“9–15 Novemba. Ita 1–5: ‘Teremaot Vel Ia blong No Gat Bilif,’” Kam Folem Mi—Blong Praemeri: Buk blong Momon 2020 (2020)
“9–15 Novemba. Ita 1–5” Kam Folem Mi—Blong Praemeri: 2020
Ol Man blong Jared Oli Aot long Babel, i kam long Albin Veselka
9–15 Novemba
Ita 1–5
“Teremaot Vel Ia blong No Gat Bilif”
Taem yu stap luklukbak long wanem we yu bin lanem aot long stadi blong yu long Ita 1–5, ?wanem trutok nao yu bin filim gud blong helpem ol pikinini blong faenemaot? Maet i gat sam aedia we oli stap long aotlaen ia we oli save helpem yu.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Soem wan pikja blong brata blong Jared (luk long aotlaen blong wik ia we i stap long Kam Folem Mi—Blong Wanwan Man, Woman mo Famli). Invaetem ol pikinini blong serem wanem oli save abaot hem.
Stap Tijim Doktrin: Ol Smol Pikinini
Papa long Heven i harem mo ansarem ol prea blong mi.
Stori brata blong Jared i soemaot samfala wei we God i save helpem yumi taem yumi prea.
Samfala Aktiviti we Yu Save Mekem
-
Invaetem samfala memba blong wod we oli save wan nara lanwis blong talem samfala sentens long lanwis ia, long klas blong yu ( o plei wan rekoding blong wan nara lanwis). Letem ol pikinini oli priten se oli toktok wan nara lanwis, mo poenemaot olsem wanem i had blong andastanem wanwan long yumi taem we yumi no toktok semfala lanwis. Yusum hemia blong stat tokbaot stori blong Taoa blong Babel we i stap long Jenesis 11:1–9 mo Ita 1:33. Ridim Ita 3:13 mo 15, mo eksplenem olsem wanem brata blong Jared i bin prea se bae, hem, mo ol fren blong hem, mo famli blong hem bae oli save andastanem wanwan long olgeta (luk long Ita 1:34–37). Ridim mo helpem ol pikinini blong oli andastanem ansa blong Lod long prea blong hem long Ita 1:35. Yu save yusum “Japta 50: Ol Man blong Jared Oli Aot long Babel” (Ol Stori long Buk blong Momon, 143-144, o vidio blong hem long ChurchofJesusChrist.org).
-
Invaetem ol pikinini blong priten se oli stap bildim wan bigfala baj o sip, olsem we oli talem long Ita 2:16–17. Eksplenem ol problem we Ol Man blong Jared oli bin gat wetem ol baj blong olgeta (luk long Ita 2:19), mo askem ol pikinini se olgeta bae oli mekem wanem from ol problem ia. Ridim Ita 2:18–19 blong tijim ol pikinini olsem wanem brata blong Jared i bin tekem ol problem ia mo i talemaot long Lod long prea. Testifae se oltaem yumi save prea taem yumi gat ol kwestin o ol problem.
-
Long sot taem, tokbaot Ita 2:19–3:6 blong eksplenem hao nao Lod i bin ansa long ol kwestin blong brata blong Jared long saed blong ol baj ia. Putum 16 ston raon long klasrum, mo invaetem ol pikinini blong kaontem olgeta taem oli stap faenem olgeta. Soem pikja long aotlaen blong wik ia we i stap long Kam Folem Mi—Blong Wanwan Man, Woman mo Famli, mo letem ol pikinini oli talem stori ia long yu bakegen (luk long luk tu long aktiviti pej blong wik ia.)
Oli bin krietem mi folem fasin mo bodi blong God.
Taem we brata blong Jared i bin luk Lod, hem i lanem se “oli bin mekem evri man long stat, folem pikja blong [Hem]” (Ita 3:15).
Samfala Aktiviti we Yu Save Mekem
-
Soem wan pikja blong Sevya, mo invaetem ol pikinini blong poenem ol defren pat blong bodi blong Hem. Eksplenem se, taem brata blong Jared i bin luk Jisas Kraes, hem i jes lanem se yumi evriwan, i luk olsem Jisas. Taem yu stap poenem wan pat blong bodi long pikja, invaetem olgeta blong poenem semfala pat ia long bodi blong olgeta bakegen. Testifae se oli krietem yumi blong yumi luk olsem Papa long Heven mo Jisas Kraes.
-
Tugeta, singsing wan singsing we i go wetem bodi blong yumi olsem “Head, Shoulders, Knees, and Toes” (Children’s Songbook, 275). Helpem ol pikinini blong oli toktok abaot from wanem oli talem tangkyu from ol defren pat blong bodi blong olgeta.
Man, oli bin krietem i folem fasin mo bodi blong God.
Stap Tijim Doktrin: Ol Bigfala Pikinini
Mi save kasem revelesen blong helpem mi.
?Olsem wanem nao yu save helpem ol pikinini blong lanem samting abaot revelesen aot long eksampol brata blong Jared? ?Wanem eksperiens nao yu save serem abaot wan taem we Lod i bin helpem yu blong faenem ol ansa long ol problem o ol kwestin blong yu?
Samfala Aktiviti we Yu Save Mekem
-
Bifo klas i stat, raetem sentens ia: “Stanap, tanem raon, sidaon” long ol defren lanwis, long ol defren pis pepa (yu save yusum wan onlaen transleta, o help blong wan we i save wan nara lanwis). Givim wan pis pepa long wanwan pikinini, mo invaetem olgeta blong traem folem ol instraksen we i stap. Yusum hemia blong eksplenem wanem nao i bin pusum brata blong Jared blong prea; ridim insaed long Ita 1:33–37. Ridim olgeta ves ia tugeta, mo askem ol pikinini blong luklukgud long wei we Lod i bin filim abaot Jared mo ol fren mo famli blong hem. ?Wanem nao yumi lanem aot long stori ia abaot prea?
-
Givim wok long wanwan pikinini blong ridim wan long ol skripja ia, mo helpem olgeta blong lukaotem wan kwestin o problem we brata blong Jared i bin gat: Ita 1:33–35; Ita 1:36–37; mo Ita 2:18–20. ?Wanem nao brata blong Jared i bin mekem abaot ol problem o kwestin ia? ?Olsem wanem nao Lod i bin helpem hem long wanwan kes ia? Invaetem ol pikinini blong tingbaot samfala problem we oli nidim help wetem. ?Olsem wanem oli save folem eksampol brata blong Jared blong faenem ol ansa long ol problem olgeta? Serem wan eksperiens blong wan taem we yu bin prea blong kasem help, mo Lod i bin helpem yu.
Oli bin krietem mi folem fasin mo bodi blong God.
Ol pikinini we yu stap tijim bae oli fesem plante giaman mesej abaot God, olgetawan, mo bodi blong mit mo bun blong olgeta. Ol ves ia, oli wan janis blong tijim ol trutok we oli no save finis abaot ol topik ia.
Samfala Aktiviti we Yu Save Mekem
-
Wetem ol pikinini, ridim Ita 3:6–16, mo helpem olgeta blong mekem wan lis blong ol samting we brata blong Jared i bin lanem abaot Lod aot long eksperiens ia. ?From wanem hem i impoten blong save olgeta samting ia? Eksampol: Taem yumi save se oli krietem yumi i folem fasin mo bodi blong Lod, ?olsem wanem nao hemia i jenisim wei we yumi stap luk bodi blong yumi?
-
Raetem bodi blong mit mo bun mo spirit bodi antap long bod. Invaetem ol pikinini blong serem ol samting blong wan bodi blong mit mo bun (yumi gat skin, blad, mo ol narawan moa) mo raetemdaon ansa blong olgeta long bod. Ridim Ita 3:4–17 tugeta, mo invaetem ol pikinini blong faenem wanem oli lanem abaot ol spirit bodi blong yumi. Testifae se bodi mo spirit blong yumi, oli “bin krietem folem stret pikja blong Jisas” (Ita 3:15).
Olgeta Tri Witnes oli testifae abaot Buk blong Momon.
Moronae i bin profesae se bae Olgeta Tri Witnes bae oli help blong stanemap trutok abaot Buk blong Momon,. Yu save yusum profesi ia blong mekem testemoni blong ol pikinini i kam strong moa mo givim insperesen long olgeta abaot Buk blong Momon, long wei ia blong olgeta.
Samfala Aktiviti we Yu Save Mekem
-
Antap long bod, raetem sam impoten toktok ia we oli stap long Ita 5:2–4, olsem ol buk, paoa, tru, ol witnes, mo testemoni. Ridim olgeta ves ia wetem ol pikinini, mo invaetem olgeta blong stop taem yu kasem wan long ol toktok long bod ia, mo toktok raon se from wanem ol toktok ia oli impoten. Blong tijim ol pikinini abaot Olgeta Tri Witnes, maet bae yu wantem lukluk i go long “Japta 7: Ol Witnes Oli Luk Ol Buk we Oli Wokem long Gol” (Ol Stori long Doktrin mo Ol Kavenan, 31–33) mo “Testemoni blong Olgeta Tri Witnes” insaed long Buk blong Momon. ?From wanem nao God i wantem se trifala pipol oli luk ol buk we oli wokem long gol?
-
Talem long ol pikinini olsem wanem yu save se Buk blong Momon i tru. Invaetem ol pikinini blong serem from wanem oli save se buk i tru. Helpem olgeta oli tingting long sam wei we oli save stap ol witnes blong Buk blong Momon, mo leftemap tingting blong olgeta blong oli serem witnes blong olgeta long wan man o woman, o pikinini, long wik ia.
Stap Leftemap Tingting blong Lanem Samting long Hom
Invaetem ol pikinini blong tingting long wan samting we oli save askem help blong Papa long Heven from, semmak olsem we brata blong Jared i bin mekem. Leftemap tingting blong olgeta blong oli askem help blong Hem tru long prea.
Stap Kam Antap long Fasin blong Yumi blong Stap Tij
Tij long taem blong ol aktiviti. Taem ol pikinini oli stap mekem ol aktiviti, olsem ol droing o wok long wan aktiviti pej, yu save yusum taem ia blong tokbaot bigwan ol trutok we oli stap tijim tru long ol aktiviti ia.