“19–25 Oktoba. 3 Nifae 27–4 Nifae: ‘I No Save Gat Wan Pipol we I Moa Hapi’” Kam Folem Mi—Blong Praemeri: Buk blong Momon 2020 (2020)
“19–25 Oktoba. 3 Nifae 27–4 Nifae,” Kam Folem Mi—Blong Praemeri: 2020
Prea blong Kraes, i kam long Derek Hegsted
19–25 Oktoba
3 Nifae 27–4 Nifae
“I No Save Gat Wan Pipol we I Moa Hapi”
Taem yu stap ridim 3 Nifae 27 kasem 4 Nifae, tingting long wanem ol eksperiens, ol tingting, ol skripja, mo ol stori nao bae i save helpem gud ol pikinini blong oli andastanem ol tingting we oli stap long ol japta ia.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Helpem ol pikinini blong rimemba wanem we oli bin lanem ova long ol las wik, abaot wanem we Jisas i bin tijim ol pipol long graon ia, Plante. Eksplenem se Buk blong Momon i stap talem long yumi olsem wanem nao ol pipol oli bin gat blesing taem oli obei long wanem we Jisas i bin tijim olgeta.
Stap Tijim Doktrin: Ol Smol Pikinini
Mi wan memba Jos Ia blong Jisas Kraes.
?Olsem wanem nao ol toktok blong Sevya we Hem i talemaot long ol disaepol, i save helpem ol pikinini blong oli andastanem se i impoten blong yu memba blong Jos Ia blong Jisas Kraes?
Samfala Aktiviti we Yu Save Mekem
-
Askem wanwan pikinini blong talem nem blong hem. ?From wanem nem blong yumi i impoten? Talem long olgeta se ol disaepol blong Jisas oli wantem blong save wanem nem nao bae oli putum long Jos Ia blong Kraes. Ridim long olgeta ansa blong Sevya we i stap long 3 Nifae 27:7. ?Hu nao Jisas i talem se bae oli singaotem Jos blong Hem folem?
-
Mekem wan baj we i talem se “Mi blong Jos Ia blong Jisas Kraes blong Ol Lata-dei Sent;” bae wanwan pikinini i werem baj ia i gobak long haos. Letem ol pikinini oli kalarem baj blong olgeta. Singsing “The Church of Jesus Christ” (Children’s Songbook, 77) olsem wan klas. Talem from wanem nao yu yu talem tangkyu blong yu memba blong Jos, mo askem ol pikinini from wanem oli talem tangkyu from Jos.
-
Helpem ol pikinini blong putum tugeta pasol we i stap long aktiviti pej blong wik ia. Eksplenem se Jisas i wantem blong oli bildimap Jos blong Hem antap long gospel blong Hem, mo yusum aktiviti pej ia blong talem long ol pikinini se hemia i minim wanem.
Blong stap laef folem gospel, i tekem glad i kam long mi.
Hapines blong ol pipol we oli tokbaot long 4 Nifae i save helpem ol pikinini blong oli lanem abaot glad ia we i kam taem wan i stap laef folem gospel.
Samfala Aktiviti we Yu Save Mekem
-
Invaetem ol pikinini blong tokbaot wanem nao i mekem olgeta i glad. Blong talem long ol pikinini abaot hapines blong ol pipol we oli tokbaot long 4 Nifae, ridim ol ki toktok long ol ves 2–3 mo 15–17. Yu save lukluk tu i go long “Japta 48: Pis long AmerikaOl Stori long Buk blong Momon 136-37 o vidio blong hem long ChurchofJesusChrist.org). Poenemaot gud se ol pipol oli bin hapi from se oli bin jenisim laef blong olgeta i kam long Lod, oli bin stap laef folem ol komanmen, mo oli bin stap lavlavem olgeta.
-
Soem pikja blong sam hapi pipol. Eksplenem se ol pipol insaed long 4 Nifae oli gat kolosap 200 yia blong hapines from se evriwan i bin traem bes blong laef folem gospel. Helpem ol pikinini blong tingting long sam komanmen we oli save obei long hem. Eksampol: yu save ridim 4 Nifae 1:15 long olgeta blong tijim olgeta se ol pipol oli nomo bin faet wetem olgeta. Invaetem ol pikinini blong aktemaot se oli stap obei olgeta komanmen we oli stap tingting long hem. Singsing tugeta long wan singsing abaot glad we i kam taem wan i laef folem gospel, olsem “When We’re Helping” (Children’s Songbook, 198).
-
Ridim ol sentens aot long 4 Nifae 1:24–29, 34–35, mo 43 we i tokbaot wanem i bin hapen taem sam long Ol Man blong Nifae oli bin stop blong obei long ol komanmen. Taem yu mekem olsem, invaetem ol pikinini blong mekem wan fes we i harem nogud taem oli harem wan samting we i no saon hapi. Testifae se fasin blong stap obei long ol komanmen i lidim man i go long hapines.
Stap Tijim Doktrin: Ol Bigfala Pikinini
Mi wan memba Jos Ia blong Jisas Kraes.
Tingting long wei we bae yu helpem ol pikinini we yu stap tijim blong luksave ol bigfala blesing we oli kam taem wan i kam memba blong Jos Ia blong Jisas Kraes.
Samfala Aktiviti we Yu Save Mekem
-
Helpem ol pikinini blong ridim 3 Nifae 27:3, mo lukaotem kwestin we ol disaepol blong Jisas oli bin askem long Hem. Afta, invaetem olgeta blong lukluk long 3 Nifae 27:5–8 blong kasem ansa. Folem ol ves ia, ?from wanem nao nem blong Jos i impoten?
-
Helpem ol pikinini blong tingting long ol defren grup we oli memba blong ol, olsem wan famli, o wan klas blong Praemeri. Askem olgeta blong talem long yu se i olsem wanem blong stap olsem wan memba blong wanwan grup. Askem ol pikinini blong helpem yu blong raetem wanwan toktok blong nem blong Jos long wan seperet pis pepa. Afta miksim ol pepa, mo invaetem ol pikinini blong stretem ol toktok ia mo putum olgeta long oda. ?Wanem blesing nao yumi kasem from se yumi ol memba blong Jos Ia blong Jisas Kraes blong Ol Lata-dei Sent?
Oli bildim Jos Ia blong Jisas Kraes folem gospel blong Hem.
Sevya i talem sot gospel blong Hem long 3 Nifae 27. ?Olsem wanem nao ol toktok blong Hem i save helpem ol pikinini blong andastanem wanem nao hem i gospel?
Samfala Aktiviti we Yu Save Mekem
-
Eksplenem long ol pikinini se toktok ia gospel i minim “gud nius” (luk long Bible Dictionary, “Gospels”). Helpem ol pikinini blong luklukgud insaed long 3 Nifae 27:13–15 blong oli faenem wan samting we i saon olsem wan gud nius long olgeta. ?From wanem yumi glad tumas blong save gospel blong Jisas Kraes?
-
Antap long bod, raetem ol prinsipol blong gospel olsem fet, fasin blong sakem sin, baptaes, Tabu Spirit, mo stap strong kasem en. Invaetem ol pikinini blong luklukgud insaed long 3 Nifae 27:19–21, mo faenem ol toktok ia, o ol toktok we oli kolosap semmak long wei we Jisas i tokbaot gospel blong Hem.
-
Askem ol pikinini blong traem pikjarem se oli gat wan fren we i stap askem olgeta se, olsem wan memba blong Jos, oli stap biliv long wanem. Helpem olgeta blong faenem ol trutok long 3 Nifae 27:13–21 we bae oli save serem blong talem sot wanem nao oli stap biliv long hem.
-
Invaetem ol pikinini blong oli jusum wan long ol trutok blong gospel we Sevya i bin tijim long 3 Nifae 27:13–21 we oli wantem lanem moa abaot. Helpem olgeta blong yusum ol futnot, Topik Gaed, o Gaed long Ol Skripja blong oli faenem wan o tu skripja we i go wetem trutok ia. Invaetem olgeta blong serem skripja blong olgeta wetem wanwan long olgeta, mo wanem oli bin lanem. ?From wanem yumi glad tumas blong save gospel blong Jisas Kraes?
Blong stap laef folem gospel, i tekem glad i kam long mi.
From se oli bin jenisim laef blong olgeta i go long Jisas Kraes mo gospel blong Hem, ol pipol we oli tokbaot long 4 Nifae oli bin save stanemap wan sosaeti blong pis mo yuniti. ?Wanem nao ol pikinini oli save lanem aot long olgeta?
Samfala Aktiviti we Yu Save Mekem
-
Rere long sam pis pepa wetem sam sentens we yu raetem long olgeta, we oli kamaot long 4 Nifae 1:2–3, 5, mo 15–17 we oli tokbaot ol blesing we ol pipol oli bin kasem (olsem “i no bin gat raorao long graon ia”). Putum ol pis pepa ia insaed long wan smol kontena, mo mekem wanwan pikinini i pikimap wan mo i ridim. Leftemap tingting blong ol pikinini blong oli faenem sentens blong olgeta long ol ves ia we oli stap long 4 Nifae. ?Wanem nao yumi lanem aot long ol sentens ia? ?Wanem semmak samting yumi stap luk bitwin ol ves ia mo mining blong Saeon long Moses 7:18?
-
Blong helpem ol pikinini oli praktisim wanem oli stap tijim long 4 Nifae 1:15–16, presentem sam situesen long olgeta, we oli pipol oli kroskros long olgeta. Invaetem olgeta blong oli rolplei long wanem situesen we i stap, mo bae i olsem sapos oli traem blong laef we i “no gat raorao.” ?From wanem i isi moa blong stap longwe long raorao taem yumi gat “lav blong God” long hat blong yumi?
-
Ridim olgeta ves ia wetem ol pikinini, mo askem olgeta blong faenem ol risen from wanem Ol Man blong Nifae mo Ol Man blong Leman oli nomo bin gat pis mo hapines: 4 Nifae 1:20, 24–29, 34–35, mo 43. ?Olsem wanem nao yumi save winim olgeta problem ia? Helpem ol pikinini blong faenemaot ol wei we yumi save stap longwe long fasin blong gat hae tingting taem yufala i luklukbak long Teachings of Presidents of the Church: Ezra Taft Benson (2014), 238–39.
Stap Leftemap Tingting blong Lanem Samting long Hom
Leftemap tingting blong ol pikinini blong disaed long wan samting we bae oli mekem blong tekem moa pis mo hapines i go insaed long hom blong olgeta mo serem wetem ol famli.
Stap Kam Antap long Fasin blong Yumi blong Stap Tij
Sapotem ol papa mo mama blong ol pikinini. “Ol papa mo mama oli ol gospel tija long ol pikinini blong olgeta mo oli ol moa impoten tija—tufala i gat tugeta bigfala wok mo bigfala paoa blong lidim tingting blong ol pikinini blong olgeta (luk long Dutronome 6:6–7 Taem yu tijim ol pikinini long jos, prea from ol wei we yu save sapotem ol papa mo mama blong olgeta long stamba rol we i blong olgeta” (Teaching in the Savior’s Way,25