“Panangusar iti Umaykayo, Sumurot Kaniak—Para kadagiti Indibidual ken Pamilia,” Umaykayo, Sumurot Kaniak—Para kadagiti Indibidual ken Pamilia: Daan a Tulag 2022 (2021)
“Panangusar iti Umaykayo, Sumurot Kaniak—Para kadagiti Indibidual ken Pamilia,” Umaykayo, Sumurot Kaniak—Para kadagiti Indibidual ken Pamilia: 2022
Panangusar iti Umaykayo, Sumurot Kaniak—Para kadagiti Indibidual ken Pamilia
Para iti Siasino Daytoy a Resource?
Daytoy a resource ket para iti tunggal indibidual ken pamilia iti Simbaan. Naisangrat daytoy a mangtulong kenka nga agsursuro iti ebanghelio—iti bukodmo man wenno kaduam ti pamiliam. No saan a masansan ti panagadalmo iti ebanghelio iti napalabas, makatulong kenka a mangirugi daytoy a resource. No addaankan iti nasayaat a kadawyan ti panagbasa iti ebanghelio, makatulong kenka daytoy a resource a maaddaan iti ad-adu pa a napapateg a padas.
Kasano a Nasken nga Usarek Daytoy a Resource?
Usarem daytoy a resource iti ania man a wagas a makatulong kenka. Mabalin a masarakam daytoy a makatulong a kas pangiwanwan wenno tulong para iti bukod ken sangapamiliaan a panagadal iti nasantuan a kasuratan. Mabalinmo pay nga usaren daytoy para iti home evening. Dagiti balabala ket mangitampok kadagiti napapateg a pagbatayan a masarakan iti Daan a Tulag, mangisingasing kadagiti kapanunotan iti panagadal ken aktibidad para kadagiti indibidual ken pamilia, ken mangted kadagiti lugar a pangisuratam kadagiti impresionmo.
TiUmaykayo, Sumurot Kaniak—Para kadagiti Indibidual ken Pamilia ket saan a nairanta a mangsukat wenno makibalubal kadagiti dadduma pay a naimbag a banag nga ar-aramidem. Surotem ti pannarabay ti Espiritu a mangikeddeng no kasano ti pamay-am iti bukodmo a panagadal iti balikas ti Dios.
Kasano a Mainaig Daytoy a Resource iti No Ania ti Mapasamak iti Simbaan?
Naurnos dagiti balabala iti daytoy a resource a mayannurot iti linawas nga iskediul iti panagbasa. Dagiti resources iti Umaykayo, Sumurot Kaniak para iti Primary, para iti Sunday School, ken para kadagiti klase dagiti Korum ti Aaronic Priesthood ken Young Women ket sumurot iti agpada nga iskediul. Tapno masuportaran dagiti panagkagumaam nga agsursuro ken agbiag iti ebanghelio iti pagtaengan, mangtedto kenka dagiti mannursurom iti simbaan kadagiti gundaway tapno maibinglaymo dagiti padas, kapanunotan, ken saludsodmo maipapan kadagiti binatog iti nasantuan a kasuratan nga ad-adalem iti pagtaengan.
Gapu ta maisuro iti mamindua laeng iti makabulan ti Sunday School, mabalin a pilien dagiti mannursuro iti Sunday School ti manglabtaw wenno mamagtitipon kadagiti balabala tapno kumamakam iti linawas nga iskediul. Mabalin pay a kasapulan daytoy (para iti agpada a Sunday School ken Primary) kadagiti lawas no saan a maangay dagiti gagangay a miting iti Simbaan gapu iti stake conference wenno dadduma pay a gapu. Bayat dagitoy a lawas maawiska nga agtultuloy nga agadal iti Daan a Tulag iti pagtaengan.
Nasken Kadi a Surotek ti Iskediul?
Ti iskediul ti mangtulongto kenka a mangbasa kadagiti napili manipud iti Daan a Tulag ken ti Perlas a Kapatgan iti gibus ti tawen. Kas mainayon, ti panangsurot iti isu met laeng nga iskediul kas kadagiti dadduma ket mabalin a mangiturong kadagiti napapateg a padas iti pagtaengan, iti simbaan, ken iti sadinno man. Ngem saan a nasken a surotem ti iskediul wenno mapilitan nga agbasa iti tunggal bersikulo; ta ti eskediul ti gagangay a pangiwanwan a mangtulong kenka no kasano ti addang iti panagbasam. Ti napateg a banag ket ti pannakasursurom iti ebanghelio nga agmaymaysa ken kas maysa a pamilia.
Palagip maipapan iti Iskediul iti Panagbasa iti Daan a Tulag
Dagiti naisingasing nga iskediul iti panagbasa iti Umaykayo, Sumurot Kaniak para iti 2022 ket saan a mangiraman iti tunggal kapitulo iti Daan a Tulag. Gapu ta at-atiddog ti Daan a Tulag ngem iti dadduma pay a libro ti nasantuan a kasuratan, naikkat dagiti sumagmamano a kapitulo ken libro tapno mapagbalin a nanamnam-ay ti iskediul iti panagbasa para kenka ken ti pamiliam.
Napili dagiti kapitulo ken libro tapno maliklikan ti panagpapada ken tapno ma-highlight dagiti binatog a mangipaneknek ken ni Jesucristo, a nabaknang iti doktrina, ken nangnangruna a mainaig iti aldawtayo. Kas pagarigan, ti naisingasing nga iskediul iti panagbasa saan a mangiraman iti 1ken 2 Cronicas gapu ta maipada ti kaaduan ti linaon dagita a libro iti material a masarakan iti 1ken 2 Ar-ari. Saan pay a nairaman iti iskediul ti Kanta ni Solomon, gapu ta insuro ni Propeta Joseph Smith a saan a naparegta a nasantuan a kasuratan daytoy (kitaen iti Pangiwanwan iti Nasantuan a Kasuratan, “Kanta ni Solomon,” iti scriptures. ChurchofJesusChrist.org). Nupay kasta, laglagipenyo a naisingasing laeng daytoy nga iskediul iti panagadal. Nasken a matarabay ti bukod ken sangapamiliaan a panagadalyo babaen ti personal a paltiing.