“Juun 29–Juļae 5 Alma 23–29: Raar ‘Jamin Raar Bun̄,’” Itok, Ļoor Eō—N̄an Būraimere: Bok in Mormon 2020 (2020)
“Juun 29–Juļae 5 Alma 23–29,” Itok, Ļoor Eō—N̄an Būraimere: 2020
RiAnti-Nipai-Liai ro Raar kalbwin Kein Tariņae ko Aer, Jān Jody Livingston
Juun 29–Juļae 5
Alma 23–29
Raar “Jamin Raar Bun̄”
Jar in ekkatak Alma 23–29, pukot im̧we kōn ta eo ajri ro reaikuji im wāween jipan̄ er.
Je En̄jake ko Rej Im̧we Eok
Kajjitōk bwe ren Kwaļo̧k
Jin̄aik juon māj elem̧ōņōņō ilo juon peba jidikdik, im kōm̧m̧an bwe kajjojo ajri ren jibwe. Ilo aer jibwe peba eo, kajjitōk ippāer n̄an kwaļ̧o̧k jet āt ilo aer ekkatak jān Bok in Mormon me ebōktok n̄an er lem̧ōņōņō.
Katakin Katak ko: Ajri ro Reddikļo̧k
Ij jeraam̧m̧an n̄e ij kōjparok kallim̧ur ko aō.
Ta eo kwaar ekkatak ilo am ekkatak jen Alma 24:6–24 me emaron̄ jipan̄ ajri ro meļeļe aorōkin kōjparok juon kallim̧ur ekwojarjar?
M̧akūtkūt ko Maron̄ Kōm̧m̧ani
-
Riiti jet eoon ko ak naan jān Alma 24:6–24 n̄an katakin ajri ro kōn RiAnti-Nipai-Liai ro, im kallim̧ur ko raar kōm̧m̧ani, im wāween aer kar kōjparok kallim̧ur ko. Kwomaron̄ bar kōjerbal pija in ilo laajrak eo an wiik in ilo Itok, Ļoor Eō—N̄an Kajjojo Armej im Baam̧le ko ak “Jebta 26: Armej ro an Ammōn” (Bwebwenato ko ilo Bok in Mormon, 73–74, ak pija in alooj eo ilo ChurchofJesusChrist.org).
-
Kōmeļeļeik wāween an RiAnti-Nipai-Liai ro kar kōjparok kallim̧ur eo aer n̄an kallibwin kein tariņae ko aer. Kajjitōk ippān ajri ro n̄an jin̄aik juon jejā innām katen wōt n̄e rej kibwij juon ron̄ im kallibwin jejā aer. Jipan̄ ajri ro ļōmņak kōn kallim̧ur ko rej kōm̧m̧ani. Etke eaorōk n̄an kōjparok kallim̧ur ko? Kōmeļeļeik bwe ke jaar peptaij, jej kōm̧m̧ani kallim̧ur ko ippān Anij im Ej kōm̧m̧an kallim̧ur ippād. Rej ņaetaer bujen ko. Kam̧ool bwe jej jeraam̧m̧an n̄e jej kōjparok kallim̧ur ko ad ippān Anij.
Gospel in ej bōktok lem̧ōņōņō, im imaron̄ kwaļo̧k lem̧ōņōņō in n̄an ro jet.
Ammōn, eo eaar jipan̄ katakin gospel eo n̄an RiAnti-Nipai-Liai, ro raar bōk lem̧ōņōņō in jān kwaļo̧k gospel in. Alma, eo eaar bar katakin gospel eo n̄an elōn̄ armej, eaar bar bōk lem̧ōņōņō in. Jemaron̄ bar en̄jake ejja lem̧ōņōņō in n̄e jej kwaļo̧k ad naan in kam̧ool n̄an ro jet.
M̧akūtkūt ko Maron̄ Kōm̧m̧ani
-
Kālet jet eoon ko jān Alma 26 ak 29 me ej kōnono kōn lem̧ōņōņō, im riiti n̄an ajri ro (lale, n̄an waanjon̄ok, Alma 26:11, 13 ak Alma 29:13–14). Kajjitōk ippān ajri ro n̄an jutak aolep iien n̄e rej ron̄ naan eo “lem̧ōņōņō” ak “m̧ōņōņō.” Jipan̄ ajri ro meļeļe bwe kwaļo̧k gospel eo ekar kōm̧m̧an an Alma im Ammōn m̧ōņōņō. Kwaļo̧k juon en̄jake me kwaļo̧k gospel eo ej bōktok n̄an kwe lem̧ōņōņō.
-
Kajjitōk ippān ajri ro n̄an jin̄aik pijain jet men me eaar bōktok n̄an er lem̧ōņōņō. Kajjitōk ippān kajjojo ajri n̄an leļo̧k jin̄a eo an n̄an ro jet uwaan kūlaaj eo im kōmeļeļeiki. Kalikkare bwe n̄e jet men ej bōktok lem̧ōņōņō n̄an kōj—āinwōt gospel in—ad lem̧ōņōņō ej kajoorļo̧k n̄e jej kwaļo̧ke.
-
Leļo̧k n̄an juon ajri juon kape in Bok in Mormon, im kōm̧m̧an bwe en kamminene kwaļo̧k n̄an ro uwaan kūlaaj eo. Rōjan̄ ajri ro n̄an kōmeļeļeik aer en̄jake kōn Bok in Mormon. Etke jej kwaļo̧k kōn Bok in Mormon n̄an ro jet?
Imaron̄ jipan̄ ro m̧ōtta mour kake gospel in.
RiNipai ro raar lo̧mo̧o̧ren RiAnti-Nipai-Liai ro jān rikōjdāt ro aer im kar jipan̄ er kōjparok bujen ko raar kōm̧m̧an ippān Irooj.
M̧akūtkūt ko Maron̄ Kōm̧m̧ani
-
Ba n̄an ajri ro bwe bwebwenatoin RiAnti-Nipai-Liai ro raar kōm̧m̧ane juon kallim̧ur jab ire ļo̧k wōt n̄an jidik (lale Alma 27:20–30). Kōmeļeļeiki bwe unin an RiAnti-Nipai-Liai ro kallim̧ur, rejjab maron̄ jojomar er make jān rikōjdāt ro aer. Riiti Alma 27:23, im kōmeļeļeik bwe ro m̧ōttaer ilubwiljin RiNipai ro raar kālet n̄an kōjparok RiAnti-Nipai-Liai ro bwe ren maron̄ kōjparok wōt kallim̧ur eo aer. Ewi wāween ad jipan̄ ro m̧ōttad kōjparok kallim̧ur ko aer? Kwaļo̧k kōn juon tōre me juon eo m̧ōttam̧ eaar jipan̄ eok kōjparok kallim̧ur ko am̧ ippān Anij.
-
Role-Play ippān ajri ro kōn jekjek ko remaron̄e, ilo juon wāween em̧m̧an, jipan̄ ro jet kālet jim̧we eo. N̄an waanjon̄ok, ta eo jemaron̄ ba n̄an eo m̧ōttad me ekōņaan riab ak lāj?
Katakin Katak ko: Ajri ro Rerūttoļo̧k
Bujen ko rej kallim̧ur ko Ij kōm̧m̧ani ippān Anij im Ej kōm̧m̧ani ippa.
RiAnti-Nipai-Liai ro raar kalbwin kein tariņae ko aer im kar kallim̧ur n̄an jamin bar ire. Ejja āinwōt, ajri ro kwoj katakin remaron̄ kōjparok bujen ko aer.
M̧akūtkūt ko Maron̄ Kōm̧m̧ani
-
Leļo̧k n̄an aolep ajri ro jet dekā jiddik, im kajjitōk ippāer n̄an je naan in bujen ioon dekā eo aer. Kōmeļeļeiki bwe bujen eo ej juon kallim̧ur kōtaan Jemedwōj Ilan̄ im ro Nejin. Ewi wāween an bujen ko ad kōm̧m̧an bwe jen kajoor ak “dim” ānwōt juon dekā? (Alma 24:19). Riit ippān doon Alma 24:16–25 n̄an jeļā ta bujen eo armej ro an Ammōn raar kōm̧m̧ane im ewi wāween aer kar kautiej bujen eo aer. Kajjitōk ippān ajri ro n̄an bōk dekā eo n̄an m̧weeo āinwōt juon kein kakeememej n̄an kōjparok bujen ko aer.
-
Riit ippān ajri ro Alma 24:16–19, im kōnono kōn ta eo RiAnti-Nipai-Liai ro raar kōm̧m̧ane n̄an kwaļo̧k n̄an Anij ke raar ukweļo̧k. Ta eo raar kallim̧ur n̄an jab kōm̧m̧ane? Kōmeļeļeik bwe bujen ko jej kōm̧m̧ani rej jet naan in “kam̧ool n̄an Anij” bwe jej kōņaan pokake kien ko an Anij (eoon 18). Ta bujen ko ajri ro raar kōm̧m̧ani?
-
Kajjitōk ippān ajri ro n̄an jin̄aiki pijain kein tariņae ko an RiAnti-Nipai-Liai ro. Innām kajjitōk ippāer n̄an je, ilo tulikkin kein tariņae ko, jet men eo rej en̄jake remaron̄ ukote n̄an maron̄ ļoor Jisōs Kraist. Kōtļo̧k bwe kōtan wōt n̄e rej kalbwin kein tariņae ko aer im kōm̧m̧ane juon karōk n̄an mour kake ta eo raar je.
Alma 24:7–10; 26:23–34; 27:27–30
Kōn an Jemedwōj Ilan̄ tiriam̧o, jemaron̄ ukweļo̧k im oktak.
Ej kab m̧ōj an ajri ro ekkatak kōn Alma, Ammōn, im RiAnti-Nipai-Liai ro. Ewi wāween am̧ kōjerbal bwebwenato kein n̄an kōmeļeļeik tiriam̧o eo an Jemedwōj Ilan̄ n̄an ro rej lukkuun in ukweļo̧k?
M̧akūtkūt ko Maron̄ Kōm̧m̧ani
-
Je Mokta im Ālkin ioon bo̧o̧t eo. Kajjitōk ippān jet iaan ajri ro n̄an riit im ļoor eoon ko n̄an pukot ta eo RiLeman ro raar kōņaan m̧okta jen an Ammōn im ro jein im jatin kar katakin er: Alma 17:14–15; 26:23–24. Kajjitōk ippān ajri ro jet n̄an riit im ļoor eoon ko n̄an pukot ewi wāween an kar RiLeman ro oktak: Alma 26:31–34; 27:27–30. Kajjitōk ippān ajri ro n̄an kōlaajrake ta eo rej loe. Innām kajjitōk ippāer n̄an pukote, ilo Alma 24:7–10, ewi wāween an Rileman ro kar maron̄ in lukkuun in oktak. Kwaļo̧k am̧ naan in kam̧ool kōn kajoor an Anij n̄an jeo̧rļo̧k ad bōd n̄an jipan̄ kōj ukweļo̧k im oktak.
-
Kajjitōk ippān ajri ro n̄an riit ippān doon Alma 26:21–22, pukot kōjeraam̧m̧an ko me rej itok n̄an ro rej ukweļo̧k. Kajjitōk ippān ajri ro n̄an kōmeļeļeik jet iaan kōjeraam̧m̧an kein ilo naan ko aer make.
Gospel in ej bōktok n̄an eō lem̧ōņōņō, im imaron̄ kwaļo̧k lem̧ōņōņō in n̄an ro jet.
Jebta kein reobrak kōn waanjon̄ok kōn lem̧ōņōņō me rej itok n̄an mour kaki im kwaļo̧k gospel in. Ewi wāween am̧ kōjerbal Alma 26 im29 n̄an im̧we ajri ro pukot lem̧ōņōņō in?
M̧akūtkūt ko Maron̄ Kōm̧m̧ani
-
Jipan̄ ajri ro n̄an pukot naan eo “lem̧ōņōņō” im “m̧ōņōņō” ilo Alma 26 im29. Riit ippān doon jet eoon ko rej loi, im kōnono ta eoon eo kein rej kwaļo̧ke kōn lem̧ōņōņō. Ta eo bōktok n̄an Ammōn im Alma lem̧ōņōņō? Kwaļo̧k juon en̄jake ke kwaar en̄jake kar lem̧ōņōņō in n̄an mour kake ak kwaļo̧k gospel in, ak kajjitōk ippān ajri ro n̄an kwaļo̧k en̄jake eo aer make.
-
Kajjitōk ippān ruo ajri n̄an jelm̧ae doon im lale wōn iaan ajri eo enaaj kattōn̄ ajri eo m̧okta. Ta jet iaan wāween ko jemaron̄ kajedeed lem̧ōņōņō in n̄an ro jet? Ewi wāween an kwaļo̧k gospel in kajedeed lem̧ōņōņō? Jipan̄ ajri ro ļōmņake wāween ko remaron̄ kwaļo̧k lem̧ōņōņō eo an gospel in n̄an ro m̧ōttaer im baam̧le ko aer.
Kōketak Ekkatak ilo M̧weo
Kajjitōk ippān ajri ro n̄an kōjparok kallim̧ur ko āinwōt kar RiAnti-Nipai-Liai ro.
Kōkōm̧anm̧anļo̧k Ad Katakin
Ekkatak juon eoon. Kālet juon eoon ak ennaan ekadu me kwoj ļōmņak emaron̄ jipan̄ ajri ro ilo kūlaaj eo am̧, im jipan̄ er kakkilōklōk e. Pija ko im kein ekkatak ko remaron̄ bar jipan̄.