Laet blong Fes blong Hem i Bin Kamkamaot, I Saen long Olgeta, i kam long Gary L. Kapp

28 Septemba–11 Oktoba

3 Nifae 17–19

“Luk, Glad blong Mi I Fulap”

Taem yu stap ridim 3 Nifae 17–19, tingting long wanem skripja, eksperiens, aktiviti, mo stori nao bae i helpem gud ol pikinini blong oli andastanem ol trutok we oli stap long ol japta ia.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Soem wan pikja blong Sevya, mo invaetem ol pikinini blong serem olsem wanem bae oli filim sapos Hem, Kraes, bae i visitim olgeta, semmak olsem we Hem i bin mekem wetem Ol Man blong Nifae.

Stap Tijim Doktrin: Ol Smol Pikinini

3 Nifae 17: 7, 20-25

Sevya i lavem wanwan long ol pikinini blong Papa long Heven.

Jisas i bin soem lav we Hem i gat long ol pikinini taem Hem i bin blesem mo i bin prea from olgeta. ?Olsem wanem nao yu save helpem ol pikinini we yu stap tijim, blong oli filim lav ia we Hem i gat long olgeta?

Samfala Aktiviti we Yu Save Mekem

• Talemsot stori we i stap long 3 Nifae 17 mo semtaem soem wan pikja olsem hemia long aotlaen blong wik ia we i stap long Kam Folem Mi—Blong Wanwan Man, Woman mo Famli. O, maet yu save yusum “Japta 44: Jisas Kraes I Blesem Ol Pikinini,” (Ol Stori long Buk blong Momon, 124-25, o vidio blong hem long ChurchofJesusChrist.org). Ridim ol sentens o ol ves long 3 Nifae 17 we i tokbaot bigwan lav we Sevya i gat long ol pipol (olsem ol ves 7 mo 20–25). Letem ol pikinini oli gat janis blong holem pikja, mo talem wanem we Jisas i bin mekem from se Hem i bin lavem ol pipol.

• Yusum aktiviti pej blong wik ia blong helpem ol pikinini blong dro wan pikja blong olgetawan wetem Jisas. Taem oli mekem olsem, helpem olgeta blong tingting long sam wei we Jisas i bin soem lav we Hem i gat long olgeta.

  

  Luk Ol Smolwan blong Yufala i kam long Gary L. Kapp

3 Nifae 18:1–12

Mi save tingting abaot Jisas taem mi stap tekem mo kakae sakramen.

I gat plante samting we i save pulum tingting blong wan pikinini long taem blong sakramen. ?Olsem wanem yu save helpem ol pikinini insaed long klas blong yu blong oli andastanem hamas i impoten blong tingting long Sevya mo lav blong Hem long olgeta long taem blong tabu odinens ia?

Samfala Aktiviti we Yu Save Mekem

• Invaetem ol pikinini blong oli talem long yu wanem nao i stap hapen long taem blong sakramen. Ridim ol ves aot long stori blong Jisas we i blesem mo pasem sakramen long Ol Man blong Nifae (luk long 3 Nifae 18:1–12), mo askem ol pikinini blong oli stanap taem oli harem wan samting we i kolosap long wanem yumi stap mekem long taem blong sakramen. ?Wanem nao Jisas Kraes i wantem yumi blong “tingbaot” o tingting long hem long taem blong sakramen (luk long 3 Nifae 18:7, 11).

• Ham, singsing, o plei wan hym o Praemeri singsing taem ol pikinini oli stap kalarem ol pikja se i save helpem olgeta blong tingbaot Sevya long taem blong sakramen (luk long aktiviti pej blong wik ia). Leftemap tingting blong olgeta blong oli lukluk long ol pikja ia blong helpem olgeta blong tingbaot Jisas taem oli tekem mo kakae sakramen.

3 Nifae 18:15, 20–21, 24; 19:16–17, 30

Jisas i stap tijim mi olsem wanem blong prea.

?Wanem nao yu stap lanem abaot prea taem yu stap stadi long 3 Nifae 17–19? ?Olsem wanem nao yumi save yusum wanem yu lanem blong tijim ol pikinini olsem wanem blong prea?

Samfala Aktiviti we Yu Save Mekem

• Soem sam pikja blong ol pipol we oli stap prea (olsem olgeta we oli stap long “Japta 46: Jisas Kraes I Tij mo I Prea wetem Ol Man blong Nifae” long Ol Stori long Buk blong Momon, 128–30). Invaetem ol pikinini blong poenemaot ol ditel insaed long pikja we i stap soem se ol pipol ia oli stap prea. Ridim 3 Nifae 19:16–17 blong eksplenem se Jisas i bin tijim yumi olsem wanem blong stap prea. Letem ol pikinini oli talem long yu olsem wanem oli stap filim taem we oli stap prea.

• Ridim 3 Nifae 18:21, mo invaetem ol pikinini blong droem wan pikja blong olgetawan, o famli blong olgeta taem oli stap prea. Leftemap tingting blong ol pikinini blong invaetem ol famli blong stap prea wetem olgeta.

• Sing tugeta wan singsing abaot prea, olsem “A Child’s Prayer” (Children’s Songbook, 12–13). Invaetem ol pikinini blong serem wanem oli bin lanem abaot prea aot long singsing ia. Serem testemoni blong yu abaot prea.

Stap Tijim Doktrin: Ol Bigfala Pikinini

3 Nifae 17

Sevya i lavem ol pikinini blong Papa long Heven.

Presiden Esra Taf Benson i bin tijim: “Mi promesem yufala, ol dia pikinini, se ol enjel oli stap givhan tu long yufala. Bae yufala i no save luk olgeta, be bae oli stap ia blong helpem yufala, mo bambae yu filim se oli stap ia” (“To the Children of the Church,” Ensign, May 1989, 83).

Samfala Aktiviti we Yu Save Mekem

• Tugeta, ridim sam ves aot long 3 Nifae 17 we yu filim se bae i gat mining long ol pikinini we yu stap tijim. Taem yu stap ridim wanwan ves ia, askem ol pikinini blong oli jusum wan toktok, o wan sentens we oli ting se i impoten, mo afta, oli serem ol toktok ia we i bin gat mining long olgeta. Testifae se Jisas i lavem tumas ol pikinini, mo from hemia nao Hem i bin blesem olgeta mo i bin prea from olgeta.

• Invaetem ol pikinini blong serem olsem wanem bae oli filim sapos oli bin stap long medel blong ol pikinini ia we Sevya i bin blesem olgeta. Sapos i posibol, soem vidio ia: “My Joy Is Full” (ChurchofJesusChrist.org) blong helpem olgeta blong traem tingting long taem ia. ?Wanem nao Sevya i mekem blong soemaot lav blong Hem? ?Wanem nao yumi save mekem blong rere long yumiwan blong stap wetem Hem taem bae Hem i kam bakegen?

3 Nifae 18:1–12

Taem mi tekem sakramen, mi save kam fulap long Tabu Spirit.

Yumi save lanem aot long 3 Nifae 18 hamas nao sakramen i impoten long Sevya. ?Olsem wanem nao yu save helpem ol pikinini blong filim se sakramen i impoten?

Samfala Aktiviti we Yu Save Mekem

• Helpem ol pikinini blong ridim 3 Nifae 18:1–12. ?Wanem nao oli lanem abaot sakramen aot long ol ves ia? Helpem olgeta blong ridim ol prea blong sakramen long Doktrin mo Ol Kavenan 20:77 mo 79 mo faenem ol toktok mo ol sentens long ol prea, we oli stap tu long 3 Nifae 18:1–12. ?Wanem nao ol toktok mo sentens ia oli stap minim? ?Olsem wanem nao yumi save rere blong tekem mo kakae sakramen? ?Wanem promes, o kavenan nao yumi mekem taem yumi tekem mo kakae sakramen?

• Sing tugeta wan singsing, olsem “Reverently, Quietly” (Children’s Songbook, 26). ?Olsem wanem we, taem yumi kaekae sakramen wetem respek mo kwaet fasin i stap helpem yumi blong filim Tabu Spirit? ?Olsem wanem nao hemia i helpem yumi blong mekem ol stret mo gud joes?

3 Nifae 18:15–24; 19:6–9, 15–36

Blong stap prea bae i helpem mi blong stap kolosap long Papa long Heven.

Yumi save filim Papa long Heven i stap kolosap long yumi tru long prea. ?Wanem mesej nao abaot prea long 3 Nifae 18–19 bae i helpem ol pikinini we yu stap tijim blong oli kam gud moa long prea blong olgeta?

Samfala Aktiviti we Yu Save Mekem

• Raetem olgeta skripja refrens ia long ol pis pepa, mo givim olgeta long wanwan pikinini, o long ol smol grup blong ol pikinini: 3 Nifae 18:15; 3 Nifae 18:20; 3 Nifae 18:21; 3 Nifae 19:19; mo 3 Nifae 19:24. Invaetem ol pikinini blong ridim ol skripja, oli lukaotem ol samting we Jisas Kraes o ol disaepol blong Hem oli stap tijim abaot prea. Askem olgeta blong givim ripot long wanem oli bin lanem i go long klas.

• Antap long bod, raetem Mi talem tangkyu Papa, from . Givim wan minit long ol pikinini blong oli tingting long hamas samting we oli save tingting long hem blong fulumap waet spes ia. ?From wanem nao hem i gud blong talemaot tangkyu blong yumi long Papa long Heven? Afta, raetem long bod Mi askem yu, Papa, blong mo ridim tugeta 3 Nifae 18:18–21 mo 19:9, 23, mo lukaotem ol aedia abaot wanem yumi sapos blong prea from.

• Serem testemoni blong yu o wan eksperiens blong yu abaot paoa blong prea, mo leftemap tingting blong ol pikinini blong oli serem ol testemoni blong olgeta, o ol eksperiens blong olgeta.

Stap Leftemap Tingting blong Lanem Samting long Hom

Leftemap tingting blong ol pikinini blong oli toktok long papa mo mama blong olgeta, o oli toktok long ol nara memba blong famli abaot wei we oli save gat wan eksperiens we i gat mining wetem sakramen long nekis Sandei.

Stap Kam Antap long Fasin blong Yumi blong stap Tij

Helpem ol smol pikinini blong lanem samting aot long skripja. Blong helpem ol smol pikinini blong lanem samting aot long skripja, lukluk moa long wan ves blong skripja fastaem o iven wan toktok nomo fastaem. Maet yu wantem invaetem ol pikinini blong stanap taem oli harem wan spesifik toktok o sentens.