“19–25 Oktoba. 3 Nifae 27–4 Nifae: ‘I No Save Gat Wan Pipol we I Moa Hapi’” Kam Folem Mi—Blong Wanwan Man, Woman mo Famli: Buk blong Momon 2020 (2020)
“19–25 Oktoba. 3 Nifae 27–4 Nifae,” Kam Folem Mi—Blong Wanwan Man, Woman mo Famli: 2020
Prea blong Kraes, i kam long Derek Hegsted
19–25 Oktoba
3 Nifae 27–4 Nifae
“I No Save Gat Wan Pipol we I Moa Hapi”
Lod i bin givim komanmen long ol disaepol blong Hem blong oli raetemdaon olgeta samting we oli bin gotru long hem (luk long 3 Nifae 27:23–24). Taem yu stap stadi, raetemdaon ol eksperiens long saed blong spirit, we yu gat.
Raetemdaon Ol Filing mo Tingting blong Yu
Ol tijing blong Jisas Kraes oli no jes wan naesfala wei blong tingting, blong stap tingting hevi long hem. Ol tijing ia oli moa bitim hemia—oli blong jenisim laef blong yumi. Buk blong 4 Nifae i givim wan klia eksampol long hemia, we i soem olsem wanem nao gospel blong Sevya i save jenisim bigwan wan pipol. Afta long sot seves blong Jisas, plante handred yia blong raorao bitwin Ol Man blong Nifae mo Ol Man blong Leman, i finis. Tufala nesen ia, we oli save gud tufala from fasin blong stap agens mo stap raorao, oli kam “ol pikinini blong Kraes” (4 Nifae 1:17), mo “oli stat blong serem evri samting long medel blong olgeta” (4 Nifae 1:3). “Lav blong God we i bin stap insaed long hat blong ol pipol,” mo “i no save gat wan pipol we i moa hapi long medel blong evri pipol we han blong God i mekem olgeta” (4 Nifae 1:15–16). Hemia nao wei we ol tijing blong Sevya oli bin jenisim Ol Man blong Nifae mo Ol Man blong Leman. ?Olsem wanem nao oli stap jenisim laef blong yu?
Sam Aedia blong Skripja Stadi blong Yuwan
Oli singaotem Jos blong Jisas Kraes folem nem blong Hem.
Taem we ol disaepol blong Jisas Kraes oli stat blong stanemap Jos blong Hem truaot long kantri, wan kwestin i kam, be, long sam, i wan smol samting nomo—?bae wanem nem nao i nem blong Jos? (luk long 3 Nifae 27:1–3). ?Wanem nao yu lanem abaot hamas nem ia i impoten aot long ansa blong Sevya we i stap long 3 Nifae 27:4–12? Long 1838 Lod i talemaot nem blong Jos blong Hem tedei (luk long D&K 115:4). Tingting Hevi long wanwan toktok insaed long nem ia. ?Olsem wanem ol toktok ia oli helpem yumi blong save huia yumi, wanem yumi biliv long hem, mo olsem wanem bae yumi mekem ol samting?
Luk tu long Russell. M. Nelson, “Stret Nem blong Jos,” Ensign o Liahona, Nov 2018, 87–80; M. Russell Ballard, “The Importance of a Name,” Ensign o Liahona, Nov. 2011, 79–82.
Taem mi mekem ol tingting mo samting we mi wantem oli kam klin moa, bae mi kam wan moa fetful disaepol.
?Bae yu talem talem wanem sapos Sevya i askem yu, olsem we Hem i askem ol disaepol: “?Yufala i wantem se mi givim wanem long yufala?” (3 Nifae 28:1). Tingting long hemia taem yu stap rid abaot eksperiens blong ol disaepol blong Sevya long 3 Nifae 28:1–11. ?Wanem nao yu lanem abaot ol samting we hat blong ol disaepol i wantem aot long ol ansa blong kwestin blong Hem? Presiden Dallin H. Oaks i tijim: “Blong kasem ples blong yumi we i no save finis long fiuja, bae yumi wantem, mo wok from ol kwaliti we yumi nid blong gat, blong kam wan man o woman we i no save finis. Bae yumi wantem blong kam olsem [Jisas Kraes]” (“Desire,” Ensign o Liahona, May 2011, 44–45). ?Wanem nao yu save mekem, blong mekem ol samting we hat blong yu i wantem, i kam moa stret mo gud? (Blong gat moa infomesen abaot “jenis [we] i hapen long bodi” blong ol trifala disaepol, luk long 3 Nifae 28:37 mo “Man, We I No Testem Ded,” Gaed long Ol Skripja, scriptures.ChurchofJesusChrist.org.)
Fasin blong jenisim laef i go long Jisas Kraes mo long gospel blong Hem, i lidim yumi long yuniti mo hapines.
?Traem blong tingting se bae i olsem wanem blong laef long ol yia ia we i folem visit blong Sevya? ?Olsem wanem nao ol pipol ia oli holemtaet tabu pis ia blong wan longlongfala taem—we i kolosap 200 yia? Taem yu stap stadi 4 Nifae 1:1–18, tingting blong makem, o raetemdaon ol joes we ol pipol oli mekem blong gotru long laef ia we i gat fulap blesing.
Tingting hevi long wanem yu save mekem blong helpem famli blong yu, wod, o komuniti blong yu blong laef long wan yuniti mo hapines we i moa bigwan, olsem ol pipol long 4 Nifae oli bin mekem. ?Wanem tijing blong Jisas Kraes nao yu save laef folem moa fulwan blong save mekem gol blong yu ia i kamtru? ?Wanem yu save mekem blong helpem ol narawan blong andastanem mo laef folem ol tijing ia?
Fasin nogud i lidim man blong i seraot mo i harem nogud tumas.
Sore tumas, sosaeti blong Saeon we oli tokbaot long 4 Nifae (luk tu long Moses 7:18,) long en, i prapa lus evriwan. Taem yu stap ridim 4 Nifae 1:19–49, lukaotem ol fasin blong man, mo fasin blong mekem samting we i bin mekem se sosaeti ia i foldaon, i go brokbrok. ?Yu yu luk eni saen blong ol kaen fasin ia long yuwan?
Luk tu long “Chapter 18: Beware of PrideTeachings of Presidents of the Church: Ezra Taft Benson2014], 229–40).
Sam Aedia blong Famli Skripja Stadi mo Famli Haos Naet
Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:
3 Nifae 27:13–21
Olgeta ves ia, oli save helpem ol memba blong famli blong andastanem gud moa wanem we Sevya i minim taem Hem i tokbaot “gospel blong mi.” Afta we yufala i ridim mo toktok raon long olgeta ves ia, yu save askem wanwan memba blong famli blong talem sot, long wan sentens nomo, wanem nao hem i gospel.
3 Nifae 27:23–26
?Olsem wanem nao yumi stap mekem wok ia blong raetemdaon olgeta samting we yumi bin “luk mo harem”—wanwan o olsem wan famli? ?From wanem hem i impoten blong kipim wan rekod abaot ol samting long saed blong spirit?
3 Nifae 27:30–31
Blong helpem ol memba blong famli blong andastanem glad blong Sevya we oli tokbaot long ol ves ia, yu save plei wan gem; mo insaed long gem ia, sam memba blong famli oli go haed, mo wan nara memba blong famli i traem faenem olgeta. Gem ia i save lidim yufala blong storian long from wanem nao hem i impoten blong faenem evri memba blong famli blong mekem se “i no gat wan long olgeta i lus.” ?Olsem wanem nao yumi save helpem ol memba blong famli blong stap strong long gospel o blong kambak long gospel sapos oli bin aot long hem?
3 Nifae 28:17–18, 36–40
?Wanem nao yumi save lanem aot long eksampol blong Momon, long taem ia we hem i no bin andastanem evri samting abaot jenis we i bin stap hapen long ol trifala disaepol we oli Ol Man blong Nifae. ?Wanem nao yumi save mekem taem yumi no andastanem evri samting abaot wan prinsipol blong gospel? Presiden Dieter F. Uchtdorf i tijim: “God i kea long yu. Bae Hem i lisin, mo bae Hem i ansarem ol kwestin blong yu. Ol ansa long prea blong yufala bae oli kam long wei blong Hem mo long taem blong Hem, mo from hemia, yu nid blong lanem blong lisin long voes blong Hem” (“Receiving a Testimony of Light and Truth,” Ensign o Liahona, Nov. 2014, 21).
4 Nifae 1:15
Blong daonem fasin blong stap raorao long hom, maet ol memba blong famli oli save putum wan gol blong oli gat moa lav long wanwan long olgeta long wik ia. Afta we wik i finis, tugeta yufala i luklukbak long progres blong yufala, mo toktok raon long, hao nao, taem we yufala i bin soem moa bigfala lav, i bin jenisim famli blong yufala.
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Stap Kam Antap long Stadi blong Yuwan
Lukaotem blong kasem revelesen evri dei. Revelesen i stap kam, plante taem, ‘tijing folem tijing’ (2 Nifae 28:30). Taem yu stap tingting hevi long olgeta ves ia we yu stap stadi long olgeta, ol aedia mo ol tingting mo filing bae oli kam long yu truaot long dei. Yu no tekem se, gospel stadi, i wan samting we yu mas “mekem taem from”, be tekem se i wan samting we yu stap mekem oltaem (luk long Teaching in the Savior’s Way, 12).
Kraes wetem Ol Trifala Disaepol we Oli Ol Man blong Nifae, i kam long Gary L. Kapp