“16–22 Novemba. Ita 6–11: ‘Blong Mekem se Nogud Fasin I Save Lus,’” Kam Folem Mi—Blong Praemeri: Buk blong Momon 2020 (2020)
“16–22 Novemba. Ita 6–11,” Kam Folem Mi—Blong Praemeri: 2020
Bae Mi Tekemaot Yu Aot long Ol Dip Ples, i kam long Jonathan Arthur Clarke
16–22 Novemba
Ita 6–11
“Blong Mekem se Nogud Fasin I Save Lus”
Ol aedia long aotlaen ia oli no ol instraksen we yu mas folem. Oli stap ia blong helpem yu blong krietem samting mo invaetem insperesen i kam long yu.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Yusum ol pikja long aotlaen blong wik ia mo ol aotlaen blong las wik we oli stap insaed long Kam Folem Mi—Blong Wanwan Man, Woman mo Famli, mo helpem ol pikinini oli luklukbak wanem we oli bin lanem abaot Ol Man blong Jared taem oli stap krosem solwota. Givim taem long wanwan blong oli serem wanem we oli save.
Stap Tijim Doktrin: Ol Smol Pikinini
Papa long Heven i save kamfotem mi taem mi stap fraet.
Maet bae Ol Man blong Jared oli fraet blong “win i pusum olgeta tru long ol wef blong solwota” (Ita 6:5). Be Lod i kipim olgeta oli stap sef mo i bin helpem olgeta. ?Olsem wanem yu save helpem ol pikinini blong oli tanem olgeta i go long Lod taem oli filim se oli fraet?
Samfala Aktiviti we Yu Save Mekem
-
Yusum ol toktok mo ol sentens we oli kam long Ita 6:2–12, mo tokbaot long ol pikinini wokbaot blong Ol Man blong Jared we oli krosem solwota. Invaetem ol pikinini blong priten se oli stap klaem insaed long ol baj mo oli priten se baj ia i stap muv mo wef i kavremap olgeta. ?Bae i fil olsem wanem blong stap long wan ril baj long medel blong ol raf wota? ?Wanem nao yumi save mekem taem yumi fraet? Tugeta, ridim ol ves 7 mo 9 blong luk wanem nao Ol Man blong Jared oli bin mekem taem we oli bin fraet.
-
Tokbaot wan taem we yu bin fraet mo Papa long Heven i bin mekem yu harem gud. Serem wan hym o singsing wetem ol pikinini we i helpem yu blong “talem tangkyu mo presem Lod” (Ita 6:9) from help blong Hem. Letem ol pikinini oli serem ol Praemeri singsing we oli laekem tumas, mo singsing sam long olgeta singsing ia tugeta.
-
Yusum aktiviti pej blong wik ia blong helpem ol pikinini blong mekem pepa baj (sip) blong olgeta. Eksplenem se ol baj ia i bin helpem Ol Man blong Jared blong stap sef iven taem we wota i kavremap olgeta (luk long Ita 6:7, 10). ?Wanem nao Papa long Heven i bin givim long yumi blong kipim yumi i sef long rod blong yumi we i gobak long Hem?
Mi gat hat blong talem tangkyu.
Afta we oli kasem graon blong promes mo oli bin sef long ples ia, Ol Man blong Jared oli bin gat bigfala hat blong talem tangkyu, mekem se “wota blong ae blong olgeta i bin ron from glad” (Ita 6:12). ?Olsem wanem yu save leftemap tingting blong ol pikinini we yu stap tijim blong oli gat spirit ia blong talem tangkyu?
Samfala Aktiviti we Yu Save Mekem
-
Ridim long ol pikinini ol sentens we oli kam long Ita 6:9 mo 12 blong tijim olgeta hao Ol Man blong Jared oli bin soem fasin blong talem tangkyu long Lod blong save helpem olgeta blong kasem graon blong promes. Askem ol pikinini blong talem nem blong sam samting we oli talem tangkyu from. Singsing tugeta, olsem Ol Man blong Jared oli bin mekem; singsing wan singsing blong talem tangkyu, olsem “Tangkyu Papa God” (STSP, 61).
-
Ridim Ita 10:2 long ol pikinini blong soem se iven plante yia afta, Ol Man blong Jared oli tingbaot olsem wanem Lod i bin helpem ol bubu blong olgeta blong krosem ol solwota. Helpem ol pikinini blong tingbaot sam wei we Lod i stap blesem olgeta. Afta, letem ol pikinini oli droem ol pikja blong mekem olgeta oli tingbaot ol blesing ia (o helpem olgeta blong oli jusum sam pikja we yu bin tekem i kam, maet sam pikja blong sam magasin blong Jos).
Mi kasem blesing taem mi folem profet.
Buk blong Ita i soem klia se, taem Ol Man blong Jared oli stap folem ol profet, oli bin kasem blesing, mo taem we oli sakemaot ol profet, laef blong olgeta i bin had moa. Tingting long sam wei we yu save helpem ol pikinini blong luk se hemia i tru long yumi.
Samfala Aktiviti we Yu Save Mekem
-
Soem wan pikja blong profet we i stap laef, mo askem ol pikinini wanem we oli save abaot hem. ?Wanem nao wan profet i stap mekem? Eksplenem se Ol Man blong Jared oli bin gat ol profet tu, mo eni taem we oli bin folem profet, oli bin kasem ol blesing mo oli bin stap hapi (luk long Ita 7:24–27). ?Olsem wanem nao yumi save folem profet?
-
Tugeta, singsing wan singsing abaot ol profet, olsem “Follow the Prophet” (Children’s Songbook, 110–11; luk tu long Gospel Art Buk, namba 4–27, 67–87). Toktok wetem ol pikinini abaot ol samting we ol profet oli bin tijim yumi blong mekem (eksampol, blong ridim skripja evri dei, kipim Sabat dei i tabu, o givim seves long ol narawan), mo invaetem olgeta blong aktemaot fasin blong stap obei long kaonsel ia taem yu talem “!Folem profet!”
Stap Tijim Doktrin: Ol Bigfala Pikinini
Mi save trastem Papa long Heven blong Hem i lidim mi i go long laef we i no save finis.
Stori blong wokbaot blong Ol Man blong Jared we oli krosem solwota, yumi save komperem long wokbaot blong yumi i go tu long laef long wol ia. Tufala kaen wokbaot ia, samtaem i gat denja long hem, mo i nidim fet se Lod bae i lidim mo bae i protektem yumi.
Samfala Aktiviti we Yu Save Mekem
-
Tugeta, ridim Ita 6:2–12, mo stop wanwan taem blong mekem se ol pikinini oli save droem ol pikja blong wanem we oli stap ridim. ?Olsem wanem nao, wokbaot blong Ol Man blong Jared i semmak long laef blong yumi? Helpem ol pikinini blong oli faenemaot mo oli raetem wanem nao ol defren pat blong droing blong olgeta i save ripresentem long laef blong yumi. Eksampol, Ol Man blong Jared oli ripresentem yumi. Ol baj oli ripresentem ol hom blong yumi, Jos, o gospel. ?Yu ting se win, wota, ston we i saen, mo promes graon oli ripresentem wanem?
-
Helpem ol pikinini blong oli faenem ol toktok mo ol sentens long Ita 6:2–12 we i soem se Ol Man blong Jared oli bin trastem God. Serem ol eksampol blong stap dipen long God, mo soem olsem wanem hemia i bin helpem yu long ol taem we oli bin had insaed long laef blong yu. Leftemap tingting blong ol pikinini blong serem ol semmak eksperiens olsem we oli bin gat.
PikjaOl Man blong Jared oli travel wetem ol animol.Wokbaot blong Ol Man blong Jared we oli krosem Esia, i kam long Minerva Teichert
Blong stap tingbaot wanem we Lod i bin mekem blong mi, i tekem pis i kam long mi.
Wan samting we i mekem se oli luksave ol king blong Ol Man blong Jared we oli bin stret mo gud long olgeta we oli gat fasin nogud, i we, ol stret mo gud king oli bin “tingbaot ol bigfala samting we Lod i bin mekem” blong olgeta (Ita 7:27). ?Olsem wanem yu save givim insperesen long ol pikinini blong oli tingbaot wanem we Lod i bin mekem blong olgeta?
Samfala Aktiviti we Yu Save Mekem
-
Askem ol pikinini blong oli ridim Ita 6:30; 7:27; mo 10:2 wanwan mo long ol smol grup mo faenem wan samting we ol ves ia oli gat we oli semmak. Serem ol filing blong yu abaot wanem we Lod i bin mekem blong yu, mo invaetem ol pikinini blong oli mekem semmak samting.
-
Serem wetem ol pikinini abaot wei we yu traem blong rimemba ol wei we Lod i bin blesem yu mo famli blong yu. Helpem ol pikinini blong tingbaot sam wei we oli mekem yumi tingbaot wanem we Lod i bin mekem blong olgeta. Givim long wanwan pikinini wan pis pepa mo invaetem olgeta blong tingting hevi mo raetemdaon wan samting we Hem i bin mekem blong olgeta i no longtaem i pas. Givim tingting se oli mekem wan evri dei fasin blong stap raetemdaon ol blesing we oli luk we i kam long Lod (luk long “O Remember, Remember” [vidio, ChurchofJesusChrist.org]).
Lod i gat sore taem mi sakem sin.
Iven we Ol Man blong Jared oli sakemaot ol profet plante taem, mo oli kam nogud, Lod oltaem i bin fogivim olgeta taem we oli bin putum tingting blong olgeta i stap daon mo oli bin sakem sin.
Samfala Aktiviti we Yu Save Mekem
-
Tugeta, ridim Ita 9:28–35, mo helpem ol pikinini blong tingting long tri o fo sentens we i talemsot wanem i bin hapen long ol ves ia. Afta, ridim Ita 11:5–8, mo helpem ol pikinini blong oli faenem ol sem samting long tufala stori ia. ?Wanem nao yumi lanem aot long ol ol stori ia?
-
Askem ol pikinini blong tingting long sam nara pipol insaed long Buk blong Momon we oli bin putum tingting blong olgeta i stap daon, mo oli kasem fogivnes. Yusum ol pikja we oli kam long Gospel Art Buk o Kam Folem Mi—Blong Wanwan Man, Woman mo Famli blong helpem olgeta blong oli tingbaot. Serem testemoni blong yu se Lod i stap fogivim yumi taem yumi sakem sin wetem tru hat.
Stap Leftemap Tingting blong Lanem Samting long Hom
Invaetem ol pikinini blong serem wetem ol famli blong olgeta wan samting we Papa long Heven i bin mekem blong olgeta, we oli talem tangkyu from.
Stap Kam Antap long Fasin blong Yumi blong Stap Tij
Helpem ol pikinini blong oli krietem samting. “Taem yu stap tijim ol pikinini, letem olgeta blong bildimap samting, dro, kala, raet mo krietem wan samting. Ol samting olsem oli no ol aktiviti blong pleiplei nomo be—oli impoten long fasin blong lanem samting” (Teaching in the Savior’s Way,25