Tianuare 16–22

Ioane 1

E a Reke i Roura te Mesia

Ngkai ko wareka ao n iangoa raoi Ioane 1, korei am namakin ake ko karekei. Tera te rongorongo ae ko kunei ake a kakawaaki nakoim ao nakon am utu? Tera ae ko kona n tibwauaia n am kiraati n te Ekaretia?

Korei Am Namakin

Ko a tia ni miimi ngkana tao arona bwa ko a tia ni kinaa Iesu mai Natareta ngkai bon Natin te Atua ngke arona bwa ko maiu n Ana tai ni mwakuri n te maiu aei? Inanon ririki, kaiin Iteraera aika a kakaonimaki, n raonaki ma Anterea, Betero, ao Biribi, ao Natanaera a kaman kakaantaninga ao n tataro ibukin okin te Meetia are e taekinaki n te berita. Ngke a kaitibo ma Ngaia, a kanga n ataia ae bon ngaia Teuare a kaman ukoukoria? Ti te arona te kawai ibukira ni kabane ni kinaa te Tia Kamaiu—man butimwaean te kakao “Mai ao noria” i bon ibukira (Ioane 1:39). Ti wareka rongorongona ni koroboki aika tabu. Ti ongora n Ana reirei. Ti kamwataua n taraa aron Maiuna. Ti namakina Tamneina. Inanon te mwananga, ti kunea, n aron are e karaoia Natanaera, bwa e kinaira ao e tangiriira te Tia Kamaiu ao e tangiria bwa ti na katauraoira ni karekei “baika abwabwaki riki” (Ioane 1:50).

Iango ibukin te Kamatebwai i bon Iroum ni Koroboki aika Tabu

Antai Ioane?

Ioane bon ana reirei Ioane te Tia Bwabetito ao imwiina e riki bwa temanna te tia iriira Iesu Kristo ao temanna mai buakoia Ana Abotoro ake Tengaun ma Uoman. E korea te Euangkerio are Ioane, tabeua reeta, ao te boki ae te Kaotioti. N ana Euangkerio, e aranna bwa ngaia ana reirei “are e tangiraki iroun Iesu” ma “te reirei are temanna” (Ioane 13:23; 20:3). E rangi ni korakora ingaingan nanon Ioane n taetaekina te euangkerio are e a bubuti bwa e na tiku iaon te aba ni karokoa Kauoakin te Tia Kamaiu bwa e aonga ni kairiia tamnei nakon Kristo (taraa Reirei ao Berita aika Tabu 7:1–6).

Taraa naba Bible Dictionary, “Ioane,” “Ioane, ana Euangkerio.”

Ioane 1:1–5

Iesu Kristo “e memena iroun te Atua i imwain karikan bwaai.”

E moana ana Euangkerio Ioane man kabwarabwaraan te mwakuri are e karaoia Kristo imwaain Bungiakina: “Ngke a tuai karikaki bwai … te Taeka[Iesu Kristo] e memena iroun te Atua.” Tera ae Ko reiakinna man kiibu aikai 1–5 n taekan te Tia Kamaiu ao Ana mwakuri? Ko kona ni kunei kamataata aika a na kona ni ibuobuoki n n ana Rairairi Iotebwa Timiti, Ioane 1:1–5 (n te Bible appendix). Ngkai ko moana am kamatebwai ibukin maiun te Tia Kamaiu, bukin tera ngkai e kakawaki ataakin Ana mwakuri n te maiu imwaain te maiu aei?

Taraa naba Gospel Topics, “Jesus Christ Chosen as Savior,” topics.ChurchofJesusChrist.org.

Ioane 1:1–18

Iesu Kristo bon ““te Ota ni koaua”natin te Atua.

E kaungaaki nanon Ioane bwa e na ukoukora te Tia Kamaiu ibukin ana kakoaua Ioane te Tia Bwabetito, are e katanoata bwa bon ngaia“te ota are e roko bwa te tia kaotioti ibukin … te ota arei” (Ioane 1:8–9). Ioane i bon irouna e kaota naba ana kakoaua ae moan te korakora ibukin maiun ao ana mwakuri te Tia Kamaiu.

E kona naba ni kakukurei karinani koaua ake e kaairi Ioane ni kaukan ana kakoaua ibukin Kristo (kiibu 1–18; taraa naba Ana Rairairi Iotebwa Timiti, Ioane 1:1–19 [n te Bible appendix]). Bukin tera n am iango ngkai Ioane e moana ana euangkerio ma koaua aikai? Iangoia korea am kakoaua ibukin Iesu Kristo—tera ae ko tangiria n tibwauaia? Tera taneiai are a tia ni buokiko n kinaa ao n iriira te Tia Kamaiu? Antai ae na kona ni kakabwaiaaki man ongoraean am kakoau?

Ioane 1:11–13

Iesu Kristo e anganiira “te kona n riki” bwa natin te Atua mwaane ao aine.

E ngae ngke ngaira ni kabane natin te Atua aine ao mwaane, ngkana ti karaoa te bure ti a riki n aki kaan, ke ni karaurenakoaki, mai Irouna. Iesu Kristo e anganiira kawaira n oki rinanon Ana anga karea ni kamaiu. Iangoia tera ae reiakinaki n Ioane 1:11–13 n riki bwa natin te Atua aine ao mwaane. Iangoia naba bwa tera ae a reiakinaki ni koroboki aika tabu arora ni karekea te bwaintangira aei: I-Rom 8:14–18; Motiaea 5:7–9; Reirei ao Berita aika Tabu 25:1. Tera nanon aei iroum ni karekea “te kona n riki” bwa natin te Atua te aine ke te mwaane?

Ioane 1:18

E kaota ana kakoaua te Tama ibukin Natina.

Ioane 1:18 bon akea temanna ae tia n nora te Atua ma ngkoa. E ngae n anne, ana Rairairi Iotebwa Timiti ibukin te kibu aei e kamataata bwa “Ao akea te aomata ae nora te Atua n te tai teuana, ma ti are e a tia ni kakoaua ibukin te Nati” (taraa Ioane 1:18, bwaai aika a na taraaki inano c). Iangoia n rinanon katoto aikai ike te Atua ae te Tama e ongo te aba ana kakoaua ibukin Natina: Mataio 3:17; 17:5; 3 Nibwaai 11:6–7; Iotebwa Timiti—Rongorongo 1:17.

Bukin tera ngkai bon te kakabwaia reken rongorongo aikai? Tera ae ko reiakinaki iai ibukin ana reitaki Iesu Kristo ma Tamana?

Iango ibukin Kamatebwai ni Koroboki aika Tabu n te Utu ao te Bootaki n te Tairiki

Ngkai ti kamwatebwai koroboki aika tabu, ti na karekea te unga n nano mairoun te tamnei ibukin maiura.

Ioane 1:4–10.Ko na kanga ni buokiia am utu ni katamnei baike a tia ni wareki ibukin te ota inanon kiibu aikai? Ko kona ni butiia am utu bwa a na ikaruoruo ni kaota te ota inanon te ruu ae rotongitongo nanona ao n tibwauaia bwa e kanga n riki te Tia Kamaiu bwa te Ota inanon mauia. Ngkanne, ngkai ko wareka Ioane 1:4–10, e na kona n iai rakan aia atatai kaain am utu ibukin ana kakoaua Ioane ibukin Iesu Kristo, Otan te Aonaaba.

Ioane 1:35–36.Bukin tera ngkai Ioane te Tia Bwabetito e arana Iesu “ana Tibutetei te Atua”? Tera ae ti reiakinna man te nakoa aei man ana rongorongo Unimwaane Elder Jeffrey R. Holland “Nora ana Tibutetei te Atua” ke ana rongorongo Unimwaane Gerrit W. Gong “Te Tia Kawakin tiibu ae Raoiroi, Ana Tiibutetei te Atua”? (Riaona, Meei 2019, 44–46, 97–101)

Ioane 1:35–46.Tera are e riki imwiin ana kakoaua Ioane? Tera ae a kona n reiakinna am utu mairouia aomata ake a kabwarabwaraaki inanon kiibu aikai bwa a kanga n tibwaua te euangkerio? Taraa naba te witeo “Inviting Others to ‘Come and See’” (ChurchofJesusChrist.org).

Ioane 1:45–51.Tera ae karaoia Natanaera are e buokia ni karekea ana kakoaua ibukin te Tia Kamaiu? Kaoia kaain am utu ni maroroakinna bwa e kanga n reke aia koaua.

Ibukin iango aika a mwaiti riki ibukiin reiakinaia ataei, taraa te kamataata n te wiiki aei n Nakomai, Iriirai—Ibukin te Moanrinan.

Te anene ae rineaki: “The Lord Is My Light,” Boki n Anene, nambwa 89.

Kanakoraoan Ara Anga reirei

Tibwauai reirei man bwaai ni kabootau. Kaoia kaain am utu bwa a na kakaei bwaai ake a na kona ni kabonganai ni buokia ni kaotaia man taian reirei ake kam kunei ni koroboki aika tabu aika kam warekia n ami utu. N aron te katooto, a kona ni kabongana te taura nenea n te tei ibukin Otan Kristo (taraa Ioane 1:4).

Iehova E Karika Aonaaba,iroun Walter Rane