“6–12 Sānuali. 1 Nīfai 1–7: ‘Te u ʻAlu ʻo Fai ʻa e Ngaahi Meʻa,’” Haʻu, ʻo Muimui ʻIate Au—Maʻá e Palaimelí: Tohi ʻa Molomona 2020 (2020)
“6–12 Sānuali. 1 Nīfai 1–7,” Haʻu, ʻo Muimui ʻIate Au—Maʻá e Palaimelí: 2020
Fononga ʻa Līhai ʻo Ofi ki he Tahi Kulokulá, tā ʻa Gary Smith
6–12 Sānuali
1 Nīfai 1–7
“Te u ʻAlu ʻo Fai ʻa e Ngaahi Meʻa”
ʻI hoʻo lau e 1 Nīfai 1–7, fakakaukau ki he ngaahi veesi, aʻusia, fehuʻi, mo ha ngaahi maʻuʻanga tokoni kehe ʻokú ke ongoʻi ʻoku ueʻi fakalaumālie koe ke ke fakaʻaongaʻi ki hono akoʻi e fānaú. ʻE lava ke fulihi ʻa e ngaahi ʻekitivitī ʻi he fokotuʻutuʻu ko ʻení maʻá e fānau lalahi angé pe iiki angé.
Lekooti e Ngaahi Ongo ʻOkú ke Maʻú
Fakaafeʻi Ke Vahevahe
Mahalo ʻe ʻi ai ha niʻihi ʻi hoʻo kalasí kuo nau ʻosi fanongo pe lau kau ki he ngaahi aʻusia ʻa e fāmili ʻo Nīfaí ʻi he 1 Nīfai 1–7. Fakaafeʻi kinautolu ke nau vahevahe e meʻa ʻoku nau ʻiló. Kapau ʻoku ʻikai ʻilo lahi e fānaú ki he ngaahi aʻusia ʻa Nīfaí, ʻoange ha faingamālie ʻi he ʻosi e lēsoní ke nau vahevahe e meʻa ne nau akó.
Akoʻi e Tokāteliné: Fānau Iiki Angé
ʻOku ou fie maʻu haʻaku fakamoʻoni pē ʻaʻaku.
Naʻe fakaʻau ʻo tui ʻa Nīfai ki he ngaahi lea ʻa ʻene tamaí koeʻuhí naʻá ne maʻu ha ngaahi holi ke ne ʻilo maʻana pē pea naʻá ne lotu ki he ʻEikí. Tokoniʻi e fānaú ke nau ako mei heʻene tā sīpingá.
Ngaahi ʻEkitivitī ʻe Ala Fakahokó
-
ʻOmi ha puha ʻoku tāpuní ʻoku faʻo ha tā ʻo e Fakamoʻuí ʻi loto, pea ʻoange ki he fānau takitaha ha faingamālie ke ne ʻiloʻi maʻana pē ʻa e meʻa ʻoku ʻi loto he puhá. Talaange ki he fānaú, naʻe fie maʻu ʻe Nīfai ke ne maʻu haʻane fakamoʻoni maʻana pē ki he fekauʻi ʻe he ʻEikí hono fāmilí ke nau mavahe mei Selūsalemá. Kole ki he fānaú ke nau fanongo ki he meʻa ne fai ʻe Nīfai ke ne maʻu ai haʻane fakamoʻoní lolotonga hoʻo lau e 1 Nīfai 2:16. Fakamoʻoniʻi ange, ko e founga tatau pē ne tau fakaava ai e puhá ke ʻiloʻi e meʻa ʻoku ʻi lotó, ʻoku pehē pē ʻa e fie maʻu ke tau kole ki he ʻOtuá ke tau maʻu ha fakamoʻoni maʻatautolu peé.
-
ʻOmi ha ʻū fakatātā pe ʻū meʻa ʻokú ne fakafofongaʻi ha ngaahi meʻa ʻe ala fekumi e ai fānaú ke maʻu ha fakamoʻoni ki ai, hangē ko ha fakatātā ʻo Sīsū Kalaisi, ko e Tohi ʻa Molomoná, pe ko ha tā ʻo e palōfita moʻuí. Fakaafeʻi e fānaú ke nau fili ha fakatātā pe ko ha meʻa pea nau vahevahe ki he kalasí ʻa ʻenau fakamoʻoni ki he meʻa ko iá.
ʻE tokoniʻi au ʻe he ʻOtuá ke u tauhi ʻEne ngaahi fekaú.
Te ke fakaʻaongaʻi fēfē ʻa e ngaahi talanoa ko ʻení ke tokoni ke mahino ki he fānaú, ʻoku tokoniʻi kitautolu ʻe he ʻOtuá ke tau tauhi ʻEne ngaahi fekaú, neongo ʻenau hā ngali faingataʻa ke tauhí?
Ngaahi ʻEkitivitī ʻe Ala Fakahokó
-
Lau ʻa e 1 Nīfai 2:2–4 ki he fānaú pea fakaʻaliʻali ange ha ʻū fakatātā ʻe niʻihi ʻo e ngaahi meʻa ne ʻave ʻe he fāmili ʻo Līhaí ki he feituʻu maomaonganoá hangē ko ha tēniti, ʻū kafu, mo ha ʻū kaufana mo e ngahau. Kole ange ke nau fakakaukauloto pe ko e hā haʻanau ongo kapau ne pau ke nau liʻaki honau ngaahi ʻapí ka nau ō ki he feituʻu maomaonganoá. Ko e hā e meʻa ʻoku fekauʻi mai ʻe he ʻEikí ke tau fai, ke tau talangofua ai kiate Ia he ʻaho ní?
-
Tokoniʻi e fānaú ke nau valivali pea kosi ʻo toʻo ʻa e ʻū fakatātā pepa ʻi he peesi ʻekitivitī ʻo e uike ní; pea kole ange ke nau fakaʻaongaʻi e ʻū fakatātā pepá ke fakamatalaʻi fakanounou ʻaki e talanoa kia Nīfai mo hono ngaahi tokouá ʻi heʻenau ʻalu ke ʻomi e ʻū lauʻi peleti palasá (vakai, 1 Nīfai 3–4). ʻE lava ke tokoni atu ʻa e foʻi hiva “Loto-toʻa ʻa Nīfaí” (Tohi Hiva ʻa e Fānaú, 64) mo e “Vahe 4: Ko e ʻŪ Peleti Palasá” (Ngaahi Talanoa ʻo e Tohi ʻa Molomoná, 8–12; vakai foki ki he vitiō ʻoku fekauʻaki mo ia ʻi he ChurchofJesusChrist.org) ki hono tala ʻo e talanoá ni.
-
Fakaʻaongaʻi e ʻū fakatātā 103–15 ʻi he Tohi Fakatātā ʻo e Ongoongoleleí ke tokoni ki he fānaú ke nau fakakaukau ki he ngaahi meʻa ʻoku fekau mai ʻe he ʻEikí ke tau faí. ʻOku faitāpuekina fēfē kitautolu ʻi heʻetau talangofua kiate Iá? Tokoni ke nau teuteuʻi ha ʻū pine ʻoku pehē Te u ʻalu ʻo fai ʻa e ngaahi meʻa kuo fekau ʻe he ʻEikí (1 Nīfai 3:7). Toutou lea fakataha ʻaki ʻa e kupuʻi leá.
Ko ha koloa matuʻaki mahuʻinga ʻa e folofolá.
Te ke tokoni fēfē ke ueʻi fakalaumālie ʻa e fānaú ke nau mataʻikoloa ʻaki ʻa e folofolá, pe ko e folofola ʻa e ʻOtuá?
Ngaahi ʻEkitivitī ʻe Ala Fakahokó
-
Fakaʻaliʻali ki he fānaú ha meʻa (pe ko ha fakatātā ʻo ha meʻa) ʻoku matuʻaki mahuʻinga kiate koe. Talanoa ki he founga ʻokú ke tokangaʻi mo tauhi ʻaki iá. Fakamatalaʻi ange, naʻe matuʻaki mahuʻinga ʻa e folofolá ki he fāmili ʻo Līhaí, ʻo hangē ha koloa mahuʻingá.
-
Fakaafeʻi ʻa e fānaú ke nau tokoni atu ke ke talanoaʻi pe fakatātaaʻi e meʻa ne fai ʻe Nīfai mo hono ngaahi tokouá ke nau maʻu ai ʻa e ʻū lauʻi peleti palasá: ne nau fononga mamaʻo, foaki ʻenau koulá mo e silivá, pea toitoi ʻi ha ʻana ke fakahaofi ʻenau moʻuí. Lau e 1 Nīfai 5:21. Ko e hā e ʻuhinga ne mahuʻinga ai e folofolá ki he fāmili ʻo Līhaí? Te tau tauhi fēfē ʻa e folofolá ke hangē ha koloa mahuʻinga?
Maʻu ʻe Līhai e ʻŪ Lauʻi Peleti Palasá, tā ʻa Clark Kelley Price
Akoʻi e Tokāteliné: Fānau Lalahi Angé
Te u lava ʻo maʻu haʻaku fakamoʻoni pē ʻaʻaku.
Ko e hā ʻokú ke ako mei he sīpinga ʻa Nīfaí ʻo kau ki hono maʻu ha fakamoʻoni maʻau peé? Te ke tokoni fēfē ki he fānaú ke nau ako mei heʻene tā sīpingá?
Ngaahi ʻEkitivitī ʻe Ala Fakahokó
-
Kole ki he fānaú ke nau fekumi ʻi he 1 Nīfai 2:16, 19 ke nau ʻiloʻi e founga ne maʻu ai ʻe Nīfai ha fakamoʻoni ki he ngaahi lea ʻa ʻene tamaí. Fakaafeʻi ke nau hiki e ngaahi ngāue ʻa Nīfaí ʻi ha ʻū kongokonga papa pe ko ha ʻū meʻa kehe pea fakaʻaongaʻi leva ia ke langa ʻaki ha meʻa ke ne fakafofongaʻi e founga ʻoku tokoniʻi ai kitautolu ʻe he ngaahi meʻa ko iá ke fakatupulaki ha fakamoʻoní.
-
Talanoa ange ki he fānaú ʻa e founga naʻá ke maʻu ai hoʻo fakamoʻoni ki he ongoongoleleí. Fakaafeʻi ke nau vahevahe ha ngaahi aʻusia tatau kuo nau maʻu, pea poupouʻi ke nau muimui ki he sīpinga ʻa Nīfaí ke hokohoko atu hono fakatupulaki ʻenau ngaahi fakamoʻoní. Ko e hā ha founga ʻe lava ke tokoniʻi ai kitautolu heʻetau fakamoʻoní?
Te u lava ʻo tali ʻi he tui ʻa e ngaahi fekau ʻa e ʻEikí.
ʻE tokoni ki he fānaú ʻa hono fakatupulaki ha ʻulungaanga hangē ko Nīfaí, ʻi he taimi ʻoku folofola mai ai ʻe he ʻEikí ke tau fai ha meʻa ʻoku ngali faingataʻá.
Ngaahi ʻEkitivitī ʻe Ala Fakahokó
-
Vahevahe ʻa e kalasí ki ha kulupu ʻe ua. Fakaafeʻi ha kulupu ʻe taha ke nau lau e tali ʻa Leimana mo Lemiuela kia Līhaí (vakai, 1 Nīfai 3:2–5) pea ki he kulupu ʻe tahá ke nau lau e tali ʻa Nīfaí (vakai, 1 Nīfai 3:2–4, 7). Fakaafeʻi ha fānau ke ne fakangalingali pē ko Līhai ia pea kole ki he toenga ʻo e fānaú ke nau fakangalingali pē ʻoku nau foki ki Selusalema ke ʻomi ʻa e ʻū lauʻi peleti palasá. Fakaafeʻi e kulupu takitaha ke nau tali ʻi he ngaahi lea pē ʻanautolu ʻo kapau ko kinautolu e kakai ʻi he ngaahi vēsí. Ko e hā ha ngaahi meʻa kuo fekauʻi kitautolu ʻe he ʻOtuá ke tau fai? ʻE lava fēfē ke tau hangē ko Nīfaí?
-
Hivaʻi fakataha ha hiva fekauʻaki mo e talangofuá, hangē ko e “Loto-toʻa ʻa Nīfaí” pe “Tauhi ʻa e Ngaahi Fekaú” (Tohi Hiva ʻa e Fānaú, 64, 68), pea kole ki he fānaú ke nau fakafanongo ki he ngaahi kupuʻi lea ʻokú ne akoʻi mai e founga ʻoku totonu ke tau tali ʻaki ki he ʻEikí.
ʻE tataki au ʻe he Laumālie Māʻoniʻoní ʻi heʻeku feinga ke fai e finangalo ʻo e ʻEikí.
Naʻe muimui ʻa Nīfai ki he Laumālié, “ʻo ʻikai te [ne] tomuʻa ʻilo ʻa e meʻa te [ne] faí” (1 Nīfai 4:6). Te ke tokoni fēfē ki he fānau ʻokú ke akoʻí ke nau fekumi ki he tataki ʻa e Laumālie Māʻoniʻoní?
Ngaahi ʻEkitivitī ʻe Ala Fakahokó
-
Fakaafeʻi e fānaú ke nau fakatātaaʻi e talanoa ʻo e feinga ʻa Nīfai mo hono ngaahi tokouá ke nau maʻu e ʻū lauʻi peleti palasá (vakai, 1 Nīfai 3–4). Fakaafeʻi ha fānau ke ne lau e 1 Nīfai 4:6, pea kole ki he kalasí ke nau fakafanongo ki he meʻa ne fai ʻe Nīfai ʻa ia ne malava ai ke nau lavameʻá.
-
Vahevahe mo e fānaú ha ngaahi sīpinga ʻo e meʻa ʻe finangalo e ʻOtuá ke nau faí, hangē ko ha fakakaungāmeʻa ki ha taha ʻoku ngali tuēnoa he akó, fakamolemoleʻi hanau tokoua pe tuongaʻane, pe tala ʻa e moʻoní hili hano fai ha fehālaaki. Kole ki he fānaú ke nau vahevahe e founga ʻe ala tokoniʻi ai kinautolu ʻe he Laumālie Māʻoniʻoní kiate kinautolu ʻi he ngaahi tūkunga ko iá. ʻE lava fēfē ke tau fakaafeʻi ʻa e Laumālie Māʻoniʻoní ke ne tokoniʻi kitautolu ke tau talangofua ki he ʻOtuá?
Poupouʻi e Ako ʻi ʻApí
Fakaafeʻi e fānaú ke nau vahevahe ha ngaahi aʻusia ʻi honau fāmilí ʻi he taimi ne faitāpuekina ai kinautolu ʻi heʻenau tauhi e ngaahi fekaú. Poupouʻi ke nau kole ki he kau mēmipa honau fāmilí ke nau vahevahe ha ngaahi aʻusia tatau.
Fakatupulaki ʻEtau Akoʻí
Tokoniʻi e fānau īkí ke nau ako mei he folofolá. Ke tokoni ki he fānaú ke nau ako mei he folofolá, tokanga taha ki ha veesi pē ʻe taha ʻo e folofolá pe ko ha kupuʻi lea mahuʻinga. Te ke lava ʻo fakaafeʻi ʻa e fānaú ke nau tuʻu ki ʻolunga pe hiki honau nimá ʻi he taimi ʻoku nau fanongo ai ki he foʻi lea pe kupuʻi lea ko iá. (Vakai foki, Ko e Faiako ʻi he Founga ʻa e Fakamoʻuí, 21.)