Ha’api’i i te mau tamari’i ri’i

Mai te peu e tamari’i ri’i tā ’outou i roto i te ’utuāfare, teie te tahi mau ’ohipa ri’i e nehenehe e tauturu ia rātou ’ia ’apo mai i te ha’api’ira’a :

• Hīmene. E ha’api’i te mau hīmene purera’a ’e te mau hīmene i roto i te Buka hīmene nā te mau tamari’i [Chants pour les enfants] i te ha’api’ira’a tumu ma te pūai. ’A fa’a’ohipa i te fa’ahorora’a tumu parau i muri i te Buka hīmene nā te mau tamari’i nō te ’ite mai i te mau hīmene e tū’ati i ni’a i te mau parau tumu o te ’evanelia tā ’outou e ha’api’i ra. Tauturu i tā ’outou mau tamari’i ’ia fa’aau i te poro’i i roto i te mau hīmene i tō rātou orara’a. (’A hi’o ato’a « Tu’u i te pehe mo’a i roto i tā ’outou ha’api’ira’a ’evanelia » i roto i teie buka.)

• Fa’aro’o ’aore rā ha’uti ta’ata ora i te hō’ē ’ā’amu. E mea au nā te mau tamari’i ’āpī te mau ’ā’amu—i roto ānei i te mau pāpa’ira’a mo’a, i roto i tō ’outou orara’a, i roto i te ’ā’amu ’utuāfare, ’e ’aore rā i roto i te mau ve’a a te ’Ēkālesia. E ’imi i te mau rāve’a ’ia fa’aō mai ia rātou i roto i te ’ohipa fa’ati’ara’a ’ā’amu. E nehenehe rātou e tāpe’a i te mau hōho’a ’aore rā te mau tao’a, e pāpa’i i te hōho’a nō te mau mea tā rātou e fa’aro’o ra, e ha’uti ta’ata ora i te ’ā’amu ’aore rā e tauturu e fa’ati’a i te ’ā’amu. E tauturu i tā ’outou mau tamari’i ’ia ’ite mai i te mau parau mau o te ’evanelia i roto i te mau ’ā’amu tā ’outou e fa’ati’a.

• Tai’o i te hō’ē ’īrava. ’Aita paha te mau tamari’i i ’ite i te tai’o, e nehenehe rā ’outou e tītau ia rātou ’ia ha’api’i i te mau pāpa’ira’a mo’a. E tītauhia paha ia ’outou ’ia rōtahi i ni’a iho i te hō’ē ’īrava, te hō’ē pereota faufa’a, ’aore rā, te hō’ē ta’o. E ti’a ato’a i te mau tamari’i ’ia tāmau ’ā’au i te mau pereota poto o te mau pāpa’ira’a mo’a mai te mea e fa’ahiti rātou i te reira e rave rahi taime. ’A fa’aro’o ai rātou i te parau a te Atua, e putapū rātou i te Vārua.

• Hi’o i te hō’ē hōho’a ’aore rā māta’ita’i i te hō’ē video. ’Ia fa’a’ite ’outou i tā ’outou tamari’i i te hō’ē hōho’a ’aore rā te hō’ē video nō ni’a i te hō’ē parau tumu o te ’evanelia ’aore rā te hō’ē ’ā’amu o te pāpa’ira’a mo’a, ’a ui ia rātou i te mau uira’a e ’apo mai rātou i te ha’api’ira’a i roto i te mea tā rātou e hi’o ra. ’Ei hi’ora’a, e nehenehe e ui : « E aha te ’ohipa e tupu ra i ni’a i te hōho’a ’aore rā i roto i te video ? E aha te mana’o e tae mai ? » E vāhi tano te fa’anahora’a Gospel Media, te MediaLibrary.ChurchofJesusChrist.org, ’e te children.ChurchofJesusChrist.org nō te ’imi i te mau hoho’a ’e te mau video.

• Hāmani. E nehenehe te mau tamari’i e patu, e pāpa’i hōho’a, ’aore rā, e fa’a’ū i te hō’ē mea e tū’ati i te ’ā’amu ’aore rā, i te parau tumu tā rātou i ’apo mai.

• ’Āmui i roto i te mau ha’api’ira’a tao’a. E nehenehe te hō’ē ha’api’ira’a tao’a ’ōhie e tauturu i tā ’outou mau tamari’i ’ia māramarama i te hō’ē parau tumu o te ’evanelia e ’ere i te mea ’ōhie ’ia māramarama. ’Ia fa’a’ohipa ’outou i te mau ha’api’ira’a tao’a, e ’imi i te rāve’a ’ia ’āmui ato’a mai tā ’outou mau tamari’i. E rahi atu ā tā rātou e ha’api’i nā roto i te ’ohipara’a, i te hi’o-noa-ra’a i te hō’ē fa’a’itera’a.

• Ha’utira’a ta’ata ora. ’Ia ha’uti ta’ata ora te mau tamari’i i te hō’ē ’ohipa e riro i te tupu i roto i tō rātou orara’a, e māramarama maita’i a’e rātou e nāhea te hō’ē parau tumu o te ’evanelia e tano ai i tō rātou orara’a.

• E nā ni’a iho fa’ahou te mau ’ohipara’a. E tītauhia i te mau tamari’i ’āpī a’e ’ia fa’aro’o i te mau tumu parau e rave rahi taime nō te hāro’aro’a i te reira. ’Eiaha e taiā ’ia nā ni’a iho fa’ahou ā i te mau ’ā’amu ’aore rā te mau ’ohipara’a. ’Ei hi’ora’a, e fa’ati’a ’outou i te hō’ē ’ā’amu nō te pāpa’ira’a mo’a e rave rahi taime ma te huru ta’a ’ē—tai’o i roto i te mau pāpa’ira’a mo’a, ha’apoto nā roto i tā ’outou iho mau parau, fa’a’ite i te hō’ē video, vaiiho i te mau tamari’i ’ia tauturu i te fa’ati’ara’a i te ’ā’amu, ani ia rātou ’ia ha’uti ta’ata ora i te ’ā’amu, ’e tē vai atu ra.