Sauniga i Aso Sa Lona Fa

O Aso Sa lona fa o masina taitasi, o le a talanoaina ai e korama, vaega, ma Aualofa se autu ua filifilia e le Au Peresitene Sili ma le Korama a Aposetolo e Toasefululua. O nei autu o le a faafouina i taimi o konafesi aoao taitasi. O le autu seia oo i le isi konafesi aoao o le aso Sapati. E mafai e taitai ma faiaoga ona filifili mai aoaoga faavae ma gaoioiga e aoao mai ai lea ua fautuaina atu i lalo, ia tuufaatasi nisi o nei gaoioiga, pe fatu ni a latou lava gaoioiga e tusa ma manaoga o tagata.

O le Sapati o se aso e manatua ai mea ua faia e le Atua mo i tatou.

I le talafaasolopito atoa, ua fesootai e le Atua nisi o galuega ofoofogia ma le Sapati. O nei galuega ofoofogia e aofia ai le Foafoaga (tagai i le Kenese 2:1–3), o le malaga umi a le fanauga a Isaraelu mai Aikupito (tagai Teuteronome 5:15), ma le Toetu o le Faaola (tagai Ioane 20:1–19; Galuega 20:7). Valaaulia tagata e toe iloilo nei fuaitau ma talanoa pe na faapefea i le manatuaina o nei mea taitasi na tutupu ona fesoasoani ia i tatou e faamamalu le aso Sapati. O a nisi o galuega ofoofogia ua faia e le Atua mo i tatou? E mafai faapefea ona tatou manatuaina nei mea i le aso Sapati? Pe a talafeagai ai, valaaulia tagata e talanoa i fesili e pei o fesili nei i o latou aiga.

O Iesu Keriso o le Alii o le Sapati.

Ua ta’ua foi le Sapati o le aso o le Alii (tagai Faaaliga 1:10). Aisea e te manatu ai ua ta’ua Iesu Keriso o le Alii o le Sapati? (tagai Mataio 12:8). Iloilo faatasi ni nai fuaiupu lea e mafai ona fesoasoani e musuia ai tagata ia mafaufau i ni auala e faaogatotonu ai o latou aafiaga o le aso Sapati ia Iesu Keriso (mo se faataitaiga, Helamana 5:12; Eteru 12:41; Moronae 10:32; ma le MF&F 6:36–37). O a nisi mau e mafai ona fefaasoaai e tagata e fesoasoani ai ia i latou ia faaogatotonuina atili ai le Sapati ia Keriso? O a ni sini e mafai ona tatou setiina e fesoasoani ia i tatou ia taulai atu ai i le Faaola i le aso Sapati atoa?

O Iesu Keriso o lo tatou faatataiga mo le faamamaluina o le Sapati.

I le taimi o Lana galuega talai i la le tino, na faaaoga e le Faaola avanoa e aoao atu ai e uiga i le aso Sapati. Fai atu i tagata e faitau tala nei ma fai se lisi o mea na faia e Iesu i le Sapati ma mataupu faavae na Ia aoao atu: Luka 6:1–11; 13:11–17; Ioane 5:1–20; 9:1–16. O a nisi mataupu faavae e uiga i le Sapati ua tatou aoaoina mai nei mau? Esoto 20:8–11; 31:12–18; Isaia 58:13–14; ma le MF&F 59:9–19. Valaaulia tagata e faasoa mai mea e mafai ona latou faia e mulimuli ai i le faataitaiga a le Faaola.

Tagai foi Russell M. Nelson, “O Le Sapati o se Aso Fiafia,” Ensign po o le Liahona, Me 2015, 129–32.

O Le Sapati o se aso e tapuai ai.

Tusi le upu tapuai i luga o le laupapa ma fesili atu i tagata o le vasega e tusi nisi upu e fesootai i ai i autafa. Ona fai lea o ni koluma se tolu i upu luma mai, i le taimi, ma le mavae ai i le pito i luga o koluma taitasi. O le a se mea e mafai ona tatou faia i luma mai, i le taimi, ma le mavae ai o le lotu e tapuai atu ai i le Alii i Lona aso paia? E mafai e tagata o le vasega ona faitau faatasi le Mosaea 18:17–29 ma le Moronae 6 mo ni manatu. Valaaulia tagata e mafaufau loloto i le auala o loo fesoasoani ai o latou uiga ma faatinoga i le aso Sapati i le latou tapuaiga i le Alii i lena aso (tagai Esoto 31:16–17). O le a se mea e mafai ona tatou faia e fesoasoani e faaleleia ai le aafiaga tapuai o mauaina e o tatou aiga ma tagata o le uarota i le taimi o sauniga Lotu?

O le ‘ai ma le inu i le faamanatuga e mafai ai ona tatou maua le Agaga e faatasi ma i tatou i taimi uma.

Tusi fesili nei i luga o le laupapa: O faapefea ona aafia e le faamanatuga lou olaga? Ina ia tali i lenei fesili, valaaulia tagata e galulue i paga e filifili ai ma talanoaina se tasi o fuaitau mai tatalo o le faamanatuga i le Mataupu Faavae ma Feagaiga 20:77, 79 ma le fautuaga i le Mataupu Faavae ma Feagaiga 59:9. Tuu atu ia tofu paga taitasi ma le taimi e sue ai ni mau ia e mafai ona fesoasoani ia i latou ina ia malamalama lelei atili ai ia latou fuaitau, ma talanoa i le auala o le a latou tali ai i le fesili o loo i luga o le laupapa. Atonu e mafai foi ona e valaaulia tagata o le vasega e filifili ni viiga o le faamanatuga e fiafia i ai ma usu faatasi i latou.

Tagai foi Cheryl A. Esplin, “O Le Faamanatuga—o se Toefaafouina o le Agaga,” Ensign po o le Liahona, Nov. 2014, 12–14.

O le Sapati o se aso e auauna atu ai i isi.

O le a se mea e mafai ona tatou aoao mai e uiga i le auauna atu i isi i le Sapati mai auala na auauna atu ai le Faaola ma faamanuiaina ai i latou na siomiaina o Ia? Uunaia tagata e toe iloilo ma talanoaina le Mataio 9:10–13; Luka 19:1–9; Ioane 11:32–46; 13:1–5, 12–17; ma le 3 Nifae 17:5–10. Fai atu i tagata e mafaufau e uiga i nei mau a o latou mafaufau i le auala e mafai ona latou auauna atu ai i le Sapati. Mo se faataitaiga, e mafai ona latou auauna atu i tagata o le aiga, aapa atu i tagata taitoatasi ma aiga latou te auauna atu i ai i faiaoga o aiga ma faiaoga asiasi, galulue i talafaasolopito o aiga, asiasi i e mama’i, pe faasoa atu le talalelei. Atonu e mafai e tagata ona faia se fonotaga faaleaiga e fuafua ai auala e mafai ona latou auauna atu ai i isi i le Sapati.

Saili punaoa nei i le polokalama o le Potutusi o le Talalelei i le comefollowme.lds.org.