Kabonganakin Nakomai, Iriirai—Ibukiia Aomata n Tatabemaniia ao Utu

Antai Ibukina te Bwai n Ibuobuoki Aei?

Te bwai n ibuobuoki aei bon ibukiia aomata n tatabemaniia ao utu n te Ekaretia. E karaoaki bwa e na buokiko n reiakina te euangkerio—tao i bon iroum ke ma am utu. Ngkana ko tuai ni kamatebwaia te euangkerio n taai aika nako, e kona ni buokiko te bwai n ibuobuoki aei ni waakina am kamatebwai. Ngkana e a kaman tia n reke kateim ae raoiroi iaon reiakinan te euangkerio, e kona te bwai n ibuobuoki aei ni buokiko ni karekei am atatai aika a na rangi ni uaana riki.

N na Kanga ni Kabongana te Bwai n Ibuobuoki Aei?

Kabongana te bwai n ibuobuoki aei ni kawai aika e na ibuobuoki nakoim. Ko kona ni kunea bwa e rangin n ibuobuoki bwa te kairi ke te buoka ibukin kamatebwaiakan booki aika tabu i bon iroum ao am utu. Ko kona naba ni kabongana n te kainutu. Te kabwarabwara aei e katurui reirei ake a kuneaki n te O Tetemanti, e anga iango ibukin te kamatebwai ao mwakuri ni kauring ibukiia aomata n tatabemaniia ao utu, ao e katauraoa te tabo ibukin korean aia namakin.

Nakomai, Iriirai—Ibukiia Aomata n Tatabemaniia ao Utu e aki kantaningaki bwa e na onei mwin ke n kaiangatoa ma bwaai aika tamaroa ake ko karaoi. Irii ana kairiiri te Tamnei ni baireia bwa ko na kanga ni kamatebwaia ana taeka te Atua.

E na Kanga te Bwai n Ibuobuoki aei ni Kaineti ma Tera ae Riki n te Ekaretia?

Te kamataata n te bwai n ibuobuoki aei a baireaki nakon bairean tain te wareware n te wiiki. Te boki Nakomai, Iriirai ibukin te Moanrinan, ibukin te Reirei n Tabati, ao ibukin te Kooram n te Nakoanibonga ae te Aaron ao Kairake n Ataeinnaine kiraati a irii taai aika ti tearona. Ni boutoka am kekeiaki n reirei ao ni maiuakina te euangkerio ni mweengam, a na anganiko am tia reirei n te aro am tai n tibwauai am atatai, am iango, ao am titiraki iaon koroboki aika tabu aika ko a tia ni kamatebwaia ni mweengami.

Bukina bwa te Reirei n Tabati e karaoaki tii uoua te tai n te namwakaina, taan reirei n te Reirei n Tabati a na rinea ke n taonna ke ni ikotii reirei ake a baireaki n teimatoa n irii babaire ni katoa wiiki. Aio e riai naba (ibukin te Reirei n Tabati ao te Moanrinan) inanon wiiki ngkana bootaki n Taromauri n tainako aki karaoaki ibukin maungatabu n te titeiki ke ibukina riki tabeua. Inanon wiiki aikai ko kaoaki bwa ko na reitinako ni kamatebwaia te O Tetemanti ni mweengam.

I Kainnanoia Bwa N na Ira te Babaire Anne?

Te babaire e na buokiko ni wareki boki ake a rineaki man te O Tetemanti ao te Bwaeao ae Bati Boona n toki ni banen te ririki. N reitaki ma anne, irakin te aeka ni babaire anne n aroia tabeman e kona ni kairi nakon atatai aika uaana ni mweengam, n te ekaretia ao n taabo nako. Ma tai iangoia bwa ko na riai n ira taina ke te kairoroaki bwa ko na wareki kibu n bane, te baire anne bon ti te kairi n buokiko n barongaiko. Te bwai ae kakawaki bwa kam reiakina te euangkerio n tatabemani ngkami ao n ami utu.

Bwaai aika a na taraaki ibukin Bairean te Wareware n te O Tetemanti

Are rineaki n tain warekan Nakomai, Iriirai ibukin 2022 e aki kairii mwakoro ni kabane inanon te O Tetemanti. Ibukina bwa te O Tetemanti e abwabwaki riki nakon waorium n koroboki aika a tabu ake tabeua, tabeua mwakoro ao booki a tia ni katukaki bwa kona kona riki ni bairea am tai ni wareware bon ibukim ao ibukiia am utu.

Mwakoro ao booki a rineaki bwa e na totokoa ae e a okioki ao ni kamatatai kibu ake a kakoaua Iesu Kristo, a korakora iai mwaitin reirei, ao riki a irekereke nakon ara bong. Te katooto, bairean wareware are e rineaki e aki kaira 1ao 2Rongorongo ibukina bwa angiin kanoan booki akanne a okioki inanon 1ao 2Uea. Te babaire aei e aki naba kaira ana Anene Toromon, ibukina bwa te Burabeti Iotebwa Timiti e reirei bwa tiaki koroboki aika kairaki n te tamnei (taraa Guide to the Scriptures, “Ana Anene Toromon,” scriptures.ChurchofJesusChrist.org). E ngae n anne, uringnga bwa aio bon ti rinerine aika baireaki ibukin te kamatebwai. Ami kamatebwai ni koroboki aika tabu ibon iroum ao n te utu e riai ni kairaki man te kaotioti nakoim.