Kairi Katangitangi aika Tabu n Am Tai ni Kamatebwaia te Euangkerio

Anenean kuna n te Moanrinan ao boki n anene e kona ni kakabwaiako ma am utu ni kawai aika a mwaiti. Iango aikai a kona ni buokiko ni kabonganai katangitang aika a tabu ngkai ko kataia n reiakinna ao ni maiuakina te euangkerio.

• Reiakin tuan reirei. Taratarai koaua ake a reiakinaki inanon kuna ake ko anenei ke n ongora nako iai. Aio are e kona ni kairi nakon maroroakinan te euangkerio iaon koaua aikai inanon te bong. Anenei ke ongoraeakini kuuna n te Moanrinan ke kuna n taromauri ake a reirei taekan Iesu Kristo ao Ana euangkerio. Kakauongo raoi nakon kawai ake e kakoaua iai te Tamnei ae Raoiroi iroun te Tia Kamaiu ao Ana reirei.

• Kinaakin mwaakan te katangitang. Anenean ke ongoraeakinan kuna n te Moanrinan ao kuna n taromauri e kona n riki bwa te kakabwaia inanon taai ni kainnano. Te katooto, aneneakin te kuna e kona ni kabebetea te teei n te tai ni matu, karekea te kimwareirei ngkai a ikotaki ni mwakuri kain am utu, kakukureia kain rarikim ae aoraki, ke ni karaua nanon temanna ae aki rau.

• Tibwai taneiai. Tibwa am taneiai ao aia taneiai am utu are e irekereke nakon te rongorongo iaon te anene. Ko kona naba n tibwai karaki man koroboki aika a tabu aika a irekereke.

• Kairiia am utu. Am utu a na karekea ae mwaiti riki man te kuna ngkana a rang kakamwakuri n ira te waaki. Arom ni kairiia kain am utu, ko kona ni kaoa natim ae ikawai riki bwa e na ibuobuoki n angareirei iaon te kuna nakon tarina ao mwanena aika uarereke riki ke ni kaoia ataei bwa a na reireiniia te utu te kuna are a reiakinna n te Moanrinan. Ko kona naba ni karekea aia tai kain te utu bwa a na ikaruoruo ni kaira te anene.

• Bwaina te kakauiango. Kabonganai kawai aika a kakaokoro n reiakin kuna aika a tabu inanon te utu. Te katooto, ko kona ni kabonganai kanikina n tein rabwatam are e nako ma te taeka ao kibuntaeka inanon te kuna. Ke ko kona ni ikaruoruo ni karaoa te kaotioti iaon mwakoron te kuna ngkai kain te utu ake tabeman a kataia ni keetina te kuna. Am utu a kona ni kukurei n anenei kuna ni biriia aika a kakaokoro ke rietaia. Te Gospel Library app ao te Euangkerio ibukiia Ataei app iai bwanaa aika a tia n raweaki ao witeo aika a kona ni buokiko n reiakin kuuna. Ko kona naba ni karaoi rinanin katangitang ke kuna aika a tau n ongora iai.

Ibukin karekeiango riki, tarai mwakoro n “Using Music to Teach Doctrine” ao “Helping Children Learn and Remember Primary Songs and Hymns,” reke ni “Kaetieti ibukin Tain te Anene ao aia Tai Ataei ni Katangitang ni kuuna aika a tabu” inanon Nakomai, Iriirai—Ibukin te Moanrinan.