Paglakip sa Sagrado nga Musika sa Imong Pagkat-on sa Ebanghelyo

Ang pagkanta og mga awit sa Primary ug mga himno makapanalangin kanimo ug sa imong pamilya sa daghang mga paagi. Kini nga mga ideya makatabang kanimo sa paggamit og sagrado nga musika samtang naningkamot ka sa pagkat-on ug sa pagpuyo sa ebanghelyo.

• Pagkat-on og mga baroganan sa doktrina. Pangita alang sa mga kamatuoran nga gitudlo diha sa mga awit nga imong gikanta o gipaminaw. Kini mahimong mogiya ngadto sa mga panaghisgot mahitungod niini nga mga kamatuoran sa tibuok adlaw. Kanta o paminaw sa mga awit sa Primary o sa himno nga nagtudlo mahitungod ni Jesukristo ug sa Iyang ebanghelyo. Hatagi og pagtagad ang mga pamaagi nga ang Espiritu Santo nagpamatuod kabahin sa Manluluwas ug sa Iyang mga pagtulon-an.

• Ilha ang gahom sa musika. Ang pagkanta o ang pagpaminaw sa mga awit sa Primary o mga himno mahimo nga panalangin sa mga panahon sa panginahanglan. Sama pananglit, ang pagkanta og usa ka awit, makapahilom sa usa ka bata sa panahon sa tingkatulog, makamugna og hingpit nga kalipay samtang ang imong pamilya nag-uban sa pagtrabaho, makapaarang-arang sa silingan kinsa masakiton, o makahupay sa usa ka tawo kinsa gibati ang kakulba.

• Paambit og mga kasinatian. Paambit og personal o pamilya nga mga kasinatian nga kalabot sa mga mensahe sa mga awit. Makigbahin ka usab og kalabot nga mga istorya sa kasulatan.

• Apila ang imong pamilya. Ang imong pamilya makakat-on pa gikan sa mga awit kon sila aktibo nga moapil. Aron sa pagpaapil sa mga sakop sa pamilya, makadapit ka og mas magulang nga bata sa pagtabang og tudlo sa awit ngadto sa mas batan-ong mga igsoon o makadapit og mga bata sa pagtuon sa pamilya og awit nga ilang nakat-onan sa Primary. Makahimo ka usab sa pagpapuli-puli og mga sakop sa pamilya sa paggiya og usa ka awit.

• Pagmamugnaon. Gamit og lain-laing mga paagi sa pagkat-on og sagrado nga mga musika isip usa ka pamilya. Sama pananglit, makagamit ka og mga lihok nga mobagay sa mga pulong ug mga hugpong sa mga pulong sa awit. O kamo makapuli-puli sa pag-aksyon sa mga bahin sa usa ka awit samtang ang ubang mga sakop sa pamilya maninguha sa pagtagna sa awit. Ang imong pamilya tingali malingaw og kanta sa awit sa lain-laing mga kapaspason o gidak-on sa tingog. Ang Gospel Library nga app ug ang The Gospel for Kids nga app adunay audio nga recording ug mga video nga makatabang kanimo sa pagkat-on sa awit. Makahimo ka usab og mga playlist sa sagradong musika nga mapaminaw.

Alang sa dugang nga mga ideya, tan-awa ang mga seksyon sa “Paggamit og Musika sa Pagtudlo sa Doktrina” ug “Pagtabang sa mga Bata nga Makakat-on ug Mahinumdom sa mga Kanta sa Primary ug Mga Himno,” nga makaplagan sa “Mga Panudlo alang sa Panahon sa Pagpanganta ug Pasundayag sa mga Bata sa Panagtigom alang sa Sakramento” sa Dali, Sunod Kanako—Alang sa Primary.