Fonotaga a le Aufono mo le Aso Sa Muamua

O le Aso Sa muamua o masina taitasi, o le a le toe i ai i sauniga a le korama, vaega, ma le Aualofa se lesona na aoaoina e se faiaoga. Nai lo lena, o le a taitaia e au peresitene po o taitai vaega se fonotaga a le aufono. O le a fefautuaai faatasi korama, vaega, po o le Aualofa e uiga i tiutetauave, avanoa, ma luitau i le lotoifale; aoao mai malamalamaaga ma aafiaga o le tasi ma le isi; ma fuafua ni auala e tali atu ai i ni musumusuga na mauaina mai le Agaga.

“O loo salalau faaaliga ia i tatou.”¹

Elder Neil L. Andersen

A o lei faia le Fonotaga a le Aufono

• Ua faailoa mai e taitai tiutetauave, avanoa, ma luitau i le lotoifale ma filifili ma le agaga tatalo i se autu e talanoaina.

• Saili e tagata uma le taitaiga a le Agaga.

• Saunia tagata uma e faasoa atu ni manatu ma aafiaga.

I le taimi o le Fonotaga a le Aufono

• E valaaulia e taitai tagata o le au paia e fefaasoaai aafiaga na faatinoga ni uunaiga sa latou mauaina mai sauniga na muamua atu.

• Ua fefautuaai faatasi tagata uma e uiga i le autu, faalogo i le tasi ma le isi, ma saili le taitaiga o le Agaga.

• E aotele e taitai manatu autu ma tuu atu valaaulia e faatino ai.

I Le Maea ai o le Fonotaga a le Aufono

• E galulue tagata uma i uunaiga ma valaaulia, galulue faatasi pe o ni tagata taitoatasi.

• Saunia tagata uma e faasoa o latou aafiaga i fonotaga o i le lumanai.

“O I Tatou o Ona Aao.”²

Peresitene Dieter F. Uchtdorf

Aikona o le tatalo mai le Getty Images

Mataupu Faavae o le Fefautuaai Faatasi

E le o fonotaga uma a aufono e foliga tutusa. Tuu atu i le Alii e aoao atu outou. O ni nai mataupu faavae nei e te amata ai:

1. O le faamoemoega o se fonotaga a aufono o le fefautuaai faatasi lea e uiga i tiutetauave, avanoa, ma luitau i le lotoifale; aoao mai malamalamaaga ma aafiaga; ma fuafua ni auala e tali atu ai i uunaiga na mauaina mai le Agaga.

2. O se fonotaga a le aufono e tatau ona taitai atu i le faatinoga—fuafuaga taitoatasi ma faalevaega, musuia e le Agaga, e faatino i fafo atu o le fonotaga ia faataunuu le galuega a le Alii (tagai MF&F 43:8–9).

3. E tatau i aufono ona faaaoga tusitusiga paia ma upu a perofeta ma aposetolo o aso e gata ai, isi au Pulega Aoao, ma Taitai Aoao e taitai ma lagolagoina le talanoaga. I lenei auala, o upu musuia a taitai o le Ekalesia e mafai ona fesoasoani i korama, vaega, ma Aualofa e taulima manaoga taua.

4. E le tatau ona pa’ia i talanoaga ia mataupu e le faalauaiteleina pe maaleale e uiga i tagata taitoatasi po o aiga.

5. E ui lava e taitaia fonotaga a aufono e se sui o le au peresitene po o taitai vaega, e le tatau ona ia pulepuletutuina le fetufaaiga. E folasia atu e le taitai se mataupu mo le talanoaga ma valaaulia tagata uma e fefaasoaai mai manatu ma aafiaga, e pei ona taitaia ai e le Agaga.

6. E ui e le tatau i se tasi ona lagona le faamalosia e auai, e tatau ona lagona e tagata uma le saogalemu e faasoa mai ni manatu ma aitia e aunoa ma le fefe i le faitioina.

7. Pe a talafeagai ai, o le saofafai i se li’o e mafai ona fesoasoani e gaosia ai le agaga o le fetufaaiga ma tatala ai le talanoaga.

Autu e Ono I Ai mo Fonotaga a le Aufono i Aso Sa Muamua

O manatu mo autu e talanoaina i fonotaga a aufono e ono sau mai fonotaga a le uarota, fonotaga a le au peresitene, fuafuaga a le eria, musumusuga a taitai mai le auauna atu i tagata, ma musumusuga mai le Agaga Paia. O autu o i lalo ua na o ni fautuaga lava. E ono silafia e taitai nisi manaoga latou te lagona le musuia ia talanoaina.

• E mafai faapefea ona faaleleia atili le tatou faamuamuaina o o tatou tiutetauave eseese uma?

• E mafai faapefea ona tatou faalatalata atili i le Atua ma maua nisi taitaiga mai le Agaga i o tatou olaga ma i o tatou aiga?

• O le a faapefea ona tatou faasoa atu le talalelei ma o tatou aiga ma tuaoi? (tagai Alema 17).

• E mafai faapefea ona tatou puipuia i tatou lava ma o tatou aiga mai ala faasalalau le talafeagai ma ponokalafi? (tagai MF&F 42:22–23).

• O le a se mea o le a tatou faia e fesoasoani ai i le faiaoga ma faamalosia a tatou fanau ma talavou i la tatou uarota?

• E faapefea ona tatou faateleina le lotogatasi i la tatou korama, vaega, po o le Aualofa? (tagai Mosaea 18:19–22).

• E mafai faapefea ona sili atu lo tatou auai i le galuega o le talafaasolopito o aiga ma tapuaiga i le malumalu?

• E faapefea ona tatou valaaulia le fesoasoani a le Alii a o tatou saili i tali o a tatou fesili ma se malamalamaaga loloto o le talalelei

• E mafai faapefea ona avea matua ma taitai sili ona lelei i le aiga po o le fale?

• E mafai faapefea ona tatou faamalosia a tatou molimau i le Alii ma Lana talalelei ma fesoasoani i o tatou aiga ina ia ola tutoatasi faaleagaga?

• O le a le uiga o le auauna atu? O faapefea ona tatou auauna atu ia i latou o siomiaina i tatou? (tagai 1 Peteru 4:11).

Afai e talafeagai, atonu e mananao taitai e faailoa mamao atu i tagata o le ekalesia le autu ina ia mafai ona latou o mai saunia e talanoaina.

Faamatalaga

1. Neil L. Andersen, i le Adam C. Olson, “Ua Faamamafaina e Le Aoaoga o le Tusitaulima le Galuega o le Faaolataga,” Ensign po o le Liahona, Ape. 2011, 76.

2. Dieter F. Uchtdorf, “O Outou o O’u Lima,” Ensign po o le Liahona, Me 2010, 68.