O Le A Le Mea ua Ese Ai?

I nei aso e gata ai, ua toefuataiina e le Atua le perisitua ma faatulaga korama a le au perisitua ma le Aualofa e fesoasoani e faataunuu Lana galuega (tagai Mose 1:39). O Aso Sa taitasi pe a tatou potopoto i sauniga a le Perisitua Mekisateko ma le Aualofa, tatou te potopoto e talanoa ma fuafua le auala o le a tatou faataunuuina ai Lana galuega. O le mafuaaga lena e manaomia ai ona sili atu nei sauniga nai lo vasega. O ni avanoa foi e fefautuaai ai e uiga i le galuega o le faaolataga, aoao faatasi mai aoaoga a taitai o le Ekalesia e uiga i lena galuega, ma faatulaga e faataunuuina ai. O nei suiga i a tatou sauniga i Aso Sa o le a fesoasoani ia i tatou e faataunuu ai nei faamoemoega.

O Se Faasologa Faalemasina

O sauniga i Aso Sa a le Perisitua Mekisateko ma le Aualofa o le a mulimuli i le faasologa faalemasina lenei:

Vaiaso	Faamoemoega
Aso Sa Muamua	Fefautuaai faatasi e uiga i tiutetauave, avanoa, ma luitau i le lotoifale ma fai ni fuafuaga e faatino ai.
Aso Sa Lona Lua ma le Lona Tolu	Suesue i savali o le konafesi aoao talu ai nei ia na filifilia e le au peresitene po o taitai vaega pe, i nisi taimi, o le epikopo po o le peresitene o le siteki.
Aso Sa Lona Fa	Talanoa i se autu faapitoa, na filifilia e le Au Peresitene Sili ma le Korama a Aposetolo e Toasefululua
Aso Sa Lona Lima	Talanoa i se autu na filifilia e le au epikopo

O Se Mamanu mo a Tatou Sauniga

I a tatou sauniga taitasi o le Perisitua Mekisateko ma le Aualofa, tatou te mulimuli i se mamanu e faataunuu ai le galuega a le Atua.

1. Faasoa aafiaga na oo mai i musumusuga ma valaaulia na maua mai sauniga talu ai a le au perisitua ma le Aualofa (taitaia e le au peresitene po o le taitai vaega).

2. Fefautuaai faatasi (Aso Sa muamua, taitaia e le au peresitene po o se uso o le vaega) po o le aoao faatasi (aso sa lona lua, lona tolu, ma le lona fa, e taitaia e se faiaoga ua valaauina).

3. Fuafua e faatino o se vaega po o ni tagata taitoatasi (taitaia e le au peresitene po o le taitai vaega).