Pagtudlo sa Gagmayng mga Bata

Kon ikaw adunay gagmayng mga bata sa imong pamilya, aniay pipila ka mga kalihokan nga makatabang kanila sa pagkat-on:

• Manganta. Ang mga himno ug mga awit gikan sa Songbook sa mga Bata nagtudlo og doktrina sa gamhanan nga paagi. Gamita ang indeks sa mga hilisgotan sa luyo sa Songbook sa mga Bata sa pagpangita og mga kanta nga may kalabotan sa mga baroganan sa ebanghelyo nga imong gitudlo. Tabangi ang imong mga anak sa pagpakiglabot sa mga mensahe sa mga awit diha sa ilang mga kinabuhi. (Tan-awa usab sa “Paglakip sa Sagrado nga Musika sa Imong Pagkat-on sa Ebanghelyo” dinhi niini nga kapanguhaan.)

• Maminaw o i-aksyon ang usa ka istorya. Ang gagmayng mga bata gusto og mga istorya—gikan sa mga kasulatan, gikan sa imong kinabuhi, gikan sa kasaysayan sa imong pamilya, o gikan sa mga magasin sa Simbahan. Pangita og mga paagi sa pagpaapil kanila sa pag-istorya sa sugilanon. Makahimo sila sa paggunit og mga hulagway o mga butang, pagdrowing sa mga hulagway sa unsay ilang nadungog, pag-aksyon sa istorya, o gani pagtabang sa pag-istorya sa sugilanon. Tabangi ang imong mga anak sa pag-ila sa mga kamatuoran sa ebanghelyo diha sa mga istorya nga imong gipakigbahin.

• Magbasa og usa ka kasulatan. Ang gagmayng mga bata tingali dili pa kaayo makamao nga mobasa, apan ikaw makahimo gihapon sa pagpaapil kanila sa pagkat-on gikan sa mga kasulatan. Mahimong gikinahanglan nimo ang pagtutok sa usa ka bersikulo, o importante nga hugpong sa mga pulong, o pulong. Ang mga bata mahimo gani tingali nga makasag-ulo og mubo nga mga hugpong sa mga pulong gikan sa mga kasulatan kon ilang balik-balikon kini sa pipila ka mga higayon. Samtang ilang madungog ang pulong sa Dios, ilang mabati ang Espiritu.

• Manan-aw og usa ka litrato o manan-aw og usa ka video. Kon patan-awon nimo ang imong mga anak og hulagway o video kalabot sa usa ka baroganan sa ebanghelyo o istorya sa kasulatan, pangutan-a sila og mga pangutana nga motabang kanila sa pagkat-on gikan sa unsay ilang nakita. Sama pananglit, makapangutana ka, “Unsay nahitabo dinhi niini nga hulagway o video? Unsay imong gibati niini?” Ang Gospel Library nga app maoy maayong mga dapit nga kapangitaan sa mga hulagway ug mga video.

• Magbuhat. Ang mga bata makahimo, makadrowing, o makakolor og butang nga may kalabotan sa istorya o baroganan nga ilang gikat-onan.

• Moapil sa mga leksyon nga naggamit og butang. Ang usa ka yanong leksyon nga naggamit og butang makatabang sa imong mga anak sa pagsabot og baroganan sa ebanghelyo nga lisod sabton. Kon gamiton ang mga leksyon nga naggamit og butang, pangita og mga paagi nga makaapil ang mga bata. Mas makakat-on sila gikan sa pagbinayloay og mga kasinatian kay sa pagtan-aw lamang sa usa ka pasundayag.

• Magdrama-drama [role-play]. Kon ang mga bata magdrama-drama og usa ka sitwasyon nga may kalagmitan nga ilang masinati sa tinuod nga kinabuhi, mas makasabot sila og maayo kon sa unsang paagi ang usa ka baroganan sa ebanghelyo magamit sa ilang mga kinabuhi.

• Ibalik-balik ang mga kalihokan. Ang gagmayng mga bata mahimong nagkinahanglan nga makadungog og mga konsepto sa makadaghang higayon aron masabtan kini. Ayaw kahadlok sa pagbalik-balik kanunay sa mga istorya o mga kalihokan. Sama pananglit, mahimo nimong ipakigbahin ang istorya sa kasulatan sa makadaghang higayon sa lain-laing mga paagi—pagbasa gikan sa mga kasulatan, pag-summarize sa imong kaugalingong mga pulong, pagpasalida og video, pagpatabang sa imong mga anak sa pagsaysay sa istorya, pagdapit kanila nga i-aksyon ang istorya, ug uban pa.