Paggamit sa Dali, Sunod Kanako—Alang sa mga Indibidwal ug mga Pamilya

Alang Kang Kinsa Kini nga Kapanguhaan?

Kini nga kapanguhaan alang sa matag indibidwal ug pamilya diha sa Simbahan. Gidisenyo kini aron ikaw matabangan nga makakat-on sa ebanghelyo—sa imong kaugalingon ba o kauban sa imong pamilya. Kon ikaw wala makatuon sa ebanghelyo sa regular nga paagi kaniadto, kini nga kapanguhaan makatabang kanimo sa pagsugod. Kon ikaw aduna nay maayong naandan nga pagtuon sa ebanghelyo, kini nga kapanguhaan makatabang kanimo nga makabaton og mas makahuloganong mga kasinatian.

Unsaon Nako sa Paggamit Niini nga Kapanguhaan?

Gamita kini nga kapanguhaan sa bisan unsang paagi nga makatabang kanimo. Makita nimo kini nga makatabang isip giya o tabang alang sa kaugalingon ug pamilya nga pagtuon sa kasulatan. Makagamit ka usab niini alang sa home evening. Ang mga gilatid nagpatataw sa importante nga mga baroganan nga makita diha sa Daang Tugon, nagsugyot og mga ideya ug mga kalihokan alang sa mga indibidwal ug mga pamilya, ug naghatag og mga luna sa pagrekord sa imong mga panghunahuna.

Dali, Sunod Kanako—Alang sa mga Indibidwal ug mga Pamilya wala magpasabot nga ipuli o ikompetensya sa ubang maayo nga mga butang nga imong gibuhat. Sunda ang giya sa Espiritu sa pagtino unsaon sa paghimo ang imong kaugalingong pagtuon sa pulong sa Dios.

Sa Unsa nga Paagi Kini nga Kapanguhaan Kalabot ngadto sa Unsay Nahitabo sa Simbahan?

Ang mga latid dinhi niini nga kapanguhaan gihan-ay sumala sa sinemana nga eskedyul sa pagbasa. Ang Dali, Sunod Kanako nga mga kapanguhaan alang sa Primary, alang sa Sunday School, ug alang sa mga korum sa Aaronic nga Pagkapari ug sa Young Women nga mga klase nagsunod sa sama nga iskedyul. Sa pagsuporta sa imong mga paningkamot sa pagkat-on ug pagpuyo sa ebanghelyo diha sa panimalay, ang imong mga magtutudlo sa simbahan mohatag kanimo og mga oportunidad sa pagpakigbahin sa imong mga kasinatian, mga hunahuna, ug mga pangutana mahitungod sa mga tudling sa kasulatan nga imong gitun-an diha sa panimalay.

Tungod kay ang Sunday School kaduha lamang itudlo sa usa ka bulan, ang mga magtutudlo sa Sunday School mahimong mopili sa paglaktaw o sa pagtipon sa mga latid aron masunod ang sinemana nga eskedyul. Kini mahimo usab nga gikinahanglan (alang sa Sunday School ug Primary) sa mga semana nga ang regular nga mga miting sa Simbahan wala mapahigayon tungod sa komperensiya sa stake o sa ubang mga rason. Sulod niini nga mga semana ikaw gidapit sa pagpadayon sa pagtuon sa Daang Tugon diha sa panimalay.

Kinahanglan Ba Akong Mosunod sa Eskedyul?

Ang eskedyul motabang kanimo sa pagbasa og mga pinili gikan sa Daang Tugon ug sa Perlas nga Labing Bililhon sa kataposan sa tuig. Agi ug dugang, ang pagsunod sa samang eskedyul sama sa uban makagiya ngadto sa makahuloganong mga kasinatian diha sa panimalay, sa simbahan, ug bisan asa. Apan ayaw batia nga nahigot sa eskedyul o napugos sa pagbasa sa matag bersikulo; ang eskedyul giya lamang aron ikaw matabangan sa paglihok sa imong kaugalingon nga kapaspason. Ang importante nga butang mao nga ikaw nagkat-on sa ebanghelyo sa indibidwal nga paagi ug isip usa ka pamilya.

Timan-i ang mahitungod sa Eskedyul sa Pagbasa sa Daang Tugon

Ang gisugyot nga Dali, Sunod Kanako nga eskedyul sa pagbasa alang sa 2022 wala mag-apil sa kada kapitulo diha sa Daang Tugon. Tungod ang Daang Tugon mas taas kay sa ubang mga bolyum sa kasulatan, ang pipila sa mga kapitulo ug mga basahon gilaktawan aron sa paghimo sa eskedyul sa pagbasa nga mas mahimo alang kanimo ug sa imong pamilya.

Ang mga kapitulo ug mga basahon gipili sa paglikay sa pagbalik-balik ug sa pagpatataw sa mga tudling sa kasulatan nga nagpamatuod ni Jesukristo, mga buhong sa doktrina, ug ilabi na sa mga may kalabotan sa atong panahon. Sama pananglit, ang gisugyot nga iskedyul nga basahon wala maglakip sa 1 ug 2 Mga Cronicas tungod kay kadaghanan sa sulod niadto nga mga basahon nagdoble sa mga materyal nga makaplagan sa 1 ug 2 Mga Hari. Ang eskedyul usab wala maglakip sa Awit ni Salomon, tungod kay nagtudlo si Propeta Joseph Smith nga kini dili dinasig nga kasulatan (tan-awa sa Ang Giya ngadto sa mga Kasulatan, “Awit ni Salomon,” scriptures.ChurchofJesusChrist.org). Hinoon, hinumdomi nga kini usa lamang ka gisugyot nga eskedyul sa pagtuon. Ang imong personal ug pamilya nga pagtuon sa kasulatan kinahanglan nga pagagiyahan pinaagi sa personal nga pagpadayag.