Pikja blong Kraes we i kamkamaot long Ol Man blong Nifae, i kam long Andrew Bosley

12–18 Oktoba

3 Nifae 20–26

“Yufala I Ol Pikinini blong Kavenan”

Taem Hem i stap tokbaot ol skripja, plante taem Jisas i stap yusum toktok ia stadi o lukaotem (luk long 3 Nifae 20:11; 23:1, 5). Taem yu stap ridim 3 Nifae 20–26, bae yu stadi long wanem?

Raetemdaon Ol Filing mo Tingting blong Yu

Taem yu harem ol pipol oli yusum ol toktok olsem, haos blong Isrel, ?yu yu filim se oli stap tokbaot yu? Ol Man blong Nifae mo Ol Man blong Leman, oli kamaot stret long laen blong Isrel—stori blong olgeta i stat long Jerusalem—be, sam long olgeta, Jerusalem i olsem se i “wan graon we i longwe tumas, wan graon we [oli] no save” (Hileman 16:20). Yes, oli bin “wan branj blong tri blong Isrel,” be tu, oli “bin kamaot long stamba blong hem” (Alma 26:36; luk tu long 1 Nifae 15:12). Be taem Sevya i bin kamaot long olgeta, Hem i bin wantem olgeta blong save se oli no kamaot long Hem. Hem i talem: “Yufala i blong laen blong Isrel, mo yufala i blong kavenan” (3 Nifae 20:25). Maet bae Hem i talem wan semmak samting long yu tedei, from se eniwan we i baptaes mo i mekem ol kavenan wetem Hem, hem tu, i blong laen blong Isrel, “i blong kavenan,” nomata se yu yu kamaot long wanem famli laen, o weaples yu stap laef long hem. Long nara toktok, taem Jisas i stap toktok abaot laen blong Isrel, Hem i stap tokbaot yu. Instraksen ia, blong blesem “evri famli blong wol,” hem i blong yu (3 Nifae 20:27). Invitesen ia, blong “wekap bakegen, mo putum paoa blong yu,” hem i blong yu (3 Nifae 20:36). Mo bigfala promes blong Hem: “Fasin blong mi blong stap kaen bae i no aot long yu, mo tu, bae mi no tekemaot kavenan blong pis blong mi,” hem i blong yu (3 Nifae 22:10).

Sam Aedia blong Skripja Stadi blong Yuwan

3 Nifae 20–22

Long ol las dei, God bae i wokem wan wok we i bigwan mo i gudfala.

Sevya i bin givim sam bigfala promes long bigfala grup blong ol pipol we oli bin stap, mo Hem i bin profesae abaot fiuja blong kavenan pipol blong Hem—mo hemia, i tekem yu tu. Olsem we Presiden Russell M. Nelson i bin talem: “Yumi tu, yumi stap insaed long ol kavenan pipol blong Lod. Hem i spesel janis blong yumi tu, blong wanwan i tekpat blong mekem olgeta promes ia oli kamtru. !I wan gudfala taem blong laef long hem!” (“The Gathering of Scattered Israel,” Ensign o Liahona, Nov. 2006, 79).

Lukaotem ol profesi abaot ol las dei insaed long ol toktok blong Sevya we oli stap long 3 Nifae 20–22. ?Wijwan long ol profesi ia we i pulum gud tingting blong yu? ?Wanem nao yu save mekem blong help blong mekem se ol profesi insaed long ol japta ia oli save hapen?

Tekem not se 3 Nifae 21:1–7 i tokbaot taem ia we Buk blong Momon bae i kamtru (“ol samting ia” insaed long ol ves 2 mo 3) i wan saen se ol promes blong God oli stat finis blong hapen. ?Wanem nao sam long ol promes ia, mo olsem wanem nao Buk blong Momon i help blong mekem ol promes ia oli kam blong hapen?

Luk tu long Russell M. Nelson, “Hope of Israel (wol divosen blong ol yut, 3 Jun 2018), broadcasts.ChurchofJesusChrist.org.

3 Nifae 20:10–12; 23; 26:1–12

Sevya i wantem mi blong stadi gud long ol toktok blong ol profet.

Ol toktok mo ol aksen blong Jisas truaot long ol japta ia, oli soemaot hao nao Hem i stap filim abaot ol skripja. ?Wanem nao yu lanem abaot ol skripja long 3 Nifae 20:10–12; 23; mo 26:1–12? ?Wanem nao yu faenem insaed long ol ves ia we i givim insperesen long yu blong “mas stadi ol samting ia wetem strong tingting”? (3 Nifae 23:1).

3 Nifae 22; 24

God i gat sore long olgeta we oli stap gobak long Hem.

Long 3 Nifae 22 mo 24, Sevya i talem ol toktok we oli kam long Aesea mo Malakae, we oli fulap long ol strong pikja mo samting we oli komperem—ol kalkala fandesen ston, ol kol long faea, silva we i klin gud, ol windo blong heven. Bae i intresting tumas blong mekem wan lis blong olgeta samting ia. ?Wanem nao wanwan long ol samting ia i stap tijim yu abaot rilesensip blong God wetem ol pipol blong Hem? Eksampol: 3 Nifae 22:4–8 i stap komperem God long wan hasban, mo ol pipol blong Hem long wan waef. Taem yu stap rid abaot ol kaen pikja ia, bae i pusum yu blong tingting long rilesensip blong yuwan wetem Lod. ?Olsem wanem nao, ol promes insaed long ol japta ia oli bin hapen insaed long laef blong yu? 3 Nifae 22:7–8, 10–17; 24:10–12, 17–18).

3 Nifae 25:5–6

Hat blong mi i mas tanem i go long ol bubu blong mi.

Promes ia, se bae Elaeja i kambak, Ol Jiu oli bin wet from samting ia blong longtaem raon long wol. Ol Lata-dei Sent oli save se Elaeja i bin kambak finis; hem i bin kamaot long Josef Smit long Ketlan Tempol long 1836 (luk long D&K 110:13–16). Wok ia blong tanem hat blong ol papa—we i tempol mo famli histri wok—i stap gohed gud finis. ?Wanem eksperiens nao yu bin gat we i bin helpem hat blong yu blong i tanem i go long ol bubu blong yu?

Sam Aedia blong Famli Skripja Stadi mo Famli Haos Naet

Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:

3 Nifae 22:2

Afta we yu ridim ves ia, maet yu save mekem wan tenet, mo tokbaot olsem wan Jos i olsem wan tenet we i stap long wan waelples. ?Wanem sam mining blong “pulum ol rop blong tenet blong yu oli kam longfala,” mo “mekem ol stek blong [tenet] oli kam strong moa”? ?Olsem wanem nao yumi stap invaetem ol narawan blong faenem wan ples blong stap long hem insaed long Jos? (Luk long vidio ia “Welcome” we i stap long Inglis, long ComeUntoChrist.org).

3 Nifae 23:6–13

Sapos Sevya i mas luklukgud ol rekod we famli blong yumi i kipim i stap, ?wanem kwestin nao bae Hem i save askem long yumi? ?Weswe? ?I gat samfala samting we i bin hapen, o sam eksperiens long saed blong spirit we yumi sapos blong raetemdaon? Naoia, bae i wan gud taem blong krietem, o blong ademap wan samting long famli histri mo kaonsel tugeta long wanem samting blong putum insaed long histri ia. Ol yang memba blong famli bae oli laekem blong dekoretem histri buk blong yufala wetem ol foto mo ol droing. ?From wanem hem i impoten blong raetemdaon ol famli eksperiens long saed blong spirit?

3 Nifae 24:7–18

?Olsem wanem yumi bin gat eksperiens ia blong kasem olgeta blesing blong pem taeting we promes blong hem i stap long ol ves ia? Mesej blong Elda David A. Bednar “The Windows of Heaven” (Ensign o Liahona, Nov. 2013, 17–20) i save helpem ol memba blong famli blong luksave olgeta blesing ia.

3 Nifae 25:5–6

?Olsem wanem nao yu save helpem ol memba blong famli blong yu blong tanem hat blong olgeta i go long ol papa blong olgeta? Maet yu save givim wok long ol memba blong famli blong lanem abaot wan long ol bubu blong yu, mo serem wetem ol nara famli wanem nao oli bin lanem (luk long FamilySearch.org). O, yu save wok tugeta blong faenem wan bubu we i nidim blong oli mekem ol tempol odinens blong hem, mo mekem plan blong gat wan tempol trip blong mekem olgeta odinens ia.

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Stap Kam Antap long Fasin blong Yumi blong Stap Tij

Laef folem testemoni blong yu. “Yu stap tijim huia yu,” Elda Neal A. Maxwell i tijim. “Bae man i tingbaot moa ol fasin blong yu bitim wan trutok insaed long wan spesel lesen” (“But a Few Days” [toktok i go long Jos Edukesen Sistem tija, 10 Sept 1982], 2). Sapos yu wantem tijim wan prinsipol blong gospel, mekem bes blong yu blong laef folem prinsipol ia.

Tekem Histri i Kam, i kam long Gary L. Kapp