ubing ken ina nga agad-adal kadagiti nasantuan a kasuratan iti pagtaengan

Dagiti Kapanunotan tapno Mapadur-as ti Sangapamiliaan a Panagadalyo iti Nasantuan a Kasuratan

Ti masansan a sangapamiliaan a panagadal iti nasantuan a kasuratan ket nabileg a wagas a mangtulong iti pamiliam nga agsursuro iti ebanghelio. No kasano ti kaadu ken kasano ti kapaut ti panagbasayo a kas maysa a pamilia ket saan a kas iti kinapateg ti panagtultuloy kadagiti panagkagumaanyo. Bayat ti panangaramidmo iti panagadal iti nasantuan a kasuratan a napateg a paset ti panagbiag iti pamiliam, matulongamto dagiti miembro ti pamiliam a naas-asideg iti tunggal maysa ken ni Jesucristo ken mapapigsam dagiti pammaneknekda maipapan iti pundasion ti balikas ti Dios.

Ibilang dagiti sumaganad a saludsod:

• Kasano a maallukoymo dagiti miembro ti pamiliam nga agadal kadagiti nasantuan a kasuratan iti bukodda?

• Ania ti mabalin nga aramidem tapno maallukoymo dagiti miembro ti pamiliam a mangibinglay no ania ti masursuroda?

• Kasano a mayunay-unaymo dagiti pagbatayan a masursurom iti Daan a Tulag kadagiti kanito iti panangisuro iti inaldaw?

Laglagipen a ti pagtaengan ti kasayaatan a lugar a pagsursuruan iti ebanghelio. Mabalinmo a sursuruen ken isuro ti ebanghelio iti pagtaengan iti wagas a saan a mabalin nga aramiden iti maysa a klase iti Simbaan. Agbalinka a managpartuat bayat ti panangpanunotmo kadagiti wagas a makatulong iti pamiliam a makasursuro manipud kadagiti nasantuan a kasuratan. Ibilangmo ti sumagmamano kadagiti sumaganad a kapanunotan a mangpasayaat iti sangapamiliaan a panagadalyo iti nasantuan a kasuratan.

Agusar iti musika.

Agkanta kadagiti kansion a mangpabileg kadagiti pagbatayan a naisuro kadagiti nasantuan a kasuratan. Maysa a naisingasing a himno wenno kanta dagiti ubbing ti nailista iti tunggal linawas a balabala. Mabalinmo ti agsaludsod kadagiti miembro ti pamilia maipapan kadagiti balikas wenno ragup ti balikas kadagiti liriko. Kas nayon iti panagkanta, mabalin a mangipabuya ti pamiliam kadagiti tignay a maigiddan kadagiti kanta wenno dumngeg kadagiti kanta kas background a musika bayat ti panangaramidda kadagiti dadduma pay nga aktibidad. Para iti ad-adu pay a kapanunotan, kitaen iti “Panangiraman ti Sagrado a Musika iti Panagsursuro iti Ebanghelio” iti daytoy a resource.

Mangibinglay kadagiti Napapateg a Nasantuan a Kasuratan

Ikkam dagiti miembro ti pamiliam iti oras a mangibinglay kadagiti binatog ti nasantuan a kasuratan a nasarakanda a napapateg kabayatan ti bukodda a panagadal.

Usarem dagiti Bukodmo a Balikas

Awisem dagiti miembro ti pamilia tapno manggupgop iti bukodda a balikas no ania ti masursuroda manipud kadagiti nasantuan a kasuratan nga adalenyo.

agtutubo a tumultulong iti bassit nga ubing a mangbasa kadagiti nasantuan a kasuratan

Yaplikarmo dagiti Nasantuan a Kasuratan iti Biagmo

Kalpasan ti panangbasam iti maysa a binatog iti nasantuan a kasuratan, kiddawem kadagiti miembro ti pamilia a mangibinglay kadagiti wagas a pakayaplikaran ti binatog iti biagda.

Agdamagka iti Saludsod

Awisem dagiti miembro ti pamilia nga agdamag iti saludsod maipanggep iti ebanghelio, ket kalpasanna mangbubos iti oras a mangsapul kadagiti bersikulo a makatulong a mangsungbat iti saludsod.

Mangi-display iti Nasantuan a Kasuratan

Pumilika iti maysa a bersikulo a makitam a napateg, ket i-display daytoy iti lugar a masansan a makitanto daytoy dagiti miembro ti pamilia. Awisem dagiti dadduma pay a miembro ti pamilia nga agsisinnublat a mangpili iti maysa a nasantuan a kasuratan a mai-display.

Agaramid iti Listaan ti Nasantuan a Kasuratan

Kas maysa a pamilia, pumilikayo iti sumagmamano a bersikulo a kayatyo a paglilinnawagan kabayatan ti umay a lawas.

Mangyulo kadagiti Nasantuan a Kasuratan

Pumilika iti maysa a binatog iti nasantuan a kasuratan a napateg iti pamiliam, ket awisem dagiti miembro ti pamilia a mangyulo iti daytoy babaen ti inaldaw a panangulit iti daytoy wenno agay-ayam iti memorization game.

tattao nga aggigiddan nga agkakanta iti pagtaengan

Mangibinglay kadagiti Banag nga Adalen [Object Lesson]

Agsapul kadagiti banag nga adalen a mainaig kadagiti pagbatayan iti ebanghelio kadagiti binatog iti nasantuan a kasuratan a basbasaenyo kas maysa a pamilia. Awisem dagiti miembro ti pamilia nga agsarita maipapan no kasano a mainaig iti tunggal banag kadagiti pannursuro kadagiti nasantuan a kasuratan.

Mangpili iti Maysa a Topiko

Pagsisinnublaten dagiti miembro ti pamilia a mangpili iti maysa a topiko nga aggigiddan nga adalento ti pamilia. Usarem ti Topical Guide, ti Bible Dictionary, wenno ti Pangiwanwan iti Nasantuan a Kasuratan (scriptures.ChurchofJesusChrist,org) a mangsarak kadagiti binatog iti nasantuan a kasuratan maipapan iti topiko.

Agdrowing iti Maysa a Ladawan

Basaen ti sumagmamano a bersikulo kas maysa a pamilia, ket kalpasanna mangilatang iti oras para kadagiti miembro ti pamilia a mangidrowing iti maysa a banag a mainaig iti no ania ti nabasayo. Mangbubos iti panawen a panangilawlawag kadagiti drowing ti tunggal maysa.

Mangyakem iti Maysa nga Estoria

Kalpasan ti panangbasam iti estoria, mangawis kadagiti miembro ti pamilia a mangyakem iti daytoy. Kalpasanna, isaritam maipapan iti no kasano a mainaig ti estoria kadagiti banag a mapadpadasam a maymaysa ken kas maysa a pamilia.

Kinuna ni Presidente Russell M. Nelson, “Ikarik a bayat ti napasnek a panagtrabahoyo a mangurnos iti pagtaenganyo nga agbalin a maysa a sentro a pagsursuruan ti ebanghelio, dumtengto kenka dagiti aldaw ti Sabbath a pudnonto a pagragsakan. Aggagarto dagiti annakyo nga agsursuro ken agbiag kadagiti pannursuro ti Mangisalakan, ket ti impluensia ti kabusor iti biagyo ken iti pagtaenganyo ket kumapsutto. Makasagid rikna ken agtultuloyto dagiti panagbalbaliw iti pamiliam” (“Becoming Exemplary Latter-day Saints,” Ensign or Liahona, Nob. 2018,113).