Ita I Stap Haed Insaed long Wan Hol long Ston, i kam long Gary Ernest Smith

23–29 Novemba

Ita 12–15

“Tru long Fet, Evri Samting I Hapen”

Taem yu stap rid long Ita 12–15, tingting long ol pikinini we yu stap tijim. Ol aktiviti aedia insaed long aotlaen ia oli save givim insperesen long yu blong gat sam moa nara aedia we bae i save help blong lukluk long ol nid blong ol pikinini insaed long klas blong yu.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Helpem ol pikinini blong tingting long ol skripja stori abaot ol pipol we oli bin soem wan fet we i bigwan. Yu save faenem sam eksampol insaed long Ita 12:11–22.

Stap Tijim Doktrin: Ol Smol Pikinini

Ita 12:6–22

Fet i blong stap biliv long ol samting we yumi no save luk.

Moronae i bin serem plante eksampol blong ol pipol we oli bin mekem ol bigfala samting from fet blong olgeta. Tingting long wei we yu save yusum ol eksampol ia blong tijim ol pikinini long wanem hem i fet.

Samfala Aktiviti we Yu Save Mekem

• Ridim long ol pikinini: “Fet i ol samting we yumi gat hop from mo yumi no luk,” we i stap long Ita 12:6, mo askem olgeta blong oli ripitim sentens ia wetem yu. Talem long ol pikinini abaot ol samting we yu stap biliv long hem, iven we yu no save luk olgeta, mo helpem ol pikinini blong oli tingting long sam moa eksampol bakegen. Singsing ia, “Faith” (Children’s Songbook, 96–97), o wan nara singsing abaot fet, i save help.

• Soem ol pikja we oli soem ol eksampol blong fet insaed long Ita 12:13–15, 20–21 (luk long Gospel Art Buk, ol namba 78, 85, mo aktiviti pej blong wik ia). Letem ol pikinini oli tokbaot long yu wanem we oli stap luk long ol pikja ia, mo wanem nao oli save abaot ol stori ia. Toktok wetem ol pikinini abaot olgeta pipol ia we oli bin soem fet mo wanem i bin hapen from fet blong olgeta.

• Plei wan gem wetem ol pikinini we bae oli traem faenem samting. Talem long olgeta sam samting abaot ol fetful pipol we oli tokbaot insaed long Ita 12:13–15, 19–20 kasem taem ol pikinini oli save talem huia olgeta. Afta, letem ol pikinini oli plei gem ia bakegen, mo wan afta wan i givim sam moa infomesen abaot ol sem pipol (mo ol nara fetful pipol) mo nara haf blong klas i traem faenem se huia. Serem wanem yu laekem tumas abaot fet blong ol pipol ia.

Ita 12:23–27

Jisas Kraes i save helpem mi blong stap strong.

Samtaem, ol pikinini oli fesem ol situesen we oli filim se oli wik, semmak olsem Moronae i bin filim. Helpem olgeta blong lanem wanem we Moronae i bin lanem—se Sevya i save mekem “ol samting ia we oli no strong long olgeta, bae Hem i mekem olgeta oli winim mo kam strong long olgeta” (Ita 12:27).

Samfala Aktiviti we Yu Save Mekem

• Tokbaot, long ol pikinini, wan wok we bae i nidim plante paoa long bodi blong mekem. Invaetem olgeta blong serem ol eksampol blong ol samting we oli no strong naf blong mekem naoia. ?Olsem wanem nao bae yumi save kam strong naf blong mekem ol samting ia? Eksplenem se, yumi tu, yumi gat wan wok long saed blong spirit blong mekem, be samtaem, yumi filim se yumi no strong naf long saed blong spirit. Moronae i bin filim semmak abaot ol raeting we oli stap long ol buk ia. Ridim Ita 12:27 long ol pikinini. ?Wanem nao Lod i bin promesem long olgeta we oli filim se oli no strong naf?

• Serem wan eksperiens we, long hem, Sevya i bin helpem yu o i bin helpem wan we yu save, blong i mekem wan samting we i had. Testifae long ol pikinini se taem oli askem help blong Hem, Jisas i save helpem olgeta blong stap strong, iven taem we oli filim se oli no strong naf.

Stap Tijim Doktrin: Ol Bigfala Pikinini

Ita 12:5–6

Fet i blong stap biliv long ol samting we yumi no save luk.

Ol pikinini we yu stap tijim, oli stap bildimap fandesen blong testemoni blong olgeta. Kaonsel blong Moronae abaot fet, i stap long Ita 12:6, mo i save helpem olgeta.

Samfala Aktiviti we Yu Save Mekem

• Eksplenem se profet Ita i bin traem blong tijim Ol Man blong Jared “ol bigfala mo gudfala samting” be oli no bin bilivim wanem hem i bin talem. Invaetem ol pikinini blong oli ridim Ita 12:5 blong faenemaot from wanem oli no bin biliv. ?Wanem oli sam samting we Papa long Heven i wantem yumi blong biliv long hem iven we yumi no stap luk olgeta? Tugeta, ridim Ita 12:6. ?Wanem nao Moronae i bin tijim long ol pipol we oli no bin wantem biliv long ol trutok long saed blong spirit from se oli no bin save luk ol samting ia?

• Soem wan pikja long wan long ol pikinini, mo no letem ol narawan pikinini oli luk, mo askem pikinini ia blong tokbaot pikja ia long klas we i stap. Folem taem we yu gat, letem ol nara pikinini oli kam, wan afta wan, blong mekem sem samting wetem ol defren pikja. Afta, invaetem olgeta blong ridim Ita 12:6 mo faenem sentens ia: “fet i ol samting we yumi gat hop from mo yumi no luk.” ?Olsem wanem nao yumi soem fet long Jisas Kraes taem we yumi no save luk Hem?

• Askem ol pikinini blong ridim sentens ia we i stap long Ita 12:6: “Yufala i no kasem eni witnes kasem afta nomo long tes blong fet blong yufala.” Helpem ol pikinini blong andastanem se, taem yumi obei long wan komanmen, yumi save kam blong save se hem i tru. Askem olgeta blong tingting long ol prinsipol blong gospel we God i wantem yumi blong gat wan testemoni long hem, olsem blong pem taeting, blong kipim Sabat dei i tabu, o blong stap laef folem Tok blong Waes. Afta, raetem long bod: Blong save kasem wan testemoni long saed blong , mi mas . Serem olsem wanem yu bin praktisim fet blong yu blong save kasem testemoni blong yu long saed blong trutok ia mo ol nara trutok blong gospel.

Ita 12:4, 32

Hop i olsem wan angka long sol blong mi.

Helpem ol pikinini we yu stap tijim blong oli andastanem se yumi save hop from wan wol we i gud moa from fet blong yumi long Kraes (Ita 12:4).

Samfala Aktiviti we Yu Save Mekem

• Serem, wetem ol pikinini, mining blong hop olsem we i stap long“Hop” (Gaed long Ol Skripja, scriptures.ChurchofJesusChrist.org). Folem mining ia, mo wanem i stap long Ita 12:4, 32, ?wanem nao yumi mas hop from? (Luk tu long Moronae 7:40–42). Helpem ol pikinini blong tingting long ol nara toktok blong tokbaot hop, mo tu, ol nara toktok we i minim oposit long hop. Serem wetem olgeta sam trutok blong gospel we oli givim hop long yu, mo invaetem olgeta blong mekem semmak.

• Soem (o dro long bod) wan pikja blong wan bot mo pikja blong wan angka. ?From wanem ol bot oli nidim ol angka? ?Wanem nao bae i hapen long wan bot we i no gat angka? Tugeta, ridim Ita 12:4, mo askem ol pikinini olsem wanem nao hop i olsem wan angka. Invaetem ol pikinini blong droem pikja blong olgeta blong wan bot mo wan angka, blong mekem se oli save tijim famli blong olgeta abaot hop.

Ita 12:23–29

Jisas Kraes i save helpem mi blong stap strong.

Taem ol pikinini oli stap kam bigwan, oli kam blong save moa abaot wiknes blong olgeta. Yusum ol ves ia blong tijim olgeta olsem wanem Sevya i save mekem “ol samting ia we oli no strong long olgeta, bae … oli winim mo kam strong long olgeta” (Ita 12:27).

Samfala Aktiviti we Yu Save Mekem

• Askem ol pikinini blong ridim Ita 12:23–25 blong faenemaot from wanem Moronae i bin wari. Askem olgeta sapos oli gat ol semmak filing. Afta, invaetem olgeta blong ridim ol ves 26–27 blong faenemaot olsem wanem Lod i leftemap tingting blong Moronae. ?Wanem nao yumi nidim blong mekem blong Lod i save helpem yumi blong stap strong taem we yumi filim se yumi no strong? Serem wan eksperiens we, long hem, Sevya i bin helpem yu blong kam strong inaf blong mekem wan samting we i bin had.

• Invaetem ol pikinini blong dro wan pikja blong wan samting we oli no strong long hem mo wan samting we oli strong long hem. Afta, invaetem olgeta blong ademap long ol droing blong olgeta, sam toktok mo sam sentens we oli kam long Ita 12:23–29 we i tijim olgeta hao nao Sevya i save helpem yumi blong tanem samting we yumi no strong long hem, bae yumi winim mo kam strong long hem. Leftemap tingting blong ol pikinini blong tingting long wan wiknes we oli gat, mo afta, oli askem help blong Sevya blong oli kam strong long hem.

Stap Leftemap Tingting blong Lanem Samting long Hom

Invaetem ol pikinini blong raetemdaon wan trutok we oli wantem kasem wan testemoni long hem. Helpem olgeta blong putum wan gol blong praktisim fet blong olgeta blong oli save kasem wan witnes long saed blong trutok ia.

Stap Kam Antap long Fasin blong Yumi blong Stap Tij

Lukaot blong andastanem ol pikinini we yu stap tijim. “Lukaotem ol wei blong andastanem bakgraon blong olgeta, ol intres, ol talen, mo ol nid blong ol pikinini we yu stap tijim. Askem ol kwestin, lisin gud, mo lukluk wanem oli stap talem mo mekem long ol defren situesen. … Askem papa mo mama blong kasem sam niu tingting. Antap long evriwan, prea blong kasem andastaning ia we Spirit nomo i save givim” (Teaching in the Savior’s Way, 7).