“Tianuare 23–29. Mataio 3; Mareko 1; Ruka 3: Katauraoa Kawain te Uea. Nakomai, Irirai - Ibukiia Aomata n Tatabemaniia ao Utu: Te Nu Tetemanti 2023 (2022)

“Tianuare 23–29. Mataio 3; Mareko 1; Ruka 3” Nakomai, Iriirai—Ibukiia Aomata n Tatabemaniia ao Utu: 2023

Tamnei

Ioane Te Tia Bwabetito e bwabetitoa Iesu

Te winto ae kirimatamata n te Nauvoo Illinois Tembora, iroun Tom Holdman

Tianuare 23–29

Mataio 3; Mareko 1; Ruka 3

“Katauraoa Kawain te Uea.”

Moanna man warekan Mataio 3; Mareko 1; ao Ruka 3. Ngkai ko tataro ibukin te Tamnei ae Raoiroi bwa E na buokiiko n kamataatako ni mwakoro aikai, E na anganiko te nonoori ae onoti ibukim. Korei mwiin namakin aikai ao karaoi am babaire ake ko na mwakuri iaoia.

Korei Am Namakin

Iesu Kristo ao Ana euangkerio e kona ni bitiko. Ruka e taekina ana taeka ni burabeti ngkoa Itaia are e taekin bwaai ake a na riki n rokon te Tia Kamaiu: Ane ana bane ni kaonaki marua, ao a na bane ni karinanoaki maunga ao tabuki; ao a na kabooraoaki taabo aika a boobuaka. ao a na kaboraoaki kawai akana a tabukibuki” (Ruka 3:5; taraa naba Itaia 40:4). Aio bon te rongorongo ibukira ni kabane, n ikotaki ma koraki ake a taku bwa aki kona ni bitaki. Ngkana te bwai teuana ae matoa n aron te maunga e kona ni kaboraoaki, ni koauana ngkane te Uea e kona ni buokiira ni kaeti kawaira ake a baoua (taraa Ruka 3:4–5). Ngkai ti kariaia ana kakao Ioane te Tia Bwabetito n rairi nanora ao ni bitaki, ti katauraoi ara iango ao nanora ni butimwaea Iesu Kristo n te aro are ti na kona naba n “taraa ana kamaiu te Atua” (Ruka 3:6).

Tamnei

te aikaon ibukin te kamatebwai i bon iroum

Iango ibukin te Kamatebwai i bon Iroum ni Koroboki aika Tabu

Antai Mareko?

Ibuakoia taan korobokii n te Euangkerio, ti ataa teutana taekan Mareko. Ti ataia bwa bon ngaia te mitinare raoia Bauro, Betero, ao mitirnare riki tabeman. A mwaiti taan reiakina te baibara are a kakoaua bwa Betero e tuanga Mareko bwa E na korei bwaai ake a riki n ana tai te Tia Kamaiu. Ana Euangkerio Mareko kanga e bon koreaki imwaia naake teniman.

Tara Bible Dictionary, “Mareko.”

Mataio 3:1–12; Mareko 1:1–8; Ruka 3:2–18

Te raira nano bon te bitaki ae korakora n te iango ao te nano.

Ana mition Ioane te Tia Bwabetito bon katauraoan nanoia aomata ni butimwaea te Tia Kamaiu ao n riki n ai Arona. E kanga ni karaoa anne? E katanoata “Rairi nanomi” (Mataio 3:2). Ao e kabonganai bannan uanikai n aron te wiita n reirei iaon te raira nano (taraa Ruka 3:9, 17).

Tera tabeua banna are ko kunei n rongorongon ana mwakuri Ioane te Tia Bwabetito? (taraa Mataio 3:1–12; Mareko 1:1–8; Ruka 3:2–18). Iangoia ni mwakeni inanon am boki aika tabu ke ni koroi tamneia. Tera ae a reireinira banna aikai ibukin taekan te reirei ao riain te raira nano?

Te rairannano ni koaua bon te “bitaki n te kantaninga, te taratara ae boou ibukin te Atua, tarakira ibon iroura, ao ni kaineti ma te aonaaba.… [E nanonaki] bitakin te nano ao te kantaninga nakon te Atua” (Bible Dictionary, “Repentance”). N Ruka 3:7–14, tera taian bitaki ake Ioane e kaoiia aomata bwa ana karaoi ibukin katauraoakiia ni butimwaea Kristo? E na kanga te reirei aei n uaana nakoim? Ko na kanga ni kaotia ae ko a rairananom ni koaua? (taraa Ruka 3:8).

Taraa naba Russell M. Nelson, “Ti Kona ni Karaoa ae Tamaroa ao ni Katamaroaki Riki,” Riaona, Meei 2019, 67–69; Dallin H. Oaks, “Kaitiakaki man te Rainannano,” Riaona, Meei 2019, 91–94.

Mataio 3:7; Ruka 3:7

Antai Baritaio ao Tarukaio?

Baritaio bon kaain te aro n Iutaia ake a kamoamoia ni matoa ni kawakin ana tua Mote ma kateina. Tarukaio bon kaain Iutaia aika a kaubwai ake ataa te aro ma te tua n tautaeka; ma aki kakoaua te reirei n te mangauti. Kurubu aikai a tannako man irakin ana tua te Atua.

Taraa naba Mataio 23:23–28; Bible Dictionary, “Pharisees,” “Sadducees,”

Mataio 3:11, 13–17; Mareko 1:9–11; Ruka 3:15–16, 21–22

E bwabetitoaki Iesu Kristo bwa e na “kakoroa nanon te raoiroi.”

Ngke ko bwabetitoaki,ko irira ana banna ni katooto te Tia Kamaiu. Kabotaua bwa tera ae ko reiakinna man rongorongon bwabetitoan te Tia Kamaiu ma aree riki inanon am tai ni bwabetito.

Bwabetitoan te Tia Kamaiu	Au Bwabetito
Bwabetitoan te Tia Kamaiu Antai ae bwabetitoa Iesu, ao tera te kariaiakaki are irouna?	Au Bwabetito Antai ae karaoa am bwabetito, ao tera te kariaiakaki are irouna?
Bwabetitoan te Tia Kamaiu E bwabetitoaki iaa Iesu?	Au Bwabetito E karaoaki iaa am bwabetito?
Bwabetitoan te Tia Kamaiu E kanga ni bwabetitoaki Iesu Kristo?	Au Bwabetito Ko kanga ni bwabetitoaki?
Bwabetitoan te Tia Kamaiu Bukin tera e bwabetitoaki Iesu?	Au Bwabetito Bukin tera ko bwabetitoaki?
Bwabetitoan te Tia Kamaiu E kanga Tamara are i Karawa ni kaotia bwa E kukurei iroun Iesu?	Au Bwabetito E kanga ni kaotia Tamara arei Karawa bwa E kukurei ngke ko bwabetitoaki? E kanga Ngaia ni kaota Ana kariaia man te tai arei ni karokoa ngkai?

Taraa naba 2 Nibwaai 31; Motiaea 18:8–11; Reirei ao Berita aika Tabu 20:37, 68–74; “The Baptism of Jesus” (video), ChurchofJesusChrist.org.

Mataio 3:16–17; Mareko 1:9–11; Ruka 3:21–22

Taian Atua n te Atu n Atua bon teniman rabwata aika maenako.

A mwaiti kanoan te Baibara ake a kaotii kakoaua ae kain te atu n atua bon teniman rabwata aika maenako. Rongorongon bwabetitoan te Tia Kamaiu bon teuana te katooto. Ngkana ko wareki rongorongo aika, iangoia raoi bwa tera ae ko reiakinna iaon te atu n atua. Bukin tera ngkai reirei aikai a kakawaki iroum?

Taraa naba Karikani Bwaai 1:26; Mataio 17:1–5; Ioane 17:1–3; Mwakuri 7:55–56; Reirei ao Berita aika Tabu 130:22.

Tamnei

te aikaon ibukin te kamatebwai n te utu

Iango ibukin Kamatebwai ni Koroboki aika Tabu n te Utu ao te Bootaki n te Tairiki

Mataio 3.Ioane te Tia Bwabetito e taua te Nakoanibonga ae te Aaron. Tera ae ti kona n reiakinna man ana katooto Ioane n te kantaninga iaon te Nakoanibonga ae te Aaron? Tera taian kakabwaia ae ti karekei man te Nakoanibonga ae te Aaron? Ngkana iai te ataeinimwaane n am utu, anaa am tai ni buokia bwa e na mataata bwa e na kanga ni kabongana te Nakoanibonga ae te Aaron n kakabwaiaia tabeman. (Taraa naba Reirei ao Berita aika Tabu 13:1; 20:46–60.)

Ngkana ti bwabetitoaki, ara bure a kaitiakaki.

Mataio 3:11–17; Mareko 1:9–11; Ruka 3:21–22.A tia kaain am utu n noora temanna ae bwabetitoaki ke ni kamatoaki bwa kaain te Ekaretia? Tera ae a namakinna kaain am utu? Tao ko na kona n reirei nakoia taekan kanikinaean te bwabetito ao te kamatoaaki. E kanga te bwabetito ao te kamatoaki n tei bwai kanga ai aron te bungiaki ae boou? Bukin tera bwa ti riai n kateboaki iaan te ran ngkana ti bwabetitoaki? Bukin tera ae ti baini mwainaina ngkana ti bwabetitoaki? Bukin tera bwa e rangi ni kakawaki ana bwaintituaraoi te Tamnei are Raoiroi ni kamatataaki bwa te „“babetito n te ai„“? (Reirei ao Berita aika Tabu 20:41; taraa naba Bible Dictionary, “Bwabetito,” “Tamnei ae Raoiroi”).

Mataio 3:17; Mareko 1:11; Ruka 3:22.Nningai ae ti a tia n namakinna bwa te Atua e kukurei iroura? Tera ae ti kona ni karaoia n te utu ni kakukureia te Atua?

Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Te anene ae tamaroa: “Baptism,” Aia Boki n Anene Ataei,100–101.

Kanakoraoan Am Kamatebwai

Bubutia te Uea ibukin te ibuobuoki. A kanakoaki booki aika tabu n te kaotioti, ao ni mataata iaoia ti bon kainnanoa te kaotioti i bon iroura. E a tia ni berita te Uea, “Bubuti, ao ane kam na anganaki; kam na ukeuke, ao ane e na reke iroumi; kam na karebwerebwe, ao ane e na kaukaki nakoimi” (Mataio 7:7).