“16–22 Novemba. Ita 6–11: ‘Blong Mekem se Nogud Fasin I Save Lus,’” Kam Folem Mi—Blong Wanwan Man, Woman mo Famli: Buk blong Momon 2020 (2020)

“16–22 Novemba. Ita 6–11,” Kam Folem Mi—Blong Wanwan Man, Woman mo Famli: 2020

Pikja

Ol baj blong Ol Man blong Jared oli stap long solwota

Bae Mi Tekemaot Yu Aot long Ol Dip Ples, i kam long Jonathan Arthur Clarke

16–22 Novemba

Ita 6–11

“Blong Mekem se Nogud Fasin I Save Lus”

Taem hem i stap tokbaot histri blong Ol Man blong Jared, Momon i talem se “i nid se evri pipol i mas save ol samting we oli bin raetem long histri ia” (Mosaea 28:19). Kipim hemia long maen taem yu stap ridim Ita 6–11. ?From wanem nao ol samting ia, yu nidim—o bae i blong gud—blong yu mo olgeta we yu lavem olgeta?

Raetemdaon Ol Filing mo Tingting blong Yu

Plante handred yia afta we Ol Man blong Jared oli bin ded evriwan, Ol Man blong Nifae oli bin faenem ol brokbrok haos blong sosaeti ia blong bifo. Long medel blong ol brokbrok haos ia, i bin gat wan defren kaen histri—ol buk we oli mekem wetem “klin mo stret gol” mo oli fulap long “ol raeting” (Mosaea 8:9). King blong Ol Man blong Nifae, Limhae, i save filim se histri ia i impoten: Hem i talem, “Mi biliv strong se i gat wan bigfala sikret we i stap long ol buk ia” (Mosaea 8:19). Tedei, yu gat wan sot raeting blong histri ia, we oli transletem long lanwis blong yu, mo oli singaotem buk blong Ita. Hem i kamaot long semfala histri ia we Ol Man blong Nifae “oli wantem bitim mak” blong ridim, mo taem oli bin ridim, “oli fulap wetem sore; be tu, hemia i givim plante save long olgeta, we i mekem olgeta oli hapi long hem” (Mosaea 28:12, 18). Taem yu stap ridim abaot taem we Ol Man blong Jared oli bin kam antap, mo afta, taem oli foldaon evriwan, bambae yu faenem plante taem blong harem nogud. Be no lukluk ova long glad blong lanem ol lesen aot long histri ia. Afta long evri samting, taem Moronae i bin stap raetem “hem i waes tingting long God se oli soemaot ol samting ia long yufala” (Ita 8:23), from we sapos yumi save lanem samting aot long ol samting we Ol Man blong Jared oli no mekem gud, mo aot long ol sakses blong olgeta, “nogud fasin i save lus, mo blong mekem se taem i save kam we Setan bae i no gat eni paoa long hat blong ol pikinini blong ol man” (Ita 8:26).

Pikja

stadi blong yuwan pikja bokis

Sam Aedia blong Skripja Stadi blong Yuwan

Ita 6:1–12

Lod bae i lidim mi i go long graon blong promes.

Bae yu save faenem sam niu tingting sapos yu komperem travel blong Ol Man blong Jared krosem bigfala solwota, long travel blong yu i go tru long laef long wol ia. Eksampol: ?Wanem nao Lod i givim we i stap saenem rod blong yu, semmak olsem ol waet ston insaed long ol baj blong Ol Man blong Jared? ?Wanem nao ol baj ia oli ripresentem, o wanem nao ol win we oli “blo i go long graon blong promes” oli ripresentem? (Ita 6:8). ?Wanem nao yu lanem aot long ol aksen blong Ol Man blong Jared bifo, long taem blong , mo afta long travel ia? ?Olsem wanem nao Lod i stap lidim yu i go from graon ia blong promes blong yu?

Wokbaot blong Ol Man blong Jared we oli krosem Esia, i kam long Minerva Teichert

Ita 6:5–18, 30; 9:28–35; 10:1–2

Lod i blesem mi taem mi gat tingting i stap daon.

I nomata se fasin blong gat hae tingting mo fasin nogud i stap win insaed long histri blong Ol Man blong Jared, oli stap tu olsem ol eksampol blong fasin blong putum tingting i stap daon insaed long ol japta ia—speseli long Ita 6:5–18, 30; 9:28–35; mo 10:1–2. Sapos yu tingting hevi long olgeta kwestin ia, bae i save helpem yu blong lanem samting aot long ol eksampol ia: ?From wanem Ol Man blong Jared oli bin putum tingting blong olgeta i stap daon long ol situesen ia? ?Wanem nao olgeta i bin mekem blong soem se oli gat tingting we i stap daon? ?Olsem wanem nao oli kasem ol blesing, olsem wan risal? Luk gud se, long sam kes, ol pipol, from situesen blong olgeta, oli mas fos nomo blong putum tingting blong olgeta i stap daon. Tingting long wanem nao yu save mekem blong yu “wokbaot wetem tingting we i no hae long fored blong Lod” (Ita 6:17) folem tingting blong yu nomo, be i no blong oli fosem yu blong yu putum tingting i stap daon (luk long Mosaea 4:11–12; Alma 32:14–18).

Luk tu long “Humility,” Gospel Topics, topics.ChurchofJesusChrist.org.

Ita 7–11

Ol stret mo gud lida oli blesem ol pipol we oli stap lidim olgeta.

Ol japta 7 kasem 11: blong buk blong Ita, oli kavremap 28 jeneresen. Nomata we i no gat tumas ditel we oli save givim long wan smol spes olsem, i gat wan paten we i kamkamaot kwik: stret mo gud lidasip i lidim pipol blong kasem ol blesing mo kam antap, be ol nogud lidasip oli lidim ol pipol blong oli prisena mo oli ded evriwan.

Andanit ia, i gat samfala king nomo we oli tokbaot long ol japta ia. Ridim ol ves we oli go wetem, mo luk wanem yu save lanem aot long ol eksampol blong olgeta—ol gudwan mo ol nogudwan—long saed blong lidasip. Taem yu stap mekem hemia, tingting long sam janis we maet yu gat blong save lidim o lidim tingting blong ol narawan insaed long hom blong yu, komuniti blong yu, Jos koling blong yu, mo ol narawan moa.

Oraeha—Ita 6:30–7:1
Sul—Ita 7:23–27
Jared—Ita 8:1–7, 11–15
Ima mo Koriantuma—Ita 9:21–23
Het—Ita 9:26–30
Ses—Ita 10:1–2
Riplakis—Ita 10:5–8
Morianton—Ita 10:10–11
Lib—Ita 10:19–28
Itam—Ita 11:11–13

Ita 8:7–26

?Wanem hem i wan sikret grup?

Taem we i gat tu o moa pipol we oli agri blong kipim ol rabis sikret plan blong olgeta, bae oli stap insaed long wan sikret grup. Plante taem, tingting blong wantem paoa o ol rij samting nao i pusum olgeta blong mekem hemia. Antap long ol sikret grup we oli tokbaot long Ita 8:7–18, i gat ol nara eksampol we oli stap long Hileman 1:9–12; 2:2–11; 6:16–30, mo Moses 5:29–33. Long Ita 8:18–26, Moronae i tokbaot ol risal blong ol sikret grup ia (luk tu long Ita 9:4–12) mo i wonem yumi blong no sapotem olgeta kaen olsem.

Pikja

famli stadi pikja bokis

Sam Aedia blong Famli Skripja Stadi mo Famli Haos Naet

Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:

Ita 6:2–12

?Bae famli blong yu i laekem blong aktem wokbaot blong Ol Man blong Jared i go long graon blong promes? Mebi yu save yusum wan rum we i tudak olsem baj mo ol tojlaet blong ripresentem ol ston we oli saen. Yufala i save tokbaot olsem wanem Ol Man blong Jared oli bin soem fet blong olgeta long Lod taem oli go insaed long baj, nomata oli save se bae “oli draon plante taem long ol dip ples blong solwota” (Ita 6:6). Afta we yufala i ridim ves 9, ol memba blong famli oli save serem ol fevret hym blong pres blong olgeta mo singsing long ol hym ia tugeta. ?Olsem wanem nao yumi save komperem ol hom blong yumi long ol baj blong Ol Man blong Jared? ?Wanem i promes graon ia we Lod i stap lidim famli blong yumi i go long hem tedei?

Ita 6:22–23

Truaot long wik ia, famli blong yu i save luk olsem wanem woning blong brata blong Jared, olsem wan profet, long saed blong fasin blong kam prisena i kam blong hapen. ?Wanem woning nao ol lida blong Jos oli bin givim long yumi? ?Long wanem wei nao, sapos yumi sakemaot kaonsel blong olgeta, i save lidim yumi i kam prisena?

Ita 8:23–26

Folem ol ves ia, ?from wanem nao Moronae i kasem komanmen blong raetem “olgeta samting ia” abaot ol sikret grup? (Ita 8:23). ?Wanem yumi lanem aot long buk blong Ita we i save helpem yumi blong kasem olgeta blesing we oli tokbaot long ves 26?

Ita 9:11

?Olsem wanem nao ol samting we yumi wantem oli lidim ol joes blong yumi? ?Wanem nao yumi save mekem olsem wan famli blong meksua se yumi wantem ol samting blong God?

Ita 11:8

Blong lanem moa abaot sore we Lod i gat long olgeta we oli sakem sin, yu save ridim Mosaea 26:29–30; 29:18–20; Alma 34:14–16; o Moronae 6:8. Maet ol memba blong famli oli save serem ol eksampol blong sore blong God, hemia aot long ol skripja, o, aot long laef blong olgetawan.

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Stap Kam Antap long Stadi blong Yuwan

Tekem aksen folem wanem yu lanem. Fasin blong lanem Gospel, i tekem moa bitim blong rid mo tingting hevi. Plante taem yumi lanem moa samting taem yumi tekem aksen folem ol trutok ia insaed long ol skripja (luk long Jon 7:17). ?Wanem nao bae yu mekem blong mekem wanem we yu stap ridim insaed long Ita 6–11?