Momon i stap raet long ol pej blong buk we oli wokem long gol.

Momon I Stap Raetemsot Histri long Ol Buk, i kam long Tom Lovell

26 Oktoba –1 Novemba

Momon 1–6

“Mo Mi Wantem se Mi Save Winim Tingting blong Yufala Evriwan … blong Yufala I Sakem Sin”

Ol taem we oli tokbaot insaed long Momon 1–6 maet bae oli had blong ol pikinini oli andastanem fulwan, be oli save lanem sam lesen aot long stori blong Momon long saed blong fasin blong stap laef long wan stret mo gud fasin insaed long wol we i nogud. ?Olsem wanem nao yu save yusum eksperiens blong hem blong tijim long ol pikinini olsem wanem blong stap tru long gospel?

Raetemdaon Ol Filing mo Tingting blong Yu

serem pikja bokis

Invaetem Ol Pikinini blong Serem Wanem Oli Gat

?Wanem nao ol pikinini oli save abaot Momon? Invaetem olgeta blong serem wanem we oli save o lanem wetem ol famli blong olgeta. Soem wan pikja blong Momon olsem hemia we i stap long aotlaen blong las wik insaed long Kam Folem Mi—Blong Wanwan Man, Woman o Famli. Hem i save help.

tijing pikja bokis

Stap Tijim Doktrin: Ol Smol Pikinini

Momon 1:1–3

Mi save stap stret mo gud olsem Momon.

Nomata we ol pikinini we yu stap tijim ol smol yet, oli save developem ol kwaliti long saed blong spirit, mo oli save laef long wan stret mo gud fasin.

Samfala Aktiviti we Yu Save Mekem

• Ridim Momon 1:1–3 i go long ol pikinini, o yusum “Japta 49: Momon mo Ol Tijing blong Hem” (Ol Stori long Buk blong Momon], 138–42, o vidio we i go wetem long ChurchofJesusChrist.org). Invaetem olgeta blong lisin long hamas yia nao Momon i gat taem we Amaron i bin givim wan spesel misin long hem. Afta, askem olgeta blong putum han antap mo soem hamas fingga ia we namba ia i talem. Blong helpem ol pikinini blong traem pikjarem olsem wanem Momon i bin yangfala tumas, soem olgeta wan pikja blong wan we i gat 10 yia nomo. Helpem olgeta blong oli andastanem olgeta kwaliti we Amaron i bin luk long Momon taem hem i bin yangfala, mo testifae se ol pikinini, oli save stap olsem Momon nomo taem oli stap folem Jisas Kraes.

• Plei wan gem wetem ol pikinini, mo long gem ia oli stap ripitim nomo ol aksen blong yu. Afta, soem ol pikja blong ol samting we Jisas i bin mekem, mo tokbaot olsem wanem yumi save stap folem Hem (luk long Gospel Art Buk, ol namba 33–35, 41–42). Toktok raon long ol wei we Momon i bin folem Jisas Kraes—eksampol, taem hem i bin tijim gospel, stap leftemap tingting blong ol pipol blong oli obei long God, mo stap lavem ol narafala man.

Momon 3:3, 9

Papa long Heven i givim plante blesing long mi.

Ol tijing blong Momon oli save helpem ol pikinini blong luksave ol blesing we Papa long Heven i bin givim long olgeta.

Samfala Aktiviti we Yu Save Mekem

• Ridim Momon 3:3 mo 9 i go long ol pikinini, mo eksplenem se Ol Man blong Nifae oli no bin luksave se Papa long Heven i bin blesem olgeta. Helpem ol pikinini blong oli tingting long ol blesing we Papa long Heven i bin givim long olgeta. Soem ol pikja o sam samting blong givim sam tingting long olgeta. ?Wanem nao yumi save mekem tedei we i soem we yumi talem tangkyu long Papa long Heven from ol blesing blong yumi?

• Helpem ol pikinini blong oli tingting long ol blesing we Papa long Heven i bin givim long olgeta, mo askem olgeta blong droem ol pikja. blong sam long ol blesing ia. Invaetem olgeta blong hangem ol pikja samples long hom, long wan ples we oli save luk olgeta, mo oli save tingbaot se Papa long Heven i blesem olgeta long plante wei. Yu save invaetem olgeta tu blong faenem ol blesing we oli kam long Papa long Heven taem oli stap singsing long fas ves blong “Tangkyu Papa God” (STSP, 61).

Momon 3:12

Papa long Heven i wantem mi blong lavem evriwan.

?Olsem wanem nao yu save helpem ol pikinini we yu stap tijim, blong wantem filim lav we olgeta raon long olgeta oli gat long olgeta?

Samfala Aktiviti we Yu Save Mekem

• Askem wanwan pikinini blong dro long bod, mo blong i poenem olsem wanem wanwan we oli droem, oli luk defren long ol narawan. Dro wan bigfala hat (♥) we i raonem evriwan long ol droing ia. Helpem ol pikinini blong oli andastanem se Papa long Heven i wantem yumi blong lavem evri pipol. Ridim Momon 3:12, mo talem bigwan ol toktok ia “lav” mo “lavem.” ?Wanem nao Momon i mekem blong soemaot lav blong hem long ol nara man?

• Singsing wan singsing tugeta abaot fasin blong lavem ol narawan, olsem “Jesus Said Love Everyone” (Children’s Songbook, 61), mo semtaem soem ol pikja blong ol pikinini raon long wol. Testifae abaot lav we God i gat long evriwan long ol pikinini blong Hem. Finisim aktiviti pej ia blong wik ia wetem ol pikinini.

tijim samting pikja bokis

Stap Tijim Doktrin: Ol Bigfala Pikinini

Momon 1:1–3; 2:1, 23–24; 3:1–3, 12, 17–22

Mi save stap stret mo gud olsem Momon.

Momon i bin yangfala tumas taem we Amaron i bin luksave se bae hem i save responsibol blong lukaotgud long ol tabu histri. ?Wanem stret mo gud kwaliti nao yu yu luk long ol pikinini we yu stap tijim olgeta?

Samfala Aktiviti we Yu Save Mekem

• Invaetem wanwan long ol pikinini ia blong ridim wan long ol skripja ia, mo helpem olgeta blong oli serem wanem we oli lanem abaot: Momon 1:1–3; 2:1, 23–24; mo 3:1–3, 12, 20–22. Afta, serem ol stret mo gud kwaliti we yu luk long wanwan long ol pikinini ia.

• Soem wan pikja blong Momon (luk long pikja we i stap long aotlaen blong wik ia long Kam Folem Mi—Blong Wanwan Man, Woman mo Famli. Helpem ol pikinini blong luk se, from Momon i bin responsibol mo oli save trastem hem inaf blong kipim mo holemtaet gud ol histri blong Ol Man blong Nifae, nao yumi gat Buk blong Momon tedei. Toktok wetem ol pikinini abaot mining blong stap responsibol mo mining blong save trastem man. Invaetem olgeta blong oli tingting hevi long ol wei we oli save kam moa responsibol.

  Momon olsem wan yang boe

  Momon, 10 yia, i kam long Scott M. Snow

Momon 2:8–15; 5:10–11

Harem nogud olsem hemia blong God, i lidim man blong i rili jenisim laef.

Momon i bin luk se Ol Man blong Nifae we oli nogud, oli bin harem nogud, be harem nogud ia i no bin kaen ia we bae i givim insperesen long man blong i sakem sin (luk long Momon 2:13). ?Olsem wanem nao yu save helpem ol pikinini blong andastanem se, i gat samting i defren bitwin fasin blong harem nogud olsem hemia blong laef long wol ia, mo harem nogud olsem hemia blong God we i lidim man blong sakem sin?

Samfala Aktiviti we Yu Save Mekem

• Raetem ol samting ia long bod: Harem nogud we i lidim man blong sakem sin mo Harem nogud we i no lidim man blong sakem sin. Invaetem ol pikinini blong oli gat taem blong ridim ol ves aot long Momon 2:8, 10–15. Helpem olgeta blong oli raetem ol samting we oli lanem abaot fasin blong harem nogud andanit long stret hed toktok long bod. ?Olsem wanem nao yumi save meksua se harem nogud we yumi stap harem from ol sin blong yumi i stap lidim yumi blong yumi jenisim fasin?

• Invaetem wan memba blong bisoprik, o wan papa o mama blong ol pikinini ia blong oli serem wetem klas olsem wanem we harem nogud olsem hemia blong God i save helpem yumi jenis blong kam moa olsem Papa long Heven mo Jisas Kraes. ?From wanem nao hem i impoten blong luksave sapos yumi harem sore olsem hemia blong God, o hemia blong laef long wol ia. Invaetem ol pikinini blong luklukgud insaed long Momon 2:12 blong faenem ol risen from wanem fasin blong sakem sin bae i mekem hat blong yumi i stap glad” (Momon 2:12).

Momon 3:12

Mi save filim lav we Papa long Heven i gat long ol narafala.

Plante taem, i isi blong lavem olgeta we yumi lavem tumas mo oli olsem yumi, be Momon i bin soem se, wetem help blong Papa long Heven, yumi save lavem olgeta we oli bilivim ol defren samting mo oli mekem samting i defren long wanem yumi stap mekem.

Samfala Aktiviti we Yu Save Mekem

• Helpem wan pikinini blong ridim Momon 3:12, mo invaetem ol pikinini blong oli raetem wan sentens we i talemsot wanem we oli bin lanem aot long Momon abaot fasin blong lavem ol narawan. Invaetem ol pikinini blong serem wanem we oli bin raetem. ?Olsem wanem yumi save filim lav we God i gat long ol narawan? (luk long Moronae 7:48). ?Wanem nao yumi save mekem blong soem lav blong yumi long ol pipol long klas blong yumi, mo tu, long ol famli blong yumi?

• Helpem ol pikinini blong finisim aktiviti pej blong wik ia. Helpem olgeta blong tingting long sam gud wei blong go long ol nara wan we oli defren long yumi.

lanem samting pikja bokis

Stap Leftemap Tingting blong Lanem Samting long Hom

Leftemap tingting blong ol pikinini blong hangem aktiviti pej blong wik ia samples long hom, blong oli save tingbaot blong soem lav long ol narawan. Givim janis long olgeta long wan nara klas blong oli serem wanem oli bin mekem.

Stap Kam Antap long Fasin blong Yumi blong Stap Tij

Stretem ol aktiviti blong oli fit wetem yia blong ol pikinini we yu stap tijim. Ol yangfala pikinini oli nidim blong oli eksplenem long ditel mo oli lan folem ol moa simpol wei blong tij. Taem oli kam bigwan moa, oli save tekpat moa, mo oli save kam gud moa blong serem ol tingting blong olgeta. Givim long evri pikinini, ol janis we i folem yia blong hem blong oli serem, oli testifae mo oli tekpat; mo meksua se yu helpem olgeta taem we i nid. (Luk long Teaching in the Savior’s Way, 25–26.)

aktiviti pej: Mi save lavem evriwan