Nambatri Nifae: Olgeta Twelef Ia Nao we Mi Mi Jusum, i kam long Gary L. Kapp

21–27 Septemba

3 Nifae 12–16

“Mi Mi Loa mo Laet”

I gat fulap prinsipol blong faenem insaed long 3 Nifae 12–16. Sam long olgeta, oli haelaetem long aotlaen ia, be yu save faenem sam narawan. Letem Papa long Heven, tru long Spirit blong Hem, i tijim yu wanem yu nidim naoia.

Raetemdaon Ol Filing mo Tingting blong Yu

Olsem ol disaepol blong Jisas we oli bin kam tugeta long Hil blong Galili, ol pipol we oli bin kam tugeta long tempol long Plante, oli bin laef anda long loa blong Moses. Oli bin folem loa ia from se i bin poenem sol blong olgeta i go long Kraes (luk long Jekob 4:5), mo naoia Kraes i bin stanap long fored blong olgeta, i stap tokbaot wan loa we i moa hae. Be, iven olgeta long yumi we i neva laef folem loa blong Moses, i save luksave standet we Jisas i putum blong ol disaepol blong Hem, se hem i wan loa we i moa hae. Hem i talem: “Mi wantem se yufala i kam stret gud evriwan semmak olsem mi” (3 Nifae 12:48). Sapos toktok ia i mekem yu yu filim se yu no naf, tingbaot se Jisas i bin talem tu se: “Olgeta we oli putum spirit blong olgeta i stap daon we oli kam long mi, bae oli kasem blesing, from kingdom blong heven i blong olgeta” (3 Nifae 12:3). Loa ia we i moa hae, hem i wan invitesen—wan nara wei blong talem: “kam long mi mo bae mi sevem yufala” (3 Nifae 12:20). Olsem loa blong Moses, loa ia i poenem yumi i go long Kraes—Wan ia nomo we i save sevem yumi mo mekem yumi kam stret evriwan. Hem i talem: “Luk, mi mi loa, mo laet. Lukluk long mi, mo stap strong kasem en, mo bae yufala i laef” (3 Nifae 15:9).

Sam Aedia blong Skripja Stadi blong Yuwan

3 Nifae 12–14

Ol tijing blong Sevya oli soem long mi olsem wanem blong stap wan tru disaepol.

I gat fulap trutok, toktok blong givim kaonsel, mo ol woning insaed long 3 Nifae 12–14. Hemia i wan wei blong stadi mo yusum wanem we Sevya i bin tijim long ol japta ia: Jusum wan grup blong ol ves, mo luk sapos yu save talemsot wanem ol ves ia oli tijim, mo talem hemia long wan sentens we i stat wetem, “ Ol tru disaepol blong Jisas Kraes …” Eksampol, blong talemsot 3 Nifae 14:1–5, yu save talem: “Ol tru disaepol blong Jisas Kraes oli no stap jajem man.” Yu save jusum wan ves long ol japta ia we oli gat mining long yu, mo lanem baehat, o kopi long hem mo putum long wan ples we bae yu luk oltaem. Tingting hevi long wei we yu save yusum wanem yu stap lanem i go long ol traehad blong yuwan blong kam gud moa blong stap wan disaepol blong Jisas Kraes.

Luk tu long Matiu 5–7; Luk 6:20–49.

3 Nifae 12:1–2; 15:23–24; 16:1–6

Olgeta we oli biliv be oli no luk, oli gat blesing.

Sapos yumi komperem long total namba blong ol pikinini blong God, olgeta we oli bin luk Sevya mo oli bin harem voes blong Hem, semmak olsem ol pipol long graon ia, Plante, oli bin luk Hem, namba ia i smol tumas. Plante long yumi oli olsem ol pipol ia we oli tokbaot long 3 Nifae 12:2; 15:23; mo 16:4–6. ?Wanem promes nao ol pipol long ol ves ia oli kasem? ?Olsem wanem ol promes ia oli kamtru insaed long laef blong yu?

Luk tu long Jon 20:26–29; 2 Nifae 26:12–13; Alma 32:16–18.

3 Nifae 12:21–30; 13:1–8, 16–18; 14:21–23

Ol stret mo gud aksen oli no naf; hat blong mi tu i mas klin evriwan, we i no gat mak.

Wan stamba toktok we maet yu luk i stap long ol japta ia, hem i invitesen blong Sevya blong laef folem wan loa we i moa hae—blong stap stret mo gud, i no long ol aksen we man i save luk nomo, be tu, insaed long hat blong yumi. Lukaotem stamba toktok ia taem Sevya i stap tokbaot fasin blong stap raorao (3 Nifae 12:21–26), fasin blong no stap klin long saed blong seks (3 Nifae 12:27–30), prea (3 Nifae 13:5–8), mo fasin blong livim kakae (3 Nifae 13:16–18). ?Wanem ol nara eksampol yu save faenem? ?Wanem nao yu save mekem, blong mekem filing blong hat blong yu i kam klin gud we i no gat mak, bitim we yu lukluk i go long ol aksen blong yu nomo we man i save luk?

3 Nifae 14:7–11

Sapos mi lukaotem “ol gudfala samting” long Papa long Heven, bambae mi kasem olgeta.

Presiden Russell M. Nelson i talem: “?Yu ting se God i rili wantem toktok wetem yu? !Yes! … O, i gat plante moa samting we Papa blong yu we i stap long Heven i wantem yu blong save.” (“Revelesen blong Jos, Revelesen blong Laef blong Yumi,” Ensign o Liahona, Mei 2018, 93). Taem yu stap ridim invitesen blong Lod insaed long 3 Nifae 14:7–11 blong askem, blong lukaotem, blong noknok, nao, tingting hevi long wanem “gudfala samting” bae Hem i wantem yu blong askem long Hem. Skripja ia we i kam afta, i save helpem yu blong andastanem olsem wanem blong askem, blong lukaotem, mo blong noknok. Oli save eksplenem from wanem, sam ansa long sam prea blong yu oli no kam olsem we yu wantem: Aesea 55:8–9; Hileman 10:5; Moronae 7:26–27, 33, 37; mo Doktrin mo Ol Kavenan 9:7–9.

Sam Aedia blong Famli Skripja Stadi mo Famli Haos Naet

Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:

3 Nifae 12:48

Olsem wanem nao mesej blong Elda Jeffrey R. Holland “Bae Yufala I Mas Stret Evriwan—long En” (Ensign o https://www.ChurchofJesusChrist.org/general-conference/2017/10/be-ye-therefore-perfect-eventually?lang=bis, Nov. 2017) i helpem yumi blong andastanem ol toktok blong Sevya insaed long ves ia? Yu save faenem sam help long Moronae 10:32–33.

3 Nifae 12:9, 38–42; 14:3–5, 12

?Olsem wanem nao ol ves ia oli go tu wetem ol samting we yumi stap mekem bitwin wanwan long yumi olsem ol memba blong famli? Maet famli blong yu i save putum sam gol tugeta, blong stap moa fetful blong laef folem olgeta prinsipol ia.

3 Nifae 13:19–21

Olgeta ves ia, oli save pusum tingting blong famli i save toktok raon abaot wanem famli i ting se i moa impoten. ?Weswe? ?I gat samfala rij samting long wol ia we oli stap holemtaet yu blong no hivimap ol rij samting long heven? Yu save tokbaot moa poen ia taem yu lidim famli blong mekem wan tresa resis blong faenem sam samting insaed long hom blong yu we i mekem ol memba blong famli oli tingbaot ol rij samting we praes blong hem i stap blong taem we i no save finis.

3 Nifae 14:7–11

Ol yangfala pikinini bae oli laekem wan gem, we insperesen blong hem i kam long 3 Nifae 14:8–9, we long gem ia, oli askem wan samting, mo oli kasem defren samting evriwan. ?Wanem nao Sevya i wantem yumi blong save abaot Papa blong yumi we i stap long Heven taem Hem i bin serem eksampol ia?

3 Nifae 14:15–20

?Wanem “gudfala frut” nao i helpem yumi blong save se Josef Smit, o Presiden blong Jos naoia, i wan tru profet?

3 Nifae14:24–27

Tingting long sam wei we yu save helpem famli blong yu i pikjarem parabol we i stap long ol ves ia. Maet ol memba blong famli blong yu oli save droem pikja, mekem ol aksen, o bildim ol samting long ol strong fandesen mo ol fandesen blong sanbij.

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Stap Kam Antap long Fasin blong Yumi blong Stap Tij

Yusum samting long lesen blong yu. Sevya i bin tijim ol dip trutok taem Hem i stap tokbaot ol samting blong evri dei laef. Yu save mekem wan semmak samting taem famli blong yu i stap ridim 3 Nifae 12–16. Eksampol: Taem yu stap ridim japta 12, yu save soem, sam sol, wan kandel mo wan kot. Hemia i save lidim yufala i go long wan gudfala riviu aktiviti. Afta we yufala i bin ridim olgeta japta ia, soem olgeta samting ia bakegen, mo askem ol memba blong klas, wanem nao Sevya i bin tijim abaot wanwan long olgeta samting ia.

Visit blong Sevya long Ol Pipol long Amerika, i kam long Glen S. Hopkinson