Juļae 13–19

Alma 32–35

“Kalbwini Naan Eo ilo Būruōmi”

Kōļmenļo̧kjeņ kōn ajri ro kwoj katakin ilo ļōmņak ilo am̧ jar im ekkatak Alma 32–35. Ilo am̧ kōm̧m̧an āidein, kōļmenļo̧kjeņ ko im im̧we ko renaaj itok elmen am̧ katakin er. Je im mour kake im̧we kein.

Je En̄jake ko Rej Im̧we Eok

Kajjitōk bwe ren Kwaļo̧k

Likūt etan kajjojo ajri ilo juon ninne. Kajjitōk ippān juon n̄an bōk juon āt, im kajjitōk ippān ajri eo bwe en kwaļo̧k jet men eaar ekkatak jān Bok in Mormon. Etal wōt m̧ae em̧ōj an aolep bōk kūņaer, im aolep ren jab kijōr in kwaļo̧ke.

Katakin Katak ko: Ajri ro Reddikļo̧k

Lale Alma 32:28–43

Imaron̄ jipan̄ kōkajoorļo̧k tōmak eo aō ilo Jisōs Kraist.

Ine, wūt, im leen wōjke rej kein ekkatak ko āinwōt me remaron̄ jipan̄ ajri ro meļeļe pedped in katak ko āinwōt tōmak im naan in kam̧ool. Kejokļo̧kjeņ ewi wāween am̧ maron̄ kōjerbal waanjon̄ok eo an Alma n̄an katakin ajri ro.

M̧akūtkūt ko Maron̄ Kōm̧m̧ani

• Kōmeļeļeiki Alma 32:28–43; kwomaron̄ kōjerbal “Jebta 29: Alma Teaches about Faith and the Word of God” (Bwebwenato ko ilo Bok in Mormon, 81, ak ilo corresponding video ilo ChurchofJesusChrist.org). Kwaļo̧k pijain juon menin eddōk ilo wāween an eddōk, im kajjitōk ippān ajri ro n̄an jipan̄ eok likūt pija ko ilo jejjetier (lale pija ko an peij in m̧akūtkūt eo an wiik in). Kōmeļeļeik bwe ilo ad mour kōn gospel in, naan in kam̧ool eo ad ej kajoorļo̧k—ej jino āinwōt juon ine edik ak emaron̄ in erom̧ juon wōjke ekilep.

• Kwaļo̧k n̄an ajri ro juon ine, im riiti n̄an er lain ko jinoin Alma 32:28. Ba n̄an ajri ro bwe naan in Anij ej āinwōt juon ine. Kajjitōk ewi wāween ad jipan̄ katōk juon ine. Katan wōt n̄e ajri ro rej katōk juon ine, wūt tidikdiki, im jipan̄ kaddōke. Kalikkar bwe jeban lo ine eo ālkin ad katōke, ak jej jeļā epād ijeņ n̄an eddōk; jeban bar loe Jemedwōj Ilan̄ im Jisōs Kraist, ak jej jeļā bwe Rej mour im Rej iakwe kōj. Jipan̄ ajri ro ļōmņake men ko remaron̄ kōm̧m̧ani n̄an jipan̄ kōkajoorļo̧k tōmak eo aer ilo Jisōs Kraist eddōk.

• Jin̄aik juon wōjke ioon bo̧o̧t eo, im kōtļo̧k bwe ajri ro ren likūt bōlōk ak leen wōjke kajjojo iien n̄e rej ļōmņake jet men rej kōm̧m̧an n̄an jipan̄ tōmak eo aer ilo Jisōs Kraist eddōk. Kajjitōk ippān ajri ro n̄an kōm̧m̧ani jerbal ko reļam waan n̄an pinej jenkwan men ko rej ļōmņaki.

Alma 33:2–11; 34:17–27

Jemedwōj Ilan̄ ej ron̄jake eō n̄e ij jar.

Rizoram ro raar jar juon katten ilo juon wiik, kōjerbal ejja naan ko kajjojo iien (lale Alma 31:22–23). Alma im Amulek raar kwaļo̧k bwe jemaron̄ jar jabdewōt iien kōn jabdewōt aikuj ko ad ilo jetōb im ilo kanniōk.

M̧akūtkūt ko Maron̄ Kōm̧m̧ani

• Riiti naan ko kwaar kāleti jān Alma 33:4–11 me rej kōmeļeļeik jikin ko jemaron̄ jar ie, im jipan̄ ajri ro ļōmņake jikin ko remaron̄ jar ie. Innām kajjitōk ippāer n̄an jin̄aik pija ko kōn aer jar ilo jikin ko. Kam̧ool bwe remaron̄ jar jabdewōt jikin, men̄e renaaj jar ippāer make.

• Kālet naan ko jān Alma 34:17–27 me rej kōmeļeļeik men ko jemaron̄ jar kaki, im riiti ļo̧k n̄an ajri ro. Jipan̄ er ļōmņaki men ko remaron̄ ba n̄an Jemedwōj Ilan̄ n̄e rej jar, im kajjitōk ippāer n̄an jin̄aik pijain men kein. Kam̧ool bwe remaron̄ kōnono n̄an Jemedwōj Ilan̄ kōn jabdewōt men rej ļōmņake ak en̄jake. Kwaļo̧k juon en̄jake me Jemedwōj Ilan̄ eaar uwaake jar ko am̧.

• Al juon al me ej katakin ajri ro kōn jar, āinwōt “A Child’s Prayer” ak “We Bow Our Heads” (Children’s Songbook, 12–13, 25). Jipan̄ er kile ta eo al eo ej katakin kōn jar.

Katakin Katak ko: Ajri ro Rerūttoļo̧k

Alma 32:1–16, 27–28

N̄e ij ettā, Irooj emaron̄ katakin eō.

Alma im Amulek raar anjo̧ ilo katakin Rizoram ro ro raar ettā im pojak n̄an ron̄jake naan eo an Anij. Ļōmņake ewi wāween am̧ maron̄ rōjan̄ ajri ro n̄an kālet n̄an ettā.

M̧akūtkūt ko Maron̄ Kōm̧m̧ani

• Kajjitōk ippān ajri ro ta eo raar keememeje wiik eo ļo̧k kōn Rizoram ro (lale Alma 31:8–24). Kakeememej er bwe juon wun Alma ekar inepata kōn er ej kōn utiej bōro eo aer (lale Alma 31:24–28). Riit ippān doon Alma 32:1–5, im kajjitōk ippān ajri ro n̄an kōmeļeļeiki ta eo eaar waļo̧k n̄an Rizoram ro raar jeram̧ōļ. Innām kajjitōk ippān ajri ro n̄an riiti eoon:12–13 n̄an lo unin an Alma kar en̄jake ke diwōjļo̧k jen jikin jar eo aer (ak kabun̄ ko aer) ekar juon men em̧m̧an n̄an Rizoram rein. Ta jet iaan kōjeraam̧m̧an ko me rej itok jen menin ettā?

• Jipan̄ ajri ro pukot juon meļeļe in ettā ak meanwōd ilo Guide to the Scriptures ak ilo tikjinede. Meļeļein naan kein remaron̄ loi ilo Alma 32:13–16? Kajjitōk ippāer n̄an ļōmņak kōn elōn̄ wāween ko n̄an kadedeļo̧k naan eo āinwōt “Imaron̄ in ettā n̄e ij .”

Alma 32:26–43

Naan in kam̧ool eo kōn Jisōs Kraist ej kajoorļo̧k n̄e ij naajdiki.

Jipan̄ ajri ro kwoj katakin lo ta eo remaron̄ kōm̧m̧ane n̄an “katōk” naan eo an Anij ilo būruōwer

M̧akūtkūt ko Maron̄ Kōm̧m̧ani

• Kwaļo̧k juon men epen, āinwōt (dekā) n̄an pinej jenkwan juon bōro epen ak utiej bōro im jet men repidodo (āinwōt bwidej) n̄an pinej jenkwan juon bōro epidodo ak ettā bōro. Kōm̧m̧an bwe ajri ro ren en̄jake men kein jim̧or. Innām kwaļo̧k n̄an ajri ro juon ine n̄an pinej jenkwan naan in Anij. Kajjitōk ippāer n̄an iuuni ļo̧k ine eo n̄an men eo epen im men eo epidodo. Riit ippān doon Alma 32:27–28, im kōnono kake ta eo emaron̄ in “ņa jikin” (eoon 27) naan in Anij ilo būruwōd.

• Ilo am̧ riiti Alma 32:26–43 ippān doon, bōjrak jidik im kajjitōk ippān ajri ro n̄an jin̄aik juon pija in juon ine ak katōk eo em̧ōj kar kōmeļeļeiki—n̄an waanjon̄ok, juon ine em̧m̧an (eoon 28), an eddōk (eoon 30), im an kalle leen (eoon 37). Rōjan̄ ajri ro n̄an ņa pija ko aer ippān eoon ko jān Alma 32. Elmen wūttidikdiki juon ine āinwōt wūttidikdiki naan in kam̧ool eo kōn Jisōs Kraist? Elmen ad wūttidikdiki naan in kam̧ool ko ad? Kajjitōk ippān ajri ro n̄an ļōmņak jidik kōn wāween an naan in kam̧ool ko aer kajoorļo̧k im ta eo remaron̄ kōm̧m̧ane n̄an wūttidikdiki.

Alma 33:2–11; 34:17–27

Jemedwōj Ilan̄ ej ron̄jake eō n̄e ij jar.

Rizoram ro raar bōk m̧ōņ kōn jar ko, jet iaer jej loi wōt rainin. Alma im Amulek raar kwaļo̧k m̧ool ko rekajoor n̄an anjo̧ jen m̧ōņ ko aer

M̧akūtkūt ko Maron̄ Kōm̧m̧ani

• Jipan̄ ajri ro kappukōt Alma 33:2–11 naan ko raorōk im eoon ko eiokļo̧k jar me rej āliji. Ta eo naan im eoon kein rej katakin kōj kake kōn jar?

• Jipan̄ ajri ro kōm̧m̧ane juon elaajrak in jekjek ko me remaron̄ jar kaki, ekoba men ko rej waļo̧k ilo Alma 33:4–10 im 34:17–27 barāinwōt jekjek ko ilo mour ko aer. Kajjitōk ippān ajri ro n̄an ļōmņak kake ak kwaļo̧k en̄jake ko ke raar jar im kar en̄jake bwe Anij eaar uwaake jar ko aer.

Kōketak Ekkatak ilo M̧weo

Eļan̄n̄e ekkar, leļo̧k n̄an kajjojo ajri ine n̄an bōk n̄an m̧weeo n̄an kakeememej er n̄an jipan̄ naan in kam̧ool eo kōn Jisōs Kraist n̄an kajoorļo̧k. Rōjan̄ er n̄an kwaļo̧k n̄an baam̧le ko aer ta eo raar ekkatak n̄an kōjerbal tōmak eo aer ilo Jisōs Kraist.

Kōkōm̧anm̧anļo̧k Ad Katakin

Kam̧ool kōn kōjeraam̧m̧an ko kar kallim̧ur kaki. N̄e kwoj kajjitōk ippān ajri ro n̄an mour kake pedped in gospel in, ba ļo̧k n̄an er kōn kōjeraam̧m̧an ko an Anij n̄an ro rej mour kake pedped kein (lale Teaching in the Savior’s Way,35(.