Iango ni Kanakoraoa Am Kamatebwai ni Utu ni Koroboki Aika Tabu

Kamatebwaian koroboki aika tabu n te utu n tainako bon te kawai ae korakora ae e na buoka am utu n reiakina te euangkerio. Mwaitira ao maanra ae ko warekia ni bootaki ma am utu e aki kakawaki riki nakon ae ko na teimatoa n am kekeiaki. Ngkana ko karaoa te kamatebwai ni booki aika tabu bwa te waaki ae kakaawaki ibukin maiuia am utu, ko na buokiia kaain am utu ni kaan riki ma Tamara are i Karawa ao Iesu Kristo ao ni katea aia koaua e aanaki n ana taeka te Atua.

Iangoi titiraki aikai:

• Ko na kanga ni kaungaia kaain am utu bwa a na kamatebwai booki aika tabu i bon irouia?

• Tera ae ko kona ni karaoia ni kaungaia am utu bwa a a tibwaua te bwai ae a reiakinna?

• Ko na kanga ni kamatatai reirei aika ko a tia n reiakin n Te O Tetemanti n taai n reirei ni katoabong?

Uringnga bwa te mweenga bon te tabo ae katauaki ibukin reiakinan te euangkerio. Ko kona n reiakinna ao n anga reirei iaon te euangkerio n te mweenga ni kawai ake a kona ni karaoaki inanon te kiraati n te Ekaretia. Ko na rangi ni kakauiango ngkana ko iangoi kawai ni buokiia am utu n reirei man booki aika tabu. Iangoi tabeua iango aikai ni kawaekoa am kamatebwai ni booki aika tabu.

Kabongana te Katangitang

Anenei anene aika a na kakorakorai reirei aika reiakinaki n koroboki aika tabu. Te anene ae tamaroa ke aia anene ataei bon kanoan naba te kabwarabwara ni katoa wiki. Ko kona n titirakiniia kaain am utu iaon taeka ke kibun te kuna. N raonaki ma te anene, a kona am utu ni karaoi kaiia are e nako ma te anene ke n ongora nakon te anene bwa katangitang n te baekiraun ngkana a karaoi mwakuri riki tabeua. Ibukin iango riki tabeua, taraa “Including Sacred Music in Your Gospel Learning” inanon te boki aei.

Tibwauai Koroboki Aika Tabu aika Uaana

Anganiia kaain te utu aia tai n tibwauai mwakoron koroboki aika tabu ake a tia ni kunei aika uaana n tain aia kamatebwai.

Kabonganai Oin Am Taeka

Kaoia kaain te utu bwa a na taekinna ni kakimototoa n oin aia taeka te bwai ae a tia n reiakinna man koroboki aika tabu.

Kabonganai Koroboki Aika Tabu nakon Maium

Imwiin warekan te mwakoro man koroboki aika tabu, tuangiia kaain te utu bwa a na tibwauai kawai bwa e kanga te mwakoro anne ni kaineti nakon maiuia.

Taekina te Titiraki

Kaoiia kaain te utu bwa a na tabeka te titiraki iaon te euangkerio, ao kabanea te tai ni kakaai kiibu are e na kona ni buokia ni kaekaa te titiraki.

Kaota te Koroboki ae Tabu

Rinea te kibu ae ko kunea bwa e uaana, ao kateia n te tabo are a na kona n nooria iai kaain te utu. Kaoia kaain te utu ake tabeman bwa a na rinea te kibu are a na kaotia.

Karaoa Karinanin Kiibu

Ni kabane kaain te utu, rinei tabeua kiibu ake ko tangiria ni maroroakinna n te wiiki ae e na roko.

Kamatenanoi Kiibu

Rinea te mwakoro man te kibu are e uaana nakon am utu, ao kaoiia kaain te utu bwa a na kamatenanoa man kaokiokia ni katoabong ke n takakaro n te keim ni kauring.

Tibwauai Reirei man Bwaai ni Kabootau

Kakaai bwaai aika irekereke ma reirein te euangkerio inanon karaki man koroboki aika tabu ake ko wareki ma am utu. Kaoia kaain te utu bwa a na taekinna bwa a kanga bwaai n tatabeua nako n irekereke ma reirei inanon koroboki aika tabu.

Bairea Atuun te Reirei

Tuangiia kaain te utu bwa ana karekea aia tai n rinei atuun reirei are ana bane ni kamatebwaia kaain te utu. Kabongana te Topical Guide, te Rikitinari n te Baibara, ke te Kairi nakon Koroboki aika Tabu (scriptures.lds.org) ni kakaai kiibu iaon atuun te reirei.

Korea te Tamnei

Wareki tabeua kiibu n te utu, ao imwiina karekea aia tai kaain te utu bwa a na korea te bwai teuana are e irekereke ma te bwai ae ko warekia. Kabanea te tai ni maroroakin aia tamnei temanna imwiin temanna.

Karaoa te Kaotioti n te Karaki

Imwiin warekan te karaki, kaoia kaain te utu bwa ana karaoa kaina. Imwiina, taekinna bwa e kanga te karaki n irekereke ma bwaai aika ko a tia n taneiai ni karaoi n tatabemaniia ao n te utu.

Beretitenti RussellM. E taku Nelson: “I berita bwa ngkana kam mwakuri korakora ni manga karaoa raoi mweengami bwa e na boboto n reiakinan te euangkerio, inanon te tai ami Tabati nako a na riki bwa boong ni kakukurei. Natimi a na kukurei n reiakina ao ni maiuakin Ana reirei te Tia Kamaiu, ao korakoran te kakaitara inanon maiumi ao ni mweengami e na keerikaki. Bitaki n am utu e na korakora ao e na kamatoaki” (“Becoming Exemplary Latter-day Saints,” Ensign ke Riaona, Nob. 2018,113).