaia niman kibono ake a wanawana n ana taetae ni kaikonaki te Tia Kamaiu (taraa Mataio 25:1–13). Te bwai ae ko aki nooria bon aia botumwaaka n aia kekeiaki ni kakorakorai aia kakoaua ibukin te koaua.

Ti kanga ni karekea ao n ribanai oin ara koaua? Korei am iango ngkai ko iangoi koroboko aika tabu akana imwiina aikai: Ruka 11:9–13; Ioane 5:39; 7:14–17; Makuri 17:10–12; 1 I-Korinto 2:9–11; ao Aramwa 5:45–46. (Taraa naba Gospel Topics, , “Testimony,” topics.ChurchofJesusChrist.org.)

te ataeinnaine irarikin te kawai

Ngaira n tatabemaniira nako ti riaikarekei ara koaua i bon ibukira.

Tera ae I riai ni karaoia ngkana iai au titiraki?

Ngkai ko ukeukeri atatai n tamnei, a na roko titiraki n am iango. Reirei akana imwiina a na kona ni buokiko ni maroroakin titiraki n aanga are a na nikoa am onimaki ao am koaua:

• Ukora te atatai mairoun te Atua. Te Atua boni ngaia oin koaua ni kabane, ao E kaota te koaua rinanon te Tamnei ae Raoiroi, koroboki aika tabu, ao Ana burabeti ao abotoro.

• Mwakuri ma te Onimaki. Ngkana akea te kaeka ae roko n te tai naba arei, onimaki bwa te Uea e na kaoti kaeka n taina ae angaraoi. Inanon te tai moa aei, kateimatoa maiuakinan te koaua are ko a kaman ataia.

• Kateimatoa te nonori ae akea tokina. Kataia noori bwaai n aron are e noori te Uea, tiaki n aron ana nonoori te aonaaba. Tarai am titiraki n ana kantaninga Tamara are i Karawa n ana babaire ni kamaiu.

te aikaon ibukin te kamatebwai n te utu

Iango ibukin Kamatebwai ni Koroboki aika Tabu n te Utu ao te Bootaki n te Tairiki

Mataio 13:1–23.Ni buoka am utu ni katauraoia n reiakinaki man te Nu Tetemanti n te ririki aei, ko kona ni wareka te kaikonaki are taekan te tia ununiki. A na kona ni kakukureiia am utu n otinako nako tinaniku ao ni kakaeai taano aika a kakaokoro ake a kabwarabwaraaki n te taetae ni kaikonaki. Ti na kanga ni karaoi nanora bwa a na riki bwa kanga “te tano ae raoiroi” are e kabwarabwara Iesu? (Mataio 13:8).

I-Karatia 5:22-23; I-Biribi 4:8.E kaoko Beretitenti Russell M. Nelson ni “bita [mweengam] nakon te tabo ni katanan te onimaki” ao ni “manga moan kabooua mweengam nakon tabo ibukin reiakinan te euangkerio.” Nakoia tee koraki ake a karaoi bwaai aikai, e berita: “Natimi a na kukurei n reiakina ao ni maiuakin Ana reirei te Tia Kamaiu, ao korakoran ana kairoro teuare e buakaka inanon maiumi ao inanon mweengami e na keerikaki. Bitaki n am utu e na korakora ao e na teimatoa” (“Becoming Exemplary Latter-day Saints,” Riaona, Nob. 2018, 113).

Ni moan te ririki ae boou bon te tai ae rangi n tamaroa ni karaoan te maroroo n utu ibukin karaoan mweengam bwa “te tabo ibukin katanan te onimaki” ao “te tabo ibukin reiakinan te euangkerio.” Tera taian iango ibukin karaoan aei ae roko n am iango ngkai ti wareka I-Karatia 5:22–23 ao I-Biribi 4:8? A kona am utu ni katea aia kouru i bon ibukiia n onoti ao ibukin te utu ni kamatebwaia te Nu Tetemanti n te ririki ae na roko. Tera ae ti na karaoia ni kauringiira ibukin ara kouru?

Ibukin iango aika a mwaiti riki ibukiia ataei, taraa te kamataata n te wiiki aei inanon Nakomai, Iriirai—Ibukin te Moanrinan.

Te anene ae rineaki: “Teach Me to Walk in the Light,” Aia Boki n Anene Ataei,, 177.

Kanakoraoan Am Kamatebwai I Bon Iroum

Tarai reirei. Te reirei bon te koaua ae akea tokina, ae aki bibitaki. E katanoata Beretitenti Boyd K. Packer bwa “ataakin raoi reirei ni koaua, e na biti anuaia ao kateia aomata” (“Little Children,” Ensign, Nob. 1986, 17). Ngkai ngkoe ma am utu kam kamatebwai koroboki aika tabu, kakaei koaua ake a na kona ni buokiko ni maiuakin riki maeun te Tia Kamaiu.

Iesu Kristo

Otan te Aonnaba,, iroun Brent Borup