Fa’a’ohipa i te Mai, pe’e mai—nō te ta’ata hō’ē ’e te ’utuāfare

Nō vai teie nei mātēria ?

Nō te mau ta’ata ato’a ’e te mau ’utuāfare i roto i te ’Ēkālesia. ’Ua hāmanihia te reira nō te tauturu ia ’outou ’ia ha’api’i i te ’evanelia—’outou ana’e iho ’aore rā ’ei ’utuāfare. Mai te peu ē, ’aita na ’outou i tuatāpapa pinepine i te ’evanelia nā mua a’e, e nehenehe teie mātēria e tauturu ia ’outou ’ia ha’amata. Mai te peu ’ua mātau maita’i ’outou i te tuatāpapa i te ’evanelia, e nehenehe teie mātēria e tauturu ia ’outou ’ia ’ite i te mau ’ohipa faufa’a atu ā.

Nāhea i te fa’a’ohipa i teie nei mātēria ?

Nā ’outou e hi’o i te fa’a’ohipara’a o te reira, ’ia tauturu ho’i te reira ia ’outou. E nehenehe te reira e tauturu ’ei arata’i ’aore rā ’ei tauturu tuatāpapara’a pāpa’ira’a mo’a nō te ta’ata hō’ē ’e te ’utuāfare. E nehenehe ato’a e fa’a’ohipa i te reira nō te pō ’utuāfare. E tūra’i te mau arata’i ha’api’ira’a i te mau parau tumu faufa’a rahi i roto i te Faufa’a Tahito, ma te tu’u i te tahi mau mana’o tuatāpapara’a ’e te mau ’ohipara’a ’e ma te fa’afāna’o i te vāhi nō te tāpa’opa’o i te mana’o e tae mai.

E ’ere te Mai, pe’e mai—nō te ta’ata hō’ē ’e te ’utuāfare nō te mono ’aore rā nō te fa’ahemo i te tahi atu mau mea maitata’i tā ’outou e rave ra. E pe’e i te arata’ira’a a te Vārua nō te fa’aoti e nāhea ’outou i te rave i tā ’outou iho tuatāpapara’a i te parau a te Atua.

e ta’ata fa’aipoipo e tuatāpapa ra i te pāpa’ira’a mo’a i te fare

E aha te tū’atira’a o teie nei mātēria ’e te mau ’ohipa i te fare purera’a ?

’Ua fa’anahohia te mau arata’i ha’api’ira’a o teie mātēria mai te au i te tārena tai’ora’a tāhepetoma. E pe’e te mau mātēria Mai, pe’e mai nō te Paraimere, nō te Ha’api’ira’a Sābati, ’e nō te mau pupu autahu’ara’a a ’A’arona ’e te feiā ’āpī tamāhine i te hō’ē ā tarena. Nō te turu i te mau tauto’ora’a i te fare nō te ha’api’i mai ’e nō te ora i te ’evanelia, e hōro’a tō ’outou mau ’orometua i te fare purera’a i te taime nō te fa’a’ite mai i te mau ’ohipa i tupu nō ’outou, tō ’outou mau mana’o ’e tā ’outou mau uira’a nō ni’a i te mau tuha’a pāpa’ira’a mo’a tā ’outou i tuatāpapa i te fare.

Nō te mea e ha’api’i-noa-hia te Ha’api’ira’a Sābati e piti taime i te ’āva’e, e nehenehe te mau ’ōrometua Ha’api’ira’a Sābati e mā’iti ’ia ’ōu’a ’e ’aore rā, ’ia ’āmui i te tahi mau arata’i ha’api’ira’a nō te pe’e i te tārena o te hepetoma. E tītau-ato’a-hia paha te reira (nō te Ha’api’ira’a Sābati ’e te Paraimere) i te mau hepetoma e’ita te mau purera’a e fa’atupuhia nō te ’āmuira’a titi ānei ’e nō te tahi atu tumu. I terā mau hepetoma, tē fa’aitoitohia nei ’outou ’ia tāmau noa i te tuatāpapa i te Faufa’a Tahito i te fare.

Tītauhia ānei ’ia pe’e i te tārena ?

E tauturu te tārena ia ’outou ’ia tai’o i te tahi mau tuha’a i roto i te Faufa’a Tahito ’e te Poe Tao’a Rahi mai teie taime ē tae atu i te hope’a matahiti. Hau atu, ’ia pe’e tātou i te hō’ē ā tārena ’e te tahi atu mau ta’ata, e nehenehe te reira e fa’atupu i te mau ’ohipa fa’ahiahia i te fare, i te fare purera’a ’e i te tahi atu mau vāhi. ’Eiaha rā ’outou e mana’o ē, e fa’ahepora’a te tārena ’aore rā ’ua tītauhia ’ia tai’o pauroa te mau ’īrava ; ’ua riro noa te reira ’ei arata’i nō te tauturu ia ’outou ’ia tātuha’a i tā ’outou tuatāpapara’a. Te mea faufa’a rahi, ’o te ha’api’ira’a ïa i te ’evanelia ’ei ta’ata hō’ē ’e ’ei ’utuāfare.

Fa’ata’ara’a nō ni’a i te tārena tai’ora’a o te Faufa’a Tahito

’Aita te tā’āto’ara’a o te mau pene o te Faufa’a Tahito i tu’uhia i roto i te tārena tai’ora’a o te Mai, pe’e mai nō 2022. Nō te mea e mea roa a’e te Faufa’a Tahito i te tahi atu mau buka pāpa’ira’a mo’a, ’ua vaiihohia te tahi mau pene ’e te tahi mau buka nō te fa’a’ōhie i te tārena tai’ora’a nō ’outou ’e nō tō ’outou ’utuāfare.

’Ua mā’itihia te mau pene ’e te mau buka ma te ’ape i te tāta’ipitira’a te mau tumu parau ’e nō te tūra’i i te mau tuha’a e fa’a’ite pāpū nei nō ni’a ia Iesu Mesia, te mau tuha’a faufa’a i te pae nō te ha’api’ira’a tumu, ’e te mau tuha’a tano maita’i nō tō tātou nei ’anotau. ’Ei hi’ora’a, ’aita i tu’uhia i roto i te tārena tai’ora’a te 1 ’e te 2 Paraleipomeno nō te mea, te rahira’a o te mau mea i roto i te reira mau buka, e tāpitira’a ïa nō te mau mea e ’itehia nei i roto i te 1 ’e te 2 Te mau Ari’i. ’Aita ato’a i tu’uhia i roto i te tārena te Sire a Solomona, nō te mea ’ua ha’api’i te peropheta Iosepha Semita ē, e ’ere te reira i te pāpa’ira’a mo’a fa’auru (’a hi’o i te arata’i nō te mau pāpa’ira’a mo’a, « Te Sire a Solomona », scriptures.ChurchofJesusChrist.org). Terā rā, ’a ha’amana’o ē, e tārena tuatāpapara’a tauturu noa teie. E mea ti’a i tā ’outou iho tuatāpapara’a ’e tā te ’utuāfare tuatāpapara’a pāpa’ira’a mo’a ’ia arata’ihia e te heheura’a a te ta’ata iho.