“12–18 Oktoba. 3 Nifae 20–26: ‘Yufala I Ol Pikinini blong Kavenan,’” Kam Folem Mi—Blong Praemeri: Buk blong Momon 2020 (2020)
“12–18 Oktoba. 3 Nifae 20–26, ” Kam Folem Mi—Blong Praemeri: 2020
Pikja blong Kraes we i kamkamaot long Ol Man blong Nifae, i kam long Andrew Bosley
12–18 Oktoba
3 Nifae 20–26
“Yufala I Ol Pikinini blong Kavenan”
Taem yu stap ridim 3 Nifae 20–26, “stadi ol samting ia wetem strong tingting” (3 Nifae 23:1) blong faenem ol trutok we yu filim insperesen blong serem wetem ol pikinini insaed long klas blong yu.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Pasem raon wan pikja blong Sevya insaed long klas. Taem wan pikinini i holem pikja, invaetem hem blong hem i serem wan samting we Jisas i bin tijim, o i bin mekem taem Hem i bin visitim ol pipol insaed long Buk blong Momon. Oli save serem wan samting we oli bin lanem long hom, o long Praemeri.
Stap Tijim Doktrin: Ol Smol Pikinini
Mi save prea insaed long hat blong mi.
Sapos klas blong yu i bin lan abaot prea long las wik, yu save ademap samting long lesen ia wetem wan long ol aktiviti ia.
Samfala Aktiviti we Yu Save Mekem
-
Askem ol pikinini blong soem long yu wanem oli mekem taem oli stap prea. ?Wanem nao oli stap mekem han blong olgeta? ?Wetem hed blong olgeta? ?Wetem ae blong olgeta? Eksplenem se, samtaem, yumi wantem toktok long Papa long Heven, be yumi no save nildaon, o sarem ae blong yumi. ?Wanem nao yumi save mekem? Ridim i go long ol pikinini; ridim 3 Nifae 20:1: “[Jisas] i givim oda long olgeta se oli no mas stop blong prea insaed long hat blong olgeta.” Talem long ol pikinini olsem wanem nao yu stap prea insaed long hat blong yu.
-
Droem wan maot mo hat (♥) long bod. Askem ol pikinini blong poenem maot mo talem long yu sam samting we oli talem taem we oli stap prea. Afta, askem olgeta blong poenem hat, mo eksplenem se yumi save talem ol sem samting ia insaed long hat blong yumi. Testifae se Papa long Heven i save ol filing mo ol tingting blong yumi.
Taem yumi pem taeting, i tekem ol blesing oli kam.
Ol pikinini we oli no baptaes, oli no nid blong pem taeting. Be, i neva eli tumas blong stap tijim olgeta ol prinsipol mo ol blesing we oli joen wetem loa ia.
Samfala Aktiviti we Yu Save Mekem
-
Sapos i gat wan windo insaed long klasrum, invaetem ol pikinini blong lukluk long windo ia. ?Wanem nao i save kam insaed long rum taem we windo i open? Ridim 3 Nifae 24:10, mo eksplenem se taem yumi stap pem taeting, “ol windo blong heven” oli open, mo ol blesing oli save kam insaed long laef blong yumi.
-
Soem 10 koen (o nara samting) long ol pikinini. Invaetem olgeta blong kaontem ol koen wetem yu. Testifae se evri samting we yumi gat, i wan blesing we i kam long Papa long Heven. Seperetem wan koen, mo eksplenem se taem yumi pem taeting, yumi givimbak wan aot long ten blong wanem we yumi stap winim, i gobak long Papa long Heven. Soem ol pikja we oli ripresentem ol samting we oli yusum taeting from blong blesem Jos blong Lod (olsem bildim ol tempol, wok blong serem gospel, mo ol narawan moa; luk long Gospel Art Buk, ol namba 109–10, 118–19).
-
Tugeta, singsing wan singsing abaot taeting, olsem “I Want to Give the Lord My Tenth” (Children’s Songbook, 150). Poenemaot sentens ia we i stap tijim from wanem yumi stap pem taeting.
Papa long Heven i wantem mi blong lanem abaot ol bubu blong mi.
Olsem we oli profesae long hem long ol ves ia, Ilaeja i bin putumbak ol ki blong siling we i letem yumi stap wetem ol famli blong yumi blong taem we i no save finis.
Samfala Aktiviti we Yu Save Mekem
-
Ridim 3 Nifae 25:6, mo invaetem ol pikinini blong putum han blong olgeta long hat blong olgeta evri taem oli harem toktok ia “hat.” Eksplenem se Papa long Heven i wantem “ol pikinini”—yumi evriwan—blong lanem abaot, mo stap filim lav long “ol papa”—ol papa mo mama blong yumi, ol bubu blong yumi, mo ol bigfala bubu blong yumi.
-
Invaetem wan papa o mama blong wan long ol pikinini ia blong oli tokbaot ol bubu blong olgeta. O talem wan stori long ol pikinini, abaot wan bubu blong yu; soem sam pikja sapos i posibol. Testifae se, Papa long Heven i wantem yumi blong stap wetem ol famli blong yumi blong oltaem, mo from hemia nao, Hem i givim ol tempol long yumi. Tugeta, singsing long “Famli I Stap Tugeta Foreva” (Liahona, Epril 2013, 65).
Stap Tijim Doktrin: Ol Bigfala Pikinini
Mi save stadi long ol skripja wetem strong tingting.
Sevya i talem long grup blong ol pipol blong stadi long ol skripja, mo Hem i bin wantem blong meksua we oli raetemdaon ol toktok blong ol profet (luk long 3 Nifae 23:1, 5–13; 26:2).
Samfala Aktiviti we Yu Save Mekem
-
Invaetem ol pikinini blong ridim 3 Nifae 23:1, 5 mo lukaotem wan toktok we oli ripitim tri taem. ?Hem i minim wanem blong stadi long ol toktok blong ol profet? ?Olsem wanem nao blong stap stadi i defren long blong stap ridim nomo? Talem long ol pikinini olsem wanem nao yu stap stadi long ol skripja, mo wanem nao yu faenem long ples ia.
-
Givim sam smol kad o pis pepa long wanwan pikinini, mo invaetem olgeta blong raetem refrens blong wan skripja we oli laekem tumas. (Givim sam tingting long olgeta sapos oli nidim.) Wanwan i kam mo i haedem kad blong hem insaed long rum, mo ol narawan oli kavremap ae blong olgeta. Talem long ol pikinini blong lukaotem skripja ia, mo taem oli faenem, oli ridim skripja ia tugeta. ?Wanem nao yumi faenem insaed long skripja ia we i impoten long yumi?
Taem yumi pem taeting, i openem ol windo blong heven.
Taem yu tijim ol pikinini abaot taeting, yu stap mekem olgeta oli rere blong kasem “wan blesing we bae i no gat inaf rum blong tekem hem” (3 Nifae 24:10).
Samfala Aktiviti we Yu Save Mekem
-
Raetem long bod Sapos mi pem taeting blong mi, Lod bambae i . Invaetem ol pikinini blong ridim 3 Nifae 24:8–12, mo helpem olgeta blong faenem ol sentens blong komplitim sentens ia. Serem wan eksperiens we yu bin kasem blesing from, from se yu bin pem taeting.
-
Raetem sam amaon blong mane antap long bod, mo helpem ol pikinini blong oli kaontem hamas taeting (10 pesen) nao oli mas givim blong wanwan amaon blong mane ia. Soem olgeta olsem wanem blong fulumap wan pepa blong taeting.
-
Helpem ol pikinini blong raetem long bod lis blong sam long ol wei we oli stap yusum taeting blong blesem Jos blong Lod (bildim ol tempol, wok blong serem gospel, pablisim ol skripja, mo sam narawan moa). Askem ol pikinini blong droem ol pikja (o faenem ol pikja long ol magasin blong Jos we oli soem ol wei we taeting i stap blesem Jos.)
Papa long Heven i wantem mi blong lanem abaot ol bubu blong mi.
Tingting long wei we bae yu givim insperesen long ol pikinini blong oli lukaotem ol bubu blong olgeta blong mekem se, taem oli bigwan inaf blong go long tempol, bae oli save mekem ol odinens long bihaf blong ol bubu ia.
Samfala Aktiviti we Yu Save Mekem
-
Talem long ol pikinini se insaed long 3 Nifae 25:5–6 i gat wan profesi abaot wan taem we bae i hapen long ol las dei. Invaetem olgeta blong ridim ol ves ia blong faenemaot se hemia wanem taem ia. Testifae se profesi ia i bin kamtru, mo invaetem ol pikinini blong rid abaot hemia long Doktrin mo Ol Kavenan 110:13–16 (luk tu long Gospel Art Buk, namba 95). Eksplenem se taem yumi stap lan abaot ol bubu blong yumi, mo stap mekem ol tempol wok blong olgeta, hat blong yumi i stap tanem i go long ol papa blong yumi.
-
Talem long ol pikinini abaot wan long ol bubu blong yu, we oli bin ded, be oli no bin gat janis blong kasem baptaes. Soem wan pikja sapos i posibol. Serem testemoni blong yu se Papa long Heven i lavem hem, mekem se Hem i mekem rere wan rod blong hem i kasem baptaes tru long wok we oli stap mekem insaed long ol tempol. Askem ol pikinini blong faenem wan sentens insaed long 3 Nifae 25:6 we i save soemaot olsem wanem nao yu yu stap filim abaot bubu blong yu.
-
Helpem ol pikinini blong fulumap wan famli tri wetem ol nem blong ol papa mo mama blong olgeta mo nem blong ol bubu blong olgeta. Leftemap tingting blong olgeta blong askem papa mo mama blong olgeta blong ademap moa nem.
Stap Leftemap Tingting blong Lanem Samting long Hom
Invaetem ol pikinini blong askem papa mo mama blong olgeta, o ol bubu blong olgeta blong talem long olgeta ol stori abaot ol bubu blong olgeta.
Stap Kam Antap long Fasin blong Yumi blong Stap Tij
Ol pikinini oli stap lanem samting long plante fasin. Ol pikinini oli stap glad blong lanem samting tru long ol niu mo defren eksperiens. Yusum ol aktiviti we bae i letem oli muv olbaot, oli yusum evri sens blong olgeta, mo oli traem ol niufala samting. (Luk long Teaching in the Savior’s Way,25.)