“26 Oktoba –1 Novemba. Momon 1–6: ‘Mo Mi Wantem se Mi Save Winim Tingting blong Yufala Evriwan … blong Yufala I Sakem Sin,’” Kam Folem Mi—Blong Wanwan Man, Woman mo Famli: Buk blong Momon 2020 (2020)
“26 Oktoba –1 Novemba. Momon 1–6,” Kam Folem Mi—Blong Wanwan Man, Woman mo Famli: 2020
Momon I Stap Raetemsot Histri long Ol Buk, i kam long Tom Lovell
26 Oktoba –1 Novemba
Momon 1–6
“Mo Mi Wantem se Mi Save Winim Tingting blong Yufala Evriwan … blong Yufala I Sakem Sin”
Taem yu stap ridim Momon 1-6, tingting long wanem nao yu stap lanem aot long eksampol blong Momon. Raetemdaon wanem yu filim insperesen blong go mekem.
Raetemdaon Ol Filing mo Tingting blong Yu
Momon i karemaot “ful histri” blong “ol fasin nogud” mo hemia we i tokbaot blad we i ron, we hem i bin luk long medel blong Ol Man blong Nifae (Momon 2:18; 5:8). Be, wanem we hem i bin raetemdaon long Momon 1-6, hem i inaf blong mekem yumi tingbaot, se wan stret mo gud pipol, i save foldaon i go longlongwe. Long medel blong ol strong fasin nogud ia, i no gat wan i save blemem Momon blong hem i kam taet, mo tu, i kam blong slakem tingting blong hem. Be yet, tru long evri samting we hem i bin luk mo gotru long hem, hem i neva lusum filing mo tingting ia se God i gat bigfala sore, mo tingting blong hem i strong se, fasin blong sakem sin, i wan wei ia blong kasem sore ia. Mo nomata ol stret pipol blong Momon oli bin sakemaot ol invitesen blong hem blong oli sakem sin, hem i bin save se hem i gat wan bigfala namba blong pipol moa blong save winim tingting blong olgeta. Hem i talem: “Luk, mi stap raet i go long evri en blong wol.” Long nara toktok, hem i raet i kam long yu (luk long Momon 3:17–20). Mo mesej blong hem i kam long yu, tedei, i semfala mesej ia we i bin save sevem Ol Man blong Nifae long taem blong olgeta: “Bilivim gospel blong Jisas Kraes. … Yufala i sakem sin mo yufala i rere blong stanap long fored blong jea blong jajmen blong Kraes” (Momon 3:21–22).
Sam Aedia blong Skripja Stadi blong Yuwan
Mi save laef long wan stret mo gud fasin, nomata long evri fasin nogud we oli stap raon long mi.
Stat long fas japta blong Momon, bae yu luk se i gat bigfala samting i defren bitwin Momon mo ol pipol we oli stap raon long hem. Taem yu stap ridim Momon 1, tingting blong lukluk wanem i defren long ol kwaliti mo ol samting we Momon i wantem, mo hemia blong ol pipol blong hem. Luk wanem i hapen long hem, mo wanem i hapen long olgeta (bae yu faenem wan eksampol long ol ves 14-15). ?Wanem nao yu lanem we i givim insperesen long yu blong laef long wan stret mo gud fasin insaed long wan wol we i nogud?
Taem yu stap ridim Momon 2–6, gohed blong luk olsem wanem Momon i soem fet blong hem long Papa long Heven mo long Jisas Kraes, nomata ol nogud paoa raon long hem.
Faet, i kam long Jorge Cocco
Harem nogud olsem hemia blong God, i lidim man blong i jenisim laef long wan tru fasin mo blong oltaem.
Taem Momon i bin luk harem nogud blong ol pipol blong hem, hem i bin hop se bae oli sakem sin. Be, “bigfala harem nogud blong olgeta i no mekem oli sakem sin” (Momon 2:13)—i no kaen harem nogud ia olsem hemia blong God we bae i lidim man blong i jenis tru (luk long 2 Korin 7:8–11). Be, Ol Man blong Nifae oli bin filim harem nogud olsem hemia blong God (luk long Momon 2:10–11). Blong andastanem wanem i defren bitwin harem nogud olsem hemia blong God, mo harem nogud olsem hemia blong wol, tingting blong mekem wan jat we yu save raetemdaon wanem yu lanem aot long Momon 2:10–15 long hem, abaot tufala kaen fasin ia blong harem nogud. Jat blong yu i save luk olsem ia:
|
Harem Nogud olsem Hemia blong God |
Harem Nogud olsem Hemia blong Wol |
|---|---|
Harem Nogud olsem Hemia blong God Kam long Jisas (ves 14) | Harem Nogud olsem Hemia blong Wol Sakem Nogud Tok long God (ves 14) |
Harem Nogud olsem Hemia blong God | Harem Nogud olsem Hemia blong Wol |
Harem Nogud olsem Hemia blong God | Harem Nogud olsem Hemia blong Wol |
Taem yu stap tingtingbak long wanem yu bin lanem, tingting long hao nao hemia i save lidim ol traehad blong yu blong winim sin, mo kam moa olsem Papa long Heven mo Sevya.
Luk tu long Dieter F. Uchtdorf, “You Can Do It Now!” Ensign o Liahona, Nov. 2013, 55–57.
Mi mas oltaem luksave mo talem se mi luk han blong God insaed long laef blong mi.
Momon i raetemdaon wan wiknes we hem i bin luk long Ol Man blong Nifae: oli no bin stap luksave mo talem ol wei we Lod i bin blesem olgeta. Presiden Henri B. Eyring i askem strong long yumi “ blong faenem ol wei blong luksave mo tingbaot gud fasin blong God. … Prea mo tingting hevi, mo askem ol kwestin: ?God i bin sendem wan mesej we i blong miwan nomo?? ?Mi mi luk han blong Hem long laef blong mi, o insaed long laef blong ol pikinini blong mi? … Mi testifae se Sevya i lavem mo i stap blesem yumi, i moa bitim we plante long yumi i bin luksave mo talem yet” (“O Remember, Remember,” Ensign o Liahona, Nov. 2007, 67, 69).
Taem yu stap rid long Momon 3: 3, 9, tingting hevi long wei we yu bin stap luksave mo talem paoa blong God insaed long laef blong yu. ?Wanem blesing nao i kam taem yumi stap luksave paoa blong Hem? ?Wanem nao risal blong no luksave mo talem ol wok blong Hem? (luk long Momon 2:26).
Jisas Kraes i stanap wetem han blong Hem we i open blong i tekem mi.
Ol Man blong Nifae oli bin sakemaot ol tijing blong Momon, be hem i bin hop se histri we hem i bin raetem, bae i jenisim laef blong yu. Taem yu stap ridim Momon 5:8–24 mo 6:16–22, ?wanem nao yu lanem abaot ol risal blong sin? ?Wanem nao yu lanem aot long ol ves ia abaot ol filing blong Papa long Heven,mo blong Jisas, we Tufala i gat long yu, iven we yu stap sin? ?Yu yu bin filim we Jisas Kraes i stap kam long yu, wetem han blong Hem we i open bigwan? From samting ia, ?wanem nao yumi filim insperesen blong go mekem?
Sam Aedia blong Famli Skripja Stadi mo Famli Haos Naet
Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:
Momon 1:2
?Long yu, hem i minim wanem blong “lanem samting kwiktaem nomo? Yu save faenem sam niu tingting insaed long atikol blong Elda David A. Bednar, “Quick to Observe” (Ensign, Dec. 2006, 30–36). ?Olsem wanem nao, presen ia blong save lanem samting kwiktaem, i kam wan blesing long Momon? ?Olsem wanem hem i save kam wan blesing long yumi?
Momon 1:1–6, 15; 2:1–2
?Olsem wanem long ol pikinini insaed long famli blong yu? ?Oli stap andastanem se oli save developem ol bigfala kwaliti mo paoa long saed blong spirit iven we oli yangfala nomo i stap? Eksampol blong Momon i save helpem olgeta. Tingting blong mekem wan taem laen abaot laef blong Momon taem hem i smol pikinini, i go kasem hem i yut, mo yusum ol yia mo samting we oli bin hapen insaed long Momon 1:1–6, 15 mo 2:1–2. Taem yufala i stap toktok raon long ol kwaliti mo ol eksperiens blong Momon, poenemaot ol kwaliti we ol pikinini blong yufala oli gat, we i bin givim insperesen long yu mo ol narawan raon long olgeta.
Momon 2:18–19
?Wanem toktok nao Momon i bin yusum blong tokbaot wol ia we yumi stap laef long hem? ?Olsem wanem nao hem i holemtaet hop ia nomata ol fasin nogud raon long hem? ?Olsem wanem nao famli blong yu i save mekem sem samting?
Momon 3:12
?Olsem wanem nao Momon i bin filim abaot ol pipol raon long hem, nomata oli gat fasin we i nogud? ?Wanem nao yu save mekem blong developem kaen lav ia we hem i gat?
Momon 5:2
?From wanem yumi stap sloslo blong prea long Papa long Heven taem yumi stap gat hadtaem blong mekem wan samting? ?Olsem wanem nao yumi save kam blong dipen moa long Papa long Heven?
Momon 5:16–18
Blong helpem famli blong yu blong pikjarem mining blong “ronem olgeta olbaot olsem doti blong wit we win i tekem i go” (ves 16), terem wan pis pepa i go long ol smol pisis, mo letem ol memba blong famli oli blo long olgeta oli flae. Eksplenem long olgeta se, doti blong wit ia, i olsem skin blong wit we i stap kamkamaot long sid blong hem, mo i no hevi, mekem se win i save karem i go olsem nating nomo. ?Olsem wanem nao blong “no gat Kraes mo God long wol” (ves 16) i olsem blong stap olsem doti blong wit we i flae long win?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Stap Kam Antap long Fasin blong Yumi blong Stap Tij
Tijim klia mo simpol doktrin. Gospel blong Lod i naes tumas from se hem i simpol (luk long D&K 133:57). Yu no traem blong pulpulum famli blong yu wetem ol bigbigfala lesen, be, meksua se wanem we yu stap tijim, i lukluk nomo long doktrin ia we i klin gud mo i simpol.
Merikel Buk blong Momon, i kam long Joseph Brickey