“28 Septemba–11 Oktoba. 3 Nifae 17–19: ‘Luk, Glad blong Mi I Fulap,’” Kam Folem Mi—Blong Wanwan Man, Woman mo Famli: Buk blong Momon 2020 (2020)
“28 Septemba–11 Oktoba. 3 Nifae 17–19,” Kam Folem Mi—Blong Wanwan Man, Woman mo Famli: 2020
Laet blong Fes blong Hem i Bin Kamkamaot, I Saen long Olgeta, i kam long Gary L. Kapp
28 Septemba–11 Oktoba
3 Nifae 17–19
“Luk, Glad blong Mi I Fulap”
Taem we olgeta japta bifo, insaed long 3 Nifae, oli lukluk plante long ol toktok blong Sevya, ol japta 17 kasem 19 oli tokbaot seves blong Hem, mo ol tijing blong Hem long medel blong ol pipol. Taem yu stap ridim olgeta japta ia, ?wanem nao Spirit i stap tijim yu abaot Sevya?.
Raetemdaon Ol Filing mo Tingting blong Yu
Jisas Kraes i jes spendem dei blong givhan long graon ia, Plante, i stap tijim gospel blong Hem, i givim ol pipol wan janis blong luk mo filim ol mak long bodi blong Hem we i laef bakegen long ded, mo i stap testifae se, Hem nao, Hem i Sevya ia blong promes. Mo naoia, i taem blong Hem i mas go. Hem i nid blong gobak long Papa blong Hem, mo Hem i bin save se ol pipol oli nidim taem blong tingting hevi long wanem Hem i bin tijim olgeta. Hem i promes se bae Hem i kambak long nekis dei, nao, Hem i sendem ol grup blong ol pipol oli gobak long haos blong olgeta. Be, i no gat wan i go. Oli no talem wanem we oli stap filim, be Jisas i save filim: oli bin hop se bae Hem i “stap wetem olgeta smol taem moa” (3 Nifae 17:5). Hem i gat ol nara impoten samting blong mekem, be janis blong soem lav mo sore, i no kam oltaem long wan stret taem, mekem se Jisas i bin stap wetem ol pipol smol taem moa. Wanem i bin kam afta, maet i wan eksampol blong givhan we i mekem hat blong man i sopsop, we oli bin raetemdaon long ol skripja. Olgeta we oli bin stap long tetaem ia, oli save talem nomo se i no gat toktok blong tokbaot wanem i hapen (luk long 3 Nifae 17:16–17). Jisas Hemwan, i talemsot bigfala taem we Spirit i bin plante, wetem ol simpol toktok ia: “Mo nao luk, glad blong mi i fulap” (3 Nifae 17:20).
Sam Aedia blong Skripja Stadi blong Yuwan
Sevya i stret eksampol blong mi, blong fasin blong givhan.
Yumi save se i bin gat samples 2,500 pipol (luk long 3 Nifae 17:25) we oli bin luk mo stap long fasfala visit ia, olsem oli raetemdaon long 3 Nifae 11–18. Be yet, Sevya i bin faenem wan wei blong givhan long olgeta, wan afta wan. ?Wanem nao yu lanem abaot wok blong givhan aot long eksampol blong Sevya insaed long japta ia? ?Wanem nid nao Hem i bin givhan long hem? Tingting hevi long wei we, eksampol blong Hem, i save helpem yu blong givhan long ol narawan.
Luk Ol Smolwan blong Yufala, i kam long Gary L. Kapp
3 Nifae 17:13–22; 18:15–25; 19:6–9, 15–36
Sevya i tijim yumi olsem wanem blong prea.
Traem blong tingting se bae i olsem wanem blong harem Sevya i stap prea from yu. ?Wanem nao bae Hem i talem long bihaf blong yu? Ol tijing mo ol prea blong Hem, insaed long ol japta ia, bae oli save givim yu wan aedia. Taem yu stap stadi,?wanem nao yu lanem aot long eksampol blong Kraes we i save mekem prea blong yuwan i gat moa mining? ?Wanem blesing blong prea yu bin luk insaed long laef blong yu?
Mi save kam fulap long Spirit taem mi tekem mo kakae sakramen.
Taem yu stap ridim 3 Nifae 18:1–12, tingting hevi long, hao nao blong tekem mo kakae sakramen i save helpem yu blong yu “fulap” long saed blong spirit (3 Nifae 18:3–5, 9; luk tu long 3 Nifae 20:1–9). Eksampol: yu save mekem wan lis blong ol kwestin blong pusum yuwan blong tingting taem yu tekem sakramen; ol kwestin olsem, “Olsem wanem nao mi mi filim abaot Sevya mo sakrifaes blong Hem from mi?” “?Olsem wanem nao, sakrifaes blong Hem i save lidim evri dei laef blong mi?” o, “Olsem wan disaepol, ?wanem nao bae mi mekem i gud moa?”
Olgeta toktok ia blong Presiden Henry B. Eyring bambae i save helpem yu blong tingting hevi lo wan wei we sakramen i save helpem yu blong fulap long saed blong spirit: “Taem yu stap luklukgud long laef blong yu long taem blong odinens blong sakramen, mi hop se ol tingting blong yu oli no lukluk nomo long ol samting we yu mekem i rong, be tu, yu lukluk long ol samting we yu mekem i raet—ol taem ia we yu bin filim se Papa long Heven mo Sevya, Tufala i bin glad long yu. Yu save tekem wan smol taem long taem blong sakramen blong askem God blong helpem yu wetem olgeta samting ia. … Taem mi bin mekem hemia, Spirit i bin talem gud long mi se, i nomata we mi longwe yet blong kam stret evriwan, tedei mi moa gud bitim yestedei. Mo hemia i givim mi tras ia, se, from Sevya, mi save kam gud moa tumoro.(“Tingbaot Hem Oltaem,” Fas Presidensi Mesej, Feb 2018).
Ol disaepol blong Jisas Kraes oli lukaotem blong kasem presen we i Tabu Spirit.
Tingabaot wan prea we yu jes talem i no longtaem. ?Wanem nao ol prea oli tijim yu abaot ol dip filing blong hat blong yu? Afta we oli spenem wan dei wetem Sevya, bigfala grup blong ol pipol oli “bin prea from samting we oli wantem tumas”—presen we i Tabu Spirit (3 Nifae 19:9). Taem yu stap ridim olgeta skripja ia, tingting hevi long hamas nao, yuwan, yu wantem kampani blong Tabu Spirit. ?Wanem nao yu lanem abaot fasin blong stap lukaotem blong gat kampani blong Tabu Spirit?
Sam Aedia blong Famli Skripja Stadi mo Famli Haos Naet
Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:
3 Nifae 17
Taem yu stap ridim japta ia olsem wan famli, tingting blong stop wanwan taem blong invaetem famli blong yu blong traem pikjarem olgeta taem ia. Eksampol. Yu save askem ol kwestin olsem, “?Wanem ol harem nogud o hadtaem blong yu bae yu karem i go long Sevya blong Hem i hilim yu long hem? “?Bae yu wantem Hem blong i prea long bihaf blong yu long saed blong wanem?” o “Huia nao we yu lavem we bae yu wantem Hem blong i blesem?” Taem yu ridim japta ia, bae i save givim insperesen tu long yu blong yu prea from ol memba blong famli blong yu, wan afta wan, olsem we Jisas i bin mekem.
3 Nifae 18:1–12
?Hem i minim wanem blong stap “fulap” taem yu tekem sakramen? Mo ?olsem wanem nao yumi gat eksperiens long hemia? ?Wanem nao yumi lanem aot long ol ves 5 kasem 7 abaot risen from wanem Jisas i bin givim yumi odinens ia blong sakramen?
3 Nifae 18:17–21
?Wanem nao yumi lanem aot long ol ves ia abaot ol stamba tingting blong prea? ?Olsem wanem nao yumi save kam antap long spirit paoa blong ol prea blong yumi, tugeta long ol prea blong wanwan long yumi, mo ol prea olsem wan famli?
3 Nifae 18:25; 19:1–3
?Wanem nao famli blong yumi i bin gotru long hem tru long gospel, we yumi wantem evriwan raon long yumi i gotru long hem tu? ?Olsem wanem nao yumi save folem eksampol blong ol pipol long ol ves ia mo “wok had tumas” (3 Nifae 19:3) blong tekem ol narawan oli kam long Kraes, blong mekem se, olgeta tu, oli save “filim mo luk” (3 Nifae 18:25) wanem we yumi bin faenem insaed long gospel?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Stap Kam Antap long Stadi blong Yuwan
Letem Spirit i lidim yu long stadi blong yu. Tabu Spirit bae i gaedem yu long olgeta samting we yu nidim blong lanem evri dei. Stap lisin gud long ol toktok blong Hem, iven sapos oli talem long yu blong yu go ridim wan defren topik, o stadi long wan defren wei long hemia we yu stap folem oltaem. Eksampol: taem yu stap ridim abaot sakramen long 3 Nifae 18, Spirit bae i save pusum yu blong spendem moa taem long topik ia bitim we yu plan from.
Oli Luk Ol Heven Oli Open, i kam long Walter Rane