“2–8 Novemba. Momon 7–9: ‘Mi Toktok long Yufala Olsem se Yufala I Stap long Ples Ia,’” Kam Folem Mi—Blong Praemeri: Buk blong Momon 2020 (2020)
“2–8 Novemba. Momon 7–9,” Kam Folem Mi—Blong Praemeri: 2020
Moronae I Stap Raet long Ol Buk we Oli Wokem long Gol, i kam long Dale Kilborn
2–8 Novemba
Momon 7–9
“Mi Toktok long Yufala Olsem se Yufala I Stap long Ples Ia”
Taem yu stap rid long Momon 7–9, tingbaot long wanem nao yu wantem tumas se ol pikinini we yu stap tijim oli save long hem. Mekem sam plan blong tijim ol trutok ia, we yu filim se bae i blesem laef blong olgeta.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Pasem raon wan kopi blong Buk blong Momon. Invaetem ol pikinini, taem we i taem blong olgeta blong holem buk, blong oli serem wan samting we oli bin lanem aot long buk ia. Sapos oli nidim help, mekem olgeta oli tingbaot ol samting we oli bin lanem i no longtaem insaed long klas
Stap Tijim Doktrin: Ol Smol Pikinini
Buk blong Momon wetem Baebol, tufala tugeta i testifae abaot Jisas Kraes.
Momon i tijim se Buk blong Momon, oli bin raetem blong helpem yumi biliv long Baebol, mo olgeta we oli biliv long Baebol bambae oli biliv long Buk blong Momon.
Samfala Aktiviti we Yu Save Mekem
-
Soem long ol pikinini taetol pej blong Buk blong Momon, mo poenem i go long ol toktok blong taetol taem yu stap ridim, mo talem bigwan toktok ia, wan nara. Helpem ol pikinini blong oli tingting long ol nara buk blong skripja we i stap tijim yumi abaot Jisas. Soem olgeta se Baebol i gat OlTesteman insaed long hem, wetem Niu Testeman. Helpem ol pikinini blong talem, “OlTesteman, Niu Testeman,” taem yu poen i go long Baebol mo “Wan Nara Testeman” taem yu poen i go long Buk blong Momon.
-
Soem wan map long wol o soem aktiviti pej blong aotlaen ia, wetem wan Baebol mo wan Buk blong Momon. Yusum ol samting ia blong tijim ol pikinini se Baebol i wan histri blong ol tijing blong Jisas insaed mo raon long Jerusalem, mo Buk blong Momon i wan histri blong ol tijing blong Hem long Ol Amerika.
-
Jusum sam samting we i bin hapen, mo sam trutok, we tugeta, Baebol mo Buk blong Momon oli stap testifae abaot, olsem taem we Jisas i bon i kam long wol, mo taem Hem i laef bakegen long ded. Soem sam pikja we oli kam long Gospel Art Buk we i soem se ol taem ia mo ol trutok ia oli tru. Askem ol pikinini blong oli tokbaot wanem oli luk long ol pikja ia, mo talem long olgeta se, tugeta, Baebol mo Buk blong Momon, tufala i stap tijim abaot ol samting ia.
Mi save jusum raet iven taem we mi mi filim se mi stap miwan.
Moronae i bin laswan long stret mo gud Man blong Nifae, be hem i bin stap tru long testemoni blong hem. Helpem ol pikinini blong lanem samting aot long eksampol blong hem.
Samfala Aktiviti we Yu Save Mekem
-
Ridim Momon 8:3, mo talem bigwan se Moronae i bin stap hemwan nomo, be hem i bin stap gohed blong obei long ol komanmen, mo hemia i tekem tu, komanmen ia blong finis blong raetem Buk blong Momon. Serem wan taem we yu bin stap fetful iven taem yu bin stap yuwan.
-
Afta we yufala i toktok raon long eksampol blong Moronae, serem sam kes we wan pikinini i mas disaed se yes o no bae hem i jusum raet, iven we i no gat wan i stap luk. ?Bae wanem nao bae Moronae i mekem?
-
Wetem ol pikinini, singsing wan singsing abaot fasin blong jusum raet, olsem “Stand for the Right” (Children’s Songbook, 159). ?From wanem hem i impoten blong jusum raet evri taem, iven taem we yu stap yuwan?
God hem i “wan God blong ol merikel.”
Helpem ol pikinini blong oli andastanem se ol merikel oli impoten long wok blong God, mo we God bae i wokem ol merikel taem we ol pipol blong Hem oli gat fet long Hem.
Samfala Aktiviti we Yu Save Mekem
-
Eksplenem se wan merikel i wan samting we God i mekem blong soem paoa blong Hem mo i blesem laef blong yumi (luk long Bible Dictionary, “Miracles”). Ridim ol toktok mo ol sentens we oli kam long Momon 9:11–13, 17 we i soem sam long ol merikel blong God. Helpem ol pikinini blong tingting long ol nara merikel we oli faenem insaed long ol skripja (ol pikja we oli kam long Gospel Art Buk, olsem ol namba 26, 40, 41, mo 83, oli save help). Testifae se God i bin mekem ol merikel long ol taem bifo mo Hem i stap wokem yet ol merikel tedei.
-
Serem wan eksperiens abaot wan taem we yu bin luk ol merikel oli hapen long Jos tedei, o insaed long laef blong yuwan. Serem testemoni blong yu se God i “wan God blong ol merikel.” (Momon 9:11).
Stap Tijim Doktrin: Ol Bigfala Pikinini
Buk blong Momon wetem Baebol, tufala tugeta i testifae abaot Jisas Kraes.
Momon i tijim se “gospel blong Kraes … bae i stap long fored blong [yumi]” long tugeta ples ia, long Baebol mo long Buk blong Momon. Tingbaot olsem wanem bae yu save tijim ol pikinini se, tufala tabu buk ia, oli impoten long yumi.
Samfala Aktiviti we Yu Save Mekem
-
Raetem Momon 7:9 long bod, be lego ol waet spes ia long ples blong ol toktok ia hemia mo ol narafala histri. Mo tu, raetem ol samting ia long bod: hemia = Buk blong Momon mo ol narafala histri = Baebol. Invaetem ol pikinini blong ridim Momon 7:9 laod mo yusum ol sentens we oli stap long bod blong fulumap ol waet spes. ?Wanem nao yu lanem abaot Baebol mo Buk blong Momon aot long ves ia?
-
Soem wan Buk blong Momon mo wan Baebol. Serem samfala stori we oli kamkamaot long wanwan buk, mo soem ol pikja sapos i gat (luk long Gospel Art Buk). Invaetem ol pikinini blong poenem buk we stori ia i kamaot long hem. ?From wanem yumi nidim tufala buk?
-
Raetem wanwan toktok blong namba eit toktok blong bilif long ol seperet pis pepa. Givim wan o tu toktok i go long wanwan pikinini, mo invaetem ol pikinini blong wok tugeta blong putum ol toktok ia long stret oda. Afta, askem olgeta blong ripitim toktok blong bilif ia plante taem. ?Wanem nao toktok ia i tijim yumi long hem?
Pikjaol kopi blong Buk blong Momon long ol defren lanwisBuk blong Momon i testifae abaot Jisas Kraes.
Mi save jusum raet iven taem we mi mi filim se mi stap miwan.
Strong tingting blong Moronae blong “mekem komanmen blong papa blong hem i hapen,” iven we papa blong hem i bin ded finis, i save givim insperesen long ol pikinini blong obei long ol komanmen blong God.
Samfala Aktiviti we Yu Save Mekem
-
Ridim Momon 8:1–7 wetem ol pikinini mo invaetem olgeta blong serem olsem wanem bae oli save bin filim sapos olgeta nao oli bin Moronae. Askem olgeta blong lukluk bakegen i go long ol ves 1, 3, mo 4 blong faenemaot wanem nao oli talem long Moronae blong mekem. ?Olsem wanem nao Moronae i bin mekem komanmen blong papa blong hem i hapen? ?Olsem wanem nao yumi save kam moa olsem Moronae?
-
Invaetem ol pikinini blong raetemdaon wan situesen we oli mas mekem wan joes bitwin raet o rong, taem we i no gat wan i stap lukluk. Putum ol aedia blong olgeta insaed long wan smol kontena, mo mekem wanwan pikinini i pikimap wan mo i serem wanem bae hem i mekem blong hem i kam olsem Moronae.
God hem i “wan God blong ol merikel.”
Plante pipol tedei, oli biliv se ol merikel oli nomo hapen. Yusum ol tijing blong Moronae long ol ves ia blong tijim ol pikinini se taem we yumi gat fet, yumi save luk God i wokem ol merikel insaed long laef blong yumi.
Samfala Aktiviti we Yu Save Mekem
-
Soem wan resipi long ol pikinini. ?Bae wanem i hapen sapos yu lego wan impoten kaekae insaed long resipi ia? Invaetem ol pikinini blong luklukgud insaed long Momon 8:24 mo 9:20–21 blong faenem “kaekae” we i nidim blong yumi gat bifo God i save wokem ol merikel. Serem ol eksampol blong ol merikel—bigwan o smolwan—we yu bin luk insaed long Jos o long laef blong yu. Invaetem ol pikinini blong serem eksampol blong olgetawan.
-
Serem ol pikinini i go long tufala tim. Invaetem wanwan tim blong lukaotem ol eksampol blong ol merikel long samfala, o evriwan long ol skripja ia: Momon 8:24; 9:11–13, 16–18, 21–25. ?Bae yumi talem wanem long wan we i ting se ol merikel oli nomo stap hapen? (luk long Momon 9:9, 15–21).
Stap Leftemap Tingting blong Lanem Samting long Hom
Invaetem ol pikinini blong askem wan memba blong famli blong tokbaot wan merikel we i bin mekem testemoni blong hem i kam strong moa.
Stap Kam Antap long Fasin blong Yumi blong Stap Tij
Ol pikinini oli save luksave paoa blong Spirit. Tijim ol pikinini se ol filing blong pis, lav, mo wom filing we oli filim taem oli stap tokbaot o sing abaot Jisas Kraes mo gospel blong Hem i kam long Tabu Spirit (luk long Teaching in the Savior’s Way, 11).