Dagiti Kapanunotan tapno Mapadur-as ti Bukodmo a Panagadal iti Nasantuan a Kasuratan

Dagitoy ti sumagmamano a simple a wagas a mangpadur-as iti panagadalmo iti balikas ti Dios kadagiti nasantuan a kasuratan.

Sapulem dagiti Kinapudno maipapan ken ni Jesucristo

Isuronatayo dagiti nasantuan a kasuratan nga amin a banag paneknekanda ni Cristo (kitaen iti 2 Nephi 11:4; Moises 6:63), isu nga ibilangmo ti panangisurat wenno panangmarka kadagiti bersikulo a mangipaneknek maipapan iti Mangisalakan ken no kasano ti sumurot Kenkuana.

Sapulem dagiti Makaparegta a Balikas ken Ragup ti Balikas

Mabalin a makakitaka iti sumagmamano a balikas ken ragup ti balikas kadagiti nasantuan a kasuratan a makaawis iti riknam, a kasla naipangpangruna a naisurat dagitoy a para kenka. Mabalin a mariknada a personal nga adda pakainaiganna dagitoy ken mangparegta ken mangguyugoy kenka. Ibilangmo ti panangmarka kadagitoy kadagiti nasantuan a kasuratan wenno panangisurat kadagitoy iti study journalmo.

Sapulem dagiti Kinapudno iti Ebanghelio

No dadduma madakamat a direkta dagiti kinapudno iti ebanghelio (masansan a maawagan iti doktrina wenno dagiti pagbatayan), ken no dadduma mailadawanda babaen iti maysa a pagarigan wenno estoria. Saludsodem iti bagim, “Ania dagiti agnanayon a kinapudno a maisuro kadagitoy a bersikulo?”

Dumngeg iti Espiritu

Imdengam dagiti kapanunotan ken riknam, uray no awan pakainaiganna iti no ania ti basbasaem. Mabalin a dagita nga impresion dagiti mismo a banag a kayat ti Nailangitan nga Amam a masursurom.

Yarigmo dagiti Nasantuan a Kasuratan iti Biagmo

Ibilangmo no kasano a mayaplikar iti biagmo dagiti estoria ken pannursuro a basbasaem. Kas pagarigan, mabalin a saludsoden iti bagim, “Ania dagiti padasko a maipada iti basbasaek?” wenno “Kasano a masurotko ti pagwadan daytoy a tao kadagiti nasantuan a kasuratan?”

Agdamag kadagiti Saludsod bayat ti Panagadalmo

Bayat ti panagadalmo kadagiti nasantuan a kasuratan, mabalin a sumangbay dagiti saludsod iti panunotmo. Mabalin a mainaig dagitoy a saludsod ti no ania ti basbasaem wenno iti biagmo iti sapasap. Utobem dagitoy a saludsod ken sapulem dagiti sungbat bayat ti panagtultuloymo a panangadal kadagiti nasantuan a kasuratan.

Usaren dagiti Tulong iti Panagadal iti Nasantuan a Kasuratan

Tapno magun-od dagiti nayon a nalawag a pannakaammo ken pannakaawat [insights] kadagiti bersikulo a basaem, usarem dagiti footnote, ti Topical Guide, ti Bible Dictionary, ti Pangiwanwan iti Nasantuan a Kasuratan (scriptures.Churchof JesusChrist.org), ken dadduma pay a tulong iti panagadal.

Ibilang ti Konteksto dagiti Nasantuan a Kasuratan

Masarakam dagiti napapateg a nalawag a pannakaammo ken pannakaawat maipapan iti nasantuan a kasuratan no ibilangmo ti konteksto daytoy—dagiti kasasaad wenno ti nakapasamakan ti nasantuan a kasuratan. Kas pagarigan, ti panangammo iti nagtaudan ken ti pammati dagiti tao nga insao ti propeta ket makatulong kenka a makaawat iti panggep dagiti balikasna.

Isuratmo dagiti Pampanunoten ken Marikriknam

Nadumaduma dagiti wagas ti panangisurat kadagiti sumangbay nga impresion bayat ti panagadalmo. Kas pagarigan, mabalinmo a markaan ti maysa a napateg a balikas wenno ragup ti balikas ken isuratmo dagiti kapanunotam a kas maysa a palagip kadagiti nasantuan a kasuratam. Mabalinmo met nga isurat iti journal dagiti nalawag a pannakaammo ken pannakaawat [insights], rikna, ken impresion a maawatmo.

Adalem dagiti Balikas dagiti Propeta ken Apostol iti Ud-udina nga Aldaw

Basaem no ania ti insuro dagiti propeta ken apostol iti ud-udina nga aldaw maipapan kadagiti pagbatayan a masarakam kadagiti nasantuan a kasuratan (kas pagarigan, kitaen iti conference.Church of JesusChrist.org ken Church magazines).

Ibinglay dagiti nalawag a pannakaammo ken pannakaawat [insights]

Ti panangilawlawag kadagiti nalawag a pannakaammo ken pannakaawat manipud iti bukodmo a panagadal ket saan laeng a nasayaat a wagas a pangisuruan kadagiti dadduma, ngem ketdi makatulong pay daytoy a mangpapigsa iti pannakaawatmo maipapan iti no ania ti nabasam.

Agbiag babaen iti no Ania ti Masursurom

Saan laeng koma a mangparegta kadatayo ti panagadal iti nasantuan a kasuratan no di ketdi iturongnatayo pay a mangbalbaliw iti wagas a panagbiagtayo. Dumngeg no ania ti iparikna kenka ti Espiritu nga aramidem bayat ti panagbasam, ket kalpasanna agkumit nga agtignay kadagita a parikna.

Kinuna ni Elder David A. Bednar: “Saantayo koma a namnamaen ti Simbaan a kas maysa a gunglo a mangisuro wenno mangibaga kadatayo iti amin a banag a kasapulantayo a maammuan ken aramiden tapno agbalin a napasnek a disipulo ken situtured nga agibtur agingga iti panungpalan [kitaen iti Doktrina ken Katulagan 121:29]. Ketdi, bukodtayo a pagrebbengan ti mangsursuro iti no ania ti nasken a sursuruentayo, ken agbiag a kas iti ammotayo a nasken a panagbiagtayo, ken agbalin iti kayat ti Maestro a nasken a pagbalinantayo. Ket dagiti pagtaengantayo ti kangrunaan a lugar para iti pagsursuruan, pagnaedan, ken pagbalinan” (“Prepared to Obtain Every Needful Thing,” Ensign or Liahona, Mayo 2019,102).